൧. സോണസുത്തം

൧൯൧. ‘‘പഞ്ചിമേ, ഭിക്ഖവേ, പോരാണാ ബ്രാഹ്മണധമ്മാ ഏതരഹി സുനഖേസു സന്ദിസ്സന്തി, നോ ബ്രാഹ്മണേസു. കതമേ പഞ്ച? പുബ്ബേ സുദം [പുബ്ബസ്സുദം (ക.)], ഭിക്ഖവേ, ബ്രാഹ്മണാ ബ്രാഹ്മണിംയേവ ഗച്ഛന്തി, നോ അബ്രാഹ്മണിം. ഏതരഹി, ഭിക്ഖവേ, ബ്രാഹ്മണാ ബ്രാഹ്മണിമ്പി ഗച്ഛന്തി, അബ്രാഹ്മണിമ്പി ഗച്ഛന്തി. ഏതരഹി, ഭിക്ഖവേ, സുനഖാ സുനഖിംയേവ ഗച്ഛന്തി, നോ അസുനഖിം. അയം, ഭിക്ഖവേ, പഠമോ പോരാണോ ബ്രാഹ്മണധമ്മോ ഏതരഹി സുനഖേസു സന്ദിസ്സതി, നോ ബ്രാഹ്മണേസു.

‘‘പുബ്ബേ സുദം, ഭിക്ഖവേ, ബ്രാഹ്മണാ ബ്രാഹ്മണിം ഉതുനിംയേവ ഗച്ഛന്തി, നോ അനുതുനിം. ഏതരഹി, ഭിക്ഖവേ, ബ്രാഹ്മണാ ബ്രാഹ്മണിം ഉതുനിമ്പി ഗച്ഛന്തി, അനുതുനിമ്പി ഗച്ഛന്തി. ഏതരഹി, ഭിക്ഖവേ, സുനഖാ സുനഖിം ഉതുനിംയേവ ഗച്ഛന്തി, നോ അനുതുനിം. അയം, ഭിക്ഖവേ, ദുതിയോ പോരാണോ ബ്രാഹ്മണധമ്മോ ഏതരഹി സുനഖേസു സന്ദിസ്സതി, നോ ബ്രാഹ്മണേസു.

‘‘പുബ്ബേ സുദം, ഭിക്ഖവേ, ബ്രാഹ്മണാ ബ്രാഹ്മണിം നേവ കിണന്തി നോ വിക്കിണന്തി, സമ്പിയേനേവ സംവാസം സംബന്ധായ [സംസഗ്ഗത്ഥായ (സീ. പീ.)] സംപവത്തേന്തി. ഏതരഹി, ഭിക്ഖവേ, ബ്രാഹ്മണാ ബ്രാഹ്മണിം കിണന്തിപി വിക്കിണന്തിപി, സമ്പിയേനപി സംവാസം സംബന്ധായ സംപവത്തേന്തി. ഏതരഹി, ഭിക്ഖവേ, സുനഖാ സുനഖിം നേവ കിണന്തി നോ വിക്കിണന്തി, സമ്പിയേനേവ സംവാസം സംബന്ധായ സംപവത്തേന്തി. അയം, ഭിക്ഖവേ, തതിയോ പോരാണോ ബ്രാഹ്മണധമ്മോ ഏതരഹി സുനഖേസു സന്ദിസ്സതി, നോ ബ്രാഹ്മണേസു.

‘‘പുബ്ബേ സുദം, ഭിക്ഖവേ, ബ്രാഹ്മണാ ന സന്നിധിം കരോന്തി ധനസ്സപി ധഞ്ഞസ്സപി രജതസ്സപി ജാതരൂപസ്സപി. ഏതരഹി, ഭിക്ഖവേ, ബ്രാഹ്മണാ സന്നിധിം കരോന്തി ധനസ്സപി ധഞ്ഞസ്സപി രജതസ്സപി ജാതരൂപസ്സപി. ഏതരഹി, ഭിക്ഖവേ, സുനഖാ ന സന്നിധിം കരോന്തി ധനസ്സപി ധഞ്ഞസ്സപി രജതസ്സപി ജാതരൂപസ്സപി. അയം, ഭിക്ഖവേ, ചതുത്ഥോ പോരാണോ ബ്രാഹ്മണധമ്മോ ഏതരഹി സുനഖേസു സന്ദിസ്സതി, നോ ബ്രാഹ്മണേസു.

‘‘പുബ്ബേ സുദം, ഭിക്ഖവേ, ബ്രാഹ്മണാ സായം സായമാസായ പാതോ പാതരാസായ ഭിക്ഖം പരിയേസന്തി. ഏതരഹി, ഭിക്ഖവേ, ബ്രാഹ്മണാ യാവദത്ഥം ഉദരാവദേഹകം ഭുഞ്ജിത്വാ അവസേസം ആദായ പക്കമന്തി. ഏതരഹി, ഭിക്ഖവേ, സുനഖാ സായം സായമാസായ പാതോ പാതരാസായ ഭിക്ഖം പരിയേസന്തി. അയം, ഭിക്ഖവേ, പഞ്ചമോ പോരാണോ ബ്രാഹ്മണധമ്മോ ഏതരഹി സുനഖേസു സന്ദിസ്സതി, നോ ബ്രാഹ്മണേസു. ഇമേ ഖോ, ഭിക്ഖവേ, പഞ്ച പോരാണാ ബ്രാഹ്മണധമ്മാ ഏതരഹി സുനഖേസു സന്ദിസ്സന്തി, നോ ബ്രാഹ്മണേസൂ’’തി. പഠമം.