(൨൨) ൨. പരിസാവഗ്ഗോ

൧. പരിസാസുത്തം

൨൧൧. ‘‘ചത്താരോമേ, ഭിക്ഖവേ, പരിസദൂസനാ. കതമേ ചത്താരോ? ഭിക്ഖു, ഭിക്ഖവേ [ഇധ ഭിക്ഖവേ ഭിക്ഖു (പീ. ക.)], ദുസ്സീലോ പാപധമ്മോ പരിസദൂസനോ; ഭിക്ഖുനീ, ഭിക്ഖവേ, ദുസ്സീലാ പാപധമ്മാ പരിസദൂസനാ; ഉപാസകോ, ഭിക്ഖവേ, ദുസ്സീലോ പാപധമ്മോ പരിസദൂസനോ; ഉപാസികാ, ഭിക്ഖവേ, ദുസ്സീലാ പാപധമ്മാ പരിസദൂസനാ. ഇമേ ഖോ, ഭിക്ഖവേ, ചത്താരോ പരിസദൂസനാ.

‘‘ചത്താരോമേ, ഭിക്ഖവേ, പരിസസോഭനാ. കതമേ ചത്താരോ? ഭിക്ഖു, ഭിക്ഖവേ, സീലവാ കല്യാണധമ്മോ പരിസസോഭനോ; ഭിക്ഖുനീ, ഭിക്ഖവേ, സീലവതീ കല്യാണധമ്മാ പരിസസോഭനാ; ഉപാസകോ, ഭിക്ഖവേ, സീലവാ കല്യാണധമ്മോ പരിസസോഭനോ; ഉപാസികാ, ഭിക്ഖവേ, സീലവതീ കല്യാണധമ്മാ പരിസസോഭനാ. ഇമേ ഖോ, ഭിക്ഖവേ, ചത്താരോ പരിസസോഭനാ’’തി. പഠമം.

൨. ദിട്ഠിസുത്തം

൨൧൨. ‘‘ചതൂഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ. കതമേഹി ചതൂഹി? കായദുച്ചരിതേന, വചീദുച്ചരിതേന, മനോദുച്ചരിതേന, മിച്ഛാദിട്ഠിയാ – ഇമേഹി ഖോ, ഭിക്ഖവേ, ചതൂഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ.

‘‘ചതൂഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേ. കതമേഹി ചതൂഹി? കായസുചരിതേന, വചീസുചരിതേന, മനോസുചരിതേന, സമ്മാദിട്ഠിയാ – ഇമേഹി ഖോ, ഭിക്ഖവേ, ചതൂഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേ’’തി. ദുതിയം.

൩. അകതഞ്ഞുതാസുത്തം

൨൧൩. ‘‘ചതൂഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ. കതമേഹി ചതൂഹി? കായദുച്ചരിതേന, വചീദുച്ചരിതേന, മനോദുച്ചരിതേന, അകതഞ്ഞുതാ അകതവേദിതാ [അകതഞ്ഞുതാഅകതവേദിതായ (സീ.)] – ഇമേഹി ഖോ, ഭിക്ഖവേ, ചതൂഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ.

‘‘ചതൂഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേ. കതമേഹി ചതൂഹി? കായസുചരിതേന, വചീസുചരിതേന, മനോസുചരിതേന, കതഞ്ഞുതാകതവേദിതാ [കതഞ്ഞുതാകതവേദിതായ (സീ.)] – ഇമേഹി ഖോ, ഭിക്ഖവേ, ചതൂഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേ’’തി. തതിയം.

൪. പാണാതിപാതീസുത്തം

൨൧൪. …പേ… പാണാതിപാതീ ഹോതി, അദിന്നാദായീ ഹോതി, കാമേസുമിച്ഛാചാരീ ഹോതി, മുസാവാദീ ഹോതി…പേ… പാണാതിപാതാ പടിവിരതോ ഹോതി, അദിന്നാദാനാ പടിവിരതോ ഹോതി, കാമേസുമിച്ഛാചാരാ പടിവിരതോ ഹോതി, മുസാവാദാ പടിവിരതോ ഹോതി. ചതുത്ഥം.

൫. പഠമമഗ്ഗസുത്തം

൨൧൫. …പേ… മിച്ഛാദിട്ഠികോ ഹോതി, മിച്ഛാസങ്കപ്പോ ഹോതി, മിച്ഛാവാചോ ഹോതി, മിച്ഛാകമ്മന്തോ ഹോതി…പേ… സമ്മാദിട്ഠികോ ഹോതി, സമ്മാസങ്കപ്പോ ഹോതി, സമ്മാവാചോ ഹോതി, സമ്മാകമ്മന്തോ ഹോതി. പഞ്ചമം.

൬. ദുതിയമഗ്ഗസുത്തം

൨൧൬. …പേ… മിച്ഛാആജീവോ ഹോതി, മിച്ഛാവായാമോ ഹോതി, മിച്ഛാസതി ഹോതി, മിച്ഛാസമാധി ഹോതി…പേ… സമ്മാആജീവോ ഹോതി, സമ്മാവായാമോ ഹോതി, സമ്മാസതി ഹോതി, സമ്മാസമാധി ഹോതി. ഛട്ഠം.

൭. പഠമവോഹാരപഥസുത്തം

൨൧൭. …പേ… അദിട്ഠേ ദിട്ഠവാദീ ഹോതി, അസുതേ സുതവാദീ ഹോതി, അമുതേ മുതവാദീ ഹോതി, അവിഞ്ഞാതേ വിഞ്ഞാതവാദീ ഹോതി…പേ… അദിട്ഠേ അദിട്ഠവാദീ ഹോതി, അസുതേ അസുതവാദീ ഹോതി, അമുതേ അമുതവാദീ ഹോതി, അവിഞ്ഞാതേ അവിഞ്ഞാതവാദീ ഹോതി. സത്തമം.

൮. ദുതിയവോഹാരപഥസുത്തം

൨൧൮. …പേ… ദിട്ഠേ അദിട്ഠവാദീ ഹോതി, സുതേ അസുതവാദീ ഹോതി, മുതേ അമുതവാദീ ഹോതി, വിഞ്ഞാതേ അവിഞ്ഞാതവാദീ ഹോതി…പേ… ദിട്ഠേ ദിട്ഠവാദീ ഹോതി, സുതേ സുതവാദീ ഹോതി, മുതേ മുതവാദീ ഹോതി, വിഞ്ഞാതേ വിഞ്ഞാതവാദീ ഹോതി. അട്ഠമം.

൯. അഹിരികസുത്തം

൨൧൯. …പേ… അസ്സദ്ധോ ഹോതി, ദുസ്സീലോ ഹോതി, അഹിരികോ ഹോതി, അനോത്തപ്പീ ഹോതി…പേ… സദ്ധോ ഹോതി, സീലവാ ഹോതി, ഹിരിമാ ഹോതി, ഓത്തപ്പീ ഹോതി. നവമം.

൧൦. ദുസ്സീലസുത്തം

൨൨൦. ‘‘ചതൂഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ. കതമേഹി ചതൂഹി? അസ്സദ്ധോ ഹോതി, ദുസ്സീലോ ഹോതി, കുസീതോ ഹോതി, ദുപ്പഞ്ഞോ ഹോതി – ഇമേഹി ഖോ, ഭിക്ഖവേ, ചതൂഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ.

‘‘ചതൂഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേ. കതമേഹി ചതൂഹി? സദ്ധോ ഹോതി, സീലവാ ഹോതി, ആരദ്ധവീരിയോ ഹോതി, പഞ്ഞവാ ഹോതി – ഇമേഹി ഖോ, ഭിക്ഖവേ, ചതൂഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേ’’തി. ദസമം.

പരിസാവഗ്ഗോ [സോഭനവഗ്ഗോ (സീ. സ്യാ. കം. പീ.)] ദുതിയോ.