(൧൫) ൫. മങ്ഗലവഗ്ഗോ

൧. അകുസലസുത്തം

൧൪൭. ‘‘തീഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ. കതമേഹി തീഹി? അകുസലേന കായകമ്മേന, അകുസലേന വചീകമ്മേന, അകുസലേന മനോകമ്മേന – ഇമേഹി ഖോ, ഭിക്ഖവേ, തീഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ.

‘‘തീഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേ. കതമേഹി തീഹി? കുസലേന കായകമ്മേന, കുസലേന വചീകമ്മേന, കുസലേന മനോകമ്മേന – ഇമേഹി ഖോ, ഭിക്ഖവേ, തീഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേ’’തി. പഠമം.

൨. സാവജ്ജസുത്തം

൧൪൮. ‘‘തീഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ. കതമേഹി തീഹി? സാവജ്ജേന കായകമ്മേന, സാവജ്ജേന വചീകമ്മേന, സാവജ്ജേന മനോകമ്മേന – ഇമേഹി ഖോ, ഭിക്ഖവേ, തീഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം നിരയേ.

‘‘തീഹി, ഭിക്ഖവേ, ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേ. കതമേഹി തീഹി? അനവജ്ജേന കായകമ്മേന, അനവജ്ജേന വചീകമ്മേന, അനവജ്ജേന മനോകമ്മേന – ഇമേഹി ഖോ…പേ… ഏവം സഗ്ഗേ’’തി. ദുതിയം.

൩. വിസമസുത്തം

൧൪൯. ‘‘തീഹി, ഭിക്ഖവേ…പേ… വിസമേന കായകമ്മേന, വിസമേന വചീകമ്മേന, വിസമേന മനോകമ്മേന – ഇമേഹി ഖോ…പേ… ഏവം നിരയേ.

‘‘തീഹി, ഭിക്ഖവേ, ധമ്മേഹി…പേ… സമേന കായകമ്മേന, സമേന വചീകമ്മേന, സമേന മനോകമ്മേന – ഇമേഹി ഖോ…പേ… ഏവം സഗ്ഗേ’’തി. തതിയം.

൪. അസുചിസുത്തം

൧൫൦. ‘‘തീഹി, ഭിക്ഖവേ…പേ… അസുചിനാ കായകമ്മേന, അസുചിനാ വചീകമ്മേന, അസുചിനാ മനോകമ്മേന – ഇമേഹി ഖോ…പേ… ഏവം നിരയേ.

‘‘തീഹി, ഭിക്ഖവേ…പേ… സുചിനാ കായകമ്മേന, സുചിനാ വചീകമ്മേന, സുചിനാ മനോകമ്മേന – ഇമേഹി ഖോ, ഭിക്ഖവേ, തീഹി ധമ്മേഹി സമന്നാഗതോ യഥാഭതം നിക്ഖിത്തോ ഏവം സഗ്ഗേ’’തി. ചതുത്ഥം.

൫. പഠമഖതസുത്തം

൧൫൧. ‘‘തീഹി, ഭിക്ഖവേ, ധമ്മേഹി സമന്നാഗതോ ബാലോ അബ്യത്തോ അസപ്പുരിസോ ഖതം ഉപഹതം അത്താനം പരിഹരതി, സാവജ്ജോ ച ഹോതി സാനുവജ്ജോ ച വിഞ്ഞൂനം, ബഹുഞ്ച അപുഞ്ഞം പസവതി. കതമേഹി തീഹി? അകുസലേന കായകമ്മേന, അകുസലേന വചീകമ്മേന, അകുസലേന മനോകമ്മേന – ഇമേഹി ഖോ, ഭിക്ഖവേ, തീഹി ധമ്മേഹി സമന്നാഗതോ ബാലോ അബ്യത്തോ അസപ്പുരിസോ ഖതം ഉപഹതം അത്താനം പരിഹരതി, സാവജ്ജോ ച ഹോതി സാനുവജ്ജോ ച വിഞ്ഞൂനം, ബഹുഞ്ച അപുഞ്ഞം പസവതി.

‘‘തീഹി, ഭിക്ഖവേ, ധമ്മേഹി സമന്നാഗതോ പണ്ഡിതോ വിയത്തോ സപ്പുരിസോ അക്ഖതം അനുപഹതം അത്താനം പരിഹരതി, അനവജ്ജോ ച ഹോതി അനനുവജ്ജോ ച വിഞ്ഞൂനം, ബഹുഞ്ച പുഞ്ഞം പസവതി. കതമേഹി തീഹി? കുസലേന കായകമ്മേന, കുസലേന വചീകമ്മേന, കുസലേന മനോകമ്മേന…പേ…. പഞ്ചമം.

൬. ദുതിയഖതസുത്തം

൧൫൨. ‘‘തീഹി, ഭിക്ഖവേ…പേ… സാവജ്ജേന കായകമ്മേന, സാവജ്ജേന വചീകമ്മേന, സാവജ്ജേന മനോകമ്മേന…പേ….

‘‘തീഹി, ഭിക്ഖവേ…പേ… അനവജ്ജേന കായകമ്മേന, അനവജ്ജേന വചീകമ്മേന, അനവജ്ജേന മനോകമ്മേന…പേ…. ഛട്ഠം.

൭. തതിയഖതസുത്തം

൧൫൩. ‘‘തീഹി, ഭിക്ഖവേ…പേ… വിസമേന കായകമ്മേന, വിസമേന വചീകമ്മേന, വിസമേന മനോകമ്മേന…പേ….

‘‘തീഹി, ഭിക്ഖവേ…പേ… സമേന കായകമ്മേന, സമേന വചീകമ്മേന, സമേന മനോകമ്മേന…പേ…. സത്തമം.

൮. ചതുത്ഥഖതസുത്തം

൧൫൪. ‘‘തീഹി, ഭിക്ഖവേ…പേ… അസുചിനാ കായകമ്മേന, അസുചിനാ വചീകമ്മേന, അസുചിനാ മനോകമ്മേന…പേ….

‘‘തീഹി, ഭിക്ഖവേ…പേ… സുചിനാ കായകമ്മേന, സുചിനാ വചീകമ്മേന, സുചിനാ മനോകമ്മേന – ഇമേഹി ഖോ, ഭിക്ഖവേ, തീഹി ധമ്മേഹി സമന്നാഗതോ പണ്ഡിതോ വിയത്തോ സപ്പുരിസോ അക്ഖതം അനുപഹതം അത്താനം പരിഹരതി, അനവജ്ജോ ച ഹോതി അനനുവജ്ജോ ച വിഞ്ഞൂനം, ബഹുഞ്ച പുഞ്ഞം പസവതീ’’തി. അട്ഠമം.

൯. വന്ദനാസുത്തം

൧൫൫. ‘‘തിസ്സോ ഇമാ, ഭിക്ഖവേ, വന്ദനാ. കതമാ തിസ്സോ? കായേന, വാചായ, മനസാ – ഇമാ ഖോ, ഭിക്ഖവേ, തിസ്സോ വന്ദനാ’’തി. നവമം.

൧൦. പുബ്ബണ്ഹസുത്തം

൧൫൬. ‘‘യേ, ഭിക്ഖവേ, സത്താ പുബ്ബണ്ഹസമയം കായേന സുചരിതം ചരന്തി, വാചായ സുചരിതം ചരന്തി, മനസാ സുചരിതം ചരന്തി, സുപുബ്ബണ്ഹോ, ഭിക്ഖവേ, തേസം സത്താനം.

‘‘യേ, ഭിക്ഖവേ, സത്താ മജ്ഝന്ഹികസമയം കായേന സുചരിതം ചരന്തി, വാചായ സുചരിതം ചരന്തി, മനസാ സുചരിതം ചരന്തി, സുമജ്ഝന്ഹികോ, ഭിക്ഖവേ, തേസം സത്താനം.

‘‘യേ, ഭിക്ഖവേ, സത്താ സായന്ഹസമയം കായേന സുചരിതം ചരന്തി, വാചായ സുചരിതം ചരന്തി, മനസാ സുചരിതം ചരന്തി, സുസായന്ഹോ, ഭിക്ഖവേ, തേസം സത്താന’’ന്തി.

‘‘സുനക്ഖത്തം സുമങ്ഗലം, സുപ്പഭാതം സുഹുട്ഠിതം [സുവുട്ഠിതം (സീ. പീ.)];

സുഖണോ സുമുഹുത്തോ ച, സുയിട്ഠം ബ്രഹ്മചാരിസു.

‘‘പദക്ഖിണം കായകമ്മം, വാചാകമ്മം പദക്ഖിണം;

പദക്ഖിണം മനോകമ്മം, പണീധി തേ പദക്ഖിണേ [പണിധിയോ പദക്ഖിണാ (സീ. പീ.), പണിധി തേ പദക്ഖിണാ (സ്യാ. കം.)];

പദക്ഖിണാനി കത്വാന, ലഭന്തത്ഥേ [ലഭതത്ഥേ (സീ. പീ.)] പദക്ഖിണേ.

‘‘തേ അത്ഥലദ്ധാ സുഖിതാ, വിരുള്ഹാ ബുദ്ധസാസനേ;

അരോഗാ സുഖിതാ ഹോഥ, സഹ സബ്ബേഹി ഞാതിഭീ’’തി. ദസമം;

മങ്ഗലവഗ്ഗോ പഞ്ചമോ.