അബ്യാകതസംയുത്ത

ഖേമാസുത്ത

പുച്ഛാ – അബ്യാകതസംയുത്തേ പനാവുസോ പോരാണകേഹി ധമ്മസംഗാഹക മഹാഥേരേഹി പഠമം സംഗീതം ഖേമാസുത്തം കത്ഥ കം ആരബ്ഭ കിസ്മിം വത്ഥുസ്മിം കേന കഥഞ്ച ഭാസിതം. കഥഞ്ച തം ഭഗവതാപി പുന ഭാസിതം.

വിസ്സജ്ജനാ – അന്തരാ ച ഭന്തേ സാവത്ഥിം അന്തരാ ച സാകേതം തോരണവത്ഥുസ്മിം പദേസേ രാജാനം പസേനദിം കോസലം ആരബ്ഭ ഖേമായ ഭിക്ഖുനിയാ ഭാസിതം. രാജാ ഭന്തേ പസേനദി കോസലോ യേന ഖേമാ ഭിക്ഖുനീ തേനുപസങ്കമി, ഉപസങ്കമിത്വാ അഭിവാദേത്വാ ഏകമന്തം നിസീദി, ഏകമന്തം നിസിന്നോ ഖോ ഭന്തേ രാജാ പസേനദികോസലോ ഖേമം ഭിക്ഖുനിം ഏതദവോച ‘‘കിം നുഖോ അയ്യേ ഹോതി തഥാഗതോ പരംമരണാ’’തി. തസ്മിം ഭന്തേ വത്ഥുസ്മിം ‘‘അബ്യാകതം ഖോ ഏതം മഹാരാജ ഭഗവതാ ഹോതി തഥാഗതോ പരം മരണാ’’തി ഏവമാദിനാ ഖേമായ ഭിക്ഖുനിയാ ഭാസിതം. ഭഗവതാ ച ഭന്തേ അപരേന സമയേന രഞ്ഞാ പസേനദികോസലേന പുട്ഠേന ഏവമേവ പുന ഭാസിതം.

കിം പനയ്യേ നഹോതി തഥാഗതോ പരം മരണാ.

കുതൂഹലസാലാസുത്ത

പുച്ഛാ – തത്ഥേവ ആവുസോ പോരാണകേഹി ധമ്മസംഗാഹകമഹാഥേരേഹി നവമം സംഗീതം കുതൂഹലസാലാസുത്തം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – വേസാലിയം ഭന്തേ വച്ഛഗോത്തം പരിബ്ബാജകം ആരബ്ഭ ഭാസിതം. വച്ഛഗോത്തോ ഭന്തേ പരിബ്ബാജകോ ഭഗവന്തം ഉപസങ്കമിത്വാ ‘‘പുരിമാനി ഭോ ഗോതമ ദിവസാനി പുരിമതരാനി സമ്ബഹുലാനം നാനാതിത്ഥിയാനം സമണബ്രാഹ്മണാനം പരിബ്ബാജകാനം കുതൂഹലസാലായം സന്നിസിന്നാനം സന്നിപതിതാനം അയമന്തരകഥാ ഉദപാദീ’’തി ഏവമാദികം വചനം അവോച. തസ്മിം ഭന്തേ വത്ഥുസ്മിം ‘‘അലഞ്ഹി തേ വച്ഛ കങ്ഖിതും, അലം വിചികിച്ഛിതും. കങ്ഖനീയേ ച പന തേ ഠാനേ വിചികിച്ഛാ ഉപ്പന്നാ’’തി ഏവമാദിനാ ഭഗവതാ ഭാസിതം.