(൨൧) ൧. സപ്പുരിസവഗ്ഗോ

൧. സിക്ഖാപദസുത്തം

൨൦൧. ‘‘അസപ്പുരിസഞ്ച വോ, ഭിക്ഖവേ, ദേസേസ്സാമി, അസപ്പുരിസേന അസപ്പുരിസതരഞ്ച; സപ്പുരിസഞ്ച, സപ്പുരിസേന സപ്പുരിസതരഞ്ച. തം സുണാഥ, സാധുകം മനസി കരോഥ; ഭാസിസ്സാമീ’’തി. ‘‘ഏവം, ഭന്തേ’’തി ഖോ തേ ഭിക്ഖൂ ഭഗവതോ പച്ചസ്സോസും. ഭഗവാ ഏതദവോച –

‘‘കതമോ ച, ഭിക്ഖവേ, അസപ്പുരിസോ? ഇധ, ഭിക്ഖവേ, ഏകച്ചോ പാണാതിപാതീ ഹോതി, അദിന്നാദായീ ഹോതി, കാമേസുമിച്ഛാചാരീ ഹോതി, മുസാവാദീ ഹോതി, സുരാമേരയമജ്ജപമാദട്ഠായീ ഹോതി. അയം വുച്ചതി, ഭിക്ഖവേ, അസപ്പുരിസോ.

‘‘കതമോ ച, ഭിക്ഖവേ, അസപ്പുരിസേന അസപ്പുരിസതരോ? ഇധ, ഭിക്ഖവേ, ഏകച്ചോ അത്തനാ ച പാണാതിപാതീ ഹോതി, പരഞ്ച പാണാതിപാതേ സമാദപേതി; അത്തനാ ച അദിന്നാദായീ ഹോതി, പരഞ്ച അദിന്നാദാനേ സമാദപേതി; അത്തനാ ച കാമേസുമിച്ഛാചാരീ ഹോതി, പരഞ്ച കാമേസുമിച്ഛാചാരേ സമാദപേതി; അത്തനാ ച മുസാവാദീ ഹോതി, പരഞ്ച മുസാവാദേ സമാദപേതി; അത്തനാ ച സുരാമേരയമജ്ജപമാദട്ഠായീ ഹോതി, പരഞ്ച സുരാമേരയമജ്ജപമാദട്ഠാനേ സമാദപേതി. അയം വുച്ചതി, ഭിക്ഖവേ, അസപ്പുരിസേന അസപ്പുരിസതരോ.

‘‘കതമോ ച, ഭിക്ഖവേ, സപ്പുരിസോ? ഇധ, ഭിക്ഖവേ, ഏകച്ചോ പാണാതിപാതാ പടിവിരതോ ഹോതി, അദിന്നാദാനാ പടിവിരതോ ഹോതി, കാമേസുമിച്ഛാചാരാ പടിവിരതോ ഹോതി, മുസാവാദാ പടിവിരതോ ഹോതി, സുരാമേരയമജ്ജപമാദട്ഠാനാ പടിവിരതോ ഹോതി. അയം വുച്ചതി, ഭിക്ഖവേ, സപ്പുരിസോ.

‘‘കതമോ ച, ഭിക്ഖവേ, സപ്പുരിസേന സപ്പുരിസതരോ? ഇധ, ഭിക്ഖവേ, ഏകച്ചോ അത്തനാ ച പാണാതിപാതാ പടിവിരതോ ഹോതി, പരഞ്ച പാണാതിപാതാ വേരമണിയാ സമാദപേതി; അത്തനാ ച അദിന്നാദാനാ പടിവിരതോ ഹോതി, പരഞ്ച അദിന്നാദാനാ വേരമണിയാ സമാദപേതി; അത്തനാ ച കാമേസുമിച്ഛാചാരാ പടിവിരതോ ഹോതി, പരഞ്ച കാമേസുമിച്ഛാചാരാ വേരമണിയാ സമാദപേതി; അത്തനാ ച മുസാവാദാ പടിവിരതോ ഹോതി, പരഞ്ച മുസാവാദാ വേരമണിയാ സമാദപേതി; അത്തനാ ച സുരാമേരയമജ്ജപമാദട്ഠാനാ പടിവിരതോ ഹോതി, പരഞ്ച സുരാമേരയമജ്ജപമാദട്ഠാനാ വേരമണിയാ സമാദപേതി. അയം വുച്ചതി, ഭിക്ഖവേ, സപ്പുരിസേന സപ്പുരിസതരോ’’തി [പു. പ. ൧൩൫]. പഠമം.

൨. അസ്സദ്ധസുത്തം

൨൦൨. ‘‘അസപ്പുരിസഞ്ച വോ, ഭിക്ഖവേ, ദേസേസ്സാമി, അസപ്പുരിസേന അസപ്പുരിസതരഞ്ച; സപ്പുരിസഞ്ച, സപ്പുരിസേന സപ്പുരിസതരഞ്ച. തം സുണാഥ…പേ….

‘‘കതമോ ച, ഭിക്ഖവേ, അസപ്പുരിസോ? ഇധ, ഭിക്ഖവേ, ഏകച്ചോ അസ്സദ്ധോ ഹോതി, അഹിരികോ ഹോതി, അനോത്തപ്പീ ഹോതി, അപ്പസ്സുതോ ഹോതി, കുസീതോ ഹോതി, മുട്ഠസ്സതി ഹോതി, ദുപ്പഞ്ഞോ ഹോതി. അയം വുച്ചതി, ഭിക്ഖവേ, അസപ്പുരിസോ.

‘‘കതമോ ച, ഭിക്ഖവേ, അസപ്പുരിസേന അസപ്പുരിസതരോ? ഇധ, ഭിക്ഖവേ, ഏകച്ചോ അത്തനാ ച അസ്സദ്ധോ ഹോതി, പരഞ്ച അസ്സദ്ധിയേ [അസദ്ധായ (ക.)] സമാദപേതി; അത്തനാ ച അഹിരികോ ഹോതി, പരഞ്ച അഹിരികതായ സമാദപേതി; അത്തനാ ച അനോത്തപ്പീ ഹോതി, പരഞ്ച അനോത്തപ്പേ സമാദപേതി; അത്തനാ ച അപ്പസ്സുതോ ഹോതി, പരഞ്ച അപ്പസ്സുതേ സമാദപേതി; അത്തനാ ച കുസീതോ ഹോതി, പരഞ്ച കോസജ്ജേ സമാദപേതി; അത്തനാ ച മുട്ഠസ്സതി ഹോതി, പരഞ്ച മുട്ഠസ്സച്ചേ [മുട്ഠസച്ചേ (സീ. സ്യാ. കം. പീ.)] സമാദപേതി; അത്തനാ ച ദുപ്പഞ്ഞോ ഹോതി, പരഞ്ച ദുപ്പഞ്ഞതായ സമാദപേതി. അയം വുച്ചതി, ഭിക്ഖവേ, അസപ്പുരിസേന അസപ്പുരിസതരോ.

‘‘കതമോ ച, ഭിക്ഖവേ, സപ്പുരിസോ? ഇധ, ഭിക്ഖവേ, ഏകച്ചോ സദ്ധോ ഹോതി, ഹിരിമാ ഹോതി, ഓത്തപ്പീ ഹോതി, ബഹുസ്സുതോ ഹോതി, ആരദ്ധവീരിയോ ഹോതി, സതിമാ ഹോതി, പഞ്ഞവാ ഹോതി. അയം വുച്ചതി, ഭിക്ഖവേ, സപ്പുരിസോ.

‘‘കതമോ ച, ഭിക്ഖവേ, സപ്പുരിസേന സപ്പുരിസതരോ? ഇധ, ഭിക്ഖവേ, ഏകച്ചോ അത്തനാ ച സദ്ധാസമ്പന്നോ ഹോതി, പരഞ്ച സദ്ധാസമ്പദായ സമാദപേതി; അത്തനാ ച ഹിരിമാ ഹോതി, പരഞ്ച ഹിരിമതായ [ഹിരിസമ്പദായ (ക.)] സമാദപേതി; അത്തനാ ച ഓത്തപ്പീ ഹോതി, പരഞ്ച ഓത്തപ്പേ സമാദപേതി; അത്തനാ ച ബഹുസ്സുതോ ഹോതി, പരഞ്ച ബാഹുസച്ചേ സമാദപേതി; അത്തനാ ച ആരദ്ധവീരിയോ ഹോതി, പരഞ്ച വീരിയാരമ്ഭേ സമാദപേതി; അത്തനാ ച ഉപട്ഠിതസ്സതി ഹോതി, പരഞ്ച സതിഉപട്ഠാനേ [സതിപട്ഠാനേ (സീ. സ്യാ. കം. പീ.)] സമാദപേതി; അത്തനാ ച പഞ്ഞാസമ്പന്നോ ഹോതി, പരഞ്ച പഞ്ഞാസമ്പദായ സമാദപേതി. അയം വുച്ചതി, ഭിക്ഖവേ, സപ്പുരിസേന സപ്പുരിസതരോ’’തി. ദുതിയം.

൩. സത്തകമ്മസുത്തം

൨൦൩. ‘‘അസപ്പുരിസഞ്ച വോ, ഭിക്ഖവേ, ദേസേസ്സാമി, അസപ്പുരിസേന അസപ്പുരിസതരഞ്ച; സപ്പുരിസഞ്ച, സപ്പുരിസേന സപ്പുരിസതരഞ്ച. തം സുണാഥ…പേ….

‘‘കതമോ ച, ഭിക്ഖവേ, അസപ്പുരിസോ? ഇധ, ഭിക്ഖവേ, ഏകച്ചോ പാണാതിപാതീ ഹോതി, അദിന്നാദായീ ഹോതി, കാമേസുമിച്ഛാചാരീ ഹോതി, മുസാവാദീ ഹോതി, പിസുണവാചോ ഹോതി, ഫരുസവാചോ ഹോതി, സമ്ഫപ്പലാപീ ഹോതി. അയം വുച്ചതി, ഭിക്ഖവേ, അസപ്പുരിസോ.

‘‘കതമോ ച, ഭിക്ഖവേ, അസപ്പുരിസേന അസപ്പുരിസതരോ? ഇധ, ഭിക്ഖവേ, ഏകച്ചോ അത്തനാ ച പാണാതിപാതീ ഹോതി, പരഞ്ച പാണാതിപാതേ സമാദപേതി; അത്തനാ ച അദിന്നാദായീ ഹോതി, പരഞ്ച അദിന്നാദാനേ സമാദപേതി; അത്തനാ ച കാമേസുമിച്ഛാചാരീ ഹോതി, പരഞ്ച കാമേസുമിച്ഛാചാരേ സമാദപേതി; അത്തനാ ച മുസാവാദീ ഹോതി, പരഞ്ച മുസാവാദേ സമാദപേതി; അത്തനാ ച പിസുണവാചോ ഹോതി, പരഞ്ച പിസുണായ വാചായ സമാദപേതി; അത്തനാ ച ഫരുസവാചോ ഹോതി, പരഞ്ച ഫരുസായ വാചായ സമാദപേതി; അത്തനാ ച സമ്ഫപ്പലാപീ ഹോതി, പരഞ്ച സമ്ഫപ്പലാപേ സമാദപേതി. അയം വുച്ചതി, ഭിക്ഖവേ, അസപ്പുരിസേന അസപ്പുരിസതരോ.

‘‘കതമോ ച, ഭിക്ഖവേ, സപ്പുരിസോ? ഇധ, ഭിക്ഖവേ, ഏകച്ചോ പാണാതിപാതാ പടിവിരതോ ഹോതി, അദിന്നാദാനാ പടിവിരതോ ഹോതി, കാമേസുമിച്ഛാചാരാ പടിവിരതോ ഹോതി, മുസാവാദാ പടിവിരതോ ഹോതി, പിസുണായ വാചായ പടിവിരതോ ഹോതി, ഫരുസായ വാചായ പടിവിരതോ, ഹോതി, സമ്ഫപ്പലാപാ പടിവിരതോ ഹോതി. അയം വുച്ചതി, ഭിക്ഖവേ, സപ്പുരിസോ.

‘‘കതമോ ച, ഭിക്ഖവേ, സപ്പുരിസേന സപ്പുരിസതരോ? ഇധ ഭിക്ഖവേ, ഏകച്ചോ അത്തനാ ച പാണാതിപാതാ പടിവിരതോ ഹോതി, പരഞ്ച പാണാതിപാതാ വേരമണിയാ സമാദപേതി; അത്തനാ ച അദിന്നാദാനാ പടിവിരതോ ഹോതി, പരഞ്ച അദിന്നാദാനാ വേരമണിയാ സമാദപേതി; അത്തനാ ച കാമേസുമിച്ഛാചാരാ പടിവിരതോ ഹോതി, പരഞ്ച കാമേസുമിച്ഛാചാരാ വേരമണിയാ സമാദപേതി; അത്തനാ ച മുസാവാദാ പടിവിരതോ ഹോതി, പരഞ്ച മുസാവാദാ വേരമണിയാ സമാദപേതി; അത്തനാ ച പിസുണായ വാചായ പടിവിരതോ ഹോതി, പരഞ്ച പിസുണായ വാചായ വേരമണിയാ സമാദപേതി; അത്തനാ ച ഫരുസായ വാചായ പടിവിരതോ ഹോതി, പരഞ്ച ഫരുസായ വാചായ വേരമണിയാ സമാദപേതി; അത്തനാ ച സമ്ഫപ്പലാപാ പടിവിരതോ ഹോതി, പരഞ്ച സമ്ഫപ്പലാപാ വേരമണിയാ സമാദപേതി. അയം വുച്ചതി, ഭിക്ഖവേ, സപ്പുരിസേന സപ്പുരിസതരോ’’തി. തതിയം.

൪. ദസകമ്മസുത്തം

൨൦൪. ‘‘അസപ്പുരിസഞ്ച വോ, ഭിക്ഖവേ, ദേസേസ്സാമി, അസപ്പുരിസേന അസപ്പുരിസതരഞ്ച; സപ്പുരിസഞ്ച, സപ്പുരിസേന സപ്പുരിസതരഞ്ച. തം സുണാഥ…പേ….

‘‘കതമോ ച, ഭിക്ഖവേ, അസപ്പുരിസോ? ഇധ, ഭിക്ഖവേ, ഏകച്ചോ പാണാതിപാതീ ഹോതി, അദിന്നാദായീ ഹോതി, കാമേസുമിച്ഛാചാരീ ഹോതി, മുസാവാദീ ഹോതി, പിസുണവാചോ ഹോതി, ഫരുസവാചോ ഹോതി, സമ്ഫപ്പലാപീ ഹോതി, അഭിജ്ഝാലു ഹോതി, ബ്യാപന്നചിത്തോ ഹോതി, മിച്ഛാദിട്ഠികോ ഹോതി. അയം വുച്ചതി, ഭിക്ഖവേ, അസപ്പുരിസോ.

‘‘കതമോ ച, ഭിക്ഖവേ, അസപ്പുരിസേന അസപ്പുരിസതരോ? ഇധ, ഭിക്ഖവേ, ഏകച്ചോ അത്തനാ ച പാണാതിപാതീ ഹോതി, പരഞ്ച പാണാതിപാതേ സമാദപേതി…പേ… അത്തനാ ച അഭിജ്ഝാലു ഹോതി, പരഞ്ച അഭിജ്ഝായ സമാദപേതി; അത്തനാ ച ബ്യാപന്നചിത്തോ ഹോതി, പരഞ്ച ബ്യാപാദേ സമാദപേതി, അത്തനാ ച മിച്ഛാദിട്ഠികോ ഹോതി, പരഞ്ച മിച്ഛാദിട്ഠിയാ സമാദപേതി. അയം വുച്ചതി, ഭിക്ഖവേ, അസപ്പുരിസേന അസപ്പുരിസതരോ.

‘‘കതമോ ച, ഭിക്ഖവേ, സപ്പുരിസോ? ഇധ, ഭിക്ഖവേ, ഏകച്ചോ പാണാതിപാതാ പടിവിരതോ ഹോതി…പേ… അനഭിജ്ഝാലു ഹോതി, അബ്യാപന്നചിത്തോ ഹോതി, സമ്മാദിട്ഠികോ ഹോതി. അയം വുച്ചതി, ഭിക്ഖവേ, സപ്പുരിസോ.

‘‘കതമോ ച, ഭിക്ഖവേ, സപ്പുരിസേന സപ്പുരിസതരോ? ഇധ, ഭിക്ഖവേ, ഏകച്ചോ അത്തനാ ച പാണാതിപാതാ പടിവിരതോ ഹോതി, പരഞ്ച പാണാതിപാതാ വേരമണിയാ സമാദപേതി…പേ… അത്തനാ ച അനഭിജ്ഝാലു ഹോതി, പരഞ്ച അനഭിജ്ഝായ സമാദപേതി; അത്തനാ ച അബ്യാപന്നചിത്തോ ഹോതി, പരഞ്ച അബ്യാപാദേ സമാദപേതി; അത്തനാ ച സമ്മാദിട്ഠികോ ഹോതി, പരഞ്ച സമ്മാദിട്ഠിയാ സമാദപേതി. അയം വുച്ചതി, ഭിക്ഖവേ, സപ്പുരിസേന സപ്പുരിസതരോ’’തി. ചതുത്ഥം.

൫. അട്ഠങ്ഗികസുത്തം

൨൦൫. ‘‘അസപ്പുരിസഞ്ച വോ, ഭിക്ഖവേ, ദേസേസ്സാമി, അസപ്പുരിസേന അസപ്പുരിസതരഞ്ച; സപ്പുരിസഞ്ച, സപ്പുരിസേന സപ്പുരിസതരഞ്ച. തം സുണാഥ…പേ….

‘‘കതമോ ച, ഭിക്ഖവേ, അസപ്പുരിസോ? ഇധ, ഭിക്ഖവേ, ഏകച്ചോ മിച്ഛാദിട്ഠികോ ഹോതി, മിച്ഛാസങ്കപ്പോ ഹോതി, മിച്ഛാവാചോ ഹോതി, മിച്ഛാകമ്മന്തോ ഹോതി, മിച്ഛാആജീവോ ഹോതി, മിച്ഛാവായാമോ ഹോതി, മിച്ഛാസതി ഹോതി, മിച്ഛാസമാധി ഹോതി. അയം വുച്ചതി, ഭിക്ഖവേ, അസപ്പുരിസോ.

‘‘കതമോ ച, ഭിക്ഖവേ, അസപ്പുരിസേന അസപ്പുരിസതരോ? ഇധ ഭിക്ഖവേ, ഏകച്ചോ അത്തനാ ച മിച്ഛാദിട്ഠികോ ഹോതി, പരഞ്ച മിച്ഛാദിട്ഠിയാ സമാദപേതി; അത്തനാ ച മിച്ഛാസങ്കപ്പോ ഹോതി, പരഞ്ച മിച്ഛാസങ്കപ്പേ സമാദപേതി; അത്തനാ ച മിച്ഛാവാചോ ഹോതി, പരഞ്ച മിച്ഛാവാചായ സമാദപേതി; അത്തനാ ച മിച്ഛാകമ്മന്തോ ഹോതി, പരഞ്ച മിച്ഛാകമ്മന്തേ സമാദപേതി; അത്തനാ ച മിച്ഛാആജീവോ ഹോതി, പരഞ്ച മിച്ഛാആജീവേ സമാദപേതി; അത്തനാ ച മിച്ഛാവായാമോ ഹോതി, പരഞ്ച മിച്ഛാവായാമേ സമാദപേതി; അത്തനാ ച മിച്ഛാസതി ഹോതി, പരഞ്ച മിച്ഛാസതിയാ സമാദപേതി; അത്തനാ ച മിച്ഛാസമാധി ഹോതി, പരഞ്ച മിച്ഛാസമാധിമ്ഹി സമാദപേതി. അയം വുച്ചതി, ഭിക്ഖവേ, അസപ്പുരിസേന അസപ്പുരിസതരോ.

‘‘കതമോ ച, ഭിക്ഖവേ, സപ്പുരിസോ? ഇധ, ഭിക്ഖവേ, ഏകച്ചോ സമ്മാദിട്ഠികോ ഹോതി, സമ്മാസങ്കപ്പോ ഹോതി, സമ്മാവാചോ ഹോതി, സമ്മാകമ്മന്തോ ഹോതി, സമ്മാആജീവോ ഹോതി, സമ്മാവായാമോ ഹോതി, സമ്മാസതി ഹോതി, സമ്മാസമാധി ഹോതി. അയം വുച്ചതി, ഭിക്ഖവേ, സപ്പുരിസോ.

‘‘കതമോ ച, ഭിക്ഖവേ, സപ്പുരിസേന സപ്പുരിസതരോ? ഇധ, ഭിക്ഖവേ, ഏകച്ചോ അത്തനാ ച സമ്മാദിട്ഠികോ ഹോതി, പരഞ്ച സമ്മാദിട്ഠിയാ സമാദപേതി; അത്തനാ ച സമ്മാസങ്കപ്പോ ഹോതി, പരഞ്ച സമ്മാസങ്കപ്പേ സമാദപേതി; അത്തനാ ച സമ്മാവാചോ ഹോതി, പരഞ്ച സമ്മാവാചായ സമാദപേതി; അത്തനാ ച സമ്മാകമ്മന്തോ ഹോതി, പരഞ്ച സമ്മാകമ്മന്തേ സമാദപേതി; അത്തനാ ച സമ്മാആജീവോ ഹോതി, പരഞ്ച സമ്മാആജീവേ സമാദപേതി; അത്തനാ ച സമ്മാവായാമോ ഹോതി, പരഞ്ച സമ്മാവായാമേ സമാദപേതി; അത്തനാ ച സമ്മാസതി ഹോതി, പരഞ്ച സമ്മാസതിയാ സമാദപേതി; അത്തനാ ച സമ്മാസമാധി ഹോതി, പരഞ്ച സമ്മാസമാധിമ്ഹി സമാദപേതി. അയം വുച്ചതി, ഭിക്ഖവേ, സപ്പുരിസേന സപ്പുരിസതരോ’’തി. പഞ്ചമം.

൬. ദസമഗ്ഗസുത്തം

൨൦൬. ‘‘അസപ്പുരിസഞ്ച വോ, ഭിക്ഖവേ, ദേസേസ്സാമി, അസപ്പുരിസേന അസപ്പുരിസതരഞ്ച; സപ്പുരിസഞ്ച, സപ്പുരിസേന സപ്പുരിസതരഞ്ച. തം സുണാഥ…പേ….

‘‘കതമോ ച, ഭിക്ഖവേ, അസപ്പുരിസോ? ഇധ, ഭിക്ഖവേ, ഏകച്ചോ മിച്ഛാദിട്ഠികോ ഹോതി …പേ… മിച്ഛാഞാണീ ഹോതി, മിച്ഛാവിമുത്തി ഹോതി. അയം വുച്ചതി, ഭിക്ഖവേ, അസപ്പുരിസോ.

‘‘കതമോ ച, ഭിക്ഖവേ, അസപ്പുരിസേന അസപ്പുരിസതരോ? ഇധ, ഭിക്ഖവേ, ഏകച്ചോ അത്തനാ ച മിച്ഛാദിട്ഠികോ ഹോതി, പരഞ്ച മിച്ഛാദിട്ഠിയാ സമാദപേതി…പേ… അത്തനാ ച മിച്ഛാഞാണീ ഹോതി, പരഞ്ച മിച്ഛാഞാണേ സമാദപേതി; അത്തനാ ച മിച്ഛാവിമുത്തി ഹോതി, പരഞ്ച മിച്ഛാവിമുത്തിയാ സമാദപേതി. അയം വുച്ചതി, ഭിക്ഖവേ, അസപ്പുരിസേന അസപ്പുരിസതരോ.

‘‘കതമോ ച, ഭിക്ഖവേ, സപ്പുരിസോ? ഇധ, ഭിക്ഖവേ, ഏകച്ചോ സമ്മാദിട്ഠികോ ഹോതി…പേ… സമ്മാഞാണീ ഹോതി, സമ്മാവിമുത്തി ഹോതി. അയം വുച്ചതി, ഭിക്ഖവേ, സപ്പുരിസോ.

‘‘കതമോ ച, ഭിക്ഖവേ, സപ്പുരിസേന സപ്പുരിസതരോ? ഇധ, ഭിക്ഖവേ, ഏകച്ചോ അത്തനാ ച സമ്മാദിട്ഠികോ ഹോതി, പരഞ്ച സമ്മാദിട്ഠിയാ സമാദപേതി…പേ… അത്തനാ ച സമ്മാഞാണീ ഹോതി, പരഞ്ച സമ്മാഞാണേ സമാദപേതി; അത്തനാ ച സമ്മാവിമുത്തി ഹോതി, പരഞ്ച സമ്മാവിമുത്തിയാ സമാദപേതി. അയം വുച്ചതി, ഭിക്ഖവേ, സപ്പുരിസേന സപ്പുരിസതരോ’’തി. ഛട്ഠം.

൭. പഠമപാപധമ്മസുത്തം

൨൦൭. ‘‘പാപഞ്ച വോ, ഭിക്ഖവേ, ദേസേസ്സാമി, പാപേന പാപതരഞ്ച; കല്യാണഞ്ച, കല്യാണേന കല്യാണതരഞ്ച. തം സുണാഥ…പേ….

‘‘കതമോ ച, ഭിക്ഖവേ, പാപോ? ഇധ, ഭിക്ഖവേ, ഏകച്ചോ പാണാതിപാതീ ഹോതി…പേ… മിച്ഛാദിട്ഠികോ ഹോതി. അയം വുച്ചതി, ഭിക്ഖവേ, പാപോ.

‘‘കതമോ ച, ഭിക്ഖവേ, പാപേന പാപതരോ? ഇധ, ഭിക്ഖവേ, ഏകച്ചോ അത്തനാ ച പാണാതിപാതീ ഹോതി, പരഞ്ച പാണാതിപാതേ സമാദപേതി…പേ… അത്തനാ ച മിച്ഛാദിട്ഠികോ ഹോതി, പരഞ്ച മിച്ഛാദിട്ഠിയാ സമാദപേതി. അയം വുച്ചതി, ഭിക്ഖവേ, പാപേന പാപതരോ.

‘‘കതമോ ച, ഭിക്ഖവേ, കല്യാണോ? ഇധ, ഭിക്ഖവേ, ഏകച്ചോ പാണാതിപാതാ പടിവിരതോ ഹോതി…പേ… സമ്മാദിട്ഠികോ ഹോതി. അയം വുച്ചതി, ഭിക്ഖവേ, കല്യാണോ.

‘‘കതമോ ച, ഭിക്ഖവേ, കല്യാണേന കല്യാണതരോ? ഇധ, ഭിക്ഖവേ, ഏകച്ചോ അത്തനാ ച പാണാതിപാതാ പടിവിരതോ ഹോതി, പരഞ്ച പാണാതിപാതാ വേരമണിയാ സമാദപേതി…പേ… അത്തനാ ച സമ്മാദിട്ഠികോ ഹോതി, പരഞ്ച സമ്മാദിട്ഠിയാ സമാദപേതി. അയം വുച്ചതി, ഭിക്ഖവേ, കല്യാണേന കല്യാണതരോ’’തി. സത്തമം.

൮. ദുതിയപാപധമ്മസുത്തം

൨൦൮. ‘‘പാപഞ്ച വോ, ഭിക്ഖവേ, ദേസേസ്സാമി, പാപേന പാപതരഞ്ച; കല്യാണഞ്ച, കല്യാണേന കല്യാണതരഞ്ച. തം സുണാഥ, സാധുകം മനസികരോഥ; ഭാസിസ്സാമീ’’തി. ഏവം…പേ… ഏതദവോച –

‘‘കതമോ ച, ഭിക്ഖവേ, പാപോ? ഇധ, ഭിക്ഖവേ, ഏകച്ചോ മിച്ഛാദിട്ഠികോ ഹോതി…പേ… മിച്ഛാഞാണീ ഹോതി, മിച്ഛാവിമുത്തി ഹോതി. അയം വുച്ചതി, ഭിക്ഖവേ, പാപോ.

‘‘കതമോ ച, ഭിക്ഖവേ, പാപേന പാപതരോ? ഇധ, ഭിക്ഖവേ, ഏകച്ചോ അത്തനാ ച മിച്ഛാദിട്ഠികോ ഹോതി, പരഞ്ച മിച്ഛാദിട്ഠിയാ സമാദപേതി…പേ… അത്തനാ ച മിച്ഛാഞാണീ ഹോതി, പരഞ്ച മിച്ഛാഞാണേ സമാദപേതി; അത്തനാ ച മിച്ഛാവിമുത്തി ഹോതി, പരഞ്ച മിച്ഛാവിമുത്തിയാ സമാദപേതി. അയം വുച്ചതി, ഭിക്ഖവേ, പാപേന പാപതരോ.

‘‘കതമോ ച, ഭിക്ഖവേ, കല്യാണോ? ഇധ, ഭിക്ഖവേ, ഏകച്ചോ സമ്മാദിട്ഠികോ ഹോതി …പേ… സമ്മാഞാണീ ഹോതി, സമ്മാവിമുത്തി ഹോതി. അയം വുച്ചതി, ഭിക്ഖവേ, കല്യാണോ.

‘‘കതമോ ച, ഭിക്ഖവേ, കല്യാണേന കല്യാണതരോ? ഇധ, ഭിക്ഖവേ, ഏകച്ചോ അത്തനാ ച സമ്മാദിട്ഠികോ ഹോതി, പരഞ്ച സമ്മാദിട്ഠിയാ സമാദപേതി…പേ… അത്തനാ ച സമ്മാഞാണീ ഹോതി, പരഞ്ച സമ്മാഞാണേ സമാദപേതി; അത്തനാ ച സമ്മാവിമുത്തി ഹോതി, പരഞ്ച സമ്മാവിമുത്തിയാ സമാദപേതി. അയം വുച്ചതി, ഭിക്ഖവേ, കല്യാണേന കല്യാണതരോ’’തി. അട്ഠമം.

൯. തതിയപാപധമ്മസുത്തം

൨൦൯. ‘‘പാപധമ്മഞ്ച വോ, ഭിക്ഖവേ, ദേസേസ്സാമി, പാപധമ്മേന പാപധമ്മതരഞ്ച; കല്യാണധമ്മഞ്ച, കല്യാണധമ്മേന കല്യാണധമ്മതരഞ്ച. തം സുണാഥ…പേ….

‘‘കതമോ ച, ഭിക്ഖവേ, പാപധമ്മോ? ഇധ, ഭിക്ഖവേ, ഏകച്ചോ പാണാതിപാതീ ഹോതി…പേ… മിച്ഛാദിട്ഠികോ ഹോതി. അയം വുച്ചതി, ഭിക്ഖവേ, പാപധമ്മോ.

‘‘കതമോ ച, ഭിക്ഖവേ, പാപധമ്മേന പാപധമ്മതരോ? ഇധ ഭിക്ഖവേ, ഏകച്ചോ അത്തനാ ച പാണാതിപാതീ ഹോതി, പരഞ്ച പാണാതിപാതേ സമാദപേതി…പേ… അത്തനാ ച മിച്ഛാദിട്ഠികോ ഹോതി, പരഞ്ച മിച്ഛാദിട്ഠിയാ സമാദപേതി. അയം വുച്ചതി, ഭിക്ഖവേ, പാപധമ്മേന പാപധമ്മതരോ.

‘‘കതമോ ച, ഭിക്ഖവേ, കല്യാണധമ്മോ? ഇധ, ഭിക്ഖവേ, ഏകച്ചോ പാണാതിപാതാ പടിവിരതോ ഹോതി…പേ… സമ്മാദിട്ഠികോ ഹോതി. അയം വുച്ചതി, ഭിക്ഖവേ, കല്യാണധമ്മോ.

‘‘കതമോ ച, ഭിക്ഖവേ, കല്യാണധമ്മേന കല്യാണധമ്മതരോ? ഇധ, ഭിക്ഖവേ, ഏകച്ചോ അത്തനാ ച പാണാതിപാതാ പടിവിരതോ ഹോതി, പരഞ്ച പാണാതിപാതാ വേരമണിയാ സമാദപേതി…പേ… അത്തനാ ച സമ്മാദിട്ഠികോ ഹോതി, പരഞ്ച സമ്മാദിട്ഠിയാ സമാദപേതി. അയം വുച്ചതി, ഭിക്ഖവേ, കല്യാണധമ്മേന കല്യാണധമ്മതരോ’’തി. നവമം.

൧൦. ചതുത്ഥപാപധമ്മസുത്തം

൨൧൦. ‘‘പാപധമ്മഞ്ച വോ, ഭിക്ഖവേ, ദേസേസ്സാമി, പാപധമ്മേന പാപധമ്മതരഞ്ച; കല്യാണധമ്മഞ്ച, കല്യാണധമ്മേന കല്യാണധമ്മതരഞ്ച. തം സുണാഥ…പേ….

‘‘കതമോ ച, ഭിക്ഖവേ, പാപധമ്മോ? ഇധ, ഭിക്ഖവേ, ഏകച്ചോ മിച്ഛാദിട്ഠികോ ഹോതി…പേ… മിച്ഛാഞാണീ ഹോതി, മിച്ഛാവിമുത്തി ഹോതി. അയം വുച്ചതി, ഭിക്ഖവേ, പാപധമ്മോ.

‘‘കതമോ ച, ഭിക്ഖവേ, പാപധമ്മേന പാപധമ്മതരോ? ഇധ, ഭിക്ഖവേ, ഏകച്ചോ അത്തനാ ച മിച്ഛാദിട്ഠികോ ഹോതി, പരഞ്ച മിച്ഛാദിട്ഠിയാ സമാദപേതി…പേ… അത്തനാ ച മിച്ഛാഞാണീ ഹോതി, പരഞ്ച മിച്ഛാഞാണേ സമാദപേതി; അത്തനാ ച മിച്ഛാവിമുത്തി ഹോതി, പരഞ്ച മിച്ഛാവിമുത്തിയാ സമാദപേതി. അയം വുച്ചതി, ഭിക്ഖവേ, പാപധമ്മേന പാപധമ്മതരോ.

‘‘കതമോ ച, ഭിക്ഖവേ, കല്യാണധമ്മോ? ഇധ, ഭിക്ഖവേ, ഏകച്ചോ സമ്മാദിട്ഠികോ ഹോതി…പേ… സമ്മാഞാണീ ഹോതി, സമ്മാവിമുത്തി ഹോതി. അയം വുച്ചതി, ഭിക്ഖവേ, കല്യാണധമ്മോ.

‘‘കതമോ ച, ഭിക്ഖവേ, കല്യാണധമ്മേന കല്യാണധമ്മതരോ? ഇധ, ഭിക്ഖവേ, ഏകച്ചോ അത്തനാ ച സമ്മാദിട്ഠികോ ഹോതി, പരഞ്ച സമ്മാദിട്ഠിയാ സമാദപേതി…പേ… അത്തനാ ച സമ്മാഞാണീ ഹോതി, പരഞ്ച സമ്മാഞാണേ സമാദപേതി; അത്തനാ ച സമ്മാവിമുത്തി ഹോതി, പരഞ്ച സമ്മാവിമുത്തിയാ സമാദപേതി. അയം വുച്ചതി, ഭിക്ഖവേ, കല്യാണധമ്മേന കല്യാണധമ്മതരോ’’തി. ദസമം.

സപ്പുരിസവഗ്ഗോ പഠമോ.