൫. പാരിച്ഛത്തകസുത്തം

൬൯. ‘‘യസ്മിം, ഭിക്ഖവേ, സമയേ ദേവാനം താവതിംസാനം പാരിച്ഛത്തകോ കോവിളാരോ പണ്ഡുപലാസോ ഹോതി, അത്തമനാ, ഭിക്ഖവേ, ദേവാ താവതിംസാ തസ്മിം സമയേ ഹോന്തി – ‘പണ്ഡുപലാസോ ദാനി പാരിച്ഛത്തകോ കോവിളാരോ നചിരസ്സേവ ദാനി പന്നപലാസോ ഭവിസ്സതീ’’’തി.

‘‘യസ്മിം, ഭിക്ഖവേ, സമയേ ദേവാനം താവതിംസാനം പാരിച്ഛത്തകോ കോവിളാരോ പന്നപലാസോ ഹോതി, അത്തമനാ, ഭിക്ഖവേ, ദേവാ താവതിംസാ തസ്മിം സമയേ ഹോന്തി – ‘പന്നപലാസോ ദാനി പാരിച്ഛത്തകോ കോവിളാരോ നചിരസ്സേവ ദാനി ജാലകജാതോ ഭവിസ്സതീ’’’തി.

‘‘യസ്മിം, ഭിക്ഖവേ, സമയേ ദേവാനം താവതിംസാനം പാരിച്ഛത്തകോ കോവിളാരോ ജാലകജാതോ ഹോതി, അത്തമനാ, ഭിക്ഖവേ, ദേവാ താവതിംസാ തസ്മിം സമയേ ഹോന്തി – ‘ജാലകജാതോ ദാനി പാരിച്ഛത്തകോ കോവിളാരോ നചിരസ്സേവ ദാനി ഖാരകജാതോ ഭവിസ്സതീ’’’തി.

‘‘യസ്മിം, ഭിക്ഖവേ, സമയേ ദേവാനം താവതിംസാനം പാരിച്ഛത്തകോ കോവിളാരോ ഖാരകജാതോ ഹോതി, അത്തമനാ, ഭിക്ഖവേ, ദേവാ താവതിംസാ തസ്മിം സമയേ ഹോന്തി – ‘ഖാരകജാതോ ദാനി പാരിച്ഛത്തകോ കോവിളാരോ നചിരസ്സേവ ദാനി കുടുമലകജാതോ [കുഡുമലകജാതോ (സീ. സ്യാ. പീ.)] ഭവിസ്സതീ’’’തി.

‘‘യസ്മിം, ഭിക്ഖവേ, സമയേ ദേവാനം താവതിംസാനം പാരിച്ഛത്തകോ കോവിളാരോ കുടുമലകജാതോ ഹോതി, അത്തമനാ, ഭിക്ഖവേ, ദേവാ താവതിംസാ തസ്മിം സമയേ ഹോന്തി – ‘കുടുമലകജാതോ ദാനി പാരിച്ഛത്തകോ കോവിളാരോ നചിരസ്സേവ ദാനി കോരകജാതോ [കോകാസകജാതോ (സീ. സ്യാ.), കോസകജാതോ (ക.)] ഭവിസ്സതീ’’’തി.

‘‘യസ്മിം, ഭിക്ഖവേ, സമയേ ദേവാനം താവതിംസാനം പാരിച്ഛത്തകോ കോവിളാരോ കോരകജാതോ ഹോതി, അത്തമനാ, ഭിക്ഖവേ, ദേവാ താവതിംസാ തസ്മിം സമയേ ഹോന്തി – ‘കോരകജാതോ ദാനി പാരിച്ഛത്തകോ കോവിളാരോ നചിരസ്സേവ ദാനി സബ്ബഫാലിഫുല്ലോ [സബ്ബപാലിഫുല്ലോ (സീ. പീ.)] ഭവിസ്സതീ’’’തി.

‘‘യസ്മിം, ഭിക്ഖവേ, സമയേ ദേവാനം താവതിംസാനം പാരിച്ഛത്തകോ കോവിളാരോ സബ്ബഫാലിഫുല്ലോ ഹോതി, അത്തമനാ, ഭിക്ഖവേ, ദേവാ താവതിംസാ പാരിച്ഛത്തകസ്സ കോവിളാരസ്സ മൂലേ ദിബ്ബേ ചത്താരോ മാസേ പഞ്ചഹി കാമഗുണേഹി സമപ്പിതാ സമങ്ഗീഭൂതാ പരിചാരേന്തി.

‘‘സബ്ബഫാലിഫുല്ലസ്സ ഖോ പന, ഭിക്ഖവേ, പാരിച്ഛത്തകസ്സ കോവിളാരസ്സ സമന്താ പഞ്ഞാസയോജനാനി ആഭായ ഫുടം ഹോതി, അനുവാതം യോജനസതം ഗന്ധോ ഗച്ഛതി, അയമാനുഭാവോ പാരിച്ഛത്തകസ്സ കോവിളാരസ്സ.

‘‘ഏവമേവം ഖോ, ഭിക്ഖവേ, യസ്മിം സമയേ അരിയസാവകോ അഗാരസ്മാ അനഗാരിയം പബ്ബജ്ജായ ചേതേതി, പണ്ഡുപലാസോ, ഭിക്ഖവേ, അരിയസാവകോ തസ്മിം സമയേ ഹോതി ദേവാനംവ താവതിംസാനം പാരിച്ഛത്തകോ കോവിളാരോ.

‘‘യസ്മിം, ഭിക്ഖവേ, സമയേ അരിയസാവകോ കേസമസ്സും ഓഹാരേത്വാ കാസായാനി വത്ഥാനി അച്ഛാദേത്വാ അഗാരസ്മാ അനഗാരിയം പബ്ബജിതോ ഹോതി, പന്നപലാസോ, ഭിക്ഖവേ, അരിയസാവകോ തസ്മിം സമയേ ഹോതി ദേവാനംവ താവതിംസാനം പാരിച്ഛത്തകോ കോവിളാരോ.

‘‘യസ്മിം, ഭിക്ഖവേ, സമയേ അരിയസാവകോ വിവിച്ചേവ കാമേഹി…പേ… പഠമം ഝാനം ഉപസമ്പജ്ജ വിഹരതി, ജാലകജാതോ, ഭിക്ഖവേ, അരിയസാവകോ തസ്മിം സമയേ ഹോതി ദേവാനംവ താവതിംസാനം പാരിച്ഛത്തകോ കോവിളാരോ.

‘‘യസ്മിം, ഭിക്ഖവേ, സമയേ അരിയസാവകോ വിതക്കവിചാരാനം വൂപസമാ…പേ… ദുതിയം ഝാനം ഉപസമ്പജ്ജ വിഹരതി, ഖാരകജാതോ, ഭിക്ഖവേ, അരിയസാവകോ തസ്മിം സമയേ ഹോതി ദേവാനംവ താവതിംസാനം പാരിച്ഛത്തകോ കോവിളാരോ.

‘‘യസ്മിം, ഭിക്ഖവേ, സമയേ അരിയസാവകോ പീതിയാ ച വിരാഗാ…പേ… തതിയം ഝാനം ഉപസമ്പജ്ജ വിഹരതി, കുടുമലകജാതോ, ഭിക്ഖവേ, അരിയസാവകോ തസ്മിം സമയേ ഹോതി ദേവാനംവ താവതിംസാനം പാരിച്ഛത്തകോ കോവിളാരോ.

‘‘യസ്മിം, ഭിക്ഖവേ, സമയേ അരിയസാവകോ സുഖസ്സ ച പഹാനാ ദുക്ഖസ്സ ച പഹാനാ…പേ… ചതുത്ഥം ഝാനം ഉപസമ്പജ്ജ വിഹരതി, കോരകജാതോ, ഭിക്ഖവേ, അരിയസാവകോ തസ്മിം സമയേ ഹോതി ദേവാനംവ താവതിംസാനം പാരിച്ഛത്തകോ കോവിളാരോ.

‘‘യസ്മിം, ഭിക്ഖവേ, സമയേ അരിയസാവകോ ആസവാനം ഖയാ…പേ… സച്ഛികത്വാ ഉപസമ്പജ്ജ വിഹരതി, സബ്ബഫാലിഫുല്ലോ, ഭിക്ഖവേ, അരിയസാവകോ തസ്മിം സമയേ ഹോതി ദേവാനംവ താവതിംസാനം പാരിച്ഛത്തകോ കോവിളാരോ.

‘‘തസ്മിം, ഭിക്ഖവേ, സമയേ ഭുമ്മാ ദേവാ സദ്ദമനുസ്സാവേന്തി – ‘ഏസോ ഇത്ഥന്നാമോ ആയസ്മാ ഇത്ഥന്നാമസ്സ ആയസ്മതോ സദ്ധിവിഹാരികോ അമുകമ്ഹാ ഗാമാ വാ നിഗമാ വാ അഗാരസ്മാ അനഗാരിയം പബ്ബജിതോ ആസവാനം ഖയാ അനാസവം ചേതോവിമുത്തിം പഞ്ഞാവിമുത്തിം ദിട്ഠേവ ധമ്മേ സയം അഭിഞ്ഞാ സച്ഛികത്വാ ഉപസമ്പജ്ജ വിഹരതീ’തി. ഭുമ്മാനം ദേവാനം സദ്ദം സുത്വാ ചാതുമഹാരാജികാ ദേവാ…പേ… താവതിംസാ ദേവാ… യാമാ ദേവാ… തുസിതാ ദേവാ… നിമ്മാനരതീ ദേവാ… പരനിമ്മിതവസവത്തീ ദേവാ… ബ്രഹ്മകായികാ ദേവാ സദ്ദമനുസ്സാവേന്തി – ‘ഏസോ ഇത്ഥന്നാമോ ആയസ്മാ ഇത്ഥന്നാമസ്സ ആയസ്മതോ സദ്ധിവിഹാരികോ അമുകമ്ഹാ ഗാമാ വാ നിഗമാ വാ അഗാരസ്മാ അനഗാരിയം പബ്ബജിതോ ആസവാനം ഖയാ അനാസവം ചേതോവിമുത്തിം പഞ്ഞാവിമുത്തിം ദിട്ഠേവ ധമ്മേ സയം അഭിഞ്ഞാ സച്ഛികത്വാ ഉപസമ്പജ്ജ വിഹരതീ’തി. ഇതിഹ തേന ഖണേന തേന മുഹുത്തേന യാവ ബ്രഹ്മലോകാ സദ്ദോ [സാധുകാരസദ്ദോ (സീ. അട്ഠ., ക. അട്ഠ.)] അബ്ഭുഗ്ഗച്ഛതി, അയമാനുഭാവോ ഖീണാസവസ്സ ഭിക്ഖുനോ’’തി. പഞ്ചമം.