൩. പഠമസംവാസസുത്തം

൫൩. ഏകം സമയം ഭഗവാ അന്തരാ ച മധുരം അന്തരാ ച വേരഞ്ജം അദ്ധാനമഗ്ഗപ്പടിപന്നോ ഹോതി. സമ്ബഹുലാപി ഖോ ഗഹപതീ ച ഗഹപതാനിയോ ച അന്തരാ ച മധുരം അന്തരാ ച വേരഞ്ജം അദ്ധാനമഗ്ഗപ്പടിപന്നാ ഹോന്തി. അഥ ഖോ ഭഗവാ മഗ്ഗാ ഓക്കമ്മ അഞ്ഞതരസ്മിം രുക്ഖമൂലേ ( ) [(പഞ്ഞത്തേ ആസനേ) (പീ. ക.)] നിസീദി. അദ്ദസംസു ഖോ ഗഹപതീ ച ഗഹപതാനിയോ ച ഭഗവന്തം അഞ്ഞതരസ്മിം രുക്ഖമൂലേ നിസിന്നം. ദിസ്വാ യേന ഭഗവാ തേനുപസങ്കമിംസു; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദിംസു. ഏകമന്തം നിസിന്നേ ഖോ തേ ഗഹപതീ ച ഗഹപതാനിയോ ച ഭഗവാ ഏതദവോച –

‘‘ചത്താരോമേ, ഗഹപതയോ, സംവാസാ. കതമേ ചത്താരോ? ഛവോ ഛവായ സദ്ധിം സംവസതി, ഛവോ ദേവിയാ സദ്ധിം സംവസതി, ദേവോ ഛവായ സദ്ധിം സംവസതി, ദേവോ ദേവിയാ സദ്ധിം സംവസതി.

‘‘കഥഞ്ച, ഗഹപതയോ, ഛവോ ഛവായ സദ്ധിം സംവസതി? ഇധ, ഗഹപതയോ, സാമികോ ഹോതി പാണാതിപാതീ അദിന്നാദായീ കാമേസുമിച്ഛാചാരീ മുസാവാദീ സുരാമേരയമജ്ജപമാദട്ഠായീ ദുസ്സീലോ പാപധമ്മോ മച്ഛേരമലപരിയുട്ഠിതേന ചേതസാ അഗാരം അജ്ഝാവസതി അക്കോസകപരിഭാസകോ സമണബ്രാഹ്മണാനം; ഭരിയാപിസ്സ ഹോതി പാണാതിപാതിനീ അദിന്നാദായിനീ കാമേസുമിച്ഛാചാരിനീ മുസാവാദിനീ സുരാമേരയമജ്ജപമാദട്ഠായിനീ ദുസ്സീലാ പാപധമ്മാ മച്ഛേരമലപരിയുട്ഠിതേന ചേതസാ അഗാരം അജ്ഝാവസതി അക്കോസികപരിഭാസികാ സമണബ്രാഹ്മണാനം. ഏവം ഖോ, ഗഹപതയോ, ഛവോ ഛവായ സദ്ധിം സംവസതി.

‘‘കഥഞ്ച, ഗഹപതയോ, ഛവോ ദേവിയാ സദ്ധിം സംവസതി? ഇധ, ഗഹപതയോ, സാമികോ ഹോതി പാണാതിപാതീ അദിന്നാദായീ കാമേസുമിച്ഛാചാരീ മുസാവാദീ സുരാമേരയമജ്ജപമാദട്ഠായീ ദുസ്സീലോ പാപധമ്മോ മച്ഛേരമലപരിയുട്ഠിതേന ചേതസാ അഗാരം അജ്ഝാവസതി അക്കോസകപരിഭാസകോ സമണബ്രാഹ്മണാനം; ഭരിയാ ഖ്വസ്സ ഹോതി പാണാതിപാതാ പടിവിരതാ അദിന്നാദാനാ പടിവിരതാ കാമേസുമിച്ഛാചാരാ പടിവിരതാ മുസാവാദാ പടിവിരതാ സുരാമേരയമജ്ജപമാദട്ഠാനാ പടിവിരതാ സീലവതീ കല്യാണധമ്മാ വിഗതമലമച്ഛേരേന ചേതസാ അഗാരം അജ്ഝാവസതി അനക്കോസികപരിഭാസികാ സമണബ്രാഹ്മണാനം. ഏവം ഖോ, ഗഹപതയോ, ഛവോ ദേവിയാ സദ്ധിം സംവസതി.

‘‘കഥഞ്ച, ഗഹപതയോ, ദേവോ ഛവായ സദ്ധിം സംവസതി? ഇധ, ഗഹപതയോ, സാമികോ ഹോതി പാണാതിപാതാ പടിവിരതോ അദിന്നാദാനാ പടിവിരതോ കാമേസുമിച്ഛാചാരാ പടിവിരതോ മുസാവാദാ പടിവിരതോ സുരാമേരയമജ്ജപമാദട്ഠാനാ പടിവിരതോ സീലവാ കല്യാണധമ്മോ വിഗതമലമച്ഛേരേന ചേതസാ അഗാരം അജ്ഝാവസതി അനക്കോസകപരിഭാസകോ സമണബ്രാഹ്മണാനം; ഭരിയാ ഖ്വസ്സ ഹോതി പാണാതിപാതിനീ…പേ… സുരാമേരയമജ്ജപമാദട്ഠായിനീ ദുസ്സീലാ പാപധമ്മാ മച്ഛേരമലപരിയുട്ഠിതേന ചേതസാ അഗാരം അജ്ഝാവസതി അക്കോസികപരിഭാസികാ സമണബ്രാഹ്മണാനം. ഏവം ഖോ, ഗഹപതയോ, ദേവോ ഛവായ സദ്ധിം സംവസതി.

‘‘കഥഞ്ച, ഗഹപതയോ, ദേവോ ദേവിയാ സദ്ധിം സംവസതി? ഇധ, ഗഹപതയോ, സാമികോ ഹോതി പാണാതിപാതാ പടിവിരതോ…പേ… സീലവാ കല്യാണധമ്മോ വിഗതമലമച്ഛേരേന ചേതസാ അഗാരം അജ്ഝാവസതി അനക്കോസകപരിഭാസകോ സമണബ്രാഹ്മണാനം; ഭരിയാപിസ്സ ഹോതി പാണാതിപാതാ പടിവിരതാ…പേ… സുരാമേരയമജ്ജപമാദട്ഠാനാ പടിവിരതാ സീലവതീ കല്യാണധമ്മാ വിഗതമലമച്ഛേരേന ചേതസാ അഗാരം അജ്ഝാവസതി അനക്കോസികപരിഭാസികാ സമണബ്രാഹ്മണാനം. ഏവം ഖോ, ഗഹപതയോ, ദേവോ ദേവിയാ സദ്ധിം സംവസതി. ഇമേ ഖോ, ഗഹപതയോ, ചത്താരോ സംവാസാ’’തി.

‘‘ഉഭോ ച ഹോന്തി ദുസ്സീലാ, കദരിയാ പരിഭാസകാ;

തേ ഹോന്തി ജാനിപതയോ, ഛവാ സംവാസമാഗതാ.

‘‘സാമികോ ഹോതി ദുസ്സീലോ, കദരിയോ പരിഭാസകോ;

ഭരിയാ സീലവതീ ഹോതി, വദഞ്ഞൂ വീതമച്ഛരാ;

സാപി ദേവീ സംവസതി, ഛവേന പതിനാ സഹ.

‘‘സാമികോ സീലവാ ഹോതി, വദഞ്ഞൂ വീതമച്ഛരോ;

ഭരിയാ ഹോതി ദുസ്സീലാ, കദരിയാ പരിഭാസികാ;

സാപി ഛവാ സംവസതി, ദേവേന പതിനാ സഹ.

‘‘ഉഭോ സദ്ധാ വദഞ്ഞൂ ച, സഞ്ഞതാ ധമ്മജീവിനോ;

തേ ഹോന്തി ജാനിപതയോ, അഞ്ഞമഞ്ഞം പിയംവദാ.

‘‘അത്ഥാസം പചുരാ ഹോന്തി, ഫാസുകം [ഫാസത്തം (സീ.), വാസത്ഥം (പീ.)] ഉപജായതി;

അമിത്താ ദുമ്മനാ ഹോന്തി, ഉഭിന്നം സമസീലിനം.

‘‘ഇധ ധമ്മം ചരിത്വാന, സമസീലബ്ബതാ ഉഭോ;

നന്ദിനോ ദേവലോകസ്മിം, മോദന്തി കാമകാമിനോ’’തി. തതിയം;