ഓപമ്മസംയുത്ത

നഖസിഖസുത്ത

പുച്ഛാ – ഓപമ്മസംയുത്തേ ആവുസോ പോരാണകേഹി ധമ്മസംഗാഹകമഹാഥേരേഹി സംഗീതം നഖസിഖസുത്തം ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ സമ്ബഹുലേ ഭിക്ഖൂ ആരബ്ഭ ‘‘തം കിം മഞ്ഞഥ ഭിക്ഖവേ, കതമം നു ഖോ ബഹുതരം, യോ ചായം മയാ പരിത്തോ നഖസിഖായം പംസു ആരോപിതോ, യാ ചായം മഹാപഥവീ’’തി ഏവമാദിനാ ഭഗവതാ ഭാസിതം.

തം കിം മഞ്ഞഥ ഭിക്ഖവേ, കതമം നു ഖോ ബഹുതരം.

തസ്മാതിഹ ഭിക്ഖവേ ഏവം സിക്ഖിതബ്ബം.

ആണിസുത്ത

പുച്ഛാ – തത്ഥേവ ആവുസോ പോരാണകേഹി ധമ്മസംഗാഹകമഹാഥേരേഹി സംഗീതം ആണിസുത്തം ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – സാവത്ഥിയംയേവ ഭന്തേ സമ്ബഹുലേ ഭിക്ഖൂ ആരബ്ഭ ‘‘ഭൂതപുബ്ബം ഭിക്ഖവേ ദസാരഹാനം ആനകോ നാമ മുദിങ്ഗോ അഹോസി, തസ്സ ദസാരഹാ ആനകേ ഘടിതേ അഞ്ഞം ആണിം ഓദഹിംസു, അഹു ഖോ സോ ഭിക്ഖവേ സമയോ യം ആനകസ്സ മുദിങ്ഗസ്സ പോരാണം പോക്ഖരഫലകം അന്തരധായി, ആണിസങ്ഘാടോവ അവസിസ്സീ’’തി ഏവമാദിനാ ഭഗവതാ ഭാസിതം.