൭. വപകാസസുത്തം

൧൨൭. ‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു നാലം സങ്ഘമ്ഹാ വപകാസിതും [വി + അപ + കാസിതും = വപകാസിതും]. കതമേഹി പഞ്ചഹി? ഇധ, ഭിക്ഖവേ, ഭിക്ഖു അസന്തുട്ഠോ ഹോതി ഇതരീതരേന ചീവരേന, അസന്തുട്ഠോ ഹോതി ഇതരീതരേന പിണ്ഡപാതേന, അസന്തുട്ഠോ ഹോതി ഇതരീതരേന സേനാസനേന, അസന്തുട്ഠോ ഹോതി ഇതരീതരേന ഗിലാനപ്പച്ചയഭേസജ്ജപരിക്ഖാരേന, കാമസങ്കപ്പബഹുലോ ച വിഹരതി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു നാലം സങ്ഘമ്ഹാ വപകാസിതും.

‘‘പഞ്ചഹി, ഭിക്ഖവേ, ധമ്മേഹി സമന്നാഗതോ ഭിക്ഖു അലം സങ്ഘമ്ഹാ വപകാസിതും. കതമേഹി പഞ്ചഹി? ഇധ, ഭിക്ഖവേ, ഭിക്ഖു സന്തുട്ഠോ ഹോതി ഇതരീതരേന ചീവരേന, സന്തുട്ഠോ ഹോതി ഇതരീതരേന പിണ്ഡപാതേന, സന്തുട്ഠോ ഹോതി ഇതരീതരേന സേനാസനേന, സന്തുട്ഠോ ഹോതി ഇതരീതരേന ഗിലാനപ്പച്ചയഭേസജ്ജപരിക്ഖാരേന, നേക്ഖമ്മസങ്കപ്പബഹുലോ [ന കാമസങ്കപ്പബഹുലോ (ക.)] ച വിഹരതി. ഇമേഹി ഖോ, ഭിക്ഖവേ, പഞ്ചഹി ധമ്മേഹി സമന്നാഗതോ ഭിക്ഖു അലം സങ്ഘമ്ഹാ വപകാസിതു’’ന്തി. സത്തമം.