൧൨. അഞ്ഞതരമനുസ്സസ്സ വത്ഥുമ്ഹി അയമാനുപുബ്ബീകഥാ

അമ്ഹാകം ഭഗവതി പരിനിബ്ബുതേ പാടലിപുത്തസമീപേ അഞ്ഞതരസ്മിം ഗാമേ അഞ്ഞതരോ ദുഗ്ഗതമനുസ്സോ വസതി, സോ പനേകദിവസം അഞ്ഞതരം ഗാമം ഗച്ഛന്തോ ദ്വേ സാടകേ നിവാസേത്വാ മഹന്തം അടവിംപാപുണി, തദേവം ഗച്ഛന്തം ദിസ്വാ ഏതസ്സ വത്ഥം ഗണ്ഹിസ്സാമീതി ഏകോ ചോരോ അനുബന്ധി, സോ ദൂരതോവ ആഗച്ഛന്തം ചോരം ദിസ്വാ ചിന്തേസി, അഹമേതസ്മാ പലായിതും വാ തേന സദ്ധിംയുജ്ഝിതും വാ ന സക്കോമി, അയമാഗന്ത്വാ അവസ്സം അനിച്ഛന്തസ്സാപി മേ വത്ഥം ഗണ്ഹിസ്സതി. മയാപിസ്സ നിരത്ഥകേന ഹരിതും ന സക്കാ, ദാനവസേനസ്സ ദസ്സാമീതി സന്നിട്ഠാന മകാസി, അഥ ചോരോ ആഗന്ത്വാ വത്ഥകം പരാമസി, അഥ സോ പുരിസോ ചിത്തം പസാദേത്വാ ഇമം മമ വത്ഥദാനം ഭവഭോഗസുഖത്ഥായ പച്ചയോ ഹോതൂതി വത്ഥം ദത്വാ ദുച്ഛാദിതത്താ മഹാമഗ്ഗം പഹായ അഞ്ഞേന ജങ്ഘാമഗ്ഗേന ഗച്ഛന്തോ ആസിവിസേന ദട്ഠോ കാലം കത്വാ ഹിമവന്തപ്പദേസേ ദ്വാദസയോജനികേ കനകവിമാനേ നേകച്ഛരാസഹസ്സപരിവുതോ നിബ്ബത്തി. വിമാനം പനസ്സ പരിവാരേത്വാ തിയോജനികേ ഠാനേ കപ്പരുക്ഖാ നിബ്ബത്തിംസു, സോ മഹന്തം ദിബ്ബസമ്പത്തിം ദിസ്വാ സോമനസ്സം പവേദേന്തോ ആഹ.

൧. പരിണാമിതമത്തേന, ദാനസ്സ സകസന്തകം;

ദദാതി വിപുലം ഭോഗം, ദിബ്ബമിസ്സരിയം വരം.

൨. ദ്വാദസയോജനുബ്ബേധം, ദുദ്ദിക്ഖം ചക്ഖുമൂസനം;

കൂടാ ഗാരവരുപേതം, സബ്ബസോവണ്ണയം സുഭം.

൩. മമ പുഞ്ഞേന നിബ്ബത്തം, നേകരാഗദ്ധജാകുലം,

തഥേവ പരിസുദ്ധേഹി, വിതാനേഹി ച ലങ്കതം.

൪. പാസാദപരിയന്തമ്ഹി, ദിബ്ബവത്ഥാനി ലമ്ബരേ;

വാതേരിതാ തേ സോഭന്തി, അവ്ഹേന്താവ സുധാസിനോ.

൫. പാസാദസ്സ സമന്താ മേ, ഭൂമിഭാഗേ തിയോജനേ;

ഇച്ഛിതിച്ഛിതദാതാരോ, ജാതാസും സുരപാദപാ.

൬. തത്ഥ നച്ചേഹി ഗീതേഹി, വാദേഹി തുരിയേഹി ച;

നേ കച്ഛരാസഹസ്സേഹി, മോദാമി ഭവനേ മമ.

൭. ന സമ്മാ ദിന്നവത്ഥസ്സ, അക്ഖേത്തേ ഫലമീ ദിസം;

ഖേത്തേ സമ്മാ ദദന്തസ്സ, കോ ഫലം വണ്ണയിസ്സതീതി.

൮. ഏവം വിധമ്പി കുസലം മനുജോ കരിത്വാ,

പപ്പോതി ദിബ്ബവിഭവം മുനിവണ്ണനീയം;

മന്ത്വാന ഭോ ദദഥ ദാനവരം സുസീലേ,

സദ്ധായ സുദ്ധമനസാസ്സ വിസേസഭാഗീതി.

അഞ്ഞതരമനുസ്സസ്സ വത്ഥും ദുതിയം.