൪. ദുതിയസംവാസസുത്തം

൫൪. ‘‘ചത്താരോമേ, ഭിക്ഖവേ, സംവാസാ. കതമേ ചത്താരോ? ഛവോ ഛവായ സദ്ധിം സംവസതി, ഛവോ ദേവിയാ സദ്ധിം സംവസതി, ദേവോ ഛവായ സദ്ധിം സംവസതി, ദേവോ ദേവിയാ സദ്ധിം സംവസതി.

‘‘കഥഞ്ച, ഭിക്ഖവേ, ഛവോ ഛവായ സദ്ധിം സംവസതി. ഇധ, ഭിക്ഖവേ, സാമികോ ഹോതി പാണാതിപാതീ അദിന്നാദായീ കാമേസുമിച്ഛാചാരീ മുസാവാദീ പിസുണവാചോ ഫരുസവാചോ സമ്ഫപ്പലാപീ അഭിജ്ഝാലു ബ്യാപന്നചിത്തോ മിച്ഛാദിട്ഠികോ ദുസ്സീലോ പാപധമ്മോ മച്ഛേരമലപരിയുട്ഠിതേന ചേതസാ അഗാരം അജ്ഝാവസതി അക്കോസകപരിഭാസകോ സമണബ്രാഹ്മണാനം; ഭരിയാപിസ്സ ഹോതി പാണാതിപാതിനീ അദിന്നാദായിനീ കാമേസുമിച്ഛാചാരിനീ മുസാവാദിനീ പിസുണവാചാ ഫരുസവാചാ സമ്ഫപ്പലാപിനീ അഭിജ്ഝാലുനീ ബ്യാപന്നചിത്താ മിച്ഛാദിട്ഠികാ ദുസ്സീലാ പാപധമ്മാ മച്ഛേരമലപരിയുട്ഠിതേന ചേതസാ അഗാരം അജ്ഝാവസതി അക്കോസികപരിഭാസികാ സമണബ്രാഹ്മണാനം. ഏവം ഖോ, ഭിക്ഖവേ, ഛവോ ഛവായ സദ്ധിം സംവസതി.

‘‘കഥഞ്ച, ഭിക്ഖവേ, ഛവോ ദേവിയാ സദ്ധിം സംവസതി? ഇധ, ഭിക്ഖവേ, സാമികോ ഹോതി പാണാതിപാതീ…പേ… മിച്ഛാദിട്ഠികോ ദുസ്സീലോ പാപധമ്മോ മച്ഛേരമലപരിയുട്ഠിതേന ചേതസാ അഗാരം അജ്ഝാവസതി അക്കോസകപരിഭാസകോ സമണബ്രാഹ്മണാനം; ഭരിയാ ഖ്വസ്സ ഹോതി പാണാതിപാതാ പടിവിരതാ അദിന്നാദാനാ പടിവിരതാ കാമേസുമിച്ഛാചാരാ പടിവിരതാ മുസാവാദാ പടിവിരതാ പിസുണായ വാചായ പടിവിരതാ ഫരുസായ വാചായ പടിവിരതാ സമ്ഫപ്പലാപാ പടിവിരതാ അനഭിജ്ഝാലുനീ അബ്യാപന്നചിത്താ സമ്മാദിട്ഠികാ സീലവതീ കല്യാണധമ്മാ വിഗതമലമച്ഛേരേന ചേതസാ അഗാരം അജ്ഝാവസതി അനക്കോസികപരിഭാസികാ സമണബ്രാഹ്മണാനം. ഏവം ഖോ, ഭിക്ഖവേ, ഛവോ ദേവിയാ സദ്ധിം സംവസതി.

‘‘കഥഞ്ച, ഭിക്ഖവേ, ദേവോ ഛവായ സദ്ധിം സംവസതി? ഇധ, ഭിക്ഖവേ, സാമികോ ഹോതി പാണാതിപാതാ പടിവിരതോ അദിന്നാദാനാ പടിവിരതോ കാമേസുമിച്ഛാചാരാ പടിവിരതോ മുസാവാദാ പടിവിരതോ പിസുണായ വാചായ പടിവിരതോ ഫരുസായ വാചായ പടിവിരതോ സമ്ഫപ്പലാപാ പടിവിരതോ അനഭിജ്ഝാലു അബ്യാപന്നചിത്തോ സമ്മാദിട്ഠികോ സീലവാ കല്യാണധമ്മോ വിഗതമലമച്ഛേരേന ചേതസാ അഗാരം അജ്ഝാവസതി അനക്കോസകപരിഭാസകോ സമണബ്രാഹ്മണാനം; ഭരിയാ ഖ്വസ്സ ഹോതി പാണാതിപാതിനീ…പേ… മിച്ഛാദിട്ഠികാ ദുസ്സീലാ പാപധമ്മാ മച്ഛേരമലപരിയുട്ഠിതേന ചേതസാ അഗാരം അജ്ഝാവസതി അക്കോസികപരിഭാസികാ സമണബ്രാഹ്മണാനം. ഏവം ഖോ, ഭിക്ഖവേ, ദേവോ ഛവായ സദ്ധിം സംവസതി.

‘‘കഥഞ്ച, ഭിക്ഖവേ, ദേവോ ദേവിയാ സദ്ധിം സംവസതി? ഇധ, ഭിക്ഖവേ, സാമികോ ഹോതി പാണാതിപാതാ പടിവിരതോ…പേ… സമ്മാദിട്ഠികോ സീലവാ കല്യാണധമ്മോ വിഗതമലമച്ഛേരേന ചേതസാ അഗാരം അജ്ഝാവസതി അനക്കോസകപരിഭാസകോ സമണബ്രാഹ്മണാനം; ഭരിയാപിസ്സ ഹോതി പാണാതിപാതാ പടിവിരതാ…പേ… സമ്മാദിട്ഠികാ സീലവതീ കല്യാണധമ്മാ വിഗതമലമച്ഛേരേന ചേതസാ അഗാരം അജ്ഝാവസതി അനക്കോസികപരിഭാസികാ സമണബ്രാഹ്മണാനം. ഏവം ഖോ, ഭിക്ഖവേ, ദേവോ ദേവിയാ സദ്ധിം സംവസതി. ഇമേ ഖോ, ഭിക്ഖവേ, ചത്താരോ സംവാസാ’’തി.

‘‘ഉഭോ ച ഹോന്തി ദുസ്സീലാ, കദരിയാ പരിഭാസകാ;

തേ ഹോന്തി ജാനിപതയോ, ഛവാ സംവാസമാഗതാ.

‘‘സാമികോ ഹോതി ദുസ്സീലോ, കദരിയോ പരിഭാസകോ;

ഭരിയാ സീലവതീ ഹോതി, വദഞ്ഞൂ വീതമച്ഛരാ;

സാപി ദേവീ സംവസതി, ഛവേന പതിനാ സഹ.

‘‘സാമികോ സീലവാ ഹോതി, വദഞ്ഞൂ വീതമച്ഛരോ;

ഭരിയാ ഹോതി ദുസ്സീലാ, കദരിയാ പരിഭാസികാ;

സാപി ഛവാ സംവസതി, ദേവേന പതിനാ സഹ.

‘‘ഉഭോ സദ്ധാ വദഞ്ഞൂ ച, സഞ്ഞതാ ധമ്മജീവിനോ;

തേ ഹോന്തി ജാനിപതയോ, അഞ്ഞമഞ്ഞം പിയംവദാ.

‘‘അത്ഥാസം പചുരാ ഹോന്തി, ഫാസുകം ഉപജായതി;

അമിത്താ ദുമ്മനാ ഹോന്തി, ഉഭിന്നം സമസീലിനം.

‘‘ഇധ ധമ്മം ചരിത്വാന, സമസീലബ്ബതാ ഉഭോ;

നന്ദിനോ ദേവലോകസ്മിം, മോദന്തി കാമകാമിനോ’’തി. ചതുത്ഥം;