൪. തികണ്ഡകീസുത്തം

൧൪൪. ഏകം സമയം ഭഗവാ സാകേതേ വിഹരതി തികണ്ഡകീവനേ [കണ്ഡകീവനേ (സം. നി. ൫.൯൦൨)]. തത്ര ഖോ ഭഗവാ ഭിക്ഖൂ ആമന്തേസി – ‘‘ഭിക്ഖവോ’’തി. ‘‘ഭദന്തേ’’തി തേ ഭിക്ഖൂ ഭഗവതോ പച്ചസ്സോസും. ഭഗവാ ഏതദവോച –

‘‘സാധു, ഭിക്ഖവേ, ഭിക്ഖു കാലേന കാലം അപ്പടികൂലേ പടികൂലസഞ്ഞീ [അപ്പടിക്കൂലേ പടിക്കൂലസഞ്ഞീ (സീ. സ്യാ. കം. പീ.)] വിഹരേയ്യ. സാധു, ഭിക്ഖവേ, ഭിക്ഖു കാലേന കാലം പടികൂലേ അപ്പടികൂലസഞ്ഞീ വിഹരേയ്യ. സാധു, ഭിക്ഖവേ, ഭിക്ഖു കാലേന കാലം അപ്പടികൂലേ ച പടികൂലേ ച പടികൂലസഞ്ഞീ വിഹരേയ്യ. സാധു, ഭിക്ഖവേ, ഭിക്ഖു കാലേന കാലം പടികൂലേ ച അപ്പടികൂലേ ച അപ്പടികൂലസഞ്ഞീ വിഹരേയ്യ. സാധു, ഭിക്ഖവേ, ഭിക്ഖു കാലേന കാലം പടികൂലഞ്ച അപ്പടികൂലഞ്ച തദുഭയം അഭിനിവജ്ജേത്വാ ഉപേക്ഖകോ വിഹരേയ്യ സതോ സമ്പജാനോ.

‘‘കിഞ്ച [കഥഞ്ച (സീ. പീ. ക.)], ഭിക്ഖവേ, ഭിക്ഖു അത്ഥവസം പടിച്ച അപ്പടികൂലേ പടികൂലസഞ്ഞീ വിഹരേയ്യ? ‘മാ മേ രജനീയേസു ധമ്മേസു രാഗോ ഉദപാദീ’തി – ഇദം ഖോ, ഭിക്ഖവേ, ഭിക്ഖു അത്ഥവസം പടിച്ച അപ്പടികൂലേ പടികൂലസഞ്ഞീ വിഹരേയ്യ.

‘‘കിഞ്ച, ഭിക്ഖവേ, ഭിക്ഖു അത്ഥവസം പടിച്ച പടികൂലേ അപ്പടികൂലസഞ്ഞീ വിഹരേയ്യ? ‘മാ മേ ദോസനീയേസു ധമ്മേസു ദോസോ ഉദപാദീ’തി – ഇദം ഖോ, ഭിക്ഖവേ, ഭിക്ഖു അത്ഥവസം പടിച്ച പടികൂലേ അപ്പടികൂലസഞ്ഞീ വിഹരേയ്യ.

‘‘കിഞ്ച, ഭിക്ഖവേ, ഭിക്ഖു അത്ഥവസം പടിച്ച അപ്പടികൂലേ ച പടികൂലേ ച പടികൂലസഞ്ഞീ വിഹരേയ്യ? ‘മാ മേ രജനീയേസു ധമ്മേസു രാഗോ ഉദപാദി, മാ മേ ദോസനീയേസു ധമ്മേസു ദോസോ ഉദപാദീ’തി – ഇദം ഖോ, ഭിക്ഖവേ, ഭിക്ഖു അത്ഥവസം പടിച്ച അപ്പടികൂലേ ച പടികൂലേ ച പടികൂലസഞ്ഞീ വിഹരേയ്യ.

‘‘കിഞ്ച, ഭിക്ഖവേ, ഭിക്ഖു അത്ഥവസം പടിച്ച പടികൂലേ ച അപ്പടികൂലേ ച അപ്പടികൂലസഞ്ഞീ വിഹരേയ്യ? ‘മാ മേ ദോസനീയേസു ധമ്മേസു ദോസോ ഉദപാദി, മാ മേ രജനീയേസു ധമ്മേസു രാഗോ ഉദപാദീ’തി – ഇദം ഖോ, ഭിക്ഖവേ, ഭിക്ഖു അത്ഥവസം പടിച്ച പടികൂലേ ച അപ്പടികൂലേ ച അപ്പടികൂലസഞ്ഞീ വിഹരേയ്യ.

‘‘കിഞ്ച, ഭിക്ഖവേ, ഭിക്ഖു അത്ഥവസം പടിച്ച പടികൂലഞ്ച അപ്പടികൂലഞ്ച തദുഭയം അഭിനിവജ്ജേത്വാ ഉപേക്ഖകോ വിഹരേയ്യ? ‘സതോ സമ്പജാനോ മാ മേ ക്വചനി [ക്വചിനി (സീ. സ്യാ. പീ.)] കത്ഥചി കിഞ്ചനം [കിഞ്ചന (സീ. പീ.)] രജനീയേസു ധമ്മേസു രാഗോ ഉദപാദി, മാ മേ ക്വചനി കത്ഥചി കിഞ്ചനം ദോസനീയേസു ധമ്മേസു ദോസോ ഉദപാദി, മാ മേ ക്വചനി കത്ഥചി കിഞ്ചനം മോഹനീയേസു ധമ്മേസു മോഹോ ഉദപാദീ’തി – ഇദം ഖോ, ഭിക്ഖവേ, ഭിക്ഖു അത്ഥവസം പടിച്ച പടികൂലഞ്ച അപ്പടികൂലഞ്ച തദുഭയം അഭിനിവജ്ജേത്വാ ഉപേക്ഖകോ വിഹരേയ്യ സതോ സമ്പജാനോ’’തി. ചതുത്ഥം.