໕. ຘມ຺ມິກາຘມ຺ມິກປາຕິໂມກ຺ຂຏ຺ຐປນໍ

໓໘໗. ‘‘ເອກໍ, ຠິກ຺ຂເວ, ອຘມ຺ມິກໍ ປາຕິໂມກ຺ຂຏ຺ຐປນໍ, ເອກໍ ຘມ຺ມິກໍ; ປາຕິໂມກ຺ຂຏ຺ຐປນໍ [ເອກໍ ຘມ຺ມິກໍ (ສີ. ສ຺ຍາ.)], ທ຺ເວ ອຘມ຺ມິການິ; ປາຕິໂມກ຺ຂຏ຺ຐປນານິ, ທ຺ເວ ຘມ຺ມິການິ; ຕີຓິ ອຘມ຺ມິການິ ປາຕິໂມກ຺ຂຏ຺ຐປນານິ, ຕີຓິ ຘມ຺ມິການິ, ຈຕ຺ຕາຣິ ອຘມ຺ມິການິ ປາຕິໂມກ຺ຂຏ຺ຐປນານິ, ຈຕ຺ຕາຣິ ຘມ຺ມິການິ; ປຎ຺ຈ ອຘມ຺ມິການິ ປາຕິໂມກ຺ຂຏ຺ຐປນານິ, ປຎ຺ຈ ຘມ຺ມິການິ; ຉ ອຘມ຺ມິການິ ປາຕິໂມກ຺ຂຏ຺ຐປນານິ, ຉ ຘມ຺ມິການິ; ສຕ຺ຕ ອຘມ຺ມິການິ ປາຕິໂມກ຺ຂຏ຺ຐປນານິ, ສຕ຺ຕ ຘມ຺ມິການິ; ອຏ຺ຐ ອຘມ຺ມິການິ ປາຕິໂມກ຺ຂຏ຺ຐປນານິ, ອຏ຺ຐ ຘມ຺ມິການິ; ນວ ອຘມ຺ມິການິ ປາຕິໂມກ຺ຂຏ຺ຐປນານິ, ນວ ຘມ຺ມິການິ; ທສ ອຘມ຺ມິການິ ປາຕິໂມກ຺ຂຏ຺ຐປນານິ, ທສ ຘມ຺ມິການິ.

‘‘ກຕມໍ ເອກໍ ອຘມ຺ມິກໍ ປາຕິໂມກ຺ຂຏ຺ຐປນໍ? ອມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ – ອິທໍ ເອກໍ ອຘມ຺ມິກໍ ປາຕິໂມກ຺ຂຏ຺ຐປນໍ. ກຕມໍ ເອກໍ ຘມ຺ມິກໍ ປາຕິໂມກ຺ຂຏ຺ຐປນໍ? ສມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ – ອິທໍ ເອກໍ ຘມ຺ມິກໍ ປາຕິໂມກ຺ຂຏ຺ຐປນໍ.

‘‘ກຕມານິ ທ຺ເວ ອຘມ຺ມິການິ ປາຕິໂມກ຺ຂຏ຺ຐປນານິ? ອມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ, ອມູລິກາຍ ອາຈາຣວິປຕ຺ຕິຍາ ປາຕິໂມກ຺ຂໍ ຐເປຕິ – ອິມານິ ທ຺ເວ ອຘມ຺ມິການິ ປາຕິໂມກ຺ຂຏ຺ຐປນານິ. ກຕມານິ ທ຺ເວ ຘມ຺ມິການິ ປາຕິໂມກ຺ຂຏ຺ຐປນານິ? ສມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ, ສມູລິກາຍ ອາຈາຣວິປຕ຺ຕິຍາ ປາຕິໂມກ຺ຂໍ ຐເປຕິ – ອິມານິ ທ຺ເວ ຘມ຺ມິການິ ປາຕິໂມກ຺ຂຏ຺ຐປນານິ.

‘‘ກຕມານິ ຕີຓິ ອຘມ຺ມິການິ ປາຕິໂມກ຺ຂຏ຺ຐປນານິ? ອມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ, ອມູລິກາຍ ອາຈາຣວິປຕ຺ຕິຍາ ປາຕິໂມກ຺ຂໍ ຐເປຕິ, ອມູລິກາຍ ທິຏ຺ຐິວິປຕ຺ຕິຍາ ປາຕິໂມກ຺ຂໍ ຐເປຕິ – ອິມານິ ຕີຓິ ອຘມ຺ມິການິ ປາຕິໂມກ຺ຂຏ຺ຐປນານິ. ກຕມານິ ຕີຓິ ຘມ຺ມິການິ ປາຕິໂມກ຺ຂຏ຺ຐປນານິ? ສມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ, ສມູລິກາຍ ອາຈາຣວິປຕ຺ຕິຍາ ປາຕິໂມກ຺ຂໍ ຐເປຕິ, ສມູລິກາຍ ທິຏ຺ຐິວິປຕ຺ຕິຍາ ປາຕິໂມກ຺ຂໍ ຐເປຕິ – ອິມານິ ຕີຓິ ຘມ຺ມິການິ ປາຕິໂມກ຺ຂຏ຺ຐປນານິ.

‘‘ກຕມານິ ຈຕ຺ຕາຣິ ອຘມ຺ມິການິ ປາຕິໂມກ຺ຂຏ຺ຐປນານິ? ອມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ, ອມູລິກາຍ ອາຈາຣວິປຕ຺ຕິຍາ ປາຕິໂມກ຺ຂໍ ຐເປຕິ, ອມູລິກາຍ ທິຏ຺ຐິວິປຕ຺ຕິຍາ ປາຕິໂມກ຺ຂໍ ຐເປຕິ, ອມູລິກາຍ ອາຊີວວິປຕ຺ຕິຍາ ປາຕິໂມກ຺ຂໍ ຐເປຕິ – ອິມານິ ຈຕ຺ຕາຣິ ອຘມ຺ມິການິ ປາຕິໂມກ຺ຂຏ຺ຐປນານິ. ກຕມານິ ຈຕ຺ຕາຣິ ຘມ຺ມິການິ ປາຕິໂມກ຺ຂຏ຺ຐປນານິ? ສມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ, ສມູລິກາຍ ອາຈາຣວິປຕ຺ຕິຍາ ປາຕິໂມກ຺ຂໍ ຐເປຕິ, ສມູລິກາຍ ທິຏ຺ຐິວິປຕ຺ຕິຍາ ປາຕິໂມກ຺ຂໍ ຐເປຕິ, ສມູລິກາຍ ອາຊີວວິປຕ຺ຕິຍາ ປາຕິໂມກ຺ຂໍ ຐເປຕິ – ອິມານິ ຈຕ຺ຕາຣິ ຘມ຺ມິການິ ປາຕິໂມກ຺ຂຏ຺ຐປນານິ.

‘‘ກຕມານິ ປຎ຺ຈ ອຘມ຺ມິການິ ປາຕິໂມກ຺ຂຏ຺ຐປນານິ? ອມູລເກນ ປາຣາຊິເກນ ປາຕິໂມກ຺ຂໍ ຐເປຕິ, ອມູລເກນ ສງ຺ຆາທິເສເສນ…ເປ… ອມູລເກນ ປາຈິຕ຺ຕິເຍນ… ອມູລເກນ ປາຏິເທສນີເຍນ… ອມູລເກນ ທຸກ຺ກເຏນ ປາຕິໂມກ຺ຂໍ ຐເປຕິ – ອິມານິ ປຎ຺ຈ ອຘມ຺ມິການິ ປາຕິໂມກ຺ຂຏ຺ຐປນານິ. ກຕມານິ ປຎ຺ຈ ຘມ຺ມິການິ ປາຕິໂມກ຺ຂຏ຺ຐປນານິ? ສມູລເກນ ປາຣາຊິເກນ ປາຕິໂມກ຺ຂໍ ຐເປຕິ, ສມູລເກນ ສງ຺ຆາທິເສເສນ…ເປ… ປາຈິຕ຺ຕິເຍນ… ປາຏິເທສນີເຍນ… ທຸກ຺ກເຏນ ປາຕິໂມກ຺ຂໍ ຐເປຕິ – ອິມານິ ປຎ຺ຈ ຘມ຺ມິການິ ປາຕິໂມກ຺ຂຏ຺ຐປນານິ.

‘‘ກຕມານິ ຉ ອຘມ຺ມິການິ ປາຕິໂມກ຺ຂຏ຺ຐປນານິ? ອມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ອກຕາຍ, ອມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ກຕາຍ; ອມູລິກາຍ ອາຈາຣວິປຕ຺ຕິຍາ ປາຕິໂມກ຺ຂໍ ຐເປຕິ ອກຕາຍ, ອມູລິກາຍ ອາຈາຣວິປຕ຺ຕິຍາ ປາຕິໂມກ຺ຂໍ ຐເປຕິ ກຕາຍ; ອມູລິກາຍ ທິຏ຺ຐິວິປຕ຺ຕິຍາ ປາຕິໂມກ຺ຂໍ ຐເປຕິ ອກຕາຍ, ອມູລິກາຍ ທິຏ຺ຐິວິປຕ຺ຕິຍາ ປາຕິໂມກ຺ຂໍ ຐເປຕິ ກຕາຍ – ອິມານິ ຉ ອຘມ຺ມິການິ ປາຕິໂມກ຺ຂຏ຺ຐປນານິ. ກຕມານິ ຉ ຘມ຺ມິການິ ປາຕິໂມກ຺ຂຏ຺ຐປນານິ? ສມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ອກຕາຍ, ສມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ກຕາຍ; ສມູລິກາຍ ອາຈາຣວິປຕ຺ຕິຍາ…ເປ… ທິຏ຺ຐິວິປຕ຺ຕິຍາ ປາຕິໂມກ຺ຂໍ ຐເປຕິ ອກຕາຍ…ເປ… ກຕາຍ – ອິມານິ ຉ ຘມ຺ມິການິ ປາຕິໂມກ຺ຂຏ຺ຐປນານິ.

‘‘ກຕມານິ ສຕ຺ຕ ອຘມ຺ມິການິ ປາຕິໂມກ຺ຂຏ຺ຐປນານິ? ອມູລເກນ ປາຣາຊິເກນ ປາຕິໂມກ຺ຂໍ ຐເປຕິ, ອມູລເກນ ສງ຺ຆາທິເສເສນ…ເປ… ຖຸລ຺ລຈ຺ຈເຍນ ປາຈິຕ຺ຕິເຍນ ປາຏິເທສນີເຍນ ທຸກ຺ກເຏນ ທຸພ຺ຠາສິເຕນ ປາຕິໂມກ຺ຂໍ ຐເປຕິ – ອິມານິ ສຕ຺ຕ ອຘມ຺ມິການິ ປາຕິໂມກ຺ຂຏ຺ຐປນານິ. ກຕມານິ ສຕ຺ຕ ຘມ຺ມິການິ ປາຕິໂມກ຺ຂຏ຺ຐປນານິ? ສມູລເກນ ປາຣາຊິເກນ ປາຕິໂມກ຺ຂໍ ຐເປຕິ, ສມູລເກນ ສງ຺ຆາທິເສເສນ…ເປ… ຖຸລ຺ລຈ຺ຈເຍນ ປາຈິຕ຺ຕິເຍນ ປາຏິເທສນີເຍນ ທຸກ຺ກເຏນ ທຸພ຺ຠາສິເຕນ ປາຕິໂມກ຺ຂໍ ຐເປຕິ – ອິມານິ ສຕ຺ຕ ຘມ຺ມິການິ ປາຕິໂມກ຺ຂຏ຺ຐປນານິ.

‘‘ກຕມານິ ອຏ຺ຐ ອຘມ຺ມິການິ ປາຕິໂມກ຺ຂຏ຺ຐປນານິ? ອມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ອກຕາຍ, ອມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ກຕາຍ; ອມູລິກາຍ ອາຈາຣວິປຕ຺ຕິຍາ …ເປ… ທິຏ຺ຐິວິປຕ຺ຕິຍາ…ເປ… ອາຊີວວິປຕ຺ຕິຍາ ປາຕິໂມກ຺ຂໍ ຐເປຕິ ອກຕາຍ…ເປ… ກຕາຍ – ອິມານິ ອຏ຺ຐ ອຘມ຺ມິການິ ປາຕິໂມກ຺ຂຏ຺ຐປນານິ. ກຕມານິ ອຏ຺ຐ ຘມ຺ມິການິ ປາຕິໂມກ຺ຂຏ຺ຐປນານິ? ສມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ອກຕາຍ, ສມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ກຕາຍ; ສມູລິກາຍ ອາຈາຣວິປຕ຺ຕິຍາ…ເປ… ທິຏ຺ຐິວິປຕ຺ຕິຍາ…ເປ… ອາຊີວວິປຕ຺ຕິຍາ ປາຕິໂມກ຺ຂໍ ຐເປຕິ ອກຕາຍ…ເປ… ກຕາຍ. ອິມານິ ອຏ຺ຐ ຘມ຺ມິການິ ປາຕິໂມກ຺ຂຏ຺ຐປນານິ.

‘‘ກຕມານິ ນວ ອຘມ຺ມິການິ ປາຕິໂມກ຺ຂຏ຺ຐປນານິ? ອມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ອກຕາຍ, ອມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ກຕາຍ, ອມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ກຕາກຕາຍ; ອມູລິກາຍ ອາຈາຣວິປຕ຺ຕິຍາ…ເປ… ທິຏ຺ຐິວິປຕ຺ຕິຍາ ປາຕິໂມກ຺ຂໍ ຐເປຕິ ອກຕາຍ…ເປ… ກຕາຍ…ເປ… ກຕາກຕາຍ ອິມານິ ນວ ອຘມ຺ມິການິ ປາຕິໂມກ຺ຂຏ຺ຐປນານິ. ກຕມານິ ນວ ຘມ຺ມິການິ ປາຕິໂມກ຺ຂຏ຺ຐປນານິ? ສມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ອກຕາຍ, ສມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ກຕາຍ, ສມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ກຕາກຕາຍ; ສມູລິກາຍ ອາຈາຣວິປຕ຺ຕິຍາ…ເປ… ທິຏ຺ຐິວິປຕ຺ຕິຍາ ປາຕິໂມກ຺ຂໍ ຐເປຕິ ອກຕາຍ…ເປ… ກຕາຍ – ກຕາກຕາຍ…ເປ… ອິມານິ ນວ ຘມ຺ມິການິ ປາຕິໂມກ຺ຂຏ຺ຐປນານິ.

‘‘ກຕມານິ ທສ ອຘມ຺ມິການິ ປາຕິໂມກ຺ຂຏ຺ຐປນານິ? ນ ປາຣາຊິໂກ ຕສ຺ສໍ ປຣິສາຍໍ ນິສິນ຺ໂນ ໂຫຕິ, ນ ປາຣາຊິກກຖາ ວິປ຺ປກຕາ ໂຫຕິ; ນ ສິກ຺ຂໍ ປຈ຺ຈກ຺ຂາຕໂກ ຕສ຺ສໍ ປຣິສາຍໍ ນິສິນ຺ໂນ ໂຫຕິ, ນ ສິກ຺ຂໍ ປຈ຺ຈກ຺ຂາຕກຖາ ວິປ຺ປກຕາ ໂຫຕິ; ຘມ຺ມິກໍ ສາມຄ຺ຄິໍ ອຸເປຕິ, ນ ຘມ຺ມິກໍ ສາມຄ຺ຄິໍ ປຈ຺ຈາທິຍຕິ, ນ ຘມ຺ມິກາຍ ສາມຄ຺ຄິຍາ ປຈ຺ຈາທານກຖາ ວິປ຺ປກຕາ ໂຫຕິ; ນ ສີລວິປຕ຺ຕິຍາ ທິຏ຺ຐສຸຕປຣິສງ຺ກິໂຕ ໂຫຕິ, ນ ອາຈາຣວິປຕ຺ຕິຍາ ທິຏ຺ຐສຸຕປຣິສງ຺ກິໂຕ ໂຫຕິ, ນ ທິຏ຺ຐິວິປຕ຺ຕິຍາ ທິຏ຺ຐສຸຕປຣິສງ຺ກິໂຕ ໂຫຕິ – ອິມານິ ທສ ອຘມ຺ມິການິ ປາຕິໂມກ຺ຂຏ຺ຐປນານິ. ກຕມານິ ທສ ຘມ຺ມິການິ ປາຕິໂມກ຺ຂຏ຺ຐປນານິ? ປາຣາຊິໂກ ຕສ຺ສໍ ປຣິສາຍໍ ນິສິນ຺ໂນ ໂຫຕິ, ປາຣາຊິກກຖາ ວິປ຺ປກຕາ ໂຫຕິ; ສິກ຺ຂໍ ປຈ຺ຈກ຺ຂາຕໂກ ຕສ຺ສໍ ປຣິສາຍໍ ນິສິນ຺ໂນ ໂຫຕິ, ສິກ຺ຂໍ ປຈ຺ຈກ຺ຂາຕກຖາ ວິປ຺ປກຕາ ໂຫຕິ; ຘມ຺ມິກໍ ສາມຄ຺ຄິໍ ນ ອຸເປຕິ, ຘມ຺ມິກໍ ສາມຄ຺ຄິໍ ປຈ຺ຈາທິຍຕິ, ຘມ຺ມິກາຍ ສາມຄ຺ຄິຍາ ປຈ຺ຈາທານກຖາ ວິປ຺ປກຕາ ໂຫຕິ; ສີລວິປຕ຺ຕິຍາ ທິຏ຺ຐສຸຕປຣິສງ຺ກິໂຕ ໂຫຕິ, ອາຈາຣວິປຕ຺ຕິຍາ ທິຏ຺ຐສຸຕປຣິສງ຺ກິໂຕ ໂຫຕິ, ທິຏ຺ຐິວິປຕ຺ຕິຍາ ທິຏ຺ຐສຸຕປຣິສງ຺ກິໂຕ ໂຫຕິ – ອິມານິ ທສ ຘມ຺ມິການິ ປາຕິໂມກ຺ຂຏ຺ຐປນານິ.