൨. വിഭത്തിസുത്തം

൧൭൨. തത്ര ഖോ ആയസ്മാ സാരിപുത്തോ ഭിക്ഖൂ ആമന്തേസി – ‘‘ആവുസോ ഭിക്ഖവേ’’തി. ‘‘ആവുസോ’’തി ഖോ തേ ഭിക്ഖൂ ആയസ്മതോ സാരിപുത്തസ്സ പച്ചസ്സോസും. ആയസ്മാ സാരിപുത്തോ ഏതദവോച –

‘‘അദ്ധമാസൂപസമ്പന്നേന മേ, ആവുസോ, അത്ഥപടിസമ്ഭിദാ സച്ഛികതാ ഓധിസോ ബ്യഞ്ജനസോ. തമഹം അനേകപരിയായേന ആചിക്ഖാമി ദേസേമി പഞ്ഞാപേമി പട്ഠപേമി വിവരാമി വിഭജാമി ഉത്താനീകരോമി. യസ്സ ഖോ പനസ്സ കങ്ഖാ വാ വിമതി വാ, സോ മം പഞ്ഹേന. അഹം വേയ്യാകരണേന സമ്മുഖീഭൂതോ നോ സത്ഥാ യോ നോ ധമ്മാനം സുകുസലോ.

‘‘അദ്ധമാസൂപസമ്പന്നേന മേ, ആവുസോ, ധമ്മപടിസമ്ഭിദാ സച്ഛികതാ ഓധിസോ ബ്യഞ്ജനസോ. തമഹം അനേകപരിയായേന ആചിക്ഖാമി ദേസേമി പഞ്ഞാപേമി പട്ഠപേമി വിവരാമി വിഭജാമി ഉത്താനീകരോമി. യസ്സ ഖോ പനസ്സ കങ്ഖാ വാ വിമതി വാ, സോ മം പഞ്ഹേന. അഹം വേയ്യാകരണേന സമ്മുഖീഭൂതോ നോ സത്ഥാ യോ നോ ധമ്മാനം സുകുസലോ.

‘‘അദ്ധമാസൂപസമ്പന്നേന മേ, ആവുസോ, നിരുത്തിപടിസമ്ഭിദാ സച്ഛികതാ ഓധിസോ ബ്യഞ്ജനസോ. തമഹം അനേകപരിയായേന ആചിക്ഖാമി ദേസേമി പഞ്ഞാപേമി പട്ഠപേമി വിവരാമി വിഭജാമി ഉത്താനീകരോമി. യസ്സ ഖോ പനസ്സ കങ്ഖാ വാ വിമതി വാ, സോ മം പഞ്ഹേന. അഹം വേയ്യാകരണേന സമ്മുഖീഭൂതോ നോ സത്ഥാ യോ നോ ധമ്മാനം സുകുസലോ.

‘‘അദ്ധമാസൂപസമ്പന്നേന മേ, ആവുസോ, പടിഭാനപടിസമ്ഭിദാ സച്ഛികതാ ഓധിസോ ബ്യഞ്ജനസോ. തമഹം അനേകപരിയായേന ആചിക്ഖാമി ദേസേമി പഞ്ഞാപേമി പട്ഠപേമി വിവരാമി വിഭജാമി ഉത്താനീകരോമി. യസ്സ ഖോ പനസ്സ കങ്ഖാ വാ വിമതി വാ, സോ മം പഞ്ഹേന. അഹം വേയ്യാകരണേന സമ്മുഖീഭൂതോ നോ സത്ഥാ യോ നോ ധമ്മാനം സുകുസലോ’’തി. ദുതിയം.