൫. ചണ്ഡാലസുത്തം

൧൭൫. ‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഉപാസകോ ഉപാസകചണ്ഡാലോ ച ഹോതി ഉപാസകമലഞ്ച ഉപാസകപതികുട്ഠോ ച [ഉപാസകപതികിട്ഠോ ച (സീ. സ്യാ. കം. പീ.)]. കതമേഹി പഞ്ചഹി? അസ്സദ്ധോ ഹോതി; ദുസ്സീലോ ഹോതി; കോതൂഹലമങ്ഗലികോ ഹോതി, മങ്ഗലം പച്ചേതി നോ കമ്മം; ഇതോ ച ബഹിദ്ധാ ദക്ഖിണേയ്യം ഗവേസതി; തത്ഥ ച പുബ്ബകാരം കരോതി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഉപാസകോ ഉപാസകചണ്ഡാലോ ച ഹോതി ഉപാസകമലഞ്ച ഉപാസകപതികുട്ഠോ ച.

‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഉപാസകോ ഉപാസകരതനഞ്ച ഹോതി ഉപാസകപദുമഞ്ച ഉപാസകപുണ്ഡരീകഞ്ച [ഉപാസകപുണ്ഡരീകോ ച (പീ. ക.)]. കതമേഹി പഞ്ചഹി? സദ്ധോ ഹോതി; സീലവാ ഹോതി; അകോതൂഹലമങ്ഗലികോ ഹോതി, കമ്മം പച്ചേതി നോ മങ്ഗലം; ന ഇതോ ബഹിദ്ധാ ദക്ഖിണേയ്യം ഗവേസതി; ഇധ ച പുബ്ബകാരം കരോതി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഉപാസകോ ഉപാസകരതനഞ്ച ഹോതി ഉപാസകപദുമഞ്ച ഉപാസകപുണ്ഡരീകഞ്ചാ’’തി. പഞ്ചമം.