൪. സേയ്യാസുത്തം

൨൪൬. ‘‘ചതസ്സോ ഇമാ, ഭിക്ഖവേ, സേയ്യാ. കതമാ ചതസ്സോ? പേതസേയ്യാ, കാമഭോഗിസേയ്യാ, സീഹസേയ്യാ, തഥാഗതസേയ്യാ. കതമാ ച, ഭിക്ഖവേ, പേതസേയ്യാ? യേഭുയ്യേന, ഭിക്ഖവേ, പേതാ ഉത്താനാ സേന്തി; അയം വുച്ചതി, ഭിക്ഖവേ, പേതസേയ്യാ.

‘‘കതമാ ച, ഭിക്ഖവേ, കാമഭോഗിസേയ്യാ? യേഭുയ്യേന, ഭിക്ഖവേ, കാമഭോഗീ വാമേന പസ്സേന സേന്തി; അയം വുച്ചതി, ഭിക്ഖവേ, കാമഭോഗിസേയ്യാ.

‘‘കതമാ ച, ഭിക്ഖവേ, സീഹസേയ്യാ? സീഹോ, ഭിക്ഖവേ, മിഗരാജാ ദക്ഖിണേന പസ്സേന സേയ്യം കപ്പേതി, പാദേ പാദം അച്ചാധായ, അന്തരസത്ഥിമ്ഹി നങ്ഗുട്ഠം അനുപക്ഖിപിത്വാ. സോ പടിബുജ്ഝിത്വാ പുരിമം കായം അബ്ഭുന്നാമേത്വാ പച്ഛിമം കായം അനുവിലോകേതി. സചേ, ഭിക്ഖവേ, സീഹോ മിഗരാജാ കിഞ്ചി പസ്സതി കായസ്സ വിക്ഖിത്തം വാ വിസടം വാ, തേന, ഭിക്ഖവേ, സീഹോ മിഗരാജാ അനത്തമനോ ഹോതി. സചേ പന, ഭിക്ഖവേ, സീഹോ മിഗരാജാ ന കിഞ്ചി പസ്സതി കായസ്സ വിക്ഖിത്തം വാ വിസടം വാ, തേന, ഭിക്ഖവേ, സീഹോ മിഗരാജാ അത്തമനോ ഹോതി. അയം വുച്ചതി, ഭിക്ഖവേ, സീഹസേയ്യാ.

‘‘കതമാ ച, ഭിക്ഖവേ, തഥാഗതസേയ്യാ? ഇധ, ഭിക്ഖവേ, തഥാഗതോ വിവിച്ചേവ കാമേഹി…പേ… ചതുത്ഥം ഝാനം ഉപസമ്പജ്ജ വിഹരതി. അയം വുച്ചതി, ഭിക്ഖവേ, തഥാഗതസേയ്യാ. ഇമാ ഖോ, ഭിക്ഖവേ, ചതസ്സോ സേയ്യാ’’തി. ചതുത്ഥം.