൯. കുലസുത്തം

൧൯൯. ‘‘യം, ഭിക്ഖവേ, സീലവന്തോ പബ്ബജിതാ കുലം ഉപസങ്കമന്തി, തത്ഥ മനുസ്സാ പഞ്ചഹി ഠാനേഹി ബഹും പുഞ്ഞം പസവന്തി. കതമേഹി പഞ്ചഹി? യസ്മിം, ഭിക്ഖവേ, സമയേ സീലവന്തേ പബ്ബജിതേ കുലം ഉപസങ്കമന്തേ മനുസ്സാ ദിസ്വാ ചിത്താനി പസാദേന്തി [പസീദന്തി (സ്യാ. കം. ക.)], സഗ്ഗസംവത്തനികം, ഭിക്ഖവേ, തം കുലം തസ്മിം സമയേ പടിപദം പടിപന്നം ഹോതി.

‘‘യസ്മിം, ഭിക്ഖവേ, സമയേ സീലവന്തേ പബ്ബജിതേ കുലം ഉപസങ്കമന്തേ മനുസ്സാ പച്ചുട്ഠേന്തി അഭിവാദേന്തി ആസനം ദേന്തി, ഉച്ചാകുലീനസംവത്തനികം, ഭിക്ഖവേ, തം കുലം തസ്മിം സമയേ പടിപദം പടിപന്നം ഹോതി.

‘‘യസ്മിം, ഭിക്ഖവേ, സമയേ സീലവന്തേ പബ്ബജിതേ കുലം ഉപസങ്കമന്തേ മനുസ്സാ മച്ഛേരമലം പടിവിനേന്തി [പടിവിനോദേന്തി (സീ. പീ.)], മഹേസക്ഖസംവത്തനികം, ഭിക്ഖവേ, തം കുലം തസ്മിം സമയേ പടിപദം പടിപന്നം ഹോതി.

‘‘യസ്മിം, ഭിക്ഖവേ, സമയേ സീലവന്തേ പബ്ബജിതേ കുലം ഉപസങ്കമന്തേ മനുസ്സാ യഥാസത്തി യഥാബലം സംവിഭജന്തി, മഹാഭോഗസംവത്തനികം, ഭിക്ഖവേ, തം കുലം തസ്മിം സമയേ പടിപദം പടിപന്നം ഹോതി.

‘‘യസ്മിം, ഭിക്ഖവേ, സമയേ സീലവന്തേ പബ്ബജിതേ കുലം ഉപസങ്കമന്തേ മനുസ്സാ പരിപുച്ഛന്തി പരിപഞ്ഹന്തി ധമ്മം സുണന്തി, മഹാപഞ്ഞാസംവത്തനികം, ഭിക്ഖവേ, തം കുലം തസ്മിം സമയേ പടിപദം പടിപന്നം ഹോതി. യം, ഭിക്ഖവേ, സീലവന്തോ പബ്ബജിതാ കുലം ഉപസങ്കമന്തി, തത്ഥ മനുസ്സാ ഇമേഹി പഞ്ചഹി ഠാനേഹി ബഹും പുഞ്ഞം പസവന്തീ’’തി. നവമം.