൪. സമയസുത്തം

൫൪. ‘‘പഞ്ചിമേ, ഭിക്ഖവേ, അസമയാ പധാനായ. കതമേ പഞ്ച? ഇധ, ഭിക്ഖവേ, ഭിക്ഖു ജിണ്ണോ ഹോതി ജരായാഭിഭൂതോ. അയം, ഭിക്ഖവേ, പഠമോ അസമയോ പധാനായ.

‘‘പുന ചപരം, ഭിക്ഖവേ, ഭിക്ഖു ബ്യാധിതോ ഹോതി ബ്യാധിനാഭിഭൂതോ. അയം, ഭിക്ഖവേ, ദുതിയോ അസമയോ പധാനായ.

‘‘പുന ചപരം, ഭിക്ഖവേ, ദുബ്ഭിക്ഖം ഹോതി ദുസ്സസ്സം ദുല്ലഭപിണ്ഡം, ന സുകരം ഉഞ്ഛേന പഗ്ഗഹേന യാപേതും. അയം, ഭിക്ഖവേ, തതിയോ അസമയോ പധാനായ.

‘‘പുന ചപരം, ഭിക്ഖവേ, ഭയം ഹോതി അടവിസങ്കോപോ, ചക്കസമാരൂള്ഹാ ജാനപദാ പരിയായന്തി. അയം, ഭിക്ഖവേ, ചതുത്ഥോ അസമയോ പധാനായ.

‘‘പുന ചപരം, ഭിക്ഖവേ, സങ്ഘോ ഭിന്നോ ഹോതി. സങ്ഘേ ഖോ പന, ഭിക്ഖവേ, ഭിന്നേ അഞ്ഞമഞ്ഞം അക്കോസാ ച ഹോന്തി, അഞ്ഞമഞ്ഞം പരിഭാസാ ച ഹോന്തി, അഞ്ഞമഞ്ഞം പരിക്ഖേപാ ച ഹോന്തി, അഞ്ഞമഞ്ഞം പരിച്ചജാ ച ഹോന്തി. തത്ഥ അപ്പസന്നാ ചേവ നപ്പസീദന്തി, പസന്നാനഞ്ച ഏകച്ചാനം അഞ്ഞഥത്തം ഹോതി. അയം, ഭിക്ഖവേ, പഞ്ചമോ അസമയോ പധാനായ. ഇമേ ഖോ, ഭിക്ഖവേ, പഞ്ച അസമയാ പധാനായാതി.

‘‘പഞ്ചിമേ, ഭിക്ഖവേ, സമയാ പധാനായ. കതമേ പഞ്ച? ഇധ, ഭിക്ഖവേ, ഭിക്ഖു ദഹരോ ഹോതി യുവാ സുസു കാളകേസോ ഭദ്രേന യോബ്ബനേന സമന്നാഗതോ പഠമേന വയസാ. അയം, ഭിക്ഖവേ, പഠമോ സമയോ പധാനായ.

‘‘പുന ചപരം, ഭിക്ഖവേ, ഭിക്ഖു അപ്പാബാധോ ഹോതി അപ്പാതങ്കോ, സമവേപാകിനിയാ ഗഹണിയാ സമന്നാഗതോ നാതിസീതായ നാച്ചുണ്ഹായ മജ്ഝിമായ പധാനക്ഖമായ. അയം, ഭിക്ഖവേ, ദുതിയോ സമയോ പധാനായ.

‘‘പുന ചപരം, ഭിക്ഖവേ, സുഭിക്ഖം ഹോതി സുസസ്സം സുലഭപിണ്ഡം, സുകരം ഉഞ്ഛേന പഗ്ഗഹേന യാപേതും. അയം, ഭിക്ഖവേ, തതിയോ സമയോ പധാനായ.

‘‘പുന ചപരം, ഭിക്ഖവേ, മനുസ്സാ സമഗ്ഗാ സമ്മോദമാനാ അവിവദമാനാ ഖീരോദകീഭൂതാ അഞ്ഞമഞ്ഞം പിയചക്ഖൂഹി സമ്പസ്സന്താ വിഹരന്തി. അയം, ഭിക്ഖവേ, ചതുത്ഥോ സമയോ പധാനായ.

‘‘പുന ചപരം, ഭിക്ഖവേ, സങ്ഘോ സമഗ്ഗോ സമ്മോദമാനോ അവിവദമാനോ ഏകുദ്ദേസോ ഫാസു വിഹരതി. സങ്ഘേ ഖോ പന, ഭിക്ഖവേ, സമഗ്ഗേ ന ചേവ അഞ്ഞമഞ്ഞം അക്കോസാ ഹോന്തി, ന ച അഞ്ഞമഞ്ഞം പരിഭാസാ ഹോന്തി, ന ച അഞ്ഞമഞ്ഞം പരിക്ഖേപാ ഹോന്തി, ന ച അഞ്ഞമഞ്ഞം പരിച്ചജാ ഹോന്തി. തത്ഥ അപ്പസന്നാ ചേവ പസീദന്തി, പസന്നാനഞ്ച ഭിയ്യോഭാവോ [ഭീയ്യോഭാവായ (ക.)] ഹോതി. അയം, ഭിക്ഖവേ, പഞ്ചമോ സമയോ പധാനായ. ഇമേ ഖോ, ഭിക്ഖവേ, പഞ്ച സമയാ പധാനായാ’’തി. ചതുത്ഥം.