໙. ທຸຕິຍອຸປກ຺ຂຏສິກ຺ຂາປທໍ

໕໓໒. ເຕນ ສມເຍນ ພຸທ຺ໂຘ ຠຄວາ ສາວຕ຺ຖິຍໍ ວິຫຣຕິ ເຊຕວເນ ອນາຖປິຓ຺ຑິກສ຺ສ ອາຣາເມ. ເຕນ ໂຂ ປນ ສມເຍນ ອຎ຺ຎຕໂຣ ປຸຣິໂສ ອຎ຺ຎຕຣໍ ປຸຣິສໍ ເອຕທໂວຈ – ‘‘ອຍ຺ຍໍ ອຸປນນ຺ທໍ ຈີວເຣນ ອຈ຺ຉາເທສ຺ສາມີ’’ຕິ. ໂສປິ ເອວມາຫ – ‘‘ອຫມ຺ປິ ອຍ຺ຍໍ ອຸປນນ຺ທໍ ຈີວເຣນ ອຈ຺ຉາເທສ຺ສາມີ’’ຕິ. ອສ຺ໂສສິ ໂຂ ອຎ຺ຎຕໂຣ ປິຓ຺ຑຈາຣິໂກ ຠິກ຺ຂຸ ເຕສໍ ປຸຣິສານໍ ອິມໍ ກຖາສລ຺ລາປໍ. ອຖ ໂຂ ໂສ ຠິກ຺ຂຸ ເຍນາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ເຕນຸປສງ຺ກມິ; ອຸປສງ຺ກມິຕ຺ວາ ອາຍສ຺ມນ຺ຕໍ ອຸປນນ຺ທໍ ສກ຺ຍປຸຕ຺ຕໍ ເອຕທໂວຈ – ‘‘ມຫາປຸຎ຺ໂຎສິ ຕ຺ວໍ, ອາວຸໂສ ອຸປນນ຺ທ. ອມຸກສ຺ມິໍ ໂອກາເສ ອຎ຺ຎຕໂຣ ປຸຣິໂສ ອຎ຺ຎຕຣໍ ປຸຣິສໍ ເອຕທໂວຈ – ‘ອຍ຺ຍໍ ອຸປນນ຺ທໍ ຈີວເຣນ ອຈ຺ຉາເທສ຺ສາມີ’ຕິ. ໂສປິ ເອວມາຫ – ‘ອຫມ຺ປິ ອຍ຺ຍໍ ອຸປນນ຺ທໍ ຈີວເຣນ ອຈ຺ຉາເທສ຺ສາມີ’’’ຕິ. ‘‘ອຕ຺ຖາວຸໂສ, ມໍ ເຕ ອຸປຏ຺ຐາກາ’’ຕິ.

ອຖ ໂຂ ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ເຍນ ເຕ ປຸຣິສາ ເຕນຸປສງ຺ກມິ; ອຸປສງ຺ກມິຕ຺ວາ ເຕ ປຸຣິເສ ເອຕທໂວຈ – ‘‘ສຈ຺ຈໍ ກິຣ ມໍ ຕຸມ຺ເຫ, ອາວຸໂສ, ຈີວເຣຫິ ອຈ຺ຉາເທຕຸກາມາຕ຺ຖາ’’ຕິ? ‘‘ອປິ ນຍ຺ຍ, ເອວໍ ໂຫຕິ – ‘ອຍ຺ຍໍ ອຸປນນ຺ທໍ ຈີວເຣຫິ ອຈ຺ຉາເທສ຺ສາມາ’’’ຕິ. ‘‘ສເຈ ໂຂ ມໍ ຕຸມ຺ເຫ, ອາວຸໂສ, ຈີວເຣຫິ ອຈ຺ຉາເທຕຸກາມາຕ຺ຖ, ເອວຣູເປນ ຈີວເຣນ ອຈ຺ຉາເທຖ, ກ຺ຍາຫໍ ເຕຫິ ອຈ຺ຉນ຺ໂນປິ ກຣິສ຺ສາມິ, ຍານາຫໍ ນ ປຣິຠຸຎ຺ຊິສ຺ສາມີ’’ຕິ. ອຖ ໂຂ ເຕ ປຸຣິສາ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ມຫິຈ຺ຉາ ອິເມ ສມຓາ ສກ຺ຍປຸຕ຺ຕິຍາ ອສນ຺ຕຸຏ຺ຐາ. ນຍິເມ ສຸກຣາ ຈີວເຣຫິ ອຈ຺ຉາເທຕຸໍ. ກຖຎ຺ຫິ ນາມ ອຍ຺ໂຍ ອຸປນນ຺ໂທ ອມ຺ເຫຫິ ປຸພ຺ເພ ອປ຺ປວາຣິໂຕ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊິສ຺ສຕີ’’ຕິ!

ອສ຺ໂສສຸໍ ໂຂ ຠິກ຺ຂູ ເຕສໍ ປຸຣິສານໍ ອຸຊ຺ຌາຍນ຺ຕານໍ ຂິຍ຺ຍນ຺ຕານໍ ວິປາເຈນ຺ຕານໍ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຍສ຺ມາ ອຸປນນ຺ໂທ ສກ຺ຍປຸຕ຺ໂຕ ປຸພ຺ເພ ອປ຺ປວາຣິໂຕ ຄຫປຕິເກ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊິສ຺ສຕີ’’ຕິ! ອຖ ໂຂ ເຕ ຠິກ຺ຂູ ອາຍສ຺ມນ຺ຕໍ ອຸປນນ຺ທໍ ສກ຺ຍປຸຕ຺ຕໍ ອເນກປຣິຍາເຍນ ວິຄຣຫິຕ຺ວາ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ‘‘ສຈ຺ຈໍ ກິຣ ຕ຺ວໍ, ອຸປນນ຺ທ, ປຸພ຺ເພ ອປ຺ປວາຣິໂຕ ຄຫປຕິເກ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊສີ’’ຕິ? ‘‘ສຈ຺ຈໍ, ຠຄວາ’’ຕິ. ‘‘ຎາຕກາ ເຕ, ອຸປນນ຺ທ, ອຎ຺ຎາຕກາ’’ຕິ? ‘‘ອຎ຺ຎາຕກາ, ຠຄວາ’’ຕິ. ‘‘ອຎ຺ຎາຕໂກ, ໂມຆປຸຣິສ, ອຎ຺ຎາຕການໍ ນ ຊານາຕິ ປຕິຣູປໍ ວາ ອປ຺ປຕິຣູປໍ ວາ ສນ຺ຕໍ ວາ ອສນ຺ຕໍ ວາ. ຕຕ຺ຖ ນາມ ຕ຺ວໍ, ໂມຆປຸຣິສ, ປຸພ຺ເພ ອປ຺ປວາຣິໂຕ ອຎ຺ຎາຕເກ ຄຫປຕິເກ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊິສ຺ສສິ! ເນຕໍ, ໂມຆປຸຣິສ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໕໓໓. ‘‘ຠິກ຺ຂຸໍ ປເນວ ອຸທ຺ທິສ຺ສ ອຸຠິນ຺ນໍ ອຎ຺ຎາຕການໍ ຄຫປຕີນໍ ວາ ຄຫປຕານີນໍ ວາ ປຈ຺ເຈກຈີວຣເຈຕາປນ຺ນານິ ອຸປກ຺ຂຏານິ ໂຫນ຺ຕິ – ‘ອິເມຫິ ມຍໍ ປຈ຺ເຈກຈີວຣເຈຕາປນ຺ເນຫິ ປຈ຺ເຈກຈີວຣານິ ເຈຕາເປຕ຺ວາ ອິຕ຺ຖນ຺ນາມໍ ຠິກ຺ຂຸໍ ຈີວເຣຫິ ອຈ຺ຉາເທສ຺ສາມາ’ຕິ; ຕຕ຺ຣ ເຈ ໂສ ຠິກ຺ຂຸ ປຸພ຺ເພ ອປ຺ປວາຣິໂຕ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ເຊຍ຺ຍ – ‘ສາຘຸ ວຕ ມໍ ອາຍສ຺ມນ຺ໂຕ ອິເມຫິ ປຈ຺ເຈກຈີວຣເຈຕາປນ຺ເນຫິ ເອວຣູປໍ ວາ ເອວຣູປໍ ວາ ຈີວຣໍ ເຈຕາເປຕ຺ວາ ອຈ຺ຉາເທຖ, ອຸໂຠວ ສນ຺ຕາ ເອເກນາ’ຕິ, ກລ຺ຍາຓກມ຺ຍຕໍ ອຸປາທາຍ, ນິສ຺ສຄ຺ຄິຍໍ ປາຈິຕ຺ຕິຍ’’ນ຺ຕິ.

໕໓໔. ຠິກ຺ຂຸໍ ປເນວ ອຸທ຺ທິສ຺ສາຕິ ຠິກ຺ຂຸສ຺ສຕ຺ຖາຍ, ຠິກ຺ຂຸໍ ອາຣມ຺ມຓໍ ກຣິຕ຺ວາ, ຠິກ຺ຂຸໍ ອຈ຺ຉາເທຕຸກາມາ.

ອຸຠິນ຺ນນ຺ຕິ ທ຺ວິນ຺ນໍ.

ອຎ຺ຎາຕກາ ນາມ ມາຕິໂຕ ວາ ປິຕິໂຕ ວາ ຍາວ ສຕ຺ຕມາ ປິຕາມຫຍຸຄາ ອສມ຺ພທ຺ຘາ.

ຄຫປຕີ ນາມ ເຍ ເກຈິ ອຄາຣ ອຊ຺ຌາວສນ຺ຕິ.

ຄຫປຕານິໂຍ ນາມ ຍາ ກາຈິ ອຄາຣໍ ອຊ຺ຌາວສນ຺ຕິ.

ຈີວຣເຈຕາປນ຺ນານິ ນາມ ຫິຣຎ຺ຎາ ວາ ສຸວຓ຺ຓາ ວາ ມຸຕ຺ຕາ ວາ ມຓີ ວາ ປວາຬາ ວາ ຜລິກາ ວາ ປຏກາ ວາ ສຸຕ຺ຕາ ວາ ກປ຺ປາສາ ວາ.

ອິເມຫິ ປຈ຺ເຈກຈີວຣເຈຕາປນ຺ເນຫິຕິ ປຈ຺ຈຸປຏ຺ຐິເຕຫິ.

ເຈຕາເປຕ຺ວາຕິ ປຣິວຕ຺ເຕຕ຺ວາ.

ອຈ຺ຉາເທສ຺ສາມາຕິ ທສ຺ສາມ.

ຕຕ຺ຣ ເຈ ໂສ ຠິກ຺ຂູຕິ ຍໍ ຠິກ຺ຂຸໍ ອຸທ຺ທິສ຺ສ ຈີວຣເຈຕາປນ຺ນານິ ອຸປກ຺ຂຏານິ ໂຫນ຺ຕິ ໂສ ຠິກ຺ຂຸ.

ປຸພ຺ເພ ອປ຺ປວາຣິໂຕຕິ ປຸພ຺ເພ ອວຸຕ຺ໂຕ ໂຫຕິ – ‘‘ກີທິເສນ ເຕ, ຠນ຺ເຕ, ຈີວເຣນ ອຕ຺ໂຖ, ກີທິສໍ ເຕ ຈີວຣໍ ເຈຕາເປມາ’’ຕິ.

ອຸປສງ຺ກມິຕ຺ວາຕິ ຆຣໍ ຄນ຺ຕ຺ວາ ຍຕ຺ຖ ກຕ຺ຖຈິ ອຸປສງ຺ກມິຕ຺ວາ.

ຈີວເຣ ວິກປ຺ປໍ ອາປຊ຺ເຊຍ຺ຍາຕິ ອາຍຕໍ ວາ ໂຫຕຸ ວິຕ຺ຖຕໍ ວາ ອປ຺ປິຕໍ ວາ ສຓ຺ຫໍ ວາ.

ອິເມຫິ ປຈ຺ເຈກຈີວຣເຈຕາປນ຺ເນຫີຕິ ປຈ຺ຈຸປຏ຺ຐິເຕຫິ.

ເອວຣູປໍ ວາ ເອວຣູປໍ ວາຕິ ອາຍຕໍ ວາ ວິຕ຺ຖຕໍ ວາ ອປ຺ປິຕໍ ວາ ສຓ຺ຫໍ ວາ.

ເຈຕາເປຕ຺ວາຕິ ປຣິວຕ຺ເຕຕ຺ວາ.

ອຈ຺ຉາເທຖາຕິ ທຊ຺ເຊຖ.

ອຸໂຠວ ສນ຺ຕາ ເອເກນາຕິ ທ຺ເວປິ ຊນາ ເອເກນ.

ກລ຺ຍາຓກມ຺ຍຕໍ ອຸປາທາຍາຕິ ສາຘຕ຺ຖິໂກ ມຫຄ຺ຆຕ຺ຖິໂກ.

ຕສ຺ສ ວຈເນນ ອາຍຕໍ ວາ ວິຕ຺ຖຕໍ ວາ ອປ຺ປິຕໍ ວາ ສຓ຺ຫໍ ວາ ເຈຕາເປນ຺ຕິ, ປໂຍເຄ ທຸກ຺ກຏໍ. ປຏິລາເຠນ ນິສ຺ສຄ຺ຄິຍໍ ໂຫຕິ. ນິສ຺ສຊ຺ຊິຕພ຺ພໍ ສງ຺ຆສ຺ສ ວາ ຄຓສ຺ສ ວາ ປຸຄ຺ຄລສ຺ສ ວາ. ເອວຎ຺ຈ ປນ, ຠິກ຺ຂເວ, ນິສ຺ສຊ຺ຊິຕພ຺ພໍ…ເປ… ອິທໍ ເມ, ຠນ຺ເຕ, ຈີວຣໍ ປຸພ຺ເພ ອປ຺ປວາຣິໂຕ ອຎ຺ຎາຕເກ ຄຫປຕິເກ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປນ຺ນໍ ນິສ຺ສຄ຺ຄິຍໍ. ອິມາຫໍ ສງ຺ຆສ຺ສ ນິສ຺ສຊ຺ຊາມີຕິ…ເປ… ທເທຍ຺ຍາຕິ…ເປ… ທເທຍ຺ຍຸນ຺ຕິ…ເປ… ອາຍສ຺ມໂຕ ທມ຺ມີຕິ.

໕໓໕. ອຎ຺ຎາຕເກ ອຎ຺ຎາຕກສຎ຺ຎີ ປຸພ຺ເພ ອປ຺ປວາຣິໂຕ ຄຫປຕິເກ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອຎ຺ຎາຕເກ ເວມຕິໂກ ປຸພ຺ເພ ອປ຺ປວາຣິໂຕ ຄຫປຕິເກ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອຎ຺ຎາຕເກ ຎາຕກສຎ຺ຎີ ປຸພ຺ເພ ອປ຺ປວາຣິໂຕ ຄຫປຕິເກ ອຸປສງ຺ກມິຕ຺ວາ ຈີວເຣ ວິກປ຺ປໍ ອາປຊ຺ຊຕິ, ນິສ຺ສຄ຺ຄິຍໍ ປາຈິຕ຺ຕິຍໍ.

ຎາຕເກ ອຎ຺ຎາຕກສຎ຺ຎີ, ອາປຕ຺ຕິ ທຸກ຺ກຏສ຺ສ. ຎາຕເກ ເວມຕິໂກ, ອາປຕ຺ຕິ ທຸກ຺ກຏສ຺ສ. ຎາຕເກ ຎາຕກສຎ຺ຎີ, ອນາປຕ຺ຕິ.

໕໓໖. ອນາປຕ຺ຕິ – ຎາຕການໍ, ປວາຣິຕານໍ, ອຎ຺ຎສ຺ສຕ຺ຖາຍ, ອຕ຺ຕໂນ ຘເນນ, ມຫຄ຺ຆໍ ເຈຕາເປຕຸກາມານໍ ອປ຺ປຄ຺ຆໍ ເຈຕາເປຕິ, ອຸມ຺ມຕ຺ຕກສ຺ສ, ອາທິກມ຺ມິກສ຺ສາຕິ.

ທຸຕິຍອຸປກ຺ຂຏສິກ຺ຂາປທໍ ນິຏ຺ຐິຕໍ ນວມໍ.