൯. ഖിപ്പനിസന്തിസുത്തം

൧൬൯. അഥ ഖോ ആയസ്മാ ആനന്ദോ യേനായസ്മാ സാരിപുത്തോ തേനുപസങ്കമി; ഉപസങ്കമിത്വാ ആയസ്മതാ സാരിപുത്തേന സദ്ധിം സമ്മോദി. സമ്മോദനീയം കഥം സാരണീയം [സാരാണീയം (സീ. സ്യാ. കം. പീ.)] വീതിസാരേത്വാ ഏകമന്തം നിസീദി. ഏകമന്തം നിസിന്നോ ഖോ ആയസ്മാ ആനന്ദോ ആയസ്മന്തം സാരിപുത്തം ഏതദവോച –

‘‘കിത്താവതാ നു ഖോ, ആവുസോ സാരിപുത്ത, ഭിക്ഖു ഖിപ്പനിസന്തി ച ഹോതി, കുസലേസു ധമ്മേസു സുഗ്ഗഹിതഗ്ഗാഹീ ച, ബഹുഞ്ച ഗണ്ഹാതി, ഗഹിതഞ്ചസ്സ നപ്പമുസ്സതീ’’തി? ‘‘ആയസ്മാ ഖോ ആനന്ദോ ബഹുസ്സുതോ. പടിഭാതു ആയസ്മന്തംയേവ ആനന്ദ’’ന്തി. ‘‘തേനഹാവുസോ സാരിപുത്ത, സുണാഹി, സാധുകം മനസി കരോഹി; ഭാസിസ്സാമീ’’തി. ‘‘ഏവമാവുസോ’’തി ഖോ ആയസ്മാ സാരിപുത്തോ ആയസ്മതോ ആനന്ദസ്സ പച്ചസ്സോസി. ആയസ്മാ ആനന്ദോ ഏതദവോച –

‘‘ഇധാവുസോ സാരിപുത്ത, ഭിക്ഖു അത്ഥകുസലോ ച ഹോതി, ധമ്മകുസലോ ച, ബ്യഞ്ജനകുസലോ ച, നിരുത്തികുസലോ ച, പുബ്ബാപരകുസലോ ച. ഏത്താവതാ ഖോ, ആവുസോ സാരിപുത്ത, ഭിക്ഖു ഖിപ്പനിസന്തി ച ഹോതി കുസലേസു ധമ്മേസു, സുഗ്ഗഹിതഗ്ഗാഹീ ച, ബഹുഞ്ച ഗണ്ഹാതി, ഗഹിതഞ്ചസ്സ നപ്പമുസ്സതീ’’തി. ‘‘അച്ഛരിയം, ആവുസോ! അബ്ഭുതം, ആവുസോ!! യാവ സുഭാസിതം ചിദം ആയസ്മതാ ആനന്ദേന. ഇമേഹി ച മയം പഞ്ചഹി ധമ്മേഹി സമന്നാഗതം ആയസ്മന്തം ആനന്ദം ധാരേമ – ‘ആയസ്മാ ആനന്ദോ അത്ഥകുസലോ ധമ്മകുസലോ ബ്യഞ്ജനകുസലോ നിരുത്തികുസലോ പുബ്ബാപരകുസലോ’’’തി. നവമം.