໗. ອຕ຺ຕາທານອງ຺ຄໍ

໓໙໘. ອຖ ໂຂ ອາຍສ຺ມາ ອຸປາລິ ເຍນ ຠຄວາ ເຕນຸປສງ຺ກມິ, ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ໂນ ໂຂ ອາຍສ຺ມາ ອຸປາລິ ຠຄວນ຺ຕໍ ເອຕທໂວຈ – ‘‘ອຕ຺ຕາທານໍ ອາທາຕຸກາເມນ, ຠນ຺ເຕ, ຠິກ຺ຂຸນາ ກຕມງ຺ຄສມນ຺ນາຄຕໍ [ກຕງ຺ຄສມນ຺ນາຄຕໍ (ກ.)] ອຕ຺ຕາທານໍ ອາທາຕພ຺ພ’’ນ຺ຕິ?

[ປຣິ. ໔໔໐] ‘‘ອຕ຺ຕາທານໍ ອາທາຕຸກາເມນ, ອຸປາລິ, ຠິກ຺ຂຸນາ ປຎ຺ຈງ຺ຄສມນ຺ນາຄຕໍ ອຕ຺ຕາທານໍ ອາທາຕພ຺ພໍ. ອຕ຺ຕາທານໍ ອາທາຕຸກາເມນ, ອຸປາລິ, ຠິກ຺ຂຸນາ ເອວໍ ປຈ຺ຈເວກ຺ຂິຕພ຺ພໍ – ‘ຍໍ ໂຂ ອຫໍ ອິມໍ ອຕ຺ຕາທານໍ ອາທາຕຸກາໂມ, ກາໂລ ນຸ ໂຂ ອິມໍ ອຕ຺ຕາທານໍ ອາທາຕຸໍ ອຸທາຫຸ ໂນ’ຕິ? ສເຈ, ອຸປາລິ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອກາໂລ ອິມໍ ອຕ຺ຕາທານໍ ອາທາຕຸໍ, ໂນ ກາໂລ’ຕິ, ນ ຕໍ, ອຸປາລິ, ອຕ຺ຕາທານໍ ອາທາຕພ຺ພໍ.

‘‘ສເຈ ປນຸປາລິ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ກາໂລ ອິມໍ ອຕ຺ຕາທານໍ ອາທາຕຸໍ, ໂນ ອກາໂລ’ຕິ, ເຕນຸປາລິ, ຠິກ຺ຂຸນາ ອຸຕ຺ຕຣິ ປຈ຺ຈເວກ຺ຂິຕພ຺ພໍ – ‘ຍໍ ໂຂ ອຫໍ ອິມໍ ອຕ຺ຕາທານໍ ອາທາຕຸກາໂມ, ຠູຕໍ ນຸ ໂຂ ອິທໍ ອຕ຺ຕາທານໍ ອຸທາຫຸ ໂນ’ຕິ? ສເຈ, ອຸປາລິ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອຠູຕໍ ອິທໍ ອຕ຺ຕາທານໍ, ໂນ ຠູຕ’ນ຺ຕິ, ນ ຕໍ, ອຸປາລິ, ອຕ຺ຕາທານໍ ອາທາຕພ຺ພໍ.

‘‘ສເຈ ປນຸປາລິ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ຠູຕໍ ອິທໍ ອຕ຺ຕາທານໍ, ໂນ ອຠູຕ’ນ຺ຕິ, ເຕນຸປາລິ, ຠິກ຺ຂຸນາ ອຸຕ຺ຕຣິ ປຈ຺ຈເວກ຺ຂິຕພ຺ພໍ – ‘ຍໍ ໂຂ ອຫໍ ອິມໍ ອຕ຺ຕາທານໍ ອາທາຕຸກາໂມ, ອຕ຺ຖສຎ຺ຫິຕໍ ນຸ ໂຂ ອິທໍ ອຕ຺ຕາທານໍ ອຸທາຫຸ ໂນ’ຕິ? ສເຈ, ອຸປາລິ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອນຕ຺ຖສຎ຺ຫິຕໍ ອິທໍ ອຕ຺ຕາທານໍ, ໂນ ອຕ຺ຖສຎ຺ຫິຕ’ນ຺ຕິ, ນ ຕໍ, ອຸປາລິ, ອຕ຺ຕາທານໍ ອາທາຕພ຺ພໍ.

‘‘ສເຈ ປນຸປາລິ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອຕ຺ຖສຎ຺ຫິຕໍ ອິທໍ ອຕ຺ຕາທານໍ, ໂນ ອນຕ຺ຖສຎ຺ຫິຕ’ນ຺ຕິ, ເຕນຸປາລິ, ຠິກ຺ຂຸນາ ອຸຕ຺ຕຣິ ປຈ຺ຈເວກ຺ຂິຕພ຺ພໍ – ‘ອິມໍ ໂຂ ອຫໍ ອຕ຺ຕາທານໍ ອາທິຍມາໂນ ລຠິສ຺ສາມິ ສນ຺ທິຏ຺ເຐ ສມ຺ຠຕ຺ເຕ ຠິກ຺ຂູ ຘມ຺ມໂຕ ວິນຍໂຕ ປກ຺ເຂ ອຸທາຫຸ ໂນ’ຕິ? ສເຈ, ອຸປາລິ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອິມໍ ໂຂ ອຫໍ ອຕ຺ຕາທານໍ ອາທິຍມາໂນ ນ ລຠິສ຺ສາມິ ສນ຺ທິຏ຺ເຐ ສມ຺ຠຕ຺ເຕ ຠິກ຺ຂູ ຘມ຺ມໂຕ ວິນຍໂຕ ປກ຺ເຂ’ຕິ, ນ ຕໍ, ອຸປາລິ, ອຕ຺ຕາທານໍ ອາທາຕພ຺ພໍ.

‘‘ສເຈ ປນຸປາລິ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອິມໍ ໂຂ ອຫໍ ອຕ຺ຕາທານໍ ອາທິຍມາໂນ ລຠິສ຺ສາມິ ສນ຺ທິຏ຺ເຐ ສມ຺ຠຕ຺ເຕ ຠິກ຺ຂູ ຘມ຺ມໂຕ ວິນຍໂຕ ປກ຺ເຂ’ຕິ, ເຕນຸປາລິ, ຠິກ຺ຂຸນາ ອຸຕ຺ຕຣິ ປຈ຺ຈເວກ຺ຂິຕພ຺ພໍ – ‘ອິມໍ ໂຂ ເມ ອຕ຺ຕາທານໍ ອາທິຍໂຕ ຠວິສ຺ສຕິ ສງ຺ຆສ຺ສ ຕໂຕນິທານໍ ຠຓ຺ຑນໍ ກລໂຫ ວິຄ຺ຄໂຫ ວິວາໂທ ສງ຺ຆເຠໂທ ສງ຺ຆຣາຊິ ສງ຺ຆວວຕ຺ຖານໍ ສງ຺ຆນານາກຣຓໍ ອຸທາຫຸ ໂນ’ຕິ? ສເຈ ອຸປາລິ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອິມໍ ໂຂ ເມ ອຕ຺ຕາທານໍ ອາທິຍໂຕ ຠວິສ຺ສຕິ ສງ຺ຆສ຺ສ ຕໂຕນິທານໍ ຠຓ຺ຑນໍ ກລໂຫ ວິຄ຺ຄໂຫ ວິວາໂທ ສງ຺ຆເຠໂທ ສງ຺ຆຣາຊິ ສງ຺ຆວວຕ຺ຖານໍ ສງ຺ຆນານາກຣຓ’ນ຺ຕິ, ນ ຕໍ, ອຸປາລິ, ອຕ຺ຕາທານໍ ອາທາຕພ຺ພໍ. ສເຈ ປນຸປາລິ, ຠິກ຺ຂຸ ປຈ຺ຈເວກ຺ຂມາໂນ ເອວໍ ຊານາຕິ – ‘ອິມໍ ໂຂ ເມ ອຕ຺ຕາທານໍ ອາທິຍໂຕ ນ ຠວິສ຺ສຕິ ສງ຺ຆສ຺ສ ຕໂຕນິທານໍ ຠຓ຺ຑນໍ ກລໂຫ ວິຄ຺ຄໂຫ ວິວາໂທ ສງ຺ຆເຠໂທ ສງ຺ຆຣາຊິ ສງ຺ຆວວຕ຺ຖານໍ ສງ຺ຆນານາກຣຓ’ນ຺ຕິ, ອາທາຕພ຺ພໍ ຕໍ, ອຸປາລິ, ອຕ຺ຕາທານໍ. ເອວໍ ປຎ຺ຈງ຺ຄສມນ຺ນາຄຕໍ ໂຂ, ອຸປາລິ, ອຕ຺ຕາທານໍ ອາທິນ຺ນໍ, ປຈ຺ຉາປິ ອວິປ຺ປຏິສາຣກຣໍ ຠວິສ຺ສຕີ’ຕິ.