൫. കേസകമ്ബലസുത്തം

൧൩൮. ‘‘സേയ്യഥാപി, ഭിക്ഖവേ, യാനി കാനിചി തന്താവുതാനം വത്ഥാനം, കേസകമ്ബലോ തേസം പടികിട്ഠോ അക്ഖായതി. കേസകമ്ബലോ, ഭിക്ഖവേ, സീതേ സീതോ, ഉണ്ഹേ ഉണ്ഹോ, ദുബ്ബണ്ണോ, ദുഗ്ഗന്ധോ, ദുക്ഖസമ്ഫസ്സോ. ഏവമേവം ഖോ, ഭിക്ഖവേ, യാനി കാനിചി പുഥുസമണബ്രാഹ്മണവാദാനം [സമണപ്പവാദാനം (സീ. സ്യാ. കം. പീ.)] മക്ഖലിവാദോ തേസം പടികിട്ഠോ അക്ഖായതി.

‘‘മക്ഖലി, ഭിക്ഖവേ, മോഘപുരിസോ ഏവംവാദീ ഏവംദിട്ഠി – ‘നത്ഥി കമ്മം, നത്ഥി കിരിയം, നത്ഥി വീരിയ’ന്തി. യേപി തേ, ഭിക്ഖവേ, അഹേസും അതീതമദ്ധാനം അരഹന്തോ സമ്മാസമ്ബുദ്ധാ, തേപി ഭഗവന്തോ കമ്മവാദാ ചേവ അഹേസും കിരിയവാദാ ച വീരിയവാദാ ച. തേപി, ഭിക്ഖവേ, മക്ഖലി മോഘപുരിസോ പടിബാഹതി – ‘നത്ഥി കമ്മം, നത്ഥി കിരിയം, നത്ഥി വീരിയ’ന്തി. യേപി തേ, ഭിക്ഖവേ, ഭവിസ്സന്തി അനാഗതമദ്ധാനം അരഹന്തോ സമ്മാസമ്ബുദ്ധാ, തേപി ഭഗവന്തോ കമ്മവാദാ ചേവ ഭവിസ്സന്തി കിരിയവാദാ ച വീരിയവാദാ ച. തേപി, ഭിക്ഖവേ, മക്ഖലി മോഘപുരിസോ പടിബാഹതി – ‘നത്ഥി കമ്മം, നത്ഥി കിരിയം, നത്ഥി വീരിയ’ന്തി. അഹമ്പി, ഭിക്ഖവേ, ഏതരഹി അരഹം സമ്മാസമ്ബുദ്ധോ കമ്മവാദോ ചേവ കിരിയവാദോ ച വീരിയവാദോ ച. മമ്പി, ഭിക്ഖവേ, മക്ഖലി മോഘപുരിസോ പടിബാഹതി – ‘നത്ഥി കമ്മം, നത്ഥി കിരിയം, നത്ഥി വീരിയ’’’ന്തി.

‘‘സേയ്യഥാപി, ഭിക്ഖവേ, നദീമുഖേ ഖിപ്പം ഉഡ്ഡേയ്യ [ഓഡ്ഡേയ്യ (സീ.)] ബഹൂനം [ബഹുന്നം (സീ. സ്യാ. കം. പീ.)] മച്ഛാനം അഹിതായ ദുക്ഖായ അനയായ ബ്യസനായ; ഏവമേവം ഖോ, ഭിക്ഖവേ, മക്ഖലി മോഘപുരിസോ മനുസ്സഖിപ്പം മഞ്ഞേ ലോകേ ഉപ്പന്നോ ബഹൂനം സത്താനം അഹിതായ ദുക്ഖായ അനയായ ബ്യസനായാ’’തി. പഞ്ചമം.