໘. ອຸປກ຺ຂຏສິກ຺ຂາປທໍ

໕໒໗. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອຎ຺ຎຕໂຣ ປຸຣິໂສ ປຊາປຕິໍ ເອຕທໂວຈ – ‘‘ອຍ຺ຍໍ ອຸປນນ຺ທໍ ຈີວເຣນ ອຈ຺ຉາເທສ຺ສາມີ’’ຕິ. ອສ຺ໂສສິ ໂຂ ອຎ຺ຎຕໂຣ ປິຓ຺ຑຈາຣິໂກ ຠິກ຺ຂຸ ຕສ຺ສ ປຸຣິສສ຺ສ ອິມໍ ວາຈໍ ຠາສມານສ຺ສ. ອຖ ໂຂ ໂສ ຠິກ຺ຂຸ ເຍນາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມນ຺ຕໍ ອຸປນນ຺ທໍ ສກ຺ຍປຸຕ຺ຕໍ ເອຕທໂວຈ – ‘‘ມຫາປຸຎ຺ໂຎສິ ຕ຺ວໍ, ອາວຸໂສ ອຸປນນ຺ທ, ອມຸກສ຺ມິໍ ໂອກາເສ ອຎ຺ຎຕໂຣ ປຸຣິໂສ ປຊາປຕິໍ ເອຕທໂວຈ – ‘‘ອຍ຺ຍໍ ອຸປນນ຺ທໍ ຈີວເຣນ ອຈ຺ຉາເທສ຺ສາມີ’’’ຕິ. ‘‘ອຕ຺ຖາວຸໂສ, ມໍ ໂສ ອຸປຏ຺ຐາໂກ’’ຕິ. ອຖ ໂຂ ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ເຍນ ໂສ ປຸຣິໂສ ເຕນຸປສງ຺ກມິ; ອຸປສງ຺ກມິຕ຺ວາ ຕໍ ປຸຣິສໍ ເອຕທໂວຈ – ‘‘ສຈ຺ຈໍ ກິຣ ມໍ ຕ຺ວໍ, ອາວຸໂສ, ຈີວເຣນ ອຈ຺ຉາເທຕຸກາໂມສີ’’ຕິ? ‘‘ອປິ ເມຍ຺ຍ, ເອວໍ ໂຫຕິ – ‘ອຍ຺ຍໍ ອຸປນນ຺ທໍ ຈີວເຣນ ອຈ຺ຉາເທສ຺ສາມີ’’’ຕິ. ‘‘ສເຈ ໂຂ ມໍ ຕ຺ວໍ, ອາວຸໂສ, ຈີວເຣນ ອຈ຺ຉາເທຕຸກາໂມສິ, ເອວຣູເປນ ຈີວເຣນ ອຈ຺ຉາເທຫິ. ກ຺ຍາຫໍ ເຕນ ອຈ຺ຉນ຺ໂນປິ ກຣິສ຺ສາມິ ຍາຫໍ ນ ປຣິຠຸຎ຺ຊິສ຺ສາມີ’’ຕິ.

ອຖ ໂຂ ໂສ ປຸຣິໂສ ອຸຊ຺ຌາຍຕິ ຂິຍ຺ຍຕິ ວິປາເຈຕິ – ‘‘ມຫິຈ຺ຉາ ອິເມ ສມຓາ ສກ຺ຍປຸຕ຺ຕິຍາ ອສນ຺ຕຸຏ຺ຐາ. ນຍິເມ ສຸກຣາ ຈີວເຣນ ອຈ຺ຉາເທຕຸໍ. ກຖຎ຺ຫິ ນາມ ອຍ຺ໂຍ ອຸປນນ຺ໂທ ມຍາ ປຸພ຺ເພ ອປ຺ປວາຣິໂຕ ມໍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊິສ຺ສຕີ’’ຕິ! ອສ຺ໂສສຸໍ ໂຂ ຠິກ຺ຂູ ຕສ຺ສ ປຸຣິສສ຺ສ ອຸຊ຺ຌາຍນ຺ຕສ຺ສ ຂິຍ຺ຍນ຺ຕສ຺ສ ວິປາເຈນ຺ຕສ຺ສ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍ຺ຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ປຸພ຺ເພ ອປ຺ປວາຣິໂຕ ຄຫປຕິກໍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊິສ຺ສຕີ’’ຕິ! ອຖ ໂຂ ເຕ ຠິກ຺ຂູ ອາຍສ຺ມນ຺ຕໍ ອຸປນນ຺ທໍ ສກ຺ຍປຸຕ຺ຕໍ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ …ເປ… ‘‘ສຈ຺ຈໍ ກິຣ ຕ຺ວໍ, ອຸປນນ຺ທ, ປຸພ຺ເພ ອປ຺ປວາຣິໂຕ ຄຫປຕິກໍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊສີ’’ຕິ? ‘‘ສຈ຺ຈໍ, ຠຄວາ’’ຕິ. ‘‘ຎາຕໂກ ເຕ, ອຸປນນ຺ທ, ອຎ຺ຎາຕໂກ’’ຕິ? ‘‘ອຎ຺ຎາຕໂກ, ຠຄວາ’’ຕິ. ‘‘ອຎ຺ຎາຕໂກ, ໂມຆປຸຣິສ, ອຎ຺ຎາຕກສ຺ສ ນ ຊານາຕິ ປຕິຣູປໍ ວາ ອປ຺ປຕິຣູປໍ ວາ ສນ຺ຕໍ ວາ ອສນ຺ຕໍ ວາ. ຕຕ຺ຖ ນາມ ຕ຺ວໍ, ໂມຆປຸຣິສ, ປຸພ຺ເພ ອປ຺ປວາຣິໂຕ ອຎ຺ຎາຕກໍ ຄຫປຕິກໍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊິສ຺ສສິ! ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໕໒໘. ‘‘ຠິກ຺ຂຸໍ ປເນວ ອຸທ຺ທິສ຺ສ ອຎ຺ຎາຕກສ຺ສ ຄຫປຕິສ຺ສ ວາ ຄຫປຕານິຍາ ວາ ຈີວຣເຈຕາປນ຺ນໍ [ຈີວຣເຈຕາປນໍ (ສ຺ຍາ.)] ອຸປກ຺ຂຏໍ ໂຫຕິ – ‘ອິມິນາ ຈີວຣເຈຕາປນ຺ເນນ ຈີວຣໍ ເຈຕາເປຕ຺ວາ ອິຕ຺ຖນ຺ນາມໍ ຠິກ຺ຂຸໍ ຈີວເຣນ ອຈ຺ຉາເທສ຺ສາມີ’ຕິ; ຕຕ຺ຣ ເຈ ໂສ ຠິກ຺ຂຸ ປຸພ຺ເພ ອປ຺ປວາຣິໂຕ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ເຊຍ຺ຍ – ‘ສາຘຸ ວຕ ມໍ ອາຍສ຺ມາ ອິມິນາ ຈີວຣເຈຕາປນ຺ເນນ ເອວຣູປໍ ວາ ເອວຣູປໍ ວາ ຈີວຣໍ ເຈຕາເປຕ຺ວາ ອຈ຺ຉາເທຫີ’ຕິ, ກລ຺ຍາຓກມ຺ຍຕໍ ອຸປາທາຍ, ນິສ຺ສຄ຺ຄິຍໍ ປາຈິຕ຺ຕິຍ’’ນ຺ຕິ.

໕໒໙. ຠິກ຺ຂຸໍ ປເນວ ອຸທ຺ທິສ຺ສາຕິ ຠິກ຺ຂຸສ຺ສຕ຺ຖາຍ, ຠິກ຺ຂຸໍ ອາຣມ຺ມຓໍ ກຣິຕ຺ວາ, ຠິກ຺ຂຸໍ ອຈ຺ຉາເທຕຸກາໂມ.

ອຎ຺ຎາຕໂກ ນາມ ມາຕິໂຕ ວາ ປິຕິໂຕ ວາ ຍາວ ສຕ຺ຕມາ ປິຕາມຫຍຸຄາ ອສມ຺ພທ຺ໂຘ.

ຄຫປຕິ ນາມ ໂຍ ໂກຈິ ອຄາຣໍ ອຊ຺ຌາວສຕິ.

ຄຫປຕານີ ນາມ ຍາ ກາຈິ ອຄາຣໍ ອຊ຺ຌາວສຕິ.

ຈີວຣເຈຕາປນ຺ນໍ ນາມ ຫິຣຎ຺ຎໍ ວາ ສຸວຓ຺ຓໍ ວາ ມຸຕ຺ຕາ ວາ ມຓິ ວາ ປວາໂຬ ວາ ຜລິໂກ ວາ ປຏໂກ ວາ ສຸຕ຺ຕໍ ວາ ກປ຺ປາໂສ ວາ.

ອິມິນາ ຈີວຣເຈຕາປນ຺ເນນາຕິ ປຈ຺ຈຸປຏ຺ຐິເຕນ.

ເຈຕາເປຕ຺ວາຕິ ປຣິວຕ຺ເຕຕ຺ວາ.

ອຈ຺ຉາເທສ຺ສາມີຕິ ທສ຺ສາມິ.

ຕຕ຺ຣ ເຈ ໂສ ຠິກ຺ຂູຕິ ຍໍ ຠິກ຺ຂຸໍ ອຸທ຺ທິສ຺ສ ຈີວຣເຈຕາປນ຺ນໍ ອຸປກ຺ຂຏໍ ໂຫຕິ ໂສ ຠິກ຺ຂຸ.

ປຸພ຺ເພ ອປ຺ປວາຣິໂຕຕິ ປຸພ຺ເພ ອວຸຕ຺ໂຕ ໂຫຕິ – ‘‘ກີທິເສນ ເຕ, ຠນ຺ເຕ, ຈີວເຣນ ອຕ຺ໂຖ, ກີທິສໍ ເຕ ຈີວຣໍ ເຈຕາເປມີ’’ຕິ?

ອຸປສງ຺ກມິຕ຺ວາຕິ ຆຣໍ ຄນ຺ຕ຺ວາ ຍຕ຺ຖ ກຕ຺ຖຈິ ອຸປສງ຺ກມິຕ຺ວາ .

ຈີວເຣ ວິກປ຺ປໍ ອາປຊ຺ເຊຍ຺ຍາຕິ ອາຍຕໍ ວາ ໂຫຕຸ ວິຕ຺ຖຕໍ ວາ ອປ຺ປິຕໍ ວາ ສຓ຺ຫໍ ວາ.

ອິມິນາ ຈີວຣເຈຕາປນ຺ເນນາຕິ ປຈ຺ຈຸປຏ຺ຐິເຕນ.

ເອວຣູປໍ ວາ ເອວຣູປໍ ວາຕິ. ອາຍຕໍ ວາ ວິຕ຺ຖຕໍ ວາ ອປ຺ປິຕໍ ວາ ສຓ຺ຫໍ ວາ.

ເຈຕາເປຕ຺ວາຕິ ປຣິວຕ຺ເຕຕ຺ວາ.

ອຈ຺ຉາເທຫີຕິ ທຊ຺ເຊຫິ.

ກລ຺ຍາຓກມ຺ຍຕໍ ອຸປາທາຍາຕິ ສາຘຕ຺ຖິໂກ [ສາຘຸຕ຺ຖິໂກ (ສ຺ຍາ.)] ມຫຄ຺ຆຕ຺ຖິໂກ. ຕສ຺ສ ວຈເນນ ອາຍຕໍ ວາ ວິຕ຺ຖຕໍ ວາ ອປ຺ປິຕໍ ວາ ສຓ຺ຫໍ ວາ ເຈຕາເປຕິ, ປໂຍເຄ ທຸກ຺ກຏໍ. ປຏິລາເຠນ ນິສ຺ສຄ຺ຄິຍໍ ໂຫຕິ. ນິສ຺ສຊ຺ຊິຕພ຺ພໍ ສງ຺ຆສ຺ສ ວາ ຄຓສ຺ສ ວາ ປຸຄ຺ຄລສ຺ສ ວາ. ເອວຎ຺ຈ ປນ, ຠິກ຺ຂເວ, ນິສ຺ສຊ຺ຊິຕພ຺ພໍ…ເປ… ອິທໍ ເມ, ຠນ຺ເຕ, ຈີວຣໍ ປຸພ຺ເພ ອປ຺ປວາຣິໂຕ ອຎ຺ຎາຕກໍ ຄຫປຕິກໍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປນ຺ນໍ ນິສ຺ສຄ຺ຄິຍໍ, ອິມາຫໍ ສງ຺ຆສ຺ສ ນິສ຺ສຊ຺ຊາມີຕິ…ເປ… ທເທຍ຺ຍາຕິ…ເປ… ທເທຍ຺ຍຸນ຺ຕິ…ເປ… ອາຍສ຺ມໂຕ ທມ຺ມີຕິ.

໕໓໐. ອຎ຺ຎາຕເກ ອຎ຺ຎາຕກສຎ຺ຎີ ປຸພ຺ເພ ອປ຺ປວາຣິໂຕ ຄຫປຕິກໍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອຎ຺ຎາຕເກ ເວມຕິໂກ ປຸພ຺ເພ ອປ຺ປວາຣິໂຕ ຄຫປຕິກໍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອຎ຺ຎາຕເກ ຎາຕກສຎ຺ຎີ ປຸພ຺ເພ ອປ຺ປວາຣິໂຕ ຄຫປຕິກໍ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ຎາຕເກ ອຎ຺ຎາຕກສຎ຺ຎີ, ອາປຕ຺ຕິ ທຸກ຺ກຏສ຺ສ. ຎາຕເກ ເວມຕິໂກ, ອາປຕ຺ຕິ ທຸກ຺ກຏສ຺ສ. ຎາຕເກ ຎາຕກສຎ຺ຎີ, ອນາປຕ຺ຕິ.

໕໓໑. ອນາປຕ຺ຕິ ຎາຕການໍ, ປວາຣິຕານໍ, ອຎ຺ຎສ຺ສຕ຺ຖາຍ, ອຕ຺ຕໂນ ຘເນນ, ມຫຄ຺ຆໍ ເຈຕາເປຕຸກາມສ຺ສ ອປ຺ປຄ຺ຆໍ ເຈຕາເປຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ອຸປກ຺ຂຏສິກ຺ຂາປທໍ ນິຏ຺ຐິຕໍ ອຏ຺ຐມໍ.