໖. ຘມ຺ມິກປາຕິໂມກ຺ຂຏ຺ຐປນໍ

໓໘໘. ‘‘ກຖໍ ປາຣາຊິໂກ ຕສ຺ສໍ ປຣິສາຍໍ ນິສິນ຺ໂນ ໂຫຕິ? ອິຘ, ຠິກ຺ຂເວ, ເຍຫິ ອາກາເຣຫິ ເຍຫິ ລິງ຺ເຄຫິ ເຍຫິ ນິມິຕ຺ເຕຫິ ປາຣາຊິກສ຺ສ ຘມ຺ມສ຺ສ ອຊ຺ຌາປຕ຺ຕິ ໂຫຕິ, ເຕຫິ ອາກາເຣຫິ ເຕຫິ ລິງ຺ເຄຫິ ເຕຫິ ນິມິຕ຺ເຕຫິ ຠິກ຺ຂຸ ຠິກ຺ຂຸໍ ປສ຺ສຕິ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ຕໍ. ນ ເຫວ ໂຂ ຠິກ຺ຂຸ ຠິກ຺ຂຸໍ ປສ຺ສຕິ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ຕໍ, ອປິ ຈ ອຎ຺ໂຎ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອິຕ຺ຖນ຺ນາໂມ, ອາວຸໂສ, ຠິກ຺ຂຸ ປາຣາຊິກໍ ຘມ຺ມໍ ອຊ຺ຌາປນ຺ໂນ’ຕິ. ນ ເຫວ ໂຂ ຠິກ຺ຂຸ ຠິກ຺ຂຸໍ ປສ຺ສຕິ ປາຣາຊິກໍ ຘມ຺ມໍ ອຊ຺ຌາປຊ຺ຊນ຺ຕໍ, ນາປິ [ນາປິ ຈ (ກ.)] ອຎ຺ໂຎ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອິຕ຺ຖນ຺ນາໂມ, ອາວຸໂສ, ຠິກ຺ຂຸ ປາຣາຊິກໍ ຘມ຺ມໍ ອຊ຺ຌາປນ຺ໂນ’ຕິ, ອປິຈ ໂສວ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອຫໍ, ອາວຸໂສ, ປາຣາຊິກໍ ຘມ຺ມໍ ອຊ຺ຌາປນ຺ໂນ’ຕິ. ອາກງ຺ຂມາໂນ, ຠິກ຺ຂເວ, ຠິກ຺ຂຸ ເຕນ ທິຏ຺ເຐນ ເຕນ ສຸເຕນ ຕາຍ ປຣິສງ຺ກາຍ ຕທຫຸໂປສເຖ ຈາຕຸທ຺ທເສ ວາ ປນ຺ນຣເສ ວາ ຕສ຺ມິໍ ປຸຄ຺ຄເລ ສມ຺ມຸຂີຠູເຕ ສງ຺ຆມຊ຺ເຌ ອຸທາຫເຣຍ຺ຍ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາໂມ ປຸຄ຺ຄໂລ ປາຣາຊິກໍ ຘມ຺ມໍ ອຊ຺ຌາປນ຺ໂນ, ຕສ຺ສ ປາຕິໂມກ຺ຂໍ ຐເປມິ, ນ ຕສ຺ມິໍ ສມ຺ມຸຂີຠູເຕ ປາຕິໂມກ຺ຂໍ ອຸທ຺ທິສິຕພ຺ພນ຺ຕິ – ຘມ຺ມິກໍ ປາຕິໂມກ຺ຂຏ຺ຐປນໍ.

໓໘໙. ‘‘ຠິກ຺ຂຸສ຺ສ ປາຕິໂມກ຺ເຂ ຐປິເຕ ປຣິສາ ວຸຏ຺ຐາຕິ, ທສນ຺ນໍ ອນ຺ຕຣາຍານໍ ອຎ຺ຎຕເຣນ [ອຎ຺ຎຕເຣນ ອນ຺ຕຣາເຍນ (ສ຺ຍາ. ກໍ.)] – ຣາຊນ຺ຕຣາເຍນ ວາ, ໂຈຣນ຺ຕຣາເຍນ ວາ, ອຄ຺ຍນ຺ຕຣາເຍນ ວາ, ອຸທກນ຺ຕຣາເຍນ ວາ, ມນຸສ຺ສນ຺ຕຣາເຍນ ວາ, ອມນຸສ຺ສນ຺ຕຣາເຍນ ວາ, ວາຬນ຺ຕຣາເຍນ ວາ, ສຣີສປນ຺ຕຣາເຍນ ວາ, ຊີວິຕນ຺ຕຣາເຍນ ວາ, ພ຺ຣຫ຺ມຈຣິຍນ຺ຕຣາເຍນ ວາ. ອາກງ຺ຂມາໂນ, ຠິກ຺ຂເວ, ຠິກ຺ຂຸ ຕສ຺ມິໍ ວາ ອາວາເສ, ອຎ຺ຎສ຺ມິໍ ວາ ອາວາເສ, ຕສ຺ມິໍ ປຸຄ຺ຄເລ ສມ຺ມຸຂີຠູເຕ ສງ຺ຆມຊ຺ເຌ ອຸທາຫເຣຍ຺ຍ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາມສ຺ສ ປຸຄ຺ຄລສ຺ສ ປາຣາຊິກກຖາ ວິປ຺ປກຕາ, ຕໍ ວຕ຺ຖຸ ອວິນິຈ຺ຉິຕໍ. ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ຕໍ ວຕ຺ຖຸໍ ວິນິຈ຺ຉິເນຍ຺ຍາຕິ.

‘‘ເອວຎ຺ເຈຕໍ ລເຠຖ, ອິຈ຺ເຈຕໍ ກຸສລໍ. ໂນ ເຈ ລເຠຖ, ຕທຫຸໂປສເຖ ຈາຕຸທ຺ທເສ ວາ ປນ຺ນຣເສ ວາ ຕສ຺ມິໍ ປຸຄ຺ຄເລ ສມ຺ມຸຂີຠູເຕ ສງ຺ຆມຊ຺ເຌ ອຸທາຫຣິຕພ຺ພໍ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາມສ຺ສ ປຸຄ຺ຄລສ຺ສ ປາຣາຊິກກຖາ ວິປ຺ປກຕາ, ຕໍ ວຕ຺ຖຸ ອວິນິຈ຺ຉິຕໍ. ຕສ຺ສ ປາຕິໂມກ຺ຂໍ ຐເປມິ, ນ ຕສ຺ມິໍ ສມ຺ມຸຂີຠູເຕ ປາຕິໂມກ຺ຂໍ ອຸທ຺ທິສິຕພ຺ພນ຺ຕິ – ຘມ຺ມິກໍ ປາຕິໂມກ຺ຂຏ຺ຐປນໍ.

໓໙໐. ‘‘ກຖໍ ສິກ຺ຂໍ ປຈ຺ຈກ຺ຂາຕໂກ ຕສ຺ສໍ ປຣິສາຍໍ ນິສິນ຺ໂນ ໂຫຕິ? ອິຘ ປນ, ຠິກ຺ຂເວ, ຠິກ຺ຂຸ ເຍຫິ ອາກາເຣຫິ ເຍຫິ ລິງ຺ເຄຫິ ເຍຫິ ນິມິຕ຺ເຕຫິ ສິກ຺ຂາ ປຈ຺ຈກ຺ຂາຕາ ໂຫຕິ, ເຕຫິ ອາກາເຣຫິ ເຕຫິ ລິງ຺ເຄຫິ ເຕຫິ ນິມິຕ຺ເຕຫິ ຠິກ຺ຂຸ ຠິກ຺ຂຸໍ ປສ຺ສຕິ ສິກ຺ຂໍ ປຈ຺ຈກ຺ຂນ຺ຕໍ. ນ ເຫວ ໂຂ ຠິກ຺ຂຸ ຠິກ຺ຂຸໍ ປສ຺ສຕິ ສິກ຺ຂໍ ປຈ຺ຈກ຺ຂນ຺ຕໍ, ອປິຈ ອຎ຺ໂຎ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອິຕ຺ຖນ຺ນາເມນ, ອາວຸໂສ, ຠິກ຺ຂຸນາ ສິກ຺ຂາ ປຈ຺ຈກ຺ຂາຕາ’ຕິ. ນ ເຫວ ໂຂ ຠິກ຺ຂຸ ຠິກ຺ຂຸໍ ປສ຺ສຕິ ສິກ຺ຂໍ ປຈ຺ຈກ຺ຂນ຺ຕໍ, ນາປິ ອຎ຺ໂຎ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອິຕ຺ຖນ຺ນາເມນ, ອາວຸໂສ, ຠິກ຺ຂຸນາ ສິກ຺ຂາ ປຈ຺ຈກ຺ຂາຕາ’ຕິ, ອປິຈ ໂສວ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ມຍາ, ອາວຸໂສ, ສິກ຺ຂາ ປຈ຺ຈກ຺ຂາຕາ’ຕິ. ອາກງ຺ຂມາໂນ, ຠິກ຺ຂເວ, ຠິກ຺ຂຸ ເຕນ ທິຏ຺ເຐນ ເຕນ ສຸເຕນ ຕາຍ ປຣິສງ຺ກາຍ ຕທຫຸໂປສເຖ ຈາຕຸທ຺ທເສ ວາ ປນ຺ນຣເສ ວາ ຕສ຺ມິໍ ປຸຄ຺ຄເລ ສມ຺ມຸຂີຠູເຕ ສງ຺ຆມຊ຺ເຌ ອຸທາຫເຣຍ຺ຍ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາເມນ ປຸຄ຺ຄເລນ ສິກ຺ຂາ ປຈ຺ຈກ຺ຂາຕາ, ຕສ຺ສ ປາຕິໂມກ຺ຂໍ ຐເປມິ, ນ ຕສ຺ມິໍ ສມ຺ມຸຂີຠູເຕ ປາຕິໂມກ຺ຂໍ ອຸທ຺ທິສິຕພ຺ພນ຺ຕິ – ຘມ຺ມິກໍ ປາຕິໂມກ຺ຂຏ຺ຐປນໍ.

໓໙໑. ‘‘ຠິກ຺ຂຸສ຺ສ ປາຕິໂມກ຺ເຂ ຐປິເຕ ປຣິສາ ວຸຏ຺ຐາຕິ, ທສນ຺ນໍ ອນ຺ຕຣາຍານໍ ອຎ຺ຎຕເຣນ – ຣາຊນ຺ຕຣາເຍນ ວາ …ເປ… ພ຺ຣຫ຺ມຈຣິຍນ຺ຕຣາເຍນ ວາ, ອາກງ຺ຂມາໂນ, ຠິກ຺ຂເວ, ຠິກ຺ຂຸ ຕສ຺ມິໍ ວາ ອາວາເສ, ອຎ຺ຎສ຺ມິໍ ວາ ອາວາເສ, ຕສ຺ມິໍ ປຸຄ຺ຄເລ ສມ຺ມຸຂີຠູເຕ ສງ຺ຆມຊ຺ເຌ ອຸທາຫເຣຍ຺ຍ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາມສ຺ສ ປຸຄ຺ຄລສ຺ສ ສິກ຺ຂໍ ປຈ຺ຈກ຺ຂາຕກຖາ [ສິກ຺ຂາປຈ຺ຈກ຺ຂາຕກຖາ (ສີ.)] ວິປ຺ປກຕາ, ຕໍ ວຕ຺ຖຸ ອວິນິຈ຺ຉິຕໍ. ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ຕໍ ວຕ຺ຖຸໍ ວິນິຈ຺ຉິເນຍ຺ຍາຕິ.

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາມສ຺ສ ປຸຄ຺ຄລສ຺ສ ສິກ຺ຂໍ ປຈ຺ຈກ຺ຂາຕກຖາ ວິປ຺ປກຕາ, ຕໍ ວຕ຺ຖຸ ອວິນິຈ຺ຉິຕໍ. ຕສ຺ສ ປາຕິໂມກ຺ຂໍ ຐເປມິ, ນ ຕສ຺ມິໍ ສມ຺ມຸຂີຠູເຕ ປາຕິໂມກ຺ຂໍ ອຸທ຺ທິສິຕພ຺ພນ຺ຕິ – ຘມ຺ມິກໍ ປາຕິໂມກ຺ຂຏ຺ຐປນໍ.

໓໙໒. ‘‘ກຖໍ ຘມ຺ມິກໍ ສາມຄ຺ຄິໍ ນ ອຸເປຕິ? ອິຘ ປນ, ຠິກ຺ຂເວ, ຠິກ຺ຂຸ ເຍຫິ ອາກາເຣຫິ ເຍຫິ ລິງ຺ເຄຫິ ເຍຫິ ນິມິຕ຺ເຕຫິ ຘມ຺ມິກາຍ ສາມຄ຺ຄິຍານຸປຄມນໍ ໂຫຕິ, ເຕຫິ ອາກາເຣຫິ ເຕຫິ ລິງ຺ເຄຫິ ເຕຫິ ນິມິຕ຺ເຕຫິ ຠິກ຺ຂຸ ຠິກ຺ຂຸໍ ປສ຺ສຕິ ຘມ຺ມິກໍ ສາມຄ຺ຄິໍ ນ ອຸເປນ຺ຕໍ. ນ ເຫວ ໂຂ ຠິກ຺ຂຸ ຠິກ຺ຂຸໍ ປສ຺ສຕິ ຘມ຺ມິກໍ ສາມຄ຺ຄິໍ ນ ອຸເປນ຺ຕໍ, ອປິ ຈ ອຎ຺ໂຎ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອິຕ຺ຖນ຺ນາໂມ, ອາວຸໂສ, ຠິກ຺ຂຸ ຘມ຺ມິກໍ ສາມຄ຺ຄິໍ ນ ອຸເປຕີ’ຕິ. ນ ເຫວ ໂຂ ຠິກ຺ຂຸ ຠິກ຺ຂຸໍ ປສ຺ສຕິ ຘມ຺ມິກໍ ສາມຄ຺ຄິໍ ນ ອຸເປນ຺ຕໍ, ນາປິ ອຎ຺ໂຎ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອິຕ຺ຖນ຺ນາໂມ, ອາວຸໂສ, ຠິກ຺ຂຸ ຘມ຺ມິກໍ ສາມຄ຺ຄິໍ ນ ອຸເປຕີ’ຕິ, ອປິ ຈ ໂສວ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອຫໍ, ອາວຸໂສ, ຘມ຺ມິກໍ ສາມຄ຺ຄິໍ ນ ອຸເປມີ’ຕິ. ອາກງ຺ຂມາໂນ, ຠິກ຺ຂເວ, ຠິກ຺ຂຸ ເຕນ ທິຏ຺ເຐນ ເຕນ ສຸເຕນ ຕາຍ ປຣິສງ຺ກາຍ ຕທຫຸໂປສເຖ ຈາຕຸທ຺ທເສ ວາ ປນ຺ນຣເສ ວາ ຕສ຺ມິໍ ປຸຄ຺ຄເລ ສມ຺ມຸຂີຠູເຕ ສງ຺ຆມຊ຺ເຌ ອຸທາຫເຣຍ຺ຍ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາໂມ ປຸຄ຺ຄໂລ ຘມ຺ມິກໍ ສາມຄ຺ຄິໍ ນ ອຸເປຕິ, ຕສ຺ສ ປາຕິໂມກ຺ຂໍ ຐເປມິ, ນ ຕສ຺ມິໍ ສມ຺ມຸຂີຠູເຕ ປາຕິໂມກ຺ຂໍ ອຸທ຺ທິສິຕພ຺ພນ຺ຕິ – ຘມ຺ມິກໍ ປາຕິໂມກ຺ຂຏ຺ຐປນໍ.

໓໙໓. ‘‘ກຖໍ ຘມ຺ມິກໍ ສາມຄ຺ຄິໍ ປຈ຺ຈາທິຍຕິ? ອິຘ, ຠິກ຺ຂເວ, ຠິກ຺ຂຸ ເຍຫິ ອາກາເຣຫິ ເຍຫິ ລິງ຺ເຄຫິ ເຍຫິ ນິມິຕ຺ເຕຫິ ຘມ຺ມິກາຍ ສາມຄ຺ຄິຍາ ປຈ຺ຈາທານໍ ໂຫຕິ, ເຕຫິ ອາກາເຣຫິ ເຕຫິ ລິງ຺ເຄຫິ ເຕຫິ ນິມິຕ຺ເຕຫິ ຠິກ຺ຂຸ ຠິກ຺ຂຸໍ ປສ຺ສຕິ ຘມ຺ມິກໍ ສາມຄ຺ຄິໍ ປຈ຺ຈາທິຍນ຺ຕໍ ນ ເຫວ ໂຂ ຠິກ຺ຂຸ ຠິກ຺ຂຸໍ ປສ຺ສຕິ ຘມ຺ມິກໍ ສາມຄ຺ຄິໍ ປຈ຺ຈາທິຍນ຺ຕໍ, ອປິ ຈ ອຎ຺ໂຎ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອິຕ຺ຖນ຺ນາໂມ, ອາວຸໂສ, ຠິກ຺ຂຸ ຘມ຺ມິກໍ ສາມຄ຺ຄິໍ ປຈ຺ຈາທິຍຕີ’ຕິ. ນ ເຫວ ໂຂ ຠິກ຺ຂຸ ຠິກ຺ຂຸໍ ປສ຺ສຕິ ຘມ຺ມິກໍ ສາມຄ຺ຄິໍ ປຈ຺ຈາທິຍນ຺ຕໍ, ນາປິ ອຎ຺ໂຎ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອິຕ຺ຖນ຺ນາໂມ, ອາວຸໂສ, ຠິກ຺ຂຸ ຘມ຺ມິກໍ ສາມຄ຺ຄິໍ ປຈ຺ຈາທິຍຕີ’ຕິ, ອປິ ຈ ໂສວ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອຫໍ, ອາວຸໂສ, ຘມ຺ມິກໍ ສາມຄ຺ຄິໍ ປຈ຺ຈາທິຍາມີ’ຕິ. ອາກງ຺ຂມາໂນ, ຠິກ຺ຂເວ, ຠິກ຺ຂຸ ເຕນ ທິຏ຺ເຐນ ເຕນ ສຸເຕນ ຕາຍ ປຣິສງ຺ກາຍ ຕທຫຸໂປສເຖ ຈາຕຸທ຺ທເສ ວາ ປນ຺ນຣເສ ວາ ຕສ຺ມິໍ ປຸຄ຺ຄເລ ສມ຺ມຸຂີຠູເຕ ສງ຺ຆມຊ຺ເຌ ອຸທາຫເຣຍ຺ຍ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາໂມ ປຸຄ຺ຄໂລ ຘມ຺ມິກໍ ສາມຄ຺ຄິໍ ປຈ຺ຈາທິຍຕິ, ຕສ຺ສ ປາຕິໂມກ຺ຂໍ ຐເປມິ, ນ ຕສ຺ມິໍ ສມ຺ມຸຂີຠູເຕ ປາຕິໂມກ຺ຂໍ ອຸທ຺ທິສິຕພ຺ພນ຺ຕິ – ຘມ຺ມິກໍ ປາຕິໂມກ຺ຂຏ຺ຐປນໍ.

໓໙໔. ‘‘ຠິກ຺ຂຸສ຺ສ ປາຕິໂມກ຺ເຂ ຐປິເຕ ປຣິສາ ວຸຏ຺ຐາຕິ, ທສນ຺ນໍ ອນ຺ຕຣາຍານໍ ອຎ຺ຎຕເຣນ – ຣາຊນ຺ຕຣາເຍນ ວາ…ເປ… ພ຺ຣຫ຺ມຈຣິຍນ຺ຕຣາເຍນ ວາ. ອາກງ຺ຂມາໂນ, ຠິກ຺ຂເວ, ຠິກ຺ຂຸ ຕສ຺ມິໍ ວາ ອາວາເສ, ອຎ຺ຎສ຺ມິໍ ວາ ອາວາເສ, ຕສ຺ມິໍ ປຸຄ຺ຄເລ ສມ຺ມຸຂີຠູເຕ ສງ຺ຆມຊ຺ເຌ ອຸທາຫເຣຍ຺ຍ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາມສ຺ສ ປຸຄ຺ຄລສ຺ສ ຘມ຺ມິກາຍ ສາມຄ຺ຄິຍາ ປຈ຺ຈາທານກຖາ ວິປ຺ປກຕາ, ຕໍ ວຕ຺ຖຸ ອວິນິຈ຺ຉິຕໍ. ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ຕໍ ວຕ຺ຖຸໍ ວິນິຈ຺ຉິເນຍ຺ຍາຕິ.

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາມສ຺ສ ປຸຄ຺ຄລສ຺ສ ຘມ຺ມິກາຍ ສາມຄ຺ຄິຍາ ປຈ຺ຈາທານກຖາ ວິປ຺ປກຕາ, ຕໍ ວຕ຺ຖຸ ອວິນິຈ຺ຉິຕໍ. ຕສ຺ສ ປາຕິໂມກ຺ຂໍ ຐເປມິ, ນ ຕສ຺ມິໍ ສມ຺ມຸຂີຠູເຕ ປາຕິໂມກ຺ຂໍ ອຸທ຺ທິສິຕພ຺ພນ຺ຕິ – ຘມ຺ມິກໍ ປາຕິໂມກ຺ຂຏ຺ຐປນໍ.

໓໙໕. ‘‘ກຖໍ ສີລວິປຕ຺ຕິຍາ ທິຏ຺ຐສຸຕປຣິສງ຺ກິໂຕ ໂຫຕິ? ອິຘ ປນ, ຠິກ຺ຂເວ, ຠິກ຺ຂຸ ເຍຫິ ອາກາເຣຫິ ເຍຫິ ລິງ຺ເຄຫິ ເຍຫິ ນິມິຕ຺ເຕຫິ ສີລວິປຕ຺ຕິຍາ ທິຏ຺ຐສຸຕປຣິສງ຺ກິໂຕ ໂຫຕິ, ເຕຫິ ອາກາເຣຫິ ເຕຫິ ລິງ຺ເຄຫິ ເຕຫິ ນິມິຕ຺ເຕຫິ ຠິກ຺ຂຸ ຠິກ຺ຂຸໍ ປສ຺ສຕິ ສີລວິປຕ຺ຕິຍາ ທິຏ຺ຐສຸຕປຣິສງ຺ກິຕໍ. ນ ເຫວ ໂຂ ຠິກ຺ຂຸ ຠິກ຺ຂຸໍ ປສ຺ສຕິ ສີລວິປຕ຺ຕິຍາ ທິຏ຺ຐສຸຕປຣິສງ຺ກິຕໍ, ອປິ ຈ ອຎ຺ໂຎ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອິຕ຺ຖນ຺ນາໂມ, ອາວຸໂສ, ຠິກ຺ຂຸ ສີລວິປຕ຺ຕິຍາ ທິຏ຺ຐສຸຕປຣິສງ຺ກິໂຕ’ຕິ. ນ ເຫວ ໂຂ ຠິກ຺ຂຸ ຠິກ຺ຂຸໍ ປສ຺ສຕິ ສີລວິປຕ຺ຕິຍາ ທິຏ຺ຐສຸຕປຣິສງ຺ກິຕໍ, ນາປິ ອຎ຺ໂຎ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອິຕ຺ຖນ຺ນາໂມ, ອາວຸໂສ, ຠິກ຺ຂຸ ສີລວິປຕ຺ຕິຍາ ທິຏ຺ຐສຸຕປຣິສງ຺ກິໂຕ’ຕິ, ອປິ ຈ ໂສວ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອຫໍ, ອາວຸໂສ, ສີລວິປຕ຺ຕິຍາ ທິຏ຺ຐສຸຕປຣິສງ຺ກິໂຕມ຺ຫີ’ຕິ. ອາກງ຺ຂມາໂນ, ຠິກ຺ຂເວ, ຠິກ຺ຂຸ ເຕນ ທິຏ຺ເຐນ ເຕນ ສຸເຕນ ຕາຍ ປຣິສງ຺ກາຍ ຕທຫຸໂປສເຖ ຈາຕຸທ຺ທເສ ວາ ປນ຺ນຣເສ ວາ ຕສ຺ມິໍ ປຸຄ຺ຄເລ ສມ຺ມຸຂີຠູເຕ ສງ຺ຆມຊ຺ເຌ ອຸທາຫເຣຍ຺ຍ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາໂມ ປຸຄ຺ຄໂລ ສີລວິປຕ຺ຕິຍາ ທິຏ຺ຐສຸຕປຣິສງ຺ກິໂຕ, [ທິຏ຺ຐສຸຕປຣິສງ຺ກິໂຕ ໂຫຕິ (ສ຺ຍາ. ກໍ.)] ຕສ຺ສ ປາຕິໂມກ຺ຂໍ ຐເປມິ, ນ ຕສ຺ມິໍ ສມ຺ມຸຂີຠູເຕ ປາຕິໂມກ຺ຂໍ ອຸທ຺ທິສິຕພ຺ພນ຺ຕິ – ຘມ຺ມິກໍ ປາຕິໂມກ຺ຂຏ຺ຐປນໍ.

໓໙໖. ‘‘ກຖໍ ອາຈາຣວິປຕ຺ຕິຍາ ທິຏ຺ຐສຸຕປຣິສງ຺ກິໂຕ ໂຫຕິ? ອິຘ ປນ, ຠິກ຺ຂເວ, ຠິກ຺ຂຸ ເຍຫິ ອາກາເຣຫິ ເຍຫິ ລິງ຺ເຄຫິ ເຍຫິ ນິມິຕ຺ເຕຫິ ອາຈາຣວິປຕ຺ຕິຍາ ທິຏ຺ຐສຸຕປຣິສງ຺ກິໂຕ ໂຫຕິ ເຕຫິ ອາກາເຣຫິ ເຕຫິ ລິງ຺ເຄຫິ ເຕຫິ ນິມິຕ຺ເຕຫິ ຠິກ຺ຂຸ ຠິກ຺ຂຸໍ ປສ຺ສຕິ ອາຈາຣວິປຕ຺ຕິຍາ ທິຏ຺ຐສຸຕປຣິສງ຺ກິຕໍ. ນ ເຫວ ໂຂ ຠິກ຺ຂຸ ຠິກ຺ຂຸໍ ປສ຺ສຕິ ອາຈາຣວິປຕ຺ຕິຍາ ທິຏ຺ຐສຸຕປຣິສງ຺ກິຕໍ, ອປິ ຈ ອຎ຺ໂຎ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອິຕ຺ຖນ຺ນາໂມ, ອາວຸໂສ, ຠິກ຺ຂຸ ອາຈາຣວິປຕ຺ຕິຍາ ທິຏ຺ຐສຸຕປຣິສງ຺ກິໂຕ’ຕິ. ນ ເຫວ ໂຂ ຠິກ຺ຂຸ ຠິກ຺ຂຸໍ ປສ຺ສຕິ ອາຈາຣວິປຕ຺ຕິຍາ ທິຏ຺ຐສຸຕປຣິສງ຺ກິຕໍ, ນາປິ ອຎ຺ໂຎ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອິຕ຺ຖນ຺ນາໂມ, ອາວຸໂສ, ຠິກ຺ຂຸ ອາຈາຣວິປຕ຺ຕິຍາ ທິຏ຺ຐສຸຕປຣິສງ຺ກິໂຕ’ຕິ, ອປິ ຈ ໂສວ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອຫໍ, ອາວຸໂສ, ອາຈາຣວິປຕ຺ຕິຍາ ທິຏ຺ຐສຸຕປຣິສງ຺ກິໂຕມ຺ຫີ’ຕິ. ອາກງ຺ຂມາໂນ, ຠິກ຺ຂເວ, ຠິກ຺ຂຸ ເຕນ ທິຏ຺ເຐນ ເຕນ ສຸເຕນ ຕາຍ ປຣິສງ຺ກາຍ ຕທຫຸໂປສເຖ ຈາຕຸທ຺ທເສ ວາ ປນ຺ນຣເສ ວາ ຕສ຺ມິໍ ປຸຄ຺ຄເລ ສມ຺ມຸຂີຠູເຕ ສງ຺ຆມຊ຺ເຌ ອຸທາຫເຣຍ຺ຍ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາໂມ ປຸຄ຺ຄໂລ ອາຈາຣວິປຕ຺ຕິຍາ ທິຏ຺ຐສຸຕປຣິສງ຺ກິໂຕ, ຕສ຺ສ ປາຕິໂມກ຺ຂໍ ຐເປມິ, ນ ຕສ຺ມິໍ ສມ຺ມຸຂີຠູເຕ ປາຕິໂມກ຺ຂໍ ອຸທ຺ທິສິຕພ຺ພນ຺ຕິ – ຘມ຺ມິກໍ ປາຕິໂມກ຺ຂຏ຺ຐປນໍ.

໓໙໗. ‘‘ກຖໍ ທິຏ຺ຐິວິປຕ຺ຕິຍາ ທິຏ຺ຐສຸຕປຣິສງ຺ກິໂຕ ໂຫຕິ? ອິຘ ປນ, ຠິກ຺ຂເວ, ຠິກ຺ຂຸ ເຍຫິ ອາກາເຣຫິ ເຍຫິ ລິງ຺ເຄຫິ ເຍຫິ ນິມິຕ຺ເຕຫິ ທິຏ຺ຐິວິປຕ຺ຕິຍາ ທິຏ຺ຐສຸຕປຣິສງ຺ກິໂຕ ໂຫຕິ, ເຕຫິ ອາກາເຣຫິ ເຕຫິ ລິງ຺ເຄຫິ ເຕຫິ ນິມິຕ຺ເຕຫິ ຠິກ຺ຂຸ ຠິກ຺ຂຸໍ ປສ຺ສຕິ ທິຏ຺ຐິວິປຕ຺ຕິຍາ ທິຏ຺ຐສຸຕປຣິສງ຺ກິຕໍ. ນ ເຫວ ໂຂ ຠິກ຺ຂຸ ຠິກ຺ຂຸໍ ປສ຺ສຕິ ທິຏ຺ຐິວິປຕ຺ຕິຍາ ທິຏ຺ຐສຸຕປຣິສງ຺ກິຕໍ, ອປິ ຈ ອຎ຺ໂຎ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອິຕ຺ຖນ຺ນາໂມ, ອາວຸໂສ, ຠິກ຺ຂຸ ທິຏ຺ຐິວິປຕ຺ຕິຍາ ທິຏ຺ຐສຸຕປຣິສງ຺ກິໂຕ’ຕິ. ນ ເຫວ ໂຂ ຠິກ຺ຂຸ ຠິກ຺ຂຸໍ ປສ຺ສຕິ ທິຏ຺ຐິວິປຕ຺ຕິຍາ ທິຏ຺ຐສຸຕປຣິສງ຺ກິຕໍ, ນາປິ ອຎ຺ໂຎ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອິຕ຺ຖນ຺ນາໂມ, ອາວຸໂສ, ຠິກ຺ຂຸ ທິຏ຺ຐິວິປຕ຺ຕິຍາ ທິຏ຺ຐສຸຕປຣິສງ຺ກິໂຕ’ຕິ, ອປິ ຈ ໂສວ ຠິກ຺ຂຸ ຠິກ຺ຂຸສ຺ສ ອາໂຣເຈຕິ – ‘ອຫໍ, ອາວຸໂສ, ທິຏ຺ຐິວິປຕ຺ຕິຍາ ທິຏ຺ຐສຸຕປຣິສງ຺ກິໂຕມ຺ຫີ’ຕິ. ອາກງ຺ຂມາໂນ, ຠິກ຺ຂເວ, ຠິກ຺ຂຸ ເຕນ ທິຏ຺ເຐນ ເຕນ ສຸເຕນ ຕາຍ ປຣິສງ຺ກາຍ ຕທຫຸໂປສເຖ ຈາຕຸທ຺ທເສ ວາ ປນ຺ນຣເສ ວາ ຕສ຺ມິໍ ປຸຄ຺ຄເລ ສມ຺ມຸຂີຠູເຕ ສງ຺ຆມຊ຺ເຌ ອຸທາຫເຣຍ຺ຍ –

‘‘ສຸຓາຕຸ ເມ, ຠນ຺ເຕ, ສງ຺ໂຆ. ອິຕ຺ຖນ຺ນາໂມ ປຸຄ຺ຄໂລ ທິຏ຺ຐິວິປຕ຺ຕິຍາ ທິຏ຺ຐສຸຕປຣິສງ຺ກິໂຕ, ຕສ຺ສ ປາຕິໂມກ຺ຂໍ ຐເປມິ, ນ ຕສ຺ມິໍ ສມ຺ມຸຂີຠູເຕ ປາຕິໂມກ຺ຂໍ ອຸທ຺ທິສິຕພ຺ພນ຺ຕິ – ຘມ຺ມິກໍ ປາຕິໂມກ຺ຂຏ຺ຐປນໍ.

‘‘ອິມານິ ທສ ຘມ຺ມິການິ ປາຕິໂມກ຺ຂຏ຺ຐປນານີ’’ຕິ.

ປຐມຠາຓວາໂຣ ນິຏ຺ຐິໂຕ.