മഹാവഗ്ഗസംയുത്തപാളി

അവിജ്ജാവഗ്ഗ

ഉപഡ്ഢസുത്ത

പുച്ഛാ – മഹാവഗ്ഗസംയുത്തേ പനാവുസോ പോരാണകേഹി ധമ്മസംഗാഹകമഹാഥേരേഹി ദുതിയം സംഗീതം ഉപഡ്ഢസുത്തം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സക്കേസു ഭന്തേ സക്കരേ നാമ സക്യാനം നിഗമേ ആയസ്മന്തം ആനന്ദത്ഥേരം ആരബ്ഭ ഭാസിതം. ആയസ്മാ ഭന്തേ ആനന്ദത്ഥേരോ ഭഗവന്തം ഏതദവോച ‘‘ഉപഡ്ഢമിദം ഭന്തേ ബ്രഹ്മചരിയം യദിദം കല്യാണമിത്തതാ കല്യാണസഹായതാ കല്യാണസമ്പവങ്കതാ’’തി. തസ്മിം ഭന്തേ വത്ഥുസ്മിം ‘‘മാ ഹേവം ആനന്ദ, മാ ഹേവം ആനന്ദ, സകലമേവിദം ആനന്ദ ബ്രഹ്മചരിയം യദിദം കല്യാണമിത്തതാ കല്യാണസഹായതാ കല്യാണസമ്പവങ്കതാ’’തി ഏവമാദിനാ ഭഗവതാ ഭാസിതം.

മമം ഹി ആനന്ദ കല്യാണമിത്തം ആഗമ്മ ജാതിധമ്മാ സത്താ ജാതിയാ പരിമുച്ചന്തി.

ബോജ്ഝങ്ഗസംയുത്ത

കുണ്ഡലിയസുത്ത

പുച്ഛാ – ബോജ്ഝങ്ഗസംയുത്തേ പനാവുസോ പോരാണകേഹി ധമ്മസംഗാഹകമഹാഥേരേഹി ഛട്ഠം സംഗീതം കുണ്ഡലിയസുത്തം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സാകേതേ ഭന്തേ അഞ്ജനവനേ മിഗദായേ കുണ്ഡലിയം പരിബ്ബാജകം ആരബ്ഭ ഭാസിതം. കുണ്ഡലിയോ ഭന്തേ പരിബ്ബാജകോ ഭഗവന്തം ഉപസങ്കമിത്വാ ‘‘അഹമസ്മി ഭോ ഗോതമ ആരാമനിസ്സയീ പരിസാവചരോ, തസ്സ മയ്ഹം ഭോ ഗോതമ പച്ഛാഭത്തം ഭുത്തപാതരാസസ്സ അയമാചാരോ ഹോതി ആരാമേന ആരാമം ഉയ്യാനേന ഉയ്യാനം അനുചങ്കമാമി അനുവിചരാമി, സോ തത്ഥ പസ്സാമി ഏകേ സമണബ്രാഹ്മണേ ഇതിവാദപ്പമോക്ഖാനിസംസഞ്ചേവ കഥം കഥന്തേ ഉപാരമ്ഭാനിസംസഞ്ച, ഭവം പന ഗോതമോ കിമാനിസംസോ വിഹരതീ’’തി ഏതം വചനം അവോച. തസ്മിം ഭന്തേ വത്ഥുസ്മിം ‘‘വിജ്ജാവിമുത്തിഫലാനിസംസോ ഖോ കുണ്ഡലിയ തഥാഗതോ വിഹരതീ’’തി ഏവമാദിനാ ഭഗവതാ ഭാസിതം.

പഠമ ഗിലാനസുത്ത

പുച്ഛാ – തേനാവുസോ ഭഗവ്വതാ ജാനതാ…പേ… സമ്മാസമ്ബുദ്ധേന ബോജ്ഝങ്ഗസംയുത്തേ ദുതിയേ ഗിലാനവഗ്ഗേ പഠമഗിലാനസുത്തം കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – രാജഗഹേ ഭന്തേ പിപ്പലിഗുഹായം ആയസ്മന്തം മഹാകസ്സപത്ഥേരം ആരബ്ഭ ഭാസിതം. ആയസ്മാ ഭന്തേ മഹാകസ്സപത്ഥേരോ പിപ്പലിഗുഹായം വിഹരതി ആബാധികോ ദുക്ഖിതോ ബാള്ഹഗിലാനോ. അഥ ഖോ ഭന്തേ ഭഗവാ സായന്ഹസമയം പടിസല്ലാനാ വുട്ഠിതോ യേനായസ്മാ മഹാകസ്സപോ തേനുപസങ്കമി, ഉപസങ്കമിത്വാ പഞ്ഞത്തേ ആസനേ നിസീദി, നിസജ്ജ ഖോ ഭഗവാ ആയസ്മന്തം മഹാകസ്സപം ഏതദവോച– ‘‘കച്ചി തേ കസ്സപ ഖമനീയം, കച്ചി യാപനീയം, കച്ചി ദുക്ഖാ വേദനാ പടിക്കമന്തി നോ അഭിക്കമന്തി, പടിക്കമോസാനം പഞ്ഞായതി നോ അഭിക്കമോതി. ന മേ ഭന്തേ ഖമനീയം ന യാപനീയം, ബാള്ഹാ മേ ദുക്ഖാ വേദനാ അഭിക്കമന്തി നോ പടിക്കമന്തി, അഭിക്കമോസാനം പഞ്ഞായതി നോ പടിക്കമോ’’തി. തസ്മിം ഭന്തേ വത്ഥുസ്മിം ‘‘സത്തിമേ കസ്സപ ബോജ്ഝങ്ഗാ മയാ സമ്മദക്ഖാതാ ഭാവിതാ ബഹുലീകതാ അഭിഞ്ഞായ സമ്ബോധായ നിബ്ബാനായ സംവത്തന്തീ’’തി ഏവമാദിനാ ഭഗവതാ ഭാസിതം.

ഉദായിസുത്ത

പുച്ഛാ – തത്ഥേവ ആവുസോ തതിയേ ഉദായിവഗ്ഗേ പോരാണകേഹി ധമ്മസംഗാഹകമഹാഥേരേഹി ദസമം സംഗീതം ഉദായിസുത്തം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സുമ്ഭേസു ഭന്തേ സേതകേനാമ സുമ്ഭാനം നിഗമേ ആയസ്മന്തം ഉദായിത്ഥേരം ആരബ്ഭ ഭാസിതം. ആയസ്മാ ഭന്തേ ഉദായിത്ഥേരോ ഭഗവന്തം ഉപസങ്കമിത്വാ ‘‘അച്ഛരിയം ഭന്തേ, അബ്ഭുതം ഭന്തേ, യാവ ബഹുകതഞ്ച മേ ഭന്തേ ഭഗവതി പേമഞ്ച ഗാരവോ ച ഹിരീ ച ഓത്തപ്പഞ്ചാതി ഏവമാദികം വചനം അവോച. തസ്മിം ഭന്തേ വത്ഥുസ്മിം ‘‘സാധു സാധു ഉദായി ഏസോ ഹി തേ ഉദായി മഗ്ഗോ പടിലദ്ധോ. യോ തേ ഭാവിതോ ബഹുലീകതോ, തഥാ തഥാ വിഹരന്തം തഥത്തായ ഉപനേസ്സതി, യഥാ ത്വം ‘ഖീണാ ജാതി, വുസിതം ബ്രഹ്മചരിയം, കതം കരണീയം, നാപരം ഇത്ഥത്തായാ’തി പജാനിസ്സതീ’’തി. ഏവം ഖോ ഭഗവതാ ഭാസിതം.

സതിപട്ഠാനസംയുത്ത

സതിസുത്ത

പുച്ഛാ – സതിപട്ഠാനസംയുത്തേ ആവുസോ പോരാണകേഹി ധമ്മസംഗാഹക മഹാഥേരേഹി ദുതിയം സംഗീതം സതിസുത്തം ഭഗവതാ കത്ഥ കം കാരബ്ഭ കഥഞ്ച ഭാസിതം.

വിസ്സജ്ജനാ – വേസാലിയം ഭന്തേ അമ്ബപാലിവനേ സമ്ബഹുലേ ഭിക്ഖൂ ആരബ്ഭ ‘‘സതോ ഭിക്ഖവേ ഭിക്ഖു വിഹരേയ്യ സമ്പജാനോ അയം വോ അമ്ഹാകം അനുസാസനീ’’തി ഏവമാദിനാ ഭഗവതാ ഭാസിതം.

സാലസുത്ത

പുച്ഛാ – തത്ഥേവ ആവുസോ പോരാണകേഹി ധമ്മസംഗാഹകമഹാഥേരേഹി ചതുത്ഥം സംഗീതം സാലസുത്തം ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – കോസലേസു ഭന്തേ സാലായനാമ കേസലാനം ബ്രാഹ്മണഗാമേ സമ്ബഹുലേ ഭിക്ഖൂ ആരബ്ഭ ‘‘യേ തേ ഭിക്ഖവേ ഭിക്ഖൂ നവാ അചിരപബ്ബജിതാ അധുനാഗതാ ഇമം ധമ്മവിനയം, തേ വോ ഭിക്ഖവേ ഭിക്ഖൂ ചതുന്നം സതിപട്ഠാനാനം ഭാവനായ സമാദപേതബ്ബാ നിവേസേതബ്ബാ പതിട്ഠാപേതബ്ബാ’’തി ഏവമാദിനാ ഭന്തേ ഭഗവതാ ഭാസിതം.

സകുണഗ്ഘിസുത്ത

പുച്ഛാ – തത്ഥേവ ആവുസോ പോരാണകേഹി ധമ്മസംഗാഹകമഹാഥേരേഹി ഛട്ഠം സംഗീതം സകുണഗ്ഘിസുത്തം ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ സമ്ബഹുലേ ഭിക്ഖൂ ആരബ്ഭ ‘‘ഭൂതപുബ്ബം ഭിക്ഖവേ സകുണഗ്ഘി ലാപം സകുണം സഹസാ അജ്ഝപ്പത്താ അഗ്ഗഹേസി. അഥ ഖോ ഭിക്ഖവേ ലാപോ സകുണോ സകുണഗ്ഘിയാ ഹരിയമാനോ ഏവം പരിദേവസി മയമേവമ്ഹ അലക്ഖികാ, മയം അപ്പപുഞ്ഞാ, യേ മയം അഗോചരേ ചരിമ്ഹ പരവിസയേ, സചേജ്ജ മയം ഗോചരേ ചരേയ്യാമ സകേ പേത്തികേ വിസയേ, ന മ്യാഹം സകുണഗ്ഘി അലം അഭവിസ്സ യദിദം യുദ്ധായാ’’തി ഏവമാദിനാ ഭഗവതാ ഭാസിതം.

മയമേവമ്ഹ അലക്ഖികാ, മയം അപ്പപുഞ്ഞാ.

കോ പന തേ ലാപ ഗോചരോ സകോ പേത്തികോ വിസയോ.

യദിദം നങ്ഗലകട്ഠകരണം ലേഡ്ഡുട്ഠാനം.

ഏഹി ഖോ ദാനി മേ സകുണഗ്ഘി, ഏഹി ഖോ ദാനി മേ സകുണഗ്ഘി,

(ദാരുഗുളോവിയ വിനിവത്തിത്വാ തസ്സേവ ലേഡ്ഡുസ്സ അന്തരേ പച്ചുപാദി. അട്ഠകഥാ)

ഏവഞ്ഹി തം ഭിക്ഖവേ ഹോതി യോ അഗോചരേ ചരതി പരവിസയേ.

തസ്മാതിഹ ഭിക്ഖവേ മാ അഗോചരേ ചരിത്ഥ പരവിസയേ.

ഗോചരേ ഭിക്ഖവേ ചരഥ സകേ പേത്തികേ വിസയേ.

ഗോചരേ ഭിക്ഖവേ ചരതം സകേ പേത്തികേ വിസയേ ന ലച്ഛതി മാരോ ഓതാരം, ന ലച്ഛതി മാരോ ആരമ്മണം.

ഭിക്ഖുനുപസ്സയസുത്ത

പുച്ഛാ – തത്ഥേവ ആവുസോ പോരാണകേഹി ധമ്മസംഗാഹകമഹാഥേരേഹി ദസമം സംഗീതം ഭിക്ഖുനുപസ്സയസുത്തം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ ആയസ്മന്തം ആനന്ദത്ഥേരം ആരബ്ഭ ഭാസിതം. ആയസ്മാ ഭന്തേ ആനന്ദോ യാവത്തകോ അഹോസി ഭിക്ഖുനീഹി സദ്ധിം കഥാസല്ലാപോ തം സബ്ബം ഭഗവതോ ആരോചേസി. തസ്മിം ഭന്തേ വത്ഥുസ്മിം ‘‘ഏവമേതം ആനന്ദ, ഏവമേതം ആനന്ദ, യോഹി കോചി ആനന്ദ ഭിക്ഖു വാ ഭിക്ഖുനീ വാ ചതൂസു സതിപട്ഠാനേസു സുപ്പതിട്ഠിതചിത്തോ വിഹരതി, തസ്സേതം പാടികങ്ഖം ഉളാരം പുബ്ബേനാപരം വിസേസം സഞ്ജാനിസ്സതീ’’തി ഏവമാദിനാ ഭഗവതാ ഭാസിതം.

ചുന്ദസുത്ത

പുച്ഛാ – തത്ഥേവ ആവുസോ ദുതിയേ നാലന്ദവഗ്ഗേ പോരാണകേഹി ധമ്മസംഗാഹകമഹാഥേരേഹി തതിയം സംഗീതം ചുന്ദസുത്തം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ ആയസ്മന്തംയേവ ആനന്ദത്ഥേരം ആരബ്ഭ ഭാസിതം. ആയസ്മാ ഭന്തേ ആനന്ദത്ഥേരോ ചുന്ദേന സമണുദ്ദേസേന സദ്ധിം യേന ഭഗവാ തേനുപസങ്കമി. ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നോ ഖോ ഭന്തേ ആയസ്മാ ആനന്ദോ ഭഗവന്തം ഏതദവോച ‘‘അയം ഭന്തേ ചുന്ദോ സമണുദ്ദേസോ ഏവമാഹ ‘ആയസ്മാ ഭന്തേ സാരിപുത്തോ പരിനിബ്ബുതോ, ഇദമസ്സ പത്തചീവര’ന്തി. അപി ച മേ ഭന്തേ മധുരകജാതോ വിയ കായോ, ദിസാപി മേ ന പക്ഖായന്തി, ധമ്മാപി മം നപ്പടിഭന്തി ‘ആയസ്മാ സാരിപുത്തോ പരിനിബ്ബുതോ’തി സുത്വാ’’തി. തസ്മിം ഭന്തേ വത്ഥുസ്മിം ‘‘കിം നു ഖോ തേ ആനന്ദ സാരിപുത്തോ സീലക്ഖന്ധം വാ ആദായ പരിനിബ്ബുതോ, സമാധിക്ഖന്ധം വാ, പഞ്ഞാക്ഖന്ധംവാ, വിമുത്തിക്ഖന്ധംവാ, വിമുത്തിഞാണദസ്സനക്ഖന്ധം വാ ആദായ പരിനിബ്ബുതോ’’തി ഏവമാദിനാ ഭഗവതാ ഭാസിതം.

അയം ഭന്തേ ചുന്ദോസമണുദ്ദേസോ ഏവമാഹ.

തസ്മാതിഹാനന്ദ അത്തദീപാ വിഹരഥ അത്തസരണാ അനഞ്ഞസരണാ ധമ്മദീപാ ധമ്മസരണാ അനഞ്ഞസരണാ.

ബാഹിയസുത്ത

പുച്ഛാ – തത്ഥേവ ആവുസോ പോരാണകേഹി ധമ്മസംഗാഹകമഹാഥേരേഹി പഞ്ചമം സംഗീതം ബാഹിയസുത്തം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ ആയസ്മന്തം ബാഹിയം ആരബ്ഭ ഭാസിതം. ആയസ്മാ ഭന്തേ ബാഹിയോ ഭഗവന്തം ഏതദവോച ‘‘സാധു മേ ഭന്തേ ഭഗവാ സംഖിത്തേന ധമ്മം ദേസേതു, യമഹം ഭഗവതോ ധമ്മം സുത്വാ ഏകോ വൂപകട്ഠോ അപ്പമത്തോ ആതാപീ പഹിതത്തോ വിഹരേയ്യ’’ന്തി. തസ്മിം ഭന്തേ വത്ഥുസ്മിം ‘‘തസ്മാതിഹ ത്വം ബാഹിയ ആദിമേവ വിസോധേഹി കുസലേസു ധമ്മേസു. കോ ചാദികുസലാനം ധമ്മാനം, സീലഞ്ച സുവിസുദ്ധം ദിട്ഠിച ഉജുകാ’’തി ഏവമാദിനാ ഭഗവതാ ഭാസിതം.

സീലട്ഠിതിവഗ്ഗ

ചിരട്ഠിതിസുത്ത

പുച്ഛാ – തത്ഥേവ ആവുസോ തതിയേ സീലട്ഠിതിവഗ്ഗേ പോരാണകേഹി ധമ്മസംഗാഹകമഹാഥേരേഹി ദുതിയം സംഗീതം ചിരട്ഠിതിസുത്തം കത്ഥ കം ആരബ്ഭ കിസ്മിം വത്ഥുസ്മിം കേന കഥഞ്ച ഭാസിതം.

വിസ്സജ്ജനാ – പാടലിപുത്തേ ഭന്തേ ആയസ്മന്തം ഭദ്ദം ആരബ്ഭ ആയസ്മതാ ആനന്ദത്ഥേരേന ധമ്മഭണ്ഡാഗാരികേന ഭാസിതം. ആയസ്മാ ഭന്തേ ഭദ്ദോ സായന്ഹസമയം പടിസല്ലാനാ വുട്ഠിതോ യേനായസ്മാ ആനന്ദോ തേനുപസങ്കമി, ഉപസങ്കമിത്വാ ആയസ്മന്തം ആനന്ദം ഏതദവോച ‘‘കോ നു ഖോ ആവുസോ ആനന്ദ ഹേതു കോ പച്ചയോ, യേന തഥാഗതേ പരിനിബ്ബുതേ സദ്ധമ്മോ ന ചിരട്ഠിതികോ ഹോതി, കോ പനാവുസോ ആനന്ദ ഹേതു കോ പച്ചയോ, യേന തഥാഗതേ പരിനിബ്ബുതേ സദ്ധമ്മോ ചിരട്ഠിതികോ ഹോതീ’’തി. തസ്മിം ഭന്തേ വത്ഥുസ്മിം ‘‘സാധു സാധു ആവുസോ ഭദ്ദ, ഭദ്ദകോ ഖോ തേ ആവുസോ ഭദ്ദ ഉമ്മങ്ഗോ’’തി ഏവമാദിനാ ആയസ്മതാ ആനന്ദത്ഥേരേന ധമ്മഭണ്ഡാഗാരികേന ഭാസിതം.

ഭദ്ദകോ തേ ആവുസോ ഭദ്ദ ഉമ്മങ്ഗോ.

‘‘ചതുന്നം ഖോ ആവുസോ സതിപട്ഠാനാനം അഭാവിതത്താ അബഹുലീകതത്താ തഥാഗതേ പരിനിബ്ബുതേ സദ്ധമ്മോ ന ചിരട്ഠിതികോ ഹോതീ’’ –

സിരിവഡ്ഢസുത്ത

പുച്ഛാ – തസ്സാവുസോ ഭഗവതാ അരഹതോ സമ്മാസമ്ബുദ്ധസ്സ പാവചനസമുദയഭൂതായ മഹാവഗ്ഗപാളിയാ സതിപട്ഠാനസംയുത്തേ സീലട്ഠിതിവഗ്ഗേ നവമം സിരിവഡ്ഢസുത്തം കത്ഥ കം ആരബ്ഭ കിസ്മിം വത്ഥുസ്മിം കേന കഥഞ്ച ഭാസിതം.

വിസ്സജ്ജനാ – രാജഗഹേ ഭന്തേ സിരിവഡ്ഢം ഗഹപതിം ആരബ്ഭ ആയസ്മതാ ആനന്ദത്ഥേരേന ധമ്മഭണ്ഡാഗാരികേന ഭാസിതം. സിരിവഡ്ഢോ ഭന്തേ ഗഹപതി ആബാധികോ ഹോതി ദുക്ഖിതോ ബാള്ഹഗിലാനോ. അഥഖോ ഭന്തേ ആയസ്മാ ആനന്ദോ യേനസിരിവഡ്ഢസ്സ ഗഹപതിസ്സ നിവേസനം തേനുപസങ്കമി, ഉപസങ്കമിത്വാ പഞ്ഞത്തേ ആസനേ നിസീദി. നിസജ്ജ ഖോ ആയസ്മാ ആനന്ദോ സിരിവഡ്ഢം ഗഹപതിം ഏതദവോച ‘‘കച്ചി തേ ഗഹപതി ഖമനീയം, കച്ചി യാപനീയം, കച്ചി ദുക്ഖാ വേദനാ പടിക്കമന്തി നോ അഭിക്കമന്തി, പടിക്കമോസാനം പഞ്ഞായതി നോ അഭിക്കമോ’’തി. ന മേ ഭന്തേ ഖമനീയം, ന യാപനീയം, ബാള്ഹാ മേ ദുക്ഖാ വേദനാ അഭിക്കമന്തി നോ പടിക്കമന്തി, അഭിക്കമോസാനം പഞ്ഞായതി നോ പടിക്കമോ’’തി. തസ്മിം ഭന്തേ വത്ഥുസ്മിം ‘‘തസ്മാതിഹ തേ ഗഹപതി ഏവം സിക്ഖിതബ്ബം ‘കായേ കായാനുപസ്സീ വിഹരിസ്സാമി ആതാപീ സമ്പജാനോ സതിമാ വിനേയ്യ ലോകേ അഭിജ്ഝാ ദോമനസ്സം. വേദനാസു. ചിത്തേ. ധമ്മേസു ധമ്മാനുപസ്സീ വിഹരിസ്സാമി ആതാപീ സമ്പജാനോ സതിമാ വിനേയ്യ ലോകേ അഭിജ്ഝാ ദോമനസ്സ’ന്തി. ഏവഞ്ഹി തേ ഗഹപതി സിക്ഖിതബ്ബ’’ന്തി. ഏവം ഖോ ആയസ്മതാ ആനന്ദത്ഥേരേന ധമ്മഭണ്ഡാഗാരികേന ഭാസിതം.

ഇദ്ധിപാദസംയുത്ത

മോഗ്ഗല്ലാനസുത്ത

പുച്ഛാ – ഇദ്ധിപാദസംയുത്തേ ആവുസോ ചതുത്ഥം മോഗ്ഗല്ലാനസുത്തം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ സമ്ബഹുലേ ഭിക്ഖൂ ആരബ്ഭ ഭാസിതം. സമ്ബഹുലാ ഭന്തേ ഭിക്ഖൂ ഹേട്ഠാമിഗാരമാതുപാസാദേ വിഹരന്തി ഉദ്ധതാ ഉന്നളാ ചപലാ മുഖരാ വികിണ്ണവാചാ മുട്ഠസ്സതിനോ അസമ്പജാനാ അസമാഹിതാ ഭന്തചിത്താ പാകതിന്ദ്രിയാ. തസ്മിം ഭന്തേ വത്ഥുസ്മിം ആയസ്മന്തം മഹാമോഗ്ഗല്ലാനം തേ ഭിക്ഖൂ സംവേജേത്വാ ‘‘കിം നു തുമ്ഹേ ഭിക്ഖവേ സംവിഗ്ഗാ ലോമഹട്ഠജാതാ ഏകമന്തം ഠിതാ’’തി ഏവമാദിനാ ഭഗവതാ ഭാസിതം.

അച്ഛരിയം വത ഭോ, അബ്ഭുതം വത ഭോ.

നിവാതഞ്ച വത.

അയഞ്ച മിഗാരമാതുപാസാദോ ഗമ്ഭീരനേമോ.

തുമ്ഹേവ ഖോ ഭിക്ഖവേ സംവേജേതുകാമേന മോഗ്ഗല്ലാനേന ഭിക്ഖുനാ പാദങ്ഗുട്ഠകേന മിഗാരമാതുപാസാദോ സങ്കമ്പിതോ സമ്പകമ്പിതോ സമ്പധാലിതോ.

തം കിം മഞ്ഞഥ ഭിക്ഖവേ, കതമേസം ധമ്മാനം ഭാവിതത്താ ബഹുലീകതത്താ മോഗ്ഗല്ലാനോ ഭിക്ഖു ഏവം മഹിദ്ധികോ ഏവം മഹാനുഭാവോ.

അനുരുദ്ധസംയുത്ത

ബാള്ഹഗിലാനസുത്ത

പുച്ഛാ – അനുരുദ്ധസംയുത്തേ ആവുസോ പോരാണകേഹി ധമ്മസംഗാഹകമഹാഥേരേഹി ദസമം സംഗീതം ബാള്ഹഗിനാനസുത്തം കത്ഥ കം ആരബ്ഭ കിസ്മിം വത്ഥുസ്മിം കേന കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ സമ്ബഹുലേ ഭിക്ഖൂ ആരബ്ഭ ആയസ്മതാ അനുരുദ്ധത്ഥേരേന ഭാസിതം. സമ്ബഹുലാ ഭന്തേ ഭിക്ഖൂ ആയസ്മന്തം അനുരുദ്ധം ആബാധികം ദുക്ഖിതം ബാള്ഹഗിലാനം ഏതദവോചും ‘‘കതമേനായസ്മതോ അനുരുദ്ധസ്സ വിഹാരേന വിഹരതോ ഉപ്പന്നാ സാരീരികാ ദുക്ഖാ വേദനാ ചിത്തം ന പരിയാദായ തിട്ഠന്തീ’’തി. തസ്മിം ഭന്തേ വത്ഥുസ്മിം ‘‘ചതൂസു ഖോ മേ ആവുസോ സതിപട്ഠാനേസു സുപ്പതിട്ഠിതചിത്തസ്സ വിഹരതോ ഉപ്പന്നാ സാരീരികാ ദുക്ഖാ വേദനാ ചിത്തം ന പരിയാദായ തിട്ഠന്തീ’’തി ഏവമാദിനാ ആയസ്മതാ അനുരുദ്ധത്ഥേരേന ഭാസിതം.

ആനാപാനസംയുത്ത

മഹാകപ്പിനസുത്ത

പുച്ഛാ – ആനാപാനസംയുത്തേ ആവുസോ പോരാണകേഹി ധമ്മസംഗാഹകമഹാഥേരേഹി സത്തമം സംഗീതം മഹാകപ്പിനസുത്തം ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ സമ്ബഹുലേ ഭിക്ഖൂ ആരബ്ഭ ‘‘പസ്സഥ നോ തുമ്ഹേ ഭിക്ഖവേ ഏതസ്സ ഭിക്ഖുനോ കായസ്സ ഇഞ്ജിതത്തം വാ ഫന്ദിതബ്ബം വാ’’തി ഏവമാദിനാ ഭഗവതാ ഭാസിതം.

ഇച്ഛാനങ്ഗലസുത്ത

പുച്ഛാ – തത്ഥേവ ആവുസോ ദുതിയവഗ്ഗേ പഠമം ഇച്ഛാനങ്ഗലസുത്തം ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – ഇച്ഛാനങ്ഗലേ ഭന്തേ സമ്ബഹുലേ ഭിക്ഖൂ ആരബ്ഭ ‘‘സചേ ഖോ ഭിക്ഖവേ അഞ്ഞതിത്ഥിയാ പരിബ്ബാജകാ ഏവം പുച്ഛേയ്യും ‘കതമേ നാവുസോ വിഹാരേന സമണോ ഗോതമോ വസ്സാവാസം ബഹുലം വിഹാസീ’തി. ഏവം പുട്ഠാ തുമ്ഹേ ഭിക്ഖവേ തേസം അഞ്ഞതിത്ഥിയാനം പരിബ്ബാജകാനം ഏവം ബ്യാകരേയ്യാഥ ആനാപാനസ്സതിസമാധിനാ ഖോ ആവുസോ ഭഗവാ വസ്സാവാസം ബഹുലം വിഹാസീ’’തി ഏവമാദിനാ ഭന്തേ ഭഗവതാ ഭാസിതം.

സോതാപത്തിസംയുത്ത

ചക്കവത്തിരാജസുത്ത

പുച്ഛാ – സോതാപത്തിസംയുത്തേ ആവുസോ പോരാണകേഹി ധമ്മസംഗാഹകമഹാഥേരേഹി പഠമം സംഗീതം ചക്കവത്തിരാജസുത്തം ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ സമ്ബഹുലേ ഭിക്ഖൂ ആരബ്ഭ ‘‘കിഞ്ചാപി ഭിക്ഖവേ രാജാ ചക്കവത്തീ ചതുന്നം ദീപാനം ഇസ്സരിയാധിപച്ചം രജ്ജം കാരേത്വാ കായസ്സ ഭേദാ പരം മരണാ സുഗതിം സഗ്ഗം ലോകം ഉപപജ്ജതി ദേവാനം താവതിംസാനം സഹബ്യതം, സോ തത്ഥ നന്ദനേ വനേ അച്ഛരാസങ്ഘപരിവുതോ ദിബ്ബേഹി ച പഞ്ചഹി കാമഗുണേഹി സമപ്പിതോ സമങ്ഗീഭൂതോ പരിചാരേതി സോ ചതൂഹി ധമ്മേഹി അസമന്നാഗതോ, അഥ ഖോ സോ അപരിമുത്തോവ നിരയാ, അപരിമുത്തോ തിരച്ഛാനയോനിയാ, അപരിമുത്തോ പേത്തിവിസയാ, അപരിമുത്തോ അപായദുഗ്ഗതിവിനിപാതാ’’തി ഏവമാദിനാ ഭന്തേ ഭഗവതാ ഭാസിതം.

ദീഘാവു ഉപാസകസുത്ത

പുച്ഛാ – തത്ഥേവ ആവുസോ പോരാണകേഹി ധമ്മസംഗാഹകമഹാഥേരേഹി തതിയം സംഗീതം ദീഘാവുഉപാസകസുത്തം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – രാജഗഹേ ഭന്തേ ദീഘാവും ഉപാസകം ആരബ്ഭ ഭാസിതം. ഭഗവാ ഭന്തേ ദീഘാവും ഉപാസകം ആബാധികം ദുക്ഖിതം ബാള്ഹഗിലാനം ഏതദവോച ‘‘കച്ചി തേ ദീഘാവു ഖമനീയം, കച്ചി യാപനീയം, കച്ചി ദുക്ഖാ വേദനാ പടിക്കമന്തി നോ അഭിക്കമന്തി, പടിക്കമോസാനം പഞ്ഞായതി നോ അഭിക്കമോ’’തി. ന മേ ഭന്തേ ഖമനീയം, ന യാപനീയം ബാള്ഹാ മേ ദുക്ഖാ വേദനാ അഭിക്കമന്തി നോ പടിക്കമന്തി, അഭിക്കമോസാനം പഞ്ഞായതി നോ പടിക്കമോതി. തസ്മിം ഭന്തേ വത്ഥുസ്മിം ‘‘തസ്മാതിഹ തേ ദീഘാവു ഏവം സിക്ഖിതബ്ബം ബുദ്ധേ അവേച്ചപ്പസാദേന സമന്നാഗതോ ഭവിസ്സാമീ’’തി ഏവമാദിനാ ഭഗവതാ ഭാസിതം.

യാനിമാനി ഭന്തേ ഭഗവതാ ചത്താരി സോതാപത്തിയങ്ഗാനി ദേസിതാനി, സംവിജ്ജന്തേ തേ ധമ്മാ മയി–

തസ്മാതിഹ ത്വം ദീഘാവു ഇമേസു ചതൂസു സോതാപത്തിയങ്ഗേസു പതിട്ഠായ ഛ വിജ്ജാഭാഗിയേ ധമ്മേ ഉത്തരി ഭാവേയ്യാസി–

മാ ത്വം താത ദീഘാവു ഏവം മനസാകാസി.

ഇങ്ഘ ത്വം താത ദീഘാവു യദേവ തേ ഭഗവാ ആഹ, തദേവ ത്വം സാധുകം മനസികരോഹി.

പണ്ഡിതോ ഭിക്ഖവേ ദീഘാവു ഉപാസകോ.

പച്ചപാദി ധമ്മസ്സാനുധമ്മം.

ന ച മം ധമ്മാധികരണം വിഹേഠേസി.

ദീഘാവു ഭിക്ഖവേ ഉപാസകോ പഞ്ചന്നം ഓരമ്ഭാഗിയാനം സംയോജനാനം പരിക്ഖയാ ഓപപാതികോ തത്ഥ പരിനിബ്ബായീ അനാവത്തിധമ്മോ തസ്മാ ലോകാ.

വേളുദ്വാരേയ്യസുത്ത

പുച്ഛാ – തേനാവുസോ ഭഗവതാ…പേ… സമ്മാസമ്ബുദ്ധേന സോതാപത്തിസംയുത്തേ സത്തമം സംഗീതം വേളുദ്വാരേയ്യസുത്തം കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – കോസലേസു ഭന്തേ വേളുദ്വാരേ നാമ കോസലാനം ബ്രാഹ്മണ ഗാമേ വേളുദ്വാരേയ്യകേ ബ്രാഹ്മണഗഹപതികേ ആരബ്ഭ ഭാസിതം.

വേളുദ്വാരേയ്യകാ ഭന്തേ ബ്രാഹ്മണഗഹപതികാ ഭഗവന്തം ഏതദവോചും ‘‘മയം ഭോ ഗോതമ ഏവംകാമാ ഏവംഛന്ദാ ഏവംഅധിപ്പായാ പുത്തസമ്ബാധസയനം അജ്ഝാവസേയ്യാമ…പേ… ജാതരൂപരജതം സാദിയേയ്യാമ, കായസ്സ ഭേദാ പരം മരണാ സുഗതിം സഗ്ഗം ലോകം ഉപപജ്ജേയ്യാമ, തേസം നോ ഭവം ഗോതമോ അമ്ഹാകം ഏവംകാമാനം ഏവംഛന്ദാനം ഏവംഅധിപ്പായാനം തഥാ ദമ്മം ദേസേതു, യഥാ മയം പുത്തസമ്ബാധസയനം അജ്ഝാവസേയ്യാമ…പേ… കായസ്സ ഭേദാ പരം മരണാ സുഗതിം സഗ്ഗം ലോകം ഉപപജ്ജേയ്യാമാ’’തി. തസ്മിം ഭന്തേ വത്ഥുസ്മിം ‘‘അത്തൂപനായികം വോ ഗഹപതയോ ധമ്മപരിയായം ദേസേസ്സാമി, തം സുണാഥ സാധുകം മനസി കരോഥ, ഭാസിസ്സാമീ’’തി ഏവമാദിനാ ഭഗവതാ ഭാസിതം.

സരണാനിവഗ്ഗ

പഠമ മഹാനാമസുത്ത

പുച്ഛാ – തത്ഥേവ ആവുസോ തതിയേ സരണാനിവഗ്ഗേ പോരാണകേഹി ധമ്മസംഗാഹകമഹാഥേരേഹി പഠമം സംഗീതം പഠമമഹാനാമസുത്തം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സക്കേസു ഭന്തേ കപിലവത്ഥുസ്മിം നിഗ്രോധാരാമേ മഹാനാമം സക്കം ആരബ്ഭ ഭാസിതം. മഹാനാമോ ഭന്തേ സക്കോ ഭഗവന്തം ഏതദവോച ‘‘ഇദം ഭന്തേ കപിലവത്ഥു ഇദ്ധഞ്ചേവ ഫീതഞ്ച ബാഹുജഞ്ഞം ആകിണ്ണമനുസ്സം സമ്ബാധബ്യൂഹം, സോ ഖ്വാഹം ഭന്തേ ഭഗവന്തം വാ പയിരുപാസിത്വാ മനോഭാവനീയേ വാ ഭിക്ഖൂ സായന്ഹസമയം കപിലവത്ഥും പവിസന്തോ ഭന്തേനപി ഹത്ഥിനാ സമാഗച്ഛാമി, ഭന്തേനപി അസ്സേന സമാഗച്ഛാമി, ഭന്തേനപി രഥേന സമാഗച്ഛാമി, ഭന്തേനപി സകടേന സമാഗച്ഛാമി, ഭന്തേനപി പുരിസേന സമാഗച്ഛാമി, തസ്സ മയ്ഹം ഭന്തേ തസ്മിം സമയേ മുസ്സതേവ ഭഗവന്തം ആരബ്ഭ സതി, മുസ്സതി ധമ്മം ആരബ്ഭ സതി, മുസ്സതി സങ്ഘം ആരബ്ഭ സതി, തസ്സ മയ്ഹം ഭന്തേ ഏവം ഹോതി ഇമമ്ഹി ചാഹം സമയേ കാലം കരേയ്യം, കാ മയ്ഹം ഗതി, കോ അഭിസമ്പരായോ’’തി. തസ്മിം ഭന്തേ വത്ഥുസ്മിം ‘‘മാ ഭായി മഹാനാമ, മാ ഭായി മഹാനാമ, അപാപകം തേ മരണം ഭവിസ്സതി അപാപികാ കാലം കിരിയാ’’തി ഏവമാദിനാ ഭഗവതാ ഭാസിതം.

ദുതിയ സരണാനിസക്കസുത്ത

പുച്ഛാ – തത്ഥേവ ആവുസോ ധമ്മസംഗാഹകമഹാഥേരേഹി പഞ്ചമം സംഗീതം ദുതിയസരണാനിസക്കസുത്തം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സക്കേസു ഭന്തേ കപിലവത്ഥുസ്മിം നിഗ്രോധാരാമേ മഹാനാമംയേവ സക്കം ആരബ്ഭ ഭാസിതം.

മഹാനാമോ ഭന്തേ സക്കോ ഭഗവന്തം ഏതദവോച ‘‘ഇധ ഭന്തേ സരണാനി സക്കോ കാലങ്കതോ, സോ ഭഗവതാ ബ്യാകതോ ‘സോതാപന്നോ അവിനിപാതധമ്മോ നിയതോ സമ്ബോധിപരായണോ’തി. തത്ര സുദം ഭന്തേ സമ്ബഹുലാ സക്കാ സങ്ഗമ്മ സമാഗമ്മ ഉജ്ഝായന്തി ഖീയന്തി വിപാചേന്തി ‘അച്ഛരിയം വത ഭോ, അബ്ഭുതം വത

ഭോ, ഏത്ഥ ദാനി കോ ന സോതാപന്നോ ഭവിസ്സതി, യത്ര ഹി നാമ സരണാനി സക്കോ കാലങ്കതോ, സോ ഭഗവതാ ബ്യാകതോ ‘സോതാപന്നോ അവിനിപാതധമ്മോ നിയതോ സമ്ബോധിപരായണോ’തി, സരണാനി സക്കോ സിക്ഖായ അപരിപൂരകാരീ അഹോസീ’’തി തസ്മിം ഭന്തേ വത്ഥുസ്മിം ‘‘യോ സോ മഹാനാമ ദീഘരത്തം ഉപാസകോ ബുദ്ധം സരണം ഗതോ, ധമ്മം സരണം ഗതോ, സങ്ഘം സരണം ഗതോ, സോ കഥം വിനിപാതം ഗച്ഛേയ്യാ’’തി ഏവമാദിനാ ഭഗവതാ ഭാസിതം.

പഠമ അനാഥപിണ്ഡികസുത്ത

പുച്ഛാ – തത്ഥേവ ആവുസോ പോരാണകേഹി ധമ്മസംഗാഹകമഹാഥേരേഹി ഛട്ഠം സംഗീതം പഠമഅനാഥപിണ്ഡികസുത്തം കത്ഥ കം ആരബ്ഭ കിസ്മിം വത്ഥുസ്മിം കേന കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ അനാഥപിണ്ഡികം ഗഹപതിം ആരബ്ഭ ആയസ്മതാ സാരിപുത്തത്ഥേരേന ധമ്മസേനാപതിനാ ഭാസിതം.

ആയസ്മാ ഭന്തേ സാരിപുത്തത്ഥേരോ ആയസ്മതാ ആനന്ദത്ഥേരേന പച്ഛാസമണേന സദ്ധിം യേന അനാഥപിണ്ഡികസ്സ ഗഹപതിസ്സ നിവേസനം തേനുപസങ്കമി, ഉപസങ്കമിത്വാ പഞ്ഞത്തേ ആസനേ നിസീദി, നിസജ്ജ ഖോ ആയസ്മാ സാരിപുത്തോ അനാഥപിണ്ഡികം ഗഹപതിം ആബാധികം ദുക്ഖിതം ബാള്ഹഗിലാനം ഏതദവോച ‘‘കച്ചി തേ ഗഹപതി ഖമനീയം കച്ചി യാപനീയം, കച്ചി ദുക്ഖാ വേദനാ പടിക്കമന്തി, നോ അഭിക്കമന്തി, പടിക്കമോസാനം പഞ്ഞായതി, നോ അഭിക്കമോ’’തി, ന മേ ഭന്തേ ഖമനീയം, ന യാപനീയം, ബാള്ഹാ മേ ദുക്ഖാ വേദനാ അഭിക്കമന്തി, നോ പടിക്കമന്തി, അഭിക്കമോസാനം പഞ്ഞായതി, നോ പടിക്കമോതി. തസ്മിം ഭന്തേ വത്ഥുസ്മിം ‘‘യഥാ രൂപേന ഖോ ഗഹപതി ബുദ്ധേ അപ്പസാദേന സമന്നാഗതോ അസ്സുതവാ പുഥുജ്ജനോ കായസ്സ ഭേദാ പരം മരണാ അപായം ദുഗ്ഗതിം വിനിപാതം നിയരം ഉപപജ്ജതി തഥാരൂപോ തേ ബുദ്ധേ അപ്പസാദോ നത്ഥി, അത്ഥി ച ഖോ തേ ഗഹപതി ബുദ്ധേ അവേച്ചപ്പസാദോ ‘ഇതിപി സോ ഭഗവാ അരഹം സമ്മാസമ്ബുദ്ധോ…പേ… ഭഗവാ’തി തഞ്ച പന തേ ബുദ്ധേ അവേച്ചപ്പസാദം അത്തനി സമനുപസ്സതോ ഠാനസോ വേദനാ പടിപ്പസ്സമ്ഭേയ്യാ’’തി ഏവമാദിനാ ആയസ്മതാ സാരിപുത്തത്ഥേരേന ധമ്മസേനാപതിനാ ഭാസിതം.

യസ്സ സദ്ധാ തഥാഗതേ, അചലാ സുപ്പതിട്ഠിതാ;

സീലഞ്ച യസ്സ കല്യാണം, അരിയകന്തം പസംസിതം.

സങ്ഘേ പസാദോ യസ്സത്ഥി, ഉജുഭൂതഞ്ച ദസ്സനം;

അദലിദ്ദോതി തം ആഹു, അമോഘം തസ്സ ജീവിതം.

തസ്മാ സദ്ധഞ്ച സീലഞ്ച, പസാദം ധമ്മദസ്സനം;

അനുയുഞ്ജേഥ മേധാവീ, സരം ബുദ്ധാനസാസനം.

പുഞ്ഞാഭിസന്ദവഗ്ഗ

മഹാനാമസുത്ത

പുച്ഛാ – തത്ഥേവ ആവുസോ പുഞ്ഞാഭിസന്ദവഗ്ഗോ പോരാണകേഹി ധമ്മസംഗാഹകമഹാഥേരേഹി സത്തമം സംഗീതം മഹാനാമസുത്തം ഭഗവതാ കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സക്കേസു ഭന്തേ കപിലവത്ഥുസ്മിം മഹാനാമം സക്കം ആരബ്ഭ ഭാസിതം.

മഹാനാമോ ഭന്തേ സക്കോ ഭഗവന്തം ഏതദവോച ‘‘കിത്താവതാ നു ഖോ ഭന്തേ ഉപാസകോ ഹോതീ’’തി. തസ്മിം ഭന്തേ വത്ഥുസ്മിം ‘‘യതോ ഖോ മഹാനാമ ബുദ്ധം സരണം ഗതോ ഹോതി, ധമ്മം സരണം ഗതോ ഹോതി, സങ്ഘം സരണം ഗതോ ഹോതീ’’തി ഏവമാദിനാ ഭഗവതാ ഭാസിതം.

കിത്താവതാ നു ഖോ ഭന്തേ ഉപാസകോ ഹോതി.

കാളിഗോധസുത്ത

പുച്ഛാ – തത്ഥേവ ആവുസോ പോരാണകേഹി ധമ്മസംഗാഹകമഹാഥേരേഹി നവമം സംഗീതം കാളിഗോധസുത്തം ഭഗവതാ കത്ഥ കം കാരബ്ഭ കഥഞ്ച ഭാസിതം.

വിസ്സജ്ജനാ – സക്കേസു ഭന്തേ കാളിഗോധം നാമ സാകിയാനിം ആരബ്ഭ ‘‘ചതൂഹി ഖോ ഗോധേ ധമ്മേഹി സമന്നാഗതാ അരിയസാവികാ സോതാപന്നാ ഹോതി അവിനിപാതധമ്മാ നിയതാ സമ്ബോധിപരായണാ’’തി ഏവമാദിനാ ഭഗവതാ ഭാസിതം.

ലാഭാ തേ ഗോധേ, സുലദ്ധം തേ ഗോധേ, സോതാപത്തിഫലം തയാ ഗോധേ –

നന്ദിയസക്കസുത്ത

പുച്ഛാ – തേനാവുസോ ജാനതാ…പേ… സമ്മാസമ്ബുദ്ധേന സോതാപത്തിസംയുത്തേ പുഞ്ഞാഭിസന്ദവഗ്ഗേ ദസമം നന്ദിയസക്കസുത്തം കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സക്കേസു ഭന്തേ കപിലവത്ഥുസ്മിം നിഗ്രോധാരാമേ നന്ദിയം സക്കം ആരബ്ഭ ഭാസിതം. നന്ദിയോ ഭന്തേ സക്കോ ഭഗവന്തം ഏതദവോച ‘‘യസ്സേവ നു ഖോ ഭന്തേ അരിയസാവകസ്സ ചത്താരി സോതാപത്തിയങ്ഗാനി സബ്ബേന സബ്ബം സബ്ബഥാസബ്ബം നത്ഥി, സ്വേവ നു ഖോ ഭന്തേ അരിയസാവകോ പമാദവിഹാരീ’’തി. തസ്മിം ഭന്തേ വത്ഥുസ്മിം ‘‘യസ്സ ഖോ നന്ദിയ ചത്താരി സോതാപത്തിയങ്ഗാനി സബ്ബേനസബ്ബം സബ്ബഥാസബ്ബം നത്ഥി, തമഹം ബാഹിരോ പുഥുജ്ജനപക്ഖേ ഠിതോതി വദാമീ’’തി ഏവമാദിനാ ഭഗവതാ ഭാസിതം.

സച്ചസംയുത്ത

തിരച്ഛാനകഥാസുത്ത

പുച്ഛാ – സച്ചസംയുത്തേ ആവുസോ പോരാണകേഹി ധമ്മസംഗായകമഹാഥേരേഹി ദസമം സംഗീതം തിരച്ഛാനകഥാസുത്തം ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ സമ്ബഹുലേ ഭിക്ഖൂ ആരബ്ഭ മാ ഭിക്ഖവേ അനേകവിഹിതം തിരച്ഛാനകഥം കഥേയ്യാഥ. സേയ്യഥിദം, രാജകഥം ചോരകഥം മഹാമത്തകഥം സേനാകഥം ഭയകഥം യുദ്ധകഥം അന്നകഥം പാനകഥം വത്ഥകഥം സയനകഥം ഏവമാദിനാ ഭന്തേ ഭഗവതാ ഭാസിതം.

ഇദം ദുക്ഖന്തി കഥേയ്യാഥ.

തസ്മാതിഹ ഭിക്ഖവേ ഇദം ദുക്ഖന്തി യോഗോ കരണീയോ…പേ… അയം ദുക്ഖനിരോധഗാമിനീ പടിപദാതി യോഗോ കരണീയോ.

ധമ്മചക്കപവത്തനസുത്ത

പുച്ഛാ – തത്ഥേവ ആവുസോ ധമ്മചക്കപ്പവത്തനവഗ്ഗേ പോരാണകേഹി ധമ്മസംഗാഹകമഹാഥേരേഹി പഠമം സംഗീതം ധമ്മചക്കപവത്തനസുത്തം ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – ബാരാണസിയം ഭന്തേ ഇസിപതനേ മിഗദായേ പഞ്ചവഗ്ഗിയേ ഭിക്ഖൂ ആരബ്ഭ ‘‘ദ്വേ മേ ഭിക്ഖവേ അന്താ പബ്ബജിതേന നസേവിതബ്ബാ. കതമേ ദ്വേ, യോ ചായം കാമേസു കാമസുഖല്ലികാനുയോഗോ ഹീനോ ഗമ്മോ പോഥുജ്ജനികോ അനരിയോ അനത്ഥസംഹിതോ, യോ ചായം അത്തകിലമഥാനുയോഗോ ദുക്ഖോ അനരിയോ അനത്ഥസംഹിതോ, ഏതേ ഖോ ഭിക്ഖവേ ഉഭോ അന്തേ അനുപഗമ്മ മജ്ഝിമാപടിപദാ തഥാഗതേന അഭിസമ്ബുദ്ധാ’’തി ഏവമാദിനാ ഭഗവതാ ഭാസിതം.

ആസവക്ഖയസുത്ത

പുച്ഛാ – തത്ഥേവ ആവുസോ കോടിഗാമവഗ്ഗേ പോരാണകേഹി ധമ്മസംഗാഹകമഹാഥേരേഹി പഞ്ചമം സംഗീതം ആസവക്ഖയസുത്തം ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ സമ്ബഹുലേ ഭിക്ഖൂ ആരബ്ഭ ‘‘ജാനതോഹം ഭിക്ഖവേ പസ്സതോ ആസവാനം ഖയം വദാമി, നോ അജാനതോ അപസ്സതോ. കിഞ്ച ഭിക്ഖവേ ജാനതോ പസ്സതോ ആസവാനം ഖയോ ഹോതി, ഇദം ദുക്ഖന്തി ഭിക്ഖവേ ജാനതോ പസ്സതോ ആസവാനം ഖയോ ഹോതി, അയം ദുക്ഖസമുദയോതി, അയം ദുക്ഖനിരോധോതി, അയം ദുക്ഖനിരോധഗാമിനീപടിപദാതി ജാനതോ പസ്സതോ ആസവാനം ഖയോ ഹോതി. ഏവം ഖോ ഭിക്ഖവേ ജാനതോ ഏവം പസ്സതോ ആസവാനം ഖയോ ഹോതി. തസ്മാതിഹ ഭിക്ഖവേ ‘‘ഇദം ദുക്ഖ’’ന്തി യോഗോ കരണീയോ, അയം ദുക്ഖസമുദയോതി, അയം ദുക്ഖനിരോധോതി, അയം ദുക്ഖനിരോധഗാമിനീപടിപദാതി യോഗോ കരണീയോ’’തി ഏവം ഖോ ഭഗവതാ ഭാസിതം.

സീസപാവനസുത്ത

പുച്ഛാ – തത്ഥേവ ആവുസോ സീസപാവനവഗ്ഗേ പോരാണകേഹി ധമ്മസംഗാഹകമഹാഥേരേഹി പഠമം സംഗീതം സീസപാവനസുത്തം ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – കോസമ്ബിയം ഭന്തേ സീസപാവനേ സമ്ബഹുലേ ഭിക്ഖൂ ആരബ്ഭ ‘‘തം കിം മഞ്ഞഥ ഭിക്ഖവേ, കതമം നുഖോ ബഹുതരം യാനി വാ മയാ പരിത്താനി സീസപാപണ്ണാനി പാണിനാ ഗഹിതാനി യദിദം ഉപരി സീസപാവനേ’’തി ഏവമാദിനാ ഭഗവതാ ഭാസിതം.

പഞ്ചഗതിപേയ്യാലവഗ്ഗ

പുച്ഛാ – തത്ഥേവ ആവുസോ പോരാണകേഹി ധമ്മസംഗാഹകമഹാഥേരേഹി പരിയോസാനഭാവേന സംഗീതോ പഞ്ചഗതിപേയ്യാലവഗ്ഗേ, ഭഗവതാ കത്ഥ കം ആരബ്ഭ കഥഞ്ച ഭാസിതോ.

വിസ്സജ്ജനാ – വേസാലിയം ഭന്തേ സമ്ബഹുലേ ഭിക്ഖൂ ആരബ്ഭ ‘‘തം കിം മഞ്ഞഥ ഭിക്ഖവേ, കതമം നു ഖോ ബഹുതരം, യോ വായം മയാ പരിത്തോ നഖസിഖായം പംസു ആരോപിതോ, അയം വാ മഹാപഥവീ’’തി ഏവമാദിനാ ഭഗവതാ ഭാസിതോ.

പുച്ഛാ – കേ ആവുസോ സിക്ഖന്തി.

വിസ്സജ്ജനാ – സേക്ഖാ ച ഭന്തേ പുഥുജ്ജനകല്യാണകാ ച സിക്ഖന്തി.

പുച്ഛാ – കേ ആവുസോ സിക്ഖിതസിക്ഖാ.

വിസ്സജ്ജനാ – അരഹന്തോ ഭന്തേ സിക്ഖിതസിക്ഖാ.

പുച്ഛാ – കത്ഥ ആവുസോ ഠിതം.

വിസ്സജ്ജനാ – സിക്ഖാകാമേസു ഭന്തേ ഠിതം.