൬. മിത്തസുത്തം

൧൪൬. ‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു മിത്തോ ന സേവിതബ്ബോ. കതമേഹി പഞ്ചഹി? കമ്മന്തം കാരേതി, അധികരണം ആദിയതി, പാമോക്ഖേസു ഭിക്ഖൂസു പടിവിരുദ്ധോ ഹോതി, ദീഘചാരികം അനവത്ഥചാരികം [അവത്ഥാനചാരികം (സ്യാ.)] അനുയുത്തോ വിഹരതി, നപ്പടിബലോ ഹോതി കാലേന കാലം ധമ്മിയാ കഥായ സന്ദസ്സേതും സമാദപേതും സമുത്തേജേതും സമ്പഹംസേതും. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു മിത്തോ ന സേവിതബ്ബോ.

‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു മിത്തോ സേവിതബ്ബോ. കതമേഹി പഞ്ചഹി? ന കമ്മന്തം കാരേതി, ന അധികരണം ആദിയതി, ന പാമോക്ഖേസു ഭിക്ഖൂസു പടിവിരുദ്ധോ ഹോതി, ന ദീഘചാരികം അനവത്ഥചാരികം അനുയുത്തോ വിഹരതി, പടിബലോ ഹോതി കാലേന കാലം ധമ്മിയാ കഥായ സന്ദസ്സേതും സമാദപേതും സമുത്തേജേതും സമ്പഹംസേതും. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു മിത്തോ സേവിതബ്ബോ’’തി. ഛട്ഠം.