໑໔. ອນ຺ເຕວາສິກວຕ຺ຕກຖາ

໓໘໑. ເຕນ ໂຂ ປນ ສມເຍນ ອາຈຣິຍາ ອນ຺ເຕວາສິເກສຸ ນ ສມ຺ມາ ວຕ຺ຕນ຺ຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ອາຈຣິຍາ ອນ຺ເຕວາສິເກສຸ ນ ສມ຺ມາ ວຕ຺ຕິສ຺ສນ຺ຕີ’’ຕິ! ອຖ ໂຂ ເຕ ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ. ອຖ ໂຂ ຠຄວາ ເອຕສ຺ມິໍ ນິທາເນ ເອຕສ຺ມິໍ ປກຣເຓ ຠິກ຺ຂຸສງ຺ຆໍ ສນ຺ນິປາຕາເປຕ຺ວາ ຠິກ຺ຂູ ປຏິປຸຈ຺ຉິ – ‘‘ສຈ຺ຈໍ ກິຣ, ຠິກ຺ຂເວ, ອາຈຣິຍາ ອນ຺ເຕວາສິເກສຸ ນ ສມ຺ມາ ວຕ຺ຕນ຺ຕີ’’ຕິ? ‘‘ສຈ຺ຈໍ ຠຄວາ’’ຕິ…ເປ… ວິຄຣຫິຕ຺ວາ…ເປ… ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ –

໓໘໒. ‘‘ເຕນ ຫິ, ຠິກ຺ຂເວ, ອາຈຣິຍານໍ ອນ຺ເຕວາສິເກສຸ ວຕ຺ຕໍ ປຎ຺ຎເປສ຺ສາມິ ຍຖາ ອາຈຣິເຍຫິ ອນ຺ເຕວາສິເກສຸ ສມ຺ມາ ວຕ຺ຕິຕພ຺ພໍ. [ມຫາວ. ໗໙] ອາຈຣິເຍນ, ຠິກ຺ຂເວ, ອນ຺ເຕວາສິກມ຺ຫິ ສມ຺ມາ ວຕ຺ຕິຕພ຺ພໍ. ຕຕ຺ຣາຍໍ ສມ຺ມາວຕ຺ຕນາ –

‘‘ອາຈຣິເຍນ, ຠິກ຺ຂເວ, ອນ຺ເຕວາສິໂກ ສງ຺ຄເຫຕພ຺ໂພ ອນຸຄ຺ຄເຫຕພ຺ໂພ ອຸທ຺ເທເສນ ປຣິປຸຈ຺ຉາຍ ໂອວາເທນ ອນຸສາສນິຍາ. ສເຈ ອາຈຣິຍສ຺ສ ປຕ຺ໂຕ ໂຫຕິ, ອນ຺ເຕວາສິກສ຺ສ ປຕ຺ໂຕ ນ ໂຫຕິ, ອາຈຣິເຍນ ອນ຺ເຕວາສິກສ຺ສ ປຕ຺ໂຕ ທາຕພ຺ໂພ, ອຸສ຺ສຸກ຺ກໍ ວາ ກາຕພ຺ພໍ – ກິນ຺ຕິ ນຸ ໂຂ ອນ຺ເຕວາສິກສ຺ສ ປຕ຺ໂຕ ອຸປ຺ປຊ຺ຊິເຍຖາຕິ. ສເຈ ອາຈຣິຍສ຺ສ ຈີວຣໍ ໂຫຕິ, ອນ຺ເຕວາສິກສ຺ສ ຈີວຣໍ ນ ໂຫຕິ, ອາຈຣິເຍນ ອນ຺ເຕວາສິກສ຺ສ ຈີວຣໍ ທາຕພ຺ພໍ, ອຸສ຺ສຸກ຺ກໍ ວາ ກາຕພ຺ພໍ – ກິນ຺ຕິ ນຸ ໂຂ ອນ຺ເຕວາສິກສ຺ສ ຈີວຣໍ ອຸປ຺ປຊ຺ຊິເຍຖາຕິ. ສເຈ ອາຈຣິຍສ຺ສ ປຣິກ຺ຂາໂຣ ໂຫຕິ, ອນ຺ເຕວາສິກສ຺ສ ປຣິກ຺ຂາໂຣ ນ ໂຫຕິ, ອາຈຣິເຍນ ອນ຺ເຕວາສິກສ຺ສ ປຣິກ຺ຂາໂຣ ທາຕພ຺ໂພ, ອຸສ຺ສຸກ຺ກໍ ວາ ກາຕພ຺ພໍ – ກິນ຺ຕິ ນຸ ໂຂ ອນ຺ເຕວາສິກສ຺ສ ປຣິກ຺ຂາໂຣ ອຸປ຺ປຊ຺ຊິເຍຖາຕິ.

‘‘ສເຈ ອນ຺ເຕວາສິໂກ ຄິລາໂນ ໂຫຕິ, ກາລສ຺ເສວ ອຸຏ຺ຐາຍ ທນ຺ຕກຏ຺ຐໍ ທາຕພ຺ພໍ, ມຸໂຂທກໍ ທາຕພ຺ພໍ, ອາສນໍ ປຎ຺ຎເປຕພ຺ພໍ. ສເຈ ຍາຄຸ ໂຫຕິ, ຠາຊນໍ ໂຘວິຕ຺ວາ ຍາຄຸ ອຸປນາເມຕພ຺ພາ. ຍາຄຸໍ ປີຕສ຺ສ ອຸທກໍ ທຕ຺ວາ ຠາຊນໍ ປຏິຄ຺ຄເຫຕ຺ວາ ນີຈໍ ກຕ຺ວາ ສາຘຸກໍ ອປ຺ປຏິຆໍສນ຺ເຕນ ໂຘວິຕ຺ວາ ປຏິສາເມຕພ຺ພໍ. ອນ຺ເຕວາສິກມ຺ຫິ ວຸຏ຺ຐິເຕ ອາສນໍ ອຸທ຺ຘຣິຕພ຺ພໍ. ສເຈ ໂສ ເທໂສ ອຸກ຺ລາໂປ ໂຫຕິ, ໂສ ເທໂສ ສມ຺ມຊ຺ຊິຕພ຺ໂພ.

‘‘ສເຈ ອນ຺ເຕວາສິໂກ ຄາມໍ ປວິສິຕຸກາໂມ ໂຫຕິ, ນິວາສນໍ ທາຕພ຺ພໍ, ປຏິນິວາສນໍ ປຏິຄ຺ຄເຫຕພ຺ພໍ, ກາຍພນ຺ຘນໍ ທາຕພ຺ພໍ, ສຄຸຓໍ ກຕ຺ວາ ສງ຺ຆາຏິໂຍ ທາຕພ຺ພາ, ໂຘວິຕ຺ວາ ປຕ຺ໂຕ ໂສທໂກ ທາຕພ຺ໂພ.

‘‘ເອຕ຺ຕາວຕາ ນິວຕ຺ຕິສ຺ສຕີຕິ ອາສນໍ ປຎ຺ຎເປຕພ຺ພໍ, ປາໂທທກໍ ປາທປີຐໍ ປາທກຖລິກໍ ອຸປນິກ຺ຂິປິຕພ຺ພໍ, ປຈ຺ຈຸຄ຺ຄນ຺ຕ຺ວາ ປຕ຺ຕຈີວຣໍ ປຏິຄ຺ຄເຫຕພ຺ພໍ, ປຏິນິວາສນໍ ທາຕພ຺ພໍ, ນິວາສນໍ ປຏິຄ຺ຄເຫຕພ຺ພໍ. ສເຈ ຈີວຣໍ ສິນ຺ນໍ ໂຫຕິ, ມຸຫຸຕ຺ຕໍ ອຸຓ຺ເຫ ໂອຕາເປຕພ຺ພໍ, ນ ຈ ອຸຓ຺ເຫ ຈີວຣໍ ນິທຫິຕພ຺ພໍ. ຈີວຣໍ ສງ຺ຆຣິຕພ຺ພໍ. ຈີວຣໍ ສງ຺ຆຣນ຺ເຕນ ຈຕຸຣງ຺ຄຸລໍ ກຓ຺ຓໍ ອຸສ຺ສາເຣຕ຺ວາ ຈີວຣໍ ສງ຺ຆຣິຕພ຺ພໍ – ມາ ມຊ຺ເຌ ຠງ຺ໂຄ ອໂຫສີຕິ. ໂອໂຠເຄ ກາຍພນ຺ຘນໍ ກາຕພ຺ພໍ.

‘‘ສເຈ ປິຓ຺ຑປາໂຕ ໂຫຕິ, ອນ຺ເຕວາສິໂກ ຈ ຠຸຎ຺ຊິຕຸກາໂມ ໂຫຕິ, ອຸທກໍ ທຕ຺ວາ ປິຓ຺ຑປາໂຕ ອຸປນາເມຕພ຺ໂພ. ອນ຺ເຕວາສິໂກ ປານີເຍນ ປຸຈ຺ຉິຕພ຺ໂພ. ຠຸຕ຺ຕາວິສ຺ສ ອຸທກໍ ທຕ຺ວາ ປຕ຺ຕໍ ປຏິຄ຺ຄເຫຕ຺ວາ ນີຈໍ ກຕ຺ວາ ສາຘຸກໍ ອປ຺ປຏິຆໍສນ຺ເຕນ ໂຘວິຕ຺ວາ ໂວທກໍ ກຕ຺ວາ ມຸຫຸຕ຺ຕໍ ອຸຓ຺ເຫ ໂອຕາເປຕພ຺ໂພ, ນ ຈ ອຸຓ຺ເຫ ປຕ຺ໂຕ ນິທຫິຕພ຺ໂພ. ປຕ຺ຕຈີວຣໍ ນິກ຺ຂິປິຕພ຺ພໍ. ປຕ຺ຕໍ ນິກ຺ຂິປນ຺ເຕນ…ເປ… ຈີວຣໍ ນິກ຺ຂິປນ຺ເຕນ…ເປ… ປາຣໂຕ ອນ຺ຕໍ ໂອຣໂຕ ໂຠຄໍ ກຕ຺ວາ ຈີວຣໍ ນິກ຺ຂິປິຕພ຺ພໍ. ອນ຺ເຕວາສິກມ຺ຫິ ອຸຏ຺ຐິເຕ ອາສນໍ ອຸທ຺ຘຣິຕພ຺ພໍ, ປາໂທທກໍ ປາທປີຐໍ ປາທກຖລິກໍ ປຏິສາເມຕພ຺ພໍ. ສເຈ ໂສ ເທໂສ ອຸກ຺ລາໂປ ໂຫຕິ, ໂສ ເທໂສ ສມ຺ມຊ຺ຊິຕພ຺ໂພ.

‘‘ສເຈ ອນ຺ເຕວາສິໂກ ນຫາຍິຕຸກາໂມ ໂຫຕິ, ນຫານໍ ປຏິຍາເທຕພ຺ພໍ. ສເຈ ສີເຕນ ອຕ຺ໂຖ ໂຫຕິ, ສີຕໍ ປຏິຍາເທຕພ຺ພໍ. ສເຈ ອຸຓ຺ເຫນ ອຕ຺ໂຖ ໂຫຕິ, ອຸຓ຺ຫໍ ປຏິຍາເທຕພ຺ພໍ.

‘‘ສເຈ ອນ຺ເຕວາສິໂກ ຊນ຺ຕາຆຣໍ ປວິສິຕຸກາໂມ ໂຫຕິ, ຈຸຓ຺ຓໍ ສນ຺ເນຕພ຺ພໍ, ມຕ຺ຕິກາ ເຕເມຕພ຺ພາ, ຊນ຺ຕາຆຣປີຐໍ ອາທາຍ [ອາທາຍ ອນ຺ເຕວາສິກສ຺ສ ປິຏ຺ຐິໂຕ ປິຏ຺ຐິໂຕ (ກ.)] ຄນ຺ຕ຺ວາ ຊນ຺ຕາຆຣປີຐໍ ທຕ຺ວາ ຈີວຣໍ ປຏິຄ຺ຄເຫຕ຺ວາ ເອກມນ຺ຕໍ ນິກ຺ຂິປິຕພ຺ພໍ, ຈຸຓ຺ຓໍ ທາຕພ຺ພໍ, ມຕ຺ຕິກາ ທາຕພ຺ພາ. ສເຈ ອຸສ຺ສຫຕິ ຊນ຺ຕາຆຣໍ ປວິສິຕພ຺ພໍ. ຊນ຺ຕາຆຣໍ ປວິສນ຺ເຕນ ມຕ຺ຕິກາຍ ມຸຂໍ ມກ຺ເຂຕ຺ວາ ປຸຣໂຕ ຈ ປຈ຺ຉໂຕ ຈ ປຏິຈ຺ຉາເທຕ຺ວາ ຊນ຺ຕາຆຣໍ ປວິສິຕພ຺ພໍ. ນ ເຖເຣ ຠິກ຺ຂູ ອນຸປຂຊ຺ຊ ນິສີທິຕພ຺ພໍ. ນ ນວາ ຠິກ຺ຂູ ອາສເນນ ປຏິພາຫິຕພ຺ພາ. ຊນ຺ຕາຆເຣ ອນ຺ເຕວາສິກສ຺ສ ປຣິກມ຺ມໍ ກາຕພ຺ພໍ. ຊນ຺ຕາຆຣາ ນິກ຺ຂມນ຺ເຕນ ຊນ຺ຕາຆຣປີຐໍ ອາທາຍ ປຸຣໂຕ ຈ ປຈ຺ຉໂຕ ຈ ປຏິຈ຺ຉາເທຕ຺ວາ ຊນ຺ຕາຆຣາ ນິກ຺ຂມິຕພ຺ພໍ.

‘‘ອຸທເກປິ ອນ຺ເຕວາສິກສ຺ສ ປຣິກມ຺ມໍ ກາຕພ຺ພໍ. ນຫາເຕນ ປຐມຕຣໍ ອຸຕ຺ຕຣິຕ຺ວາ ອຕ຺ຕໂນ ຄຕ຺ຕໍ ໂວທກໍ ກຕ຺ວາ ນິວາເສຕ຺ວາ ອນ຺ເຕວາສິກສ຺ສ ຄຕ຺ຕໂຕ ອຸທກໍ ປມຊ຺ຊິຕພ຺ພໍ, ນິວາສນໍ ທາຕພ຺ພໍ, ສງ຺ຆາຏິ ທາຕພ຺ພາ, ຊນ຺ຕາຆຣປີຐໍ ອາທາຍ ປຐມຕຣໍ ອາຄນ຺ຕ຺ວາ ອາສນໍ ປຎ຺ຎເປຕພ຺ພໍ, ປາໂທທກໍ ປາທປີຐໍ ປາທກຖລິກໍ ອຸປນິກ຺ຂິປິຕພ຺ພໍ, ອນ຺ເຕວາສິໂກ ປານີເຍນ ປຸຈ຺ຉິຕພ຺ໂພ.

‘‘ຍສ຺ມິໍ ວິຫາເຣ ອນ຺ເຕວາສິໂກ ວິຫຣຕິ, ສເຈ ໂສ ວິຫາໂຣ ອຸກ຺ລາໂປ ໂຫຕິ, ສເຈ ອຸສ຺ສຫຕິ, ໂສເຘຕພ຺ໂພ. ວິຫາຣໍ ໂສເຘນ຺ເຕນ ປຐມໍ ປຕ຺ຕຈີວຣໍ ນີຫຣິຕ຺ວາ ເອກມນ຺ຕໍ ນິກ຺ຂິປິຕພ຺ພໍ…ເປ… ອາຈມນກຸມ຺ຠິຍາ ອຸທກໍ ນ ໂຫຕິ, ອາຈມນກຸມ຺ຠິຍາ ອຸທກໍ ອາສິຎ຺ຈິຕພ຺ພໍ.

‘‘ສເຈ ອນ຺ເຕວາສິກສ຺ສ ອນຠິຣຕິ ອຸປ຺ປນ຺ນາ ໂຫຕິ, ອາຈຣິເຍນ ວູປກາເສຕພ຺ໂພ, ວູປກາສາເປຕພ຺ໂພ, ຘມ຺ມກຖາ ວາສ຺ສ ກາຕພ຺ພາ. ສເຈ ອນ຺ເຕວາສິກສ຺ສ ກຸກ຺ກຸຈ຺ຈໍ ອຸປ຺ປນ຺ນໍ ໂຫຕິ, ອາຈຣິເຍນ ວິໂນເທຕພ຺ພໍ, ວິໂນທາເປຕພ຺ພໍ, ຘມ຺ມກຖາ ວາສ຺ສ ກາຕພ຺ພາ. ສເຈ ອນ຺ເຕວາສິກສ຺ສ ທິຏ຺ຐິຄຕໍ ອຸປ຺ປນ຺ນໍ ໂຫຕິ, ອາຈຣິເຍນ ວິເວເຈຕພ຺ພໍ, ວິເວຈາເປຕພ຺ພໍ, ຘມ຺ມກຖາ ວາສ຺ສ ກາຕພ຺ພາ. ສເຈ ອນ຺ເຕວາສິໂກ ຄຣຸຘມ຺ມໍ ອຊ຺ຌາປນ຺ໂນ ໂຫຕິ, ປຣິວາສາຣໂຫ, ອາຈຣິເຍນ ອຸສ຺ສຸກ຺ກໍ ກາຕພ຺ພໍ – ກິນ຺ຕິ ນຸ ໂຂ ສງ຺ໂຆ ອນ຺ເຕວາສິກສ຺ສ ປຣິວາສໍ ທເທຍ຺ຍາຕິ. ສເຈ ອນ຺ເຕວາສິໂກ ມູລາຍປຏິກສ຺ສນາຣໂຫ ໂຫຕິ, ອາຈຣິເຍນ ອຸສ຺ສຸກ຺ກໍ ກາຕພ຺ພໍ – ກິນ຺ຕິ ນຸ ໂຂ ສງ຺ໂຆ ອນ຺ເຕວາສິກໍ ມູລາຍ ປຏິກສ຺ເສຍ຺ຍາຕິ. ສເຈ ອນ຺ເຕວາສິໂກ ມານຕ຺ຕາຣໂຫ ໂຫຕິ, ອາຈຣິເຍນ ອຸສ຺ສຸກ຺ກໍ ກາຕພ຺ພໍ – ກິນ຺ຕິ ນຸ ໂຂ ສງ຺ໂຆ ອນ຺ເຕວາສິກສ຺ສ ມານຕ຺ຕໍ ທເທຍ຺ຍາຕິ. ສເຈ ອນ຺ເຕວາສິໂກ ອພ຺ຠານາຣໂຫ ໂຫຕິ, ອາຈຣິເຍນ ອຸສ຺ສຸກ຺ກໍ ກາຕພ຺ພໍ – ກິນ຺ຕິ ນຸ ໂຂ ສງ຺ໂຆ ອນ຺ເຕວາສິກໍ ອພ຺ເຠຍ຺ຍາຕິ. ສເຈ ສງ຺ໂຆ ອນ຺ເຕວາສິກສ຺ສ ກມ຺ມໍ ກຕ຺ຕຸກາໂມ ໂຫຕິ, ຕຊ຺ຊນີຍໍ ວາ ນິຍສ຺ສໍ ວາ ປພ຺ພາຊນີຍໍ ວາ ປຏິສາຣຓີຍໍ ວາ ອຸກ຺ເຂປນີຍໍ ວາ, ອາຈຣິເຍນ ອຸສ຺ສຸກ຺ກໍ ກາຕພ຺ພໍ – ກິນ຺ຕິ ນຸ ໂຂ ສງ຺ໂຆ ອນ຺ເຕວາສິກສ຺ສ ກມ຺ມໍ ນ ກເຣຍ຺ຍ, ລຫຸກາຍ ວາ ປຣິຓາເມຍ຺ຍາຕິ. ກຕໍ ວາ ປນສ຺ສ ໂຫຕິ, ສງ຺ເຆນ ກມ຺ມໍ, ຕຊ຺ຊນີຍໍ ວາ ນິຍສ຺ສໍ ວາ ປພ຺ພາຊນີຍໍ ວາ ປຏິສາຣຓີຍໍ ວາ ອຸກ຺ເຂປນີຍໍ ວາ, ອາຈຣິເຍນ ອຸສ຺ສຸກ຺ກໍ ກາຕພ຺ພໍ – ກິນ຺ຕິ ນຸ ໂຂ ອນ຺ເຕວາສິໂກ ສມ຺ມາ ວຕ຺ເຕຍ຺ຍ, ໂລມໍ ປາເຕຍ຺ຍ, ເນຕ຺ຖາຣໍ ວຕ຺ເຕຍ຺ຍ, ສງ຺ໂຆ ຕໍ ກມ຺ມໍ ປຏິປ຺ປສ຺ສມ຺ເຠຍ຺ຍາຕິ.

‘‘ສເຈ ອນ຺ເຕວາສິກສ຺ສ ຈີວຣໍ ໂຘວິຕພ຺ພໍ ໂຫຕິ, ອາຈຣິເຍນ ອາຈິກ຺ຂິຕພ຺ພໍ – ເອວໍ ໂຘເວຍ຺ຍາສີຕິ, ອຸສ຺ສຸກ຺ກໍ ວາ ກາຕພ຺ພໍ – ກິນ຺ຕິ ນຸ ໂຂ ອນ຺ເຕວາສິກສ຺ສ ຈີວຣໍ ໂຘວິເຍຖາຕິ. ສເຈ ອນ຺ເຕວາສິກສ຺ສ ຈີວຣໍ ກາຕພ຺ພໍ ໂຫຕິ, ອາຈຣິເຍນ ອາຈິກ຺ຂິຕພ຺ພໍ – ເອວໍ ກເຣຍ຺ຍາສີຕິ, ອຸສ຺ສຸກ຺ກໍ ວາ ກາຕພ຺ພໍ – ກິນ຺ຕິ ນຸ ໂຂ ອນ຺ເຕວາສິກສ຺ສ ຈີວຣໍ ກຣິເຍຖາຕິ. ສເຈ ອນ຺ເຕວາສິກສ຺ສ ຣຊນໍ ປຈິຕພ຺ພໍ ໂຫຕິ, ອາຈຣິເຍນ ອາຈິກ຺ຂິຕພ຺ພໍ – ເອວໍ ປເຈຍ຺ຍາສີຕິ, ອຸສ຺ສຸກ຺ກໍ ວາ ກາຕພ຺ພໍ – ກິນ຺ຕິ ນຸ ໂຂ ອນ຺ເຕວາສິກສ຺ສ ຣຊນໍ ປຈິເຍຖາຕິ. ສເຈ ອນ຺ເຕວາສິກສ຺ສ ຈີວຣໍ ຣຊິຕພ຺ພໍ ໂຫຕິ, ອາຈຣິເຍນ ອາຈິກ຺ຂິຕພ຺ພໍ – ເອວໍ ຣເຊຍ຺ຍາສີຕິ, ອຸສ຺ສຸກ຺ກໍ ວາ ກາຕພ຺ພໍ – ກິນ຺ຕິ ນຸ ໂຂ ອນ຺ເຕວາສິກສ຺ສ ຈີວຣໍ ຣຊິເຍຖາຕິ. ຈີວຣໍ ຣຊນ຺ເຕນ ສາຘຸກໍ ສມ຺ປຣິວຕ຺ຕກໍ ສມ຺ປຣິວຕ຺ຕກໍ ຣຊິຕພ຺ພໍ. ນ ຈ ອຈ຺ຉິນ຺ເນ ເຖເວ ປກ຺ກມິຕພ຺ພໍ. ສເຈ ອນ຺ເຕວາສິໂກ ຄິລາໂນ ໂຫຕິ, ຍາວຊີວໍ ອຸປຏ຺ຐາຕພ຺ໂພ, ວຸຏ຺ຐານມສ຺ສ ອາຄເມຕພ຺ພໍ. ອິທໍ ໂຂ, ຠິກ຺ຂເວ, ອາຈຣິຍານໍ ອນ຺ເຕວາສິເກສຸ ວຕ຺ຕໍ ຍຖາ ອາຈຣິເຍຫິ ອນ຺ເຕວາສິເກສຸ ສມ຺ມາ ວຕ຺ຕິຕພ຺ພ’’ນ຺ຕິ.

ວຕ຺ຕກ຺ຂນ຺ຘໂກ ອຏ຺ຐໂມ.

ອິມມ຺ຫິ ຂນ຺ຘເກ ວຕ຺ຖູ ເອກູນວີສຕິ, ວຕ຺ຕາ ຈຸທ຺ທສ.

ຕສ຺ສຸທ຺ທານໍ –

ສອຸປາຫນາ ຉຕ຺ຕາ ຈ, ໂອຄຸຓ຺ຐິ ສີສໍ ປານີຍໍ;

ນາຠິວາເທ ນ ປຸຈ຺ຉນ຺ຕິ, ອຫິ ອຸຊ຺ຌນ຺ຕິ ເປສລາ.

ໂອມຸຎ຺ຈິ ຉຕ຺ຕໍ ຂນ຺ເຘ ຈ, ອຕຣຎ຺ຈ ປຏິກ຺ກມໍ;

ປຕ຺ຕຈີວຣໍ ນິກ຺ຂິປາ, ປຕິຣູປຎ຺ຈ ປຸຈ຺ຉິຕາ.

ອາສິຎ຺ເຈຍ຺ຍ ໂຘວິເຕນ, ສຸກ຺ເຂນລ຺ເລນຸປາຫນາ;

ວຸຑ຺ໂຒ ນວໂກ ປຸຈ຺ເຉຍ຺ຍ, ອຊ຺ຌາວຸຏ຺ຐຎ຺ຈ ໂຄຈຣາ.

ເສກ຺ຂາ ວຈ຺ຈາ ປານີ ປຣິ, ກຕ຺ຕຣໍ ກຕິກໍ ຕໂຕ;

ກາລໍ ມຸຫຸຕ຺ຕໍ ອຸກ຺ລາໂປ, ຠູມຕ຺ຖຣຓໍ ນີຫເຣ.

ປຏິປາໂທ ຠິສິພິພ຺ໂພ, ມຎ຺ຈປີຐຎ຺ຈ ມລ຺ລກໍ;

ອປສ຺ເສນຸລ຺ໂລກກຓ຺ຓາ, ເຄຣຸກາ ກາຬ ອກຕາ.

ສງ຺ກາຣຎ຺ຈ ຠູມຕ຺ຖຣຓໍ, ປຏິປາທກໍ ມຎ຺ຈປີຐໍ;

ຠິສິ ນິສີທນມ຺ປິ, ມລ຺ລກໍ ອປສ຺ເສນ ຈ.

ປຕ຺ຕຈີວຣໍ ຠູມິ ຈ, ປາຣນ຺ຕໍ ໂອຣໂຕ ໂຠຄໍ;

ປຸຣຕ຺ຖິມາ ປຈ຺ຉິມາ ຈ, ອຸຕ຺ຕຣາ ອຖ ທກ຺ຂິຓາ.

ສີຕຸຓ຺ເຫ ຈ ທິວາຣຕ຺ຕິໍ, ປຣິເວຓຎ຺ຈ ໂກຏ຺ຐໂກ;

ອຸປຏ຺ຐານຄ຺ຄິ ສາລາ ຈ, ວຕ຺ຕໍ ວຈ຺ຈກຸຏີສຸ ຈ.

ປານີ ປຣິໂຠຊນິຍາ, ກຸມ຺ຠິ ອາຈມເນສຸ ຈ;

ອໂນປເມນ ປຎ຺ຎຕ຺ຕໍ, ວຕ຺ຕໍ ອາຄນ຺ຕຸເກຫິເມ [ເວ (ກ. ເອວມຸປຣິປິ)].

ເນວາສນໍ ນ ອຸທກໍ, ນ ປຈ຺ຈຸ ນ ຈ ປານິຍໍ;

ນາຠິວາເທ ນປຎ຺ຎເປ, ອຸຊ຺ຌາຍນ຺ຕິ ຈ ເປສລາ.

ວຸຑ຺ຒາສນຎ຺ຈ ອຸທກໍ, ປຈ຺ຈຸຄ຺ຄນ຺ຕ຺ວາ ຈ ປານິຍໍ;

ອຸປາຫເນ ເອກມນ຺ຕໍ, ອຠິວາເທ ຈ ປຎ຺ຎເປ.

ວຸຕ຺ຖໍ ໂຄຈຣເສກ຺ໂຂ ຈ, ຐານໍ ປານິຍໂຠຊນໍ;

ກຕ຺ຕຣໍ ກຕິກໍ ກາລໍ, ນວກສ຺ສ ນິສິນ຺ນເກ.

ອຠິວາທເຍ ອາຈິກ຺ເຂ, ຍຖາ ເຫຏ຺ຐາ ຕຖາ ນເຍ;

ນິທ຺ທິຏ຺ຐໍ ສຕ຺ຖວາເຫນ ວຕ຺ຕໍ ອາວາສິເກຫິເມ.

ຄມິກາ ທາຣຸມຕ຺ຕິ ຈ, ວິວຣິຕ຺ວາ ນ ປຸຈ຺ຉິຍ;

ນສ຺ສນ຺ຕິ ຈ ອຄຸຕ຺ຕຎ຺ຈ, ອຸຊ຺ຌາຍນ຺ຕິ ຈ ເປສລາ.

ປຏິສາເມຕ຺ວາ ຖເກຕ຺ວາ, ອາປຸຈ຺ຉິຕ຺ວາວ ປກ຺ກເມ;

ຠິກ຺ຂຸ ວາ ສາມເຓໂຣ ວາ, ອາຣາມິໂກ ອຸປາສໂກ.

ປາສາຓເກສຸ ຈ ປຸຎ຺ຊໍ, ປຏິສາເມ ຖເກຍ຺ຍ ຈ;

ສເຈ ອຸສ຺ສຫຕິ ອຸສ຺ສຸກ຺ກໍ, ອໂນວສ຺ເສ ຕເຖວ ຈ.

ສພ຺ໂພ ໂອວສ຺ສຕິ ຄາມໍ, ອຊ຺ໂຌກາເສ ຕເຖວ ຈ;

ອປ຺ເປວງ຺ຄານິ ເສເສຍ຺ຍຸໍ, ວຕ຺ຕໍ ຄມິກຠິກ຺ຂຸນາ.

ນານຸໂມທນ຺ຕິ ເຖເຣນ, ໂອຫາຍ ຈຕຸປຎ຺ຈຫິ;

ວຈ຺ຈິໂຕ ມຸຈ຺ຉິໂຕ ອາສິ, ວຕ຺ຕານຸໂມທເນສຸເມ.

ຉພ຺ພຄ຺ຄິຍາ ທຸນ຺ນິວຕ຺ຖາ, ອໂຖປິ ຈ ທຸປ຺ປາຣຸຕາ;

ອນາກປ຺ປາ ຈ ໂວກ຺ກມ຺ມ, ເຖເຣ ອນຸປຂຊ຺ຊເນ.

ນເວ ຠິກ຺ຂູ ຈ ສງ຺ຆາຏິ, ອຸຊ຺ຌາຍນ຺ຕິ ຈ ເປສລາ;

ຕິມຓ຺ຑລໍ ນິວາເສຕ຺ວາ, ກາຍສຄຸຓຄຓ຺ຐິກາ.

ນ ໂວກ຺ກມ຺ມ ປຏິຈ຺ຉນ຺ນໍ, ສຸສໍວຸໂຕກ຺ຂິຕ຺ຕຈກ຺ຂຸ;

ອຸກ຺ຂິຕ຺ໂຕຊ຺ຊຄ຺ຆິກາສທ຺ໂທ, ຕໂຍ ເຈວ ປຈາລນາ.

ຂມ຺ໂຠຄຸຓ຺ຐິອຸກ຺ກຸຏິກາ, ປຏິຈ຺ຉນ຺ນໍ ສຸສໍວຸໂຕ;

ໂອກ຺ຂິຕ຺ຕຸກ຺ຂິຕ຺ຕອຸຊ຺ຊຄ຺ຆິ, ອປ຺ປສທ຺ໂທ ຕໂຍ ຈລາ.

ຂມ຺ໂຠຄຸຓ຺ຐິປລ຺ລຕ຺ຖິ ຈ, ອນຸປຂຊ຺ຊ ນາສເນ;

ໂອຕ຺ຖຣິຕ຺ວານ ອຸທເກ, ນີຈໍ ກຕ຺ວານ ສິຎ຺ຈິຍາ.

ປຏິ ສາມນ຺ຕາ ສງ຺ຆາຏິ, ໂອທເນ ຈ ປຏິຄ຺ຄເຫ;

ສູປໍ ອຸຕ຺ຕຣິຠງ຺ເຄນ, ສພ຺ເພສໍ ສມຕິຕ຺ຖິ ຈ.

ສກ຺ກຈ຺ຈໍ ປຕ຺ຕສຎ຺ຎີ ຈ, ສປທານຎ຺ຈ ສູປກໍ;

ນ ຖູປໂຕ ປຏິຈ຺ຉາເທ, ວິຎ຺ຎຕ຺ຕຸຊ຺ຌານສຎ຺ຎິນາ.

ມຫນ຺ຕມຓ຺ຑລທ຺ວາຣໍ, ສພ຺ພຫຕ຺ໂຖ ນ ພ຺ຍາຫເຣ;

ອຸກ຺ເຂໂປ ເຉທນາຄຓ຺ຑ, ຘຸນໍ ສິຕ຺ຖາວກາຣກໍ.

ຊິວ຺ຫານິຈ຺ຉາຣກຎ຺ເຈວ, ຈປຸຈປຸ ສຸຣຸສຸຣຸ;

ຫຕ຺ຖປຕ຺ໂຕຏ຺ຐນິລ຺ເລຫໍ, ສາມິເສນ ປຏິຄ຺ຄເຫ.

ຍາວ ນ ສພ຺ເພ ອຸທເກ, ນີຈໍ ກຕ຺ວານ ສິຎ຺ຈິຍໍ;

ປຏິ ສາມນ຺ຕາ ສງ຺ຆາຏິ, ນີຈໍ ກຕ຺ວາ ຉມາຍ ຈ.

ສສິຕ຺ຖກໍ ນິວຕ຺ຕນ຺ເຕ, ສຸປ຺ປຏິຈ຺ຉນ຺ນມຸກ຺ກຸຏິ;

ຘມ຺ມຣາເຊນ ປຎ຺ຎຕ຺ຕໍ, ອິທໍ ຠຕ຺ຕຄ຺ຄວຕ຺ຕນໍ.

ທຸນ຺ນິວຕ຺ຖາ ອນາກປ຺ປາ, ອສລ຺ເລກ຺ເຂຕ຺ວາ ຈ ສຫສາ;

ທູເຣ ອຈ຺ຈ ຈິຣໍ ລຫຸໍ, ຕເຖວ ປິຓ຺ຑຈາຣິໂກ.

ປຏິຈ຺ຉນ຺ໂນວ ຄຈ຺ເຉຍ຺ຍ, ສຸໍສວຸໂຕກ຺ຂິຕ຺ຕຈກ຺ຂຸ;

ອຸກ຺ຂິຕ຺ໂຕຊ຺ຊຄ຺ຆິກາສທ຺ໂທ, ຕໂຍ ເຈວ ປຈາລນາ.

ຂມ຺ໂຠຄຸຓ຺ຐິອຸກ຺ກຸຏິກາ, ສລ຺ລກ຺ເຂຕ຺ວາ ຈ ສຫສາ;

ທູເຣ ອຈ຺ຈ ຈິຣໍ ລຫຸໍ, ອາສນກໍ ກຏຈ຺ຉຸກາ.

ຠາຊນໍ ວາ ຐເປຕິ ຈ, ອຸຈ຺ຈາເຣຕ຺ວາ ປຓາເມຕ຺ວາ;

ປຏິຄ຺ຄເຫ ນ ອຸລ຺ໂລເກ, ສູເປສຸປິ ຕເຖວ ຕໍ.

ຠິກ຺ຂຸ ສງ຺ຆາຏິຍາ ຉາເທ, ປຏິຈ຺ຉນ຺ເນວ ຄຈ຺ຉິຍໍ;

ສໍວຸໂຕກ຺ຂິຕ຺ຕຈກ຺ຂຸ ຈ, ອຸກ຺ຂິຕ຺ໂຕຊ຺ຊຄ຺ຆິກາຍ ຈ;

ອປ຺ປສທ຺ໂທ ຕໂຍ ຈາລາ, ຂມ຺ໂຠຄຸຓ຺ຐິກອຸກ຺ກຸຏິ.

ປຐມາສນວກ຺ກາຣ, ປານິຍໍ ປຣິໂຠຊນີ;

ປຈ຺ຉາກງ຺ຂຕິ ຠຸຎ຺ເຊຍ຺ຍ, ໂອປິລາເປຍ຺ຍ ອຸທ຺ຘເຣ.

ປຏິສາເມຍ຺ຍ ສມ຺ມຊ຺ເຊ, ຣິຕ຺ຕໍ ຕຸຈ຺ຉໍ ອຸປຏ຺ຐເປ;

ຫຕ຺ຖວິກາເຣ ຠິນ຺ເທຍ຺ຍ, ວຕ຺ຕິທໍ ປິຓ຺ຑຈາຣິເກ.

ປານີ ປຣິ ອຄ຺ຄິຣຓິ, ນກ຺ຂຕ຺ຕທິສໂຈຣາ ຈ;

ສພ຺ພໍ ນຕ຺ຖີຕິ ໂກຏ຺ເຏຕ຺ວາ, ປຕ຺ຕໍເສ ຈີວຣໍ ຕໂຕ.

ອິທານິ ອໍເສ ລຄ຺ເຄຕ຺ວາ, ຕິມຓ຺ຑລໍ ປຣິມຓ຺ຑລໍ;

ຍຖາ ປິຓ຺ຑຈາຣິວຕ຺ຕໍ, ນເຍ ອາຣຎ຺ຎເກສຸປິ.

ປຕ຺ຕໍເສ ຈີວຣໍ ສີເສ, ອາໂຣຫິຕ຺ວາ ຈ ປານິຍໍ;

ປຣິໂຠຊນິຍໍ ອຄ຺ຄິ, ອຣຓີ ຈາປິ ກຕ຺ຕຣໍ.

ນກ຺ຂຕ຺ຕໍ ສປ຺ປເທສໍ ວາ, ທິສາປິ ກຸສໂລ ຠເວ;

ສຕ຺ຕຸຕ຺ຕເມນ ປຎ຺ຎຕ຺ຕໍ, ວຕ຺ຕໍ ອາຣຎ຺ຎເກສຸເມ.

ອຊ຺ໂຌກາເສ ໂອກິຣິໍສຸ, ອຸຊ຺ຌາຍນ຺ຕິ ຈ ເປສລາ;

ສເຈ ວິຫາໂຣ ອຸກ຺ລາໂປ, ປຐມໍ ປຕ຺ຕຈີວຣໍ.

ຠິສິພິພ຺ໂພຫນໍ ມຎ຺ຈໍ, ປີຐຎ຺ຈ ເຂຬມລ຺ລກໍ;

ອປສ຺ເສນຸລ຺ໂລກກຓ຺ຓາ, ເຄຣຸກາ ກາຬ ອກຕາ.

ສງ຺ກາຣໍ ຠິກ຺ຂຸສາມນ຺ຕາ, ເສນາວິຫາຣປານິຍໍ;

ປຣິໂຠຊນສາມນ຺ຕາ, ປຏິວາເຕ ຈ ອງ຺ຄເຓ.

ອໂຘວາເຕ ອຕ຺ຖຣຓໍ, ປຏິປາທກມຎ຺ໂຈ ຈ;

ປີຐໍ ຠິສິ ນິສີທນໍ, ມລ຺ລກໍ ອປສ຺ເສນ ຈ.

ປຕ຺ຕຈີວຣໍ ຠູມິ ຈ, ປາຣນ຺ຕໍ ໂອຣໂຕ ໂຠຄໍ;

ປຸຣຕ຺ຖິມາ ຈ ປຈ຺ຉິມາ, ອຸຕ຺ຕຣາ ອຖ ທກ຺ຂິຓາ.

ສີຕຸຓ຺ເຫ ຈ ທິວາ ຣຕ຺ຕິໍ, ປຣິເວຓຎ຺ຈ ໂກຏ຺ຐໂກ;

ອຸປຏ຺ຐານຄ຺ຄິສາລາ ຈ, ວຈ຺ຈກຸຏີ ຈ ປານິຍໍ.

ອາຈມນກຸມ຺ຠິ ວຸຑ຺ເຒ ຈ, ອຸທ຺ເທສປຸຈ຺ຉນາ ສຊ຺ຌາ;

ຘມ຺ໂມ ປທີປໍ ວິຊ຺ຌາເປ, ນ ວິວເຣ ນປິ ຖເກ.

ເຍນ ວຸຑ຺ໂຒ ປຣິວຕ຺ຕິ, ກຓ຺ເຓນປິ ນ ຆຏ຺ຏເຍ;

ປຎ຺ຎເປສິ ມຫາວີໂຣ, ວຕ຺ຕໍ ເສນາສເນສຸ ຕໍ.

ນິວາຣິຍມານາ ທ຺ວາຣໍ, ມຸຈ຺ຉິຕຸຊ຺ຌນ຺ຕິ ເປສລາ;

ຉາຣິກໍ ຉຑ຺ຑເຍ ຊນ຺ຕາ, ປຣິຠຓ຺ຑໍ ຕເຖວ ຈ.

ປຣິເວຓໍ ໂກຏ຺ຐໂກ ສາລາ, ຈຸຓ຺ຓມຕ຺ຕິກໂທຓິກາ;

ມຸຂໍ ປຸຣໂຕ ນ ເຖເຣ, ນ ນເວ ອຸສ຺ສຫຕິ ສເຈ.

ປຸຣໂຕ ອຸປຣິມຄ຺ໂຄ, ຈິກ຺ຂລ຺ລໍ ມຕ຺ຕິ ປີຐກໍ;

ວິຊ຺ຌາເປຕ຺ວາ ຖເກຕ຺ວາ ຈ, ວຕ຺ຕໍ ຊນ຺ຕາຆເຣສຸເມ.

ນາຈເມຕິ ຍຖາວຸຑ຺ຒໍ, ປຏິປາຏິ ຈ ສຫສາ;

ອຸພ຺ຠຊິ ນິຕ຺ຖຸໂນ ກຏ຺ຐໍ, ວຈ຺ຈໍ ປສ຺ສາວ ເຂຬກໍ.

ຜຣຸສາ ກູປ ສຫສາ, ອຸພ຺ຠຊິ ຈປຸ ເສເສນ;

ພຫິ ອນ຺ໂຕ ຈ ອຸກ຺ກາເສ, ຣຊ຺ຊຸ ອຕຣມານຎ຺ຈ.

ສຫສາ ອຸພ຺ຠຊິ ຐິເຕ, ນິຕ຺ຖຸເນ ກຏ຺ຐ ວຈ຺ຈຎ຺ຈ;

ປສ຺ສາວ ເຂຬ ຜຣຸສາ, ກູປຎ຺ຈ ວຈ຺ຈປາທຸເກ.

ນາຕິສຫສາ ອຸພ຺ຠຊິ, ປາທຸກາຍ ຈປຸຈປຸ;

ນ ເສສເຍ ປຏິຈ຺ຉາເທ, ອຸຫຕປິຘເຣນ ຈ.

ວຈ຺ຈກຸຏີ ປຣິຠຓ຺ຑໍ, ປຣິເວຓຎ຺ຈ ໂກຏ຺ຐໂກ;

ອາຈມເນ ຈ ອຸທກໍ, ວຕ຺ຕໍ ວຈ຺ຈກຸຏີສຸເມ.

ອຸປາຫນາ ທນ຺ຕກຏ຺ຐໍ, ມຸໂຂທກຎ຺ຈ ອາສນໍ;

ຍາຄຸ ອຸທກໍ ໂຘວິຕ຺ວາ, ອຸທ຺ຘາຣຸກ຺ລາປ ຄາມ ຈ.

ນິວາສນາ ກາຍພນ຺ຘາ, ສຄຸຓໍ ປຕ຺ຕໂສທກໍ;

ປຈ຺ຉາ ຕິມຓ຺ຑໂລ ເຈວ, ປຣິມຓ຺ຑລ ພນ຺ຘນໍ.

ສຄຸຓໍ ໂຘວິຕ຺ວາ ປຈ຺ຉາ, ນາຕິທູເຣ ປຏິຄ຺ຄເຫ;

ຠຓມານສ຺ສ ອາປຕ຺ຕິ, ປຐມາຄນ຺ຕ຺ວານ ອາສນໍ.

ອຸທກໍ ປີຐກຖລິ, ປຈ຺ຈຸຄ຺ຄນ຺ຕ຺ວາ ນິວາສນໍ;

ໂອຕາເປ ນິທຫິ ຠງ຺ໂຄ, ໂອໂຠເຄ ຠຸຎ຺ຊິຕຸ ນເມ.

ປານີຍໍ ອຸທກໍ ນີຈໍ, ມຸຫຸຕ຺ຕໍ ນ ຈ ນິທເຫ;

ປຕ຺ຕຈີວຣໍ ຠູມິ ຈ, ປາຣນ຺ຕໍ ໂອຣໂຕ ໂຠຄໍ.

ອຸທ຺ຘເຣ ປຏິສາເມ ຈ, ອຸກ຺ລາໂປ ຈ ນຫາຍິຕຸໍ;

ສີຕໍ ອຸຓ຺ຫໍ ຊນ຺ຕາຆຣໍ, ຈຸຓ຺ຓໍ ມຕ຺ຕິກ ປິຏ຺ຐິໂຕ.

ປີຐຎ຺ຈ ຈີວຣໍ ຈຸຓ຺ຓໍ, ມຕ຺ຕິກຸສ຺ສຫຕິ ມຸຂໍ;

ປຸຣໂຕ ເຖເຣ ນເວ ຈ, ປຣິກມ຺ມຎ຺ຈ ນິກ຺ຂເມ.

ປຸຣໂຕ ອຸທເກ ນ຺ຫາເຕ, ນິວາເສຕ຺ວາ ອຸປຊ຺ຌາຍໍ;

ນິວາສນຎ຺ຈ ສງ຺ຆາຏິ, ປີຐກໍ ອາສເນນ ຈ.

ປາໂທ ປີຐໍ ກຖລິຎ຺ຈ, ປານີຍຸທ຺ເທສປຸຈ຺ຉນາ;

ອຸກ຺ລາປໍ ສຸໂສເຘຍ຺ຍ, ປຐມໍ ປຕ຺ຕຈີວຣໍ.

ນິສີທນປຈ຺ຈຕ຺ຖຣຓໍ, ຠິສິ ພິພ຺ໂພຫນານິ ຈ;

ມຎ຺ໂຈ ປີຐໍ ປຏິປາທໍ, ມລ຺ລກໍ ອປສ຺ເສນ ຈ.