കസ്സപസംയുത്ത

ചന്ദൂപമസുത്ത

പുച്ഛാ – കസ്സപസംയുത്തേ പനാവുസോ ചന്ദൂപമസുത്തം ഭഗവതാ കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ സമ്ബഹുലേ ഭിക്ഖൂ ആരബ്ഭ ‘‘ചന്ദൂപമാ ഭിക്ഖവേ കുലാനി ഉപസങ്കമഥ അപകസ്സേവ കായം അപകസ്സ ചിത്തം നിച്ചനവകാ കുലേസു അപ്പഗബ്ഭാ. സേയ്യഥാപി ഭിക്ഖവേ പുരിസോ ജരുദപാനം വാ ഓലോകേയ്യ പബ്ബതവിസമം വാ നദീവിദുഗ്ഗം വാ അപകസ്സേവ കായം അപകസ്സ ചിത്തം. ഏവമേവ ഖോ ഭിക്ഖവേ ചന്ദൂപമാ കുലാനി ഉപസങ്കമഥ അപകസ്സേവ കായം അപകസ്സ ചിത്തം നിച്ചനവകാ കുലേസു അപ്പഗബ്ഭാ’’തി ഏവമാദിനാ ഭഗവതാ ഭാസിതം.

തം കിം മഞ്ഞഥ ഭിക്ഖവേ, കഥം രൂപാ ഭിക്ഖു അരഹതി കുലാനി ഉപസങ്കമിതും.

പുച്ഛാ – കഥഞ്ചാവുസോ തത്ഥ ഭഗവതാ പരിസുദ്ധാപരിസുദ്ധ ധമ്മദേസനം ദസ്സേത്വാ ഭിക്ഖൂനം ഓവാദോ ദിന്നോ.

വിസ്സജ്ജനാ – ‘‘തം കിം മഞ്ഞഥ ഭിക്ഖവേ, കഥം രൂപസ്സ ഭിക്ഖുനോ അപരിസുദ്ധാ ധമ്മദേസനാ ഹോതി, കഥം രൂപസ്സ ഭിക്ഖുനോ പരിസുദ്ധാ ധമ്മദേസനാ ഹോതീ’’തി ഏവമാദിനാ പരിസുദ്ധാപരിസുദ്ധധമ്മദേസനാ വിത്ഥാരതോ ദസ്സേത്വാ ‘‘കസ്സപേന വാ ഹി വോ ഭിക്ഖവേ ഓവദിസ്സാമി യോ വാ പനസ്സ കസ്സപസദിസോ, ഓവദിതേഹി ച പന വോ തഥത്തായ പടിപജ്ജിതബ്ബ’’ന്തി. ഏവം ഖോ ഭന്തേ ഭഗവതോ ഭിക്ഖൂനം ഓവാദോ ദിന്നോ.

യോ ഹി കോചി ഭിക്ഖവേ ഭിക്ഖു ഏവംചിത്തോ പരേസം ധമ്മം ദേസേതി ‘‘അഹോ വത മേ ധമ്മം സുണേയ്യും, സുത്വാ ച പന ധമ്മം പസീദേയ്യും, പസന്നാ ച മേ പസന്നാകാരം കരേയ്യും–

സ്വാക്ഖാതോ ഭഗവതാ ധമ്മോ സന്ദിട്ഠികോ അകാലികോ ഏഹി പസ്സികോ ഓപനേയ്യികോ പച്ചത്തം വേദിതബ്ബോ വിഞ്ഞൂഹി–

കസ്സപേന വാ ഹി വോ ഭിക്ഖവേ ഓവദിസ്സാമി യോ വാ പനസ്സ കസ്സപസദിസോ, ഓവദിതേഹി ച പന വോ തഥത്തായ പടിപജ്ജിതബ്ബം–

കുലൂപകസുത്ത

പുച്ഛാ – തേനാവുസോ ഭഗവതാ…പേ… സമ്മാസമ്ബുദ്ധേന കസ്സപസംയുത്തേ ചതുത്ഥം കുലൂപകസുത്തം കത്ഥ കം ആരബ്ഭ കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ സമ്ബഹുലേ ഭിക്ഖൂ ആരബ്ഭ ‘‘തം കിം മഞ്ഞഥ ഭിക്ഖവേ, കഥം രൂപോ ഭിക്ഖു അരഹതി കുലൂപകോ ഹോതും, കഥം രൂപോ ഭിക്ഖു ന അരഹതി കുലൂപകോ ഹോതു’’ന്തി ഏവമാദിനാ ഭഗവതാ ഭാസിതം.

കസ്സപേന വാ ഹി വോ ഭിക്ഖവേ ഓവദിസ്സാമി യോ വാ പനസ്സ കസ്സപസദിസോ, ഓവദിതേഹി ച പന വോ തഥത്തായ പടിപജ്ജിതബ്ബം.

ദുതിയ ഓവാദസുത്ത

പുച്ഛാ – തത്ഥേവാവുസോ ഭഗവതാ ദുതിയ ഓവാദസുത്തം കത്ഥ കേന സദ്ധിം കഥഞ്ച ഭാസിതം.

വിസ്സജ്ജനാ – രാജഗഹേ ഭന്തേ ആയസ്മതാ മഹാകസ്സപേന സദ്ധിം ‘‘ഓവദ കസ്സപ ഭിക്ഖൂ, കരോഹി കസ്സപ ഭിക്ഖൂനം ധമ്മിം കഥം, അഹം വാ കസ്സപ ഭിക്ഖൂ ഓവദേയ്യം ത്വം വാ, അഹം വാ ഭിക്ഖൂനം ധമ്മിം കഥം കരേയ്യം ത്വം വാ’’തി ഏവമാദിനാ ഭഗവതാ ഭാസിതം.

യസ്സ കസ്സചി ഭന്തേ സദ്ധാ നത്ഥി കുസലേസു ധമ്മേസു, ഹിരീ നത്ഥി. ഓത്തപ്പം നത്ഥി. വീരിയം നത്ഥി. പഞ്ഞാ നത്ഥി കുസലേസു ധമ്മേസു.

തതിയ ഓവാദസുത്ത

പുച്ഛാ – തത്ഥേവാവുസോ ഭഗവതാ തതിയഓവാദസുത്തം കത്ഥ കേന സദ്ധിം കഥഞ്ച ഭാസിതം.

വിസ്സജ്ജനാ – രാജഗഹേ ഭന്തേ ആയസ്മതായേവ മഹാകസ്സപേന സദ്ധിം ‘‘ഓവദ കസ്സപ ഭിക്ഖൂ. കരോഹി കസ്സപ ഭിക്ഖൂനം ധമ്മിം കഥം, അഹം വാ കസ്സപ ഭിക്ഖൂ ഓവദേയ്യം ത്വം വാ. അഹം വാ ഭിക്ഖൂനം ധമ്മം കഥം കരേയ്യം ത്വം വാ’’തി ഏവമാദിനാ ഭഗവതാ ഭാസിതം.

ദുബ്ബചാ ഖോ ഭന്തേ ഏതരഹി ഭിക്ഖൂ ദോവചസ്സകരണേഹി ധമ്മേഹി സമന്നാഗതാ അക്ഖമാ അപ്പദക്ഖിണഗ്ഗാഹിനോ അനുസാസനിം–

സദ്ധമ്മപ്പതിരൂപകസുത്ത

പുച്ഛാ – തത്ഥേവാവുസോ ഭഗവതാ പരിയോസാനം സദ്ധമ്മപ്പതിരൂപകസുത്തം കത്ഥ കം ആരബ്ഭ കിസ്മിം വത്ഥുസ്മിം കഥഞ്ച ഭാസിതം.

വിസ്സജ്ജനാ – സാവത്ഥിയം ഭന്തേ ആയസ്മന്തംയേവ മഹാകസ്സപം ആരബ്ഭ ഭാസിതം. ആയസ്മാ ഭന്തേ മഹാകസ്സപോ ഭഗവന്തം ഏതദേവോച ‘‘കോ നു ഖോ ഭന്തേ ഹേതു കോ പച്ചയോ, യേന പുബ്ബേ അപ്പതരാനി ചേവ സിക്ഖാപദാനി അഹേസും, ബഹുതരാ ച ഭിക്ഖൂ അഞ്ഞായ സണ്ഠഹിംസു. കോ പന ഭന്തേ ഹേതു കോ പച്ചയോ, യേനേതരഹി ബഹുതരാനി ചേവ സക്ഖാപദാനി അപ്പതരാ ച ഭിക്ഖൂ അഞ്ഞായ സണ്ഠഹന്തീ’’തി. തസ്മിം ഭന്തേ വത്ഥുസ്മിം ‘‘ഏവഞ്ചേതം കസ്സപ ഹോതി സത്തേസു ഹായമാനേസു സദ്ധമ്മേ അന്തരധായമാനേ ബഹുതരാനിചേവ സിക്ഖാപദാനി ഹോന്തി, അപ്പതരാച ഭിക്ഖൂ അഞ്ഞായ സണ്ഠഹന്തീ’’തി ഏവമാദിനാ ഭഗവതാ ഭാസിതം.