໗. ເອຬກໂລມໂຘວາປນສິກ຺ຂາປທໍ

໕໗໖. ເຕນ ສມເຍນ ພຸທ຺ໂຘ ຠຄວາ ສກ຺ເກສຸ ວິຫຣຕິ ກປິລວຕ຺ຖຸສ຺ມິໍ ນິຄ຺ໂຣຘາຣາເມ. ເຕນ ໂຂ ປນ ສມເຍນ ຉພ຺ພຄ຺ຄິຍາ ຠິກ຺ຂູ ຠິກ຺ຂຸນີຫິ ເອຬກໂລມານິ ໂຘວາເປນ຺ຕິປິ ຣຊາເປນ຺ຕິປິ ວິຊຏາເປນ຺ຕິປິ. ຠິກ຺ຂຸນິໂຍ ເອຬກໂລມານິ ໂຘວນ຺ຕິໂຍ ຣຊນ຺ຕິໂຍ ວິຊເຏນ຺ຕິໂຍ ຣິຎ຺ຈນ຺ຕິ ອຸທ຺ເທສໍ ປຣິປຸຈ຺ຉໍ ອຘິສີລໍ ອຘິຈິຕ຺ຕໍ ອຘິປຎ຺ຎໍ. ອຖ ໂຂ ມຫາປຊາປຕິ ໂຄຕມີ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ອຏ຺ຐາສິ. ເອກມນ຺ຕໍ ຐິຕໍ ໂຂ ມຫາປຊາປຕິໍ ໂຄຕມິໍ ຠຄວາ ເອຕທໂວຈ – ‘‘ກຈ຺ຈິ, ໂຄຕມິ, ຠິກ຺ຂຸນິໂຍ ອປ຺ປມຕ຺ຕາ ອາຕາປິນິໂຍ ປຫິຕຕ຺ຕາ ວິຫຣນ຺ຕີ’’ຕິ? ‘‘ກຸໂຕ, ຠນ຺ເຕ, ຠິກ຺ຂຸນີນໍ ອປ຺ປມາໂທ! ອຍ຺ຍາ ຉພ຺ພຄ຺ຄິຍາ ຠິກ຺ຂຸນີຫິ ເອຬກໂລມານິ ໂຘວາເປນ຺ຕິປິ ຣຊາເປນ຺ຕິປິ ວິຊຏາເປນ຺ຕິປິ. ຠິກ຺ຂຸນິໂຍ ເອຬກໂລມານິ ໂຘວນ຺ຕິໂຍ ຣຊນ຺ຕິໂຍ ວິຊເຏນ຺ຕິໂຍ ຣິຎ຺ຈນ຺ຕິ ອຸທ຺ເທສໍ ປຣິປຸຈ຺ຉໍ ອຘິສີລໍ ອຘິຈິຕ຺ຕໍ ອຘິປຎ຺ຎ’’ນ຺ຕິ.

ອຖ ໂຂ ຠຄວາ ມຫາປຊາປຕິໍ ໂຄຕມິໍ ຘມ຺ມິຍາ ກຖາຍ ສນ຺ທສ຺ເສສິ ສມາທເປສິ ສມຸຕ຺ເຕເຊສິ ສມ຺ປຫໍເສສິ. ອຖ ໂຂ ມຫາປຊາປຕິ ໂຄຕມີ ຠຄວຕາ ຘມ຺ມິຍາ ກຖາຍ ສນ຺ທສ຺ສິຕາ ສມາທປິຕາ ສມຸຕ຺ເຕຊິຕາ ສມ຺ປຫໍສິຕາ ຠຄວນ຺ຕໍ ອຠິວາເທຕ຺ວາ ປທກ຺ຂິຓໍ ກຕ຺ວາ ປກ຺ກາມິ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຠິກ຺ຂຸສງ຺ຆໍ ສນ຺ນິປາຕາເປຕ຺ວາ ຉພ຺ພຄ຺ຄິເຍ ຠິກ຺ຂູ ປຏິປຸຈ຺ຉິ – ‘‘ສຈ຺ຈໍ ກິຣ ຕຸມ຺ເຫ, ຠິກ຺ຂເວ, ຠິກ຺ຂຸນີຫິ ເອຬກໂລມານິ ໂຘວາເປຖປິ ຣຊາເປຖປິ ວິຊຏາເປຖປີ’’ຕິ? ‘‘ສຈ຺ຈໍ, ຠຄວາ’’ຕິ. ‘‘ຎາຕິກາໂຍ ຕຸມ຺ຫາກໍ, ຠິກ຺ຂເວ, ອຎ຺ຎາຕິກາໂຍ’’ຕິ? ‘‘ອຎ຺ຎາຕິກາໂຍ, ຠຄວາ’’ຕິ. ‘‘ອຎ຺ຎາຕກາ, ໂມຆປຸຣິສາ, ອຎ຺ຎາຕິການໍ ນ ຊານນ຺ຕິ ປຕິຣູປໍ ວາ ອປ຺ປຕິຣູປໍ ວາ ປາສາທິກໍ ວາ ອປາສາທິກໍ. ຕຕ຺ຖ ນາມ ຕຸມ຺ເຫ, ໂມຆປຸຣິສາ, ອຎ຺ຎາຕິກາຫິ ຠິກ຺ຂຸນີຫິ ເອຬກໂລມານິ ໂຘວາເປສ຺ສຖປິ ຣຊາເປສ຺ສຖປິ ວິຊຏາເປສ຺ສຖປິ! ເນຕໍ, ໂມຆປຸຣິສາ, ອປ຺ປສນ຺ນານໍ ວາ ປສາທາຍ…ເປ… ເອວຎ຺ຈ ປນ, ຠິກ຺ຂເວ, ອິມໍ ສິກ຺ຂາປທໍ ອຸທ຺ທິເສຍ຺ຍາຖ –

໕໗໗. ‘‘ໂຍ ປນ ຠິກ຺ຂຸ ອຎ຺ຎາຕິກາຍ ຠິກ຺ຂຸນິຍາ ເອຬກໂລມານິ ໂຘວາເປຍ຺ຍ ວາ ຣຊາເປຍ຺ຍ ວາ ວິຊຏາເປຍ຺ຍ ວາ, ນິສ຺ສຄ຺ຄິຍໍ ປາຈິຕ຺ຕິຍ’’ນ຺ຕິ.

໕໗໘. ໂຍ ປນາຕິ ໂຍ ຍາທິໂສ…ເປ… ຠິກ຺ຂູຕິ…ເປ… ອຍໍ ອິມສ຺ມິໍ ອຕ຺ເຖ ອຘິປ຺ເປໂຕ ຠິກ຺ຂູຕິ.

ອຎ຺ຎາຕິກາ ນາມ ມາຕິໂຕ ວາ ປິຕິໂຕ ວາ ຍາວ ສຕ຺ຕມາ ປິຕາມຫຍຸຄາ ອສມ຺ພທ຺ຘາ.

ຠິກ຺ຂຸນີ ນາມ ອຸຠໂຕສງ຺ເຆ ອຸປສມ຺ປນ຺ນາ.

ໂຘວາຕິ ອາຓາເປຕິ, ອາປຕ຺ຕິ ທຸກ຺ກຏສ຺ສ. ໂຘຕານິ ນິສ຺ສຄ຺ຄິຍານິ ໂຫນ຺ຕິ. ຣຊາຕິ ອາຓາເປຕິ, ອາປຕ຺ຕິ ທຸກ຺ກຏສ຺ສ. ຣຕ຺ຕານິ ນິສ຺ສຄ຺ຄິຍານິ ໂຫນ຺ຕິ. ວິຊເຏຫີຕິ ອາຓາເປຕິ, ອາປຕ຺ຕິ ທຸກ຺ກຏສ຺ສ. ວິຊຏິຕານິ ນິສ຺ສຄ຺ຄິຍານິ ໂຫນ຺ຕິ. ນິສ຺ສຊ຺ຊິຕພ຺ພານິ ສງ຺ຆສ຺ສ ວາ ຄຓສ຺ສ ວາ ປຸຄ຺ຄລສ຺ສ ວາ. ເອວຎ຺ຈ ປນ, ຠິກ຺ຂເວ, ນິສ຺ສຊ຺ຊິຕພ຺ພານິ…ເປ… ອິມານິ ເມ, ຠນ຺ເຕ, ເອຬກໂລມານິ ອຎ຺ຎາຕິກາຍ ຠິກ຺ຂຸນິຍາ ໂຘວາປິຕານິ ນິສ຺ສຄ຺ຄິຍານິ. ອິມານາຫໍ ສງ຺ຆສ຺ສ ນິສ຺ສຊ຺ຊາມີຕິ…ເປ… ທເທຍ຺ຍາຕິ…ເປ… ທເທຍ຺ຍຸນ຺ຕິ…ເປ… ອາຍສ຺ມໂຕ ທມ຺ມີຕິ.

໕໗໙. ອຎ຺ຎາຕິກາຍ ອຎ຺ຎາຕິກສຎ຺ຎີ ເອຬກໂລມານິ ໂຘວາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອຎ຺ຎາຕິກາຍ ອຎ຺ຎາຕິກສຎ຺ຎີ ເອຬກໂລມານິ ໂຘວາເປຕິ ຣຊາເປຕິ, ນິສ຺ສຄ຺ຄິເຍນ ອາປຕ຺ຕິ ທຸກ຺ກຏສ຺ສ. ອຎ຺ຎາຕິກາຍ ອຎ຺ຎາຕິກສຎ຺ຎີ ເອຬກໂລມານິ ໂຘວາເປຕິ ວິຊຏາເປຕິ, ນິສ຺ສຄ຺ຄິເຍນ ອາປຕ຺ຕິ ທຸກ຺ກຏສ຺ສ. ອຎ຺ຎາຕິກາຍ ອຎ຺ຎາຕິກສຎ຺ຎີ ເອຬກໂລມານິ ໂຘວາເປຕິ ຣຊາເປຕິ ວິຊຏາເປຕິ, ນິສ຺ສຄ຺ຄິເຍນ ອາປຕ຺ຕິ ທ຺ວິນ຺ນໍ ທຸກ຺ກຏານໍ.

ອຎ຺ຎາຕິກາຍ ອຎ຺ຎາຕິກສຎ຺ຎີ ເອຬກໂລມານິ ຣຊາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອຎ຺ຎາຕິກາຍ ອຎ຺ຎາຕິກສຎ຺ຎີ ເອຬກໂລມານິ ຣຊາເປຕິ ວິຊຏາເປຕິ, ນິສ຺ສຄ຺ຄິເຍນ ອາປຕ຺ຕິ ທຸກ຺ກຏສ຺ສ. ອຎ຺ຎາຕິກາຍ ອຎ຺ຎາຕິກສຎ຺ຎີ ເອຬກໂລມານິ ຣຊາເປຕິ ໂຘວາເປຕິ, ນິສ຺ສຄ຺ຄິເຍນ ອາປຕ຺ຕິ ທຸກ຺ກຏສ຺ສ. ອຎ຺ຎາຕິກາຍ ອຎ຺ຎາຕິກສຎ຺ຎີ ເອຬກໂລມານິ ຣຊາເປຕິ ວິຊຏາເປຕິ ໂຘວາເປຕິ, ນິສ຺ສຄ຺ຄິເຍນ ອາປຕ຺ຕິ ທ຺ວິນ຺ນໍ ທຸກ຺ກຏານໍ.

ອຎ຺ຎາຕິກາຍ ອຎ຺ຎາຕິກສຎ຺ຎີ ເອຬກໂລມານິ ວິຊຏາເປຕິ, ນິສ຺ສຄ຺ຄິຍໍ ປາຈິຕ຺ຕິຍໍ. ອຎ຺ຎາຕິກາຍ ອຎ຺ຎາຕິກສຎ຺ຎີ ເອຬກໂລມານິ ວິຊຏາເປຕິ ໂຘວາເປຕິ, ນິສ຺ສຄ຺ຄິເຍນ ອາປຕ຺ຕິ ທຸກ຺ກຏສ຺ສ. ອຎ຺ຎາຕິກາຍ ອຎ຺ຎາຕິກສຎ຺ຎີ ເອຬກໂລມານິ ວິຊຏາເປຕິ ຣຊາເປຕິ, ນິສ຺ສຄ຺ຄິເຍນ ອາປຕ຺ຕິ ທຸກ຺ກຏສ຺ສ. ອຎ຺ຎາຕິກາຍ ອຎ຺ຎາຕິກສຎ຺ຎີ ເອຬກໂລມານິ ວິຊຏາເປຕິ ໂຘວາເປຕິ ຣຊາເປຕິ, ນິສ຺ສຄ຺ຄິເຍນ ອາປຕ຺ຕິ ທ຺ວິນ຺ນໍ ທຸກ຺ກຏານໍ.

໕໘໐. ອຎ຺ຎາຕິກາຍ ເວມຕິໂກ…ເປ… ອຎ຺ຎາຕິກາຍ ຎາຕິກສຎ຺ຎີ…ເປ… ອຎ຺ຎສ຺ສ ເອຬກໂລມານິ ໂຘວາເປຕິ, ອາປຕ຺ຕິ ທຸກ຺ກຏສ຺ສ. ເອກໂຕ ອຸປສມ຺ປນ຺ນາຍ ໂຘວາເປຕິ, ອາປຕ຺ຕິ ທຸກ຺ກຏສ຺ສ. ຎາຕິກາຍ ອຎ຺ຎາຕິກສຎ຺ຎີ, ອາປຕ຺ຕິ ທຸກ຺ກຏສ຺ສ. ຎາຕິກາຍ ເວມຕິໂກ, ອາປຕ຺ຕິ ທຸກ຺ກຏສ຺ສ. ຎາຕິກາຍ ຎາຕິກສຎ຺ຎີ, ອນາປຕ຺ຕິ.

໕໘໑. ອນາປຕ຺ຕິ ຎາຕິກາຍ ຘາວນ຺ຕິຍາ ອຎ຺ຎາຕິກາ ທຸຕິຍາ ໂຫຕິ, ອວຸຕ຺ຕາ ໂຘວຕິ, ອປຣິຠຸຕ຺ຕໍ ກຕຠຓ຺ຑໍ ໂຘວາເປຕິ, ສິກ຺ຂມານາຍ ສາມເຓຣິຍາ ອຸມ຺ມຕ຺ຕກສ຺ສ ອາທິກມ຺ມິກສ຺ສາຕິ.

ເອຬກໂລມໂຘວາປນສິກ຺ຂາປທໍ ນິຏ຺ຐິຕໍ ສຕ຺ຕມໍ.