໘. ອຘິກຣຓໍ

໒໑໕. ເຕນ ໂຂ ປນ ສມເຍນ (ຠິກ຺ຂູປິ ຠິກ຺ຂູຫິ ວິວທນ຺ຕິ,) [( ) ນຕ຺ຖິ (ສີ. ສ຺ຍາ. ກໍ.)] ຠິກ຺ຂູປິ ຠິກ຺ຂຸນີຫິ ວິວທນ຺ຕິ, ຠິກ຺ຂຸນິໂຍປິ ຠິກ຺ຂູຫິ ວິວທນ຺ຕິ, ຉນ຺ໂນປິ ຠິກ຺ຂຸ ຠິກ຺ຂຸນີນໍ ອນຸປຂຊ຺ຊ ຠິກ຺ຂູຫິ ສທ຺ຘິໍ ວິວທຕິ, ຠິກ຺ຂຸນີນໍ ປກ຺ຂໍ ຄາເຫຕິ. ເຍ ເຕ ຠິກ຺ຂູ ອປ຺ປິຈ຺ຉາ…ເປ… ເຕ ອຸຊ຺ຌາຍນ຺ຕິ ຂິຍ຺ຍນ຺ຕິ ວິປາເຈນ຺ຕິ – ‘‘ກຖຎ຺ຫິ ນາມ ຉນ຺ໂນ ຠິກ຺ຂຸ ຠິກ຺ຂຸນີນໍ ອນຸປຂຊ຺ຊ ຠິກ຺ຂູຫິ ສທ຺ຘິໍ ວິວທິສ຺ສຕິ, ຠິກ຺ຂຸນີນໍ ປກ຺ຂໍ ຄາເຫສ຺ສຕີຕິ! ອຖ ໂຂ ເຕ ຠິກ຺ຂູ ຠຄວໂຕ ເອຕມຕ຺ຖໍ ອາໂຣເຈສຸໍ…ເປ… ສຈ຺ຈໍ ກິຣ, ຠິກ຺ຂເວ…ເປ… ສຈ຺ຈໍ ຠຄວາ’’ຕິ…ເປ… ວິຄຣຫິຕ຺ວາ…ເປ… ຘມ຺ມິໍ ກຖໍ ກຕ຺ວາ ຠິກ຺ຂູ ອາມນ຺ເຕສິ –

[ປຣິ. ໒໗໕] ‘‘ຈຕ຺ຕາຣິມານິ, ຠິກ຺ຂເວ, ອຘິກຣຓານິ – ວິວາທາຘິກຣຓໍ, ອນຸວາທາຘິກຣຓໍ, ອາປຕ຺ຕາຘິກຣຓໍ, ກິຈ຺ຈາຘິກຣຓໍ [ກິຈ຺ຈາຘິກຣຓຎ຺ຈ (ກ.)].

‘‘ຕຕ຺ຖ ກຕມໍ ວິວາທາຘິກຣຓໍ [ປຣິ. ໓໑໔]? ອິຘ ປນ, ຠິກ຺ຂເວ, ຠິກ຺ຂູ [ຠິກ຺ຂູ ຠິກ຺ຂຸໍ (ກ.)] ວິວທນ຺ຕິ – ຘມ຺ໂມຕິ ວາ ອຘມ຺ໂມຕິ ວາ, ວິນໂຍຕິ ວາ ອວິນໂຍຕິ ວາ, ຠາສິຕໍ ລປິຕໍ ຕຖາຄເຕນາຕິ ວາ ອຠາສິຕໍ ອລປິຕໍ ຕຖາຄເຕນາຕິ ວາ, ອາຈິຓ຺ຓໍ ຕຖາຄເຕນາຕິ ວາ ອນາຈິຓ຺ຓໍ ຕຖາຄເຕນາຕິ ວາ, ປຎ຺ຎຕ຺ຕໍ ຕຖາຄເຕນາຕິ ວາ ອປ຺ປຎ຺ຎຕ຺ຕໍ ຕຖາຄເຕນາຕິ ວາ, ອາປຕ຺ຕີຕິ ວາ ອນາປຕ຺ຕີຕິ ວາ, ລຫຸກາ ອາປຕ຺ຕີຕິ ວາ ຄຣຸກາ ອາປຕ຺ຕີຕິ ວາ, ສາວເສສາ ອາປຕ຺ຕີຕິ ວາ ອນວເສສາ ອາປຕ຺ຕີຕິ ວາ, ທຸຏ຺ຐຸລ຺ລາ ອາປຕ຺ຕີຕິ ວາ ອທຸຏ຺ຐຸລ຺ລາ ອາປຕ຺ຕີຕິ ວາ? ຍໍ ຕຕ຺ຖ ຠຓ຺ຑນໍ ກລໂຫ ວິຄ຺ຄໂຫ ວິວາໂທ ນານາວາໂທ ອຎ຺ຎຖາວາໂທ ວິປຈ຺ຈຕາຍ ໂວຫາໂຣ ເມຘຄໍ – ອິທໍ ວຸຈ຺ຈຕິ ວິວາທາຘິກຣຓໍ.

‘‘ຕຕ຺ຖ ກຕມໍ ອນຸວາທາຘິກຣຓໍ? [ປຣິ. ໓໑໕] ອິຘ ປນ, ຠິກ຺ຂເວ, ຠິກ຺ຂູ ຠິກ຺ຂຸໍ ອນຸວທນ຺ຕິ ສີລວິປຕ຺ຕິຍາ ວາ ອາຈາຣວິປຕ຺ຕິຍາ ວາ ທິຏ຺ຐິວິປຕ຺ຕິຍາ ວາ ອາຊີວວິປຕ຺ຕິຍາ ວາ. ໂຍ ຕຕ຺ຖ ອນຸວາໂທ ອນຸວທນາ ອນຸລ຺ລປນາ ອນຸຠຓນາ ອນຸສມ຺ປວງ຺ກຕາ ອພ຺ຠຸສ຺ສຫນຕາ ອນຸພລປ຺ປທານໍ – ອິທໍ ວຸຈ຺ຈຕິ ອນຸວາທາຘິກຣຓໍ.

‘‘ຕຕ຺ຖ ກຕມໍ ອາປຕ຺ຕາຘິກຣຓໍ? ປຎ຺ຈປິ ອາປຕ຺ຕິກ຺ຂນ຺ຘາ ອາປຕ຺ຕາຘິກຣຓໍ, ສຕ຺ຕປິ ອາປຕ຺ຕິກ຺ຂນ຺ຘາ ອາປຕ຺ຕາຘິກຣຓໍ – ອິທໍ ວຸຈ຺ຈຕິ ອາປຕ຺ຕາຘິກຣຓໍ.

‘‘ຕຕ຺ຖ ກຕມໍ ກິຈ຺ຈາຘິກຣຓໍ? [ປຣິ. ໓໑໗] ຍາ ສງ຺ຆສ຺ສ ກິຈ຺ຈຍຕາ, ກຣຓີຍຕາ, ອປໂລກນກມ຺ມໍ, ຎຕ຺ຕິກມ຺ມໍ, ຎຕ຺ຕິທຸຕິຍກມ຺ມໍ, ຎຕ຺ຕິຈຕຸຕ຺ຖກມ຺ມໍ – ອິທໍ ວຸຈ຺ຈຕິ ກິຈ຺ຈາຘິກຣຓໍ.

໒໑໖. ‘‘ວິວາທາຘິກຣຓສ຺ສ ກິໍ ມູລໍ? ຉ ວິວາທມູລານິ ວິວາທາຘິກຣຓສ຺ສ ມູລໍ. ຕີຓິປິ ອກຸສລມູລານິ ວິວາທາຘິກຣຓສ຺ສ ມູລໍ, ຕີຓິປິ ກຸສລມູລານິ ວິວາທາຘິກຣຓສ຺ສ ມູລໍ. [ປຣິ. ໒໗໒; ອ. ນິ. ໒.໓໕-໓໖; ມ. ນິ. ໓.໔໔] ກຕມານິ ຉ ວິວາທມູລານິ ວິວາທາຘິກຣຓສ຺ສ ມູລໍ? ອິຘ ປນ, ຠິກ຺ຂເວ, ຠິກ຺ຂຸ ໂກຘໂນ ໂຫຕິ ອຸປນາຫີ. ໂຍ ໂສ, ຠິກ຺ຂເວ, ຠິກ຺ຂຸ ໂກຘໂນ ໂຫຕິ ອຸປນາຫີ, ໂສ ສຕ຺ຖຣິປິ ອຄາຣໂວ ວິຫຣຕິ ອປ຺ປຕິສ຺ໂສ, ຘມ຺ເມປິ ອຄາຣໂວ ວິຫຣຕິ ອປ຺ປຕິສ຺ໂສ, ສງ຺ເຆປິ ອຄາຣໂວ ວິຫຣຕິ ອປ຺ປຕິສ຺ໂສ, ສິກ຺ຂາຍປິ ນ ປຣິປູຣກາຣີ ໂຫຕິ. ໂຍ ໂສ, ຠິກ຺ຂເວ, ຠິກ຺ຂຸ ສຕ຺ຖຣິປິ ອຄາຣໂວ ວິຫຣຕິ ອປ຺ປຕິສ຺ໂສ, ຘມ຺ເມປິ…ເປ… ສງ຺ເຆປິ…ເປ… ສິກ຺ຂາຍປິ ນ ປຣິປູຣກາຣີ, ໂສ ສງ຺ເຆ ວິວາທໍ ຊເນຕິ. ໂຍ ໂຫຕິ ວິວາໂທ ພຫຸຊນາຫິຕາຍ ພຫຸຊນາສຸຂາຍ ພຫຸໂນ ຊນສ຺ສ ອນຕ຺ຖາຍ ອຫິຕາຍ ທຸກ຺ຂາຍ ເທວມນຸສ຺ສານໍ. ເອວຣູປຎ຺ເຈ ຕຸມ຺ເຫ, ຠິກ຺ຂເວ, ວິວາທມູລໍ ອຊ຺ຌຕ຺ຕໍ ວາ ພຫິທ຺ຘາ ວາ ສມນຸປສ຺ເສຍ຺ຍາຖ, ຕຕ຺ຣ ຕຸມ຺ເຫ, ຠິກ຺ຂເວ, ຕສ຺ເສວ ປາປກສ຺ສ ວິວາທມູລສ຺ສ ປຫານາຍ ວາຍເມຍ຺ຍາຖ. ເອວຣູປຎ຺ເຈ ຕຸມ຺ເຫ, ຠິກ຺ຂເວ, ວິວາທມູລໍ ອຊ຺ຌຕ຺ຕໍ ວາ ພຫິທ຺ຘາ ວາ ນ ສມນຸປສ຺ເສຍ຺ຍາຖ, ຕຕ຺ຣ ຕຸມ຺ເຫ, ຠິກ຺ຂເວ, ຕສ຺ເສວ ປາປກສ຺ສ ວິວາທມູລສ຺ສ ອາຍຕິໍ ອນວສ຺ສວາຍ ປຏິປຊ຺ເຊຍ຺ຍາຖ. ເອວເມຕສ຺ສ ປາປກສ຺ສ ວິວາທມູລສ຺ສ ປຫານໍ ໂຫຕິ. ເອວເມຕສ຺ສ ປາປກສ຺ສ ວິວາທມູລສ຺ສ ອາຍຕິໍ ອນວສ຺ສໂວ ໂຫຕິ.

[ປຣິ.໒໗໒] ‘‘ປຸນ ຈປຣໍ, ຠິກ຺ຂເວ, ຠິກ຺ຂຸ ມກ຺ຂີ ໂຫຕິ ປຬາສີ…ເປ… ອິສ຺ສຸກີ ໂຫຕິ ມຈ຺ຉຣີ, ສໂຐ ໂຫຕິ ມາຍາວີ, ປາປິຈ຺ໂຉ ໂຫຕິ ມິຈ຺ຉາທິຏ຺ຐີ, ສນ຺ທິຏ຺ຐິປຣາມາສີ ໂຫຕິ ອາຘານຄ຺ຄາຫີ ທຸປ຺ປຏິນິສ຺ສຄ຺ຄີ. ໂຍ ໂສ, ຠິກ຺ຂເວ, ຠິກ຺ຂຸ ສນ຺ທິຏ຺ຐິປຣາມາສີ ໂຫຕິ ອາຘານຄ຺ຄາຫີ ທຸປ຺ປຏິນິສ຺ສຄ຺ຄີ, ໂສ ສຕ຺ຖຣິປິ ອຄາຣໂວ ວິຫຣຕິ ອປ຺ປຕິສ຺ໂສ, ຘມ຺ເມປິ ອຄາຣໂວ ວິຫຣຕິ ອປ຺ປຕິສ຺ໂສ, ສງ຺ເຆປິ ອຄາຣໂວ ວິຫຣຕິ ອປ຺ປຕິສ຺ໂສ, ສິກ຺ຂາຍປິ ນ ປຣິປູຣກາຣີ ໂຫຕິ. ໂຍ ໂສ, ຠິກ຺ຂເວ, ຠິກ຺ຂຸ ສຕ຺ຖຣິປິ ອຄາຣໂວ ວິຫຣຕິ ອປ຺ປຕິສ຺ໂສ, ຘມ຺ເມປິ…ເປ… ສງ຺ເຆປິ…ເປ… ສິກ຺ຂາຍປິ ນ ປຣິປູຣກາຣີ, ໂສ ສງ຺ເຆ ວິວາທໍ ຊເນຕິ. ໂຍ ໂຫຕິ ວິວາໂທ ພຫຸຊນາຫິຕາຍ ພຫຸຊນາສຸຂາຍ ພຫຸໂນ ຊນສ຺ສ ອນຕ຺ຖາຍ ອຫິຕາຍ ທຸກ຺ຂາຍ ເທວມນຸສ຺ສານໍ. ເອວຣູປຎ຺ເຈ ຕຸມ຺ເຫ, ຠິກ຺ຂເວ, ວິວາທມູລໍ ອຊ຺ຌຕ຺ຕໍ ວາ ພຫິທ຺ຘາ ວາ ສມນຸປສ຺ເສຍ຺ຍາຖ, ຕຕ຺ຣ ຕຸມ຺ເຫ, ຠິກ຺ຂເວ, ຕສ຺ເສວ ປາປກສ຺ສ ວິວາທມູລສ຺ສ ປຫານາຍ ວາຍເມຍ຺ຍາຖ. ເອວຣູປຎ຺ເຈ ຕຸມ຺ເຫ, ຠິກ຺ຂເວ, ວິວາທມູລໍ ອຊ຺ຌຕ຺ຕໍ ວາ ພຫິທ຺ຘາ ວາ ນ ສມນຸປສ຺ເສຍ຺ຍາຖ, ຕຕ຺ຣ ຕຸມ຺ເຫ, ຠິກ຺ຂເວ, ຕສ຺ເສວ ປາປກສ຺ສ ວິວາທມູລສ຺ສ ອາຍຕິໍ ອນວສ຺ສວາຍ ປຏິປຊ຺ເຊຍ຺ຍາຖ. ເອວເມຕສ຺ສ ປາປກສ຺ສ ວິວາທມູລສ຺ສ ປຫານໍ ໂຫຕິ. ເອວເມຕສ຺ສ ປາປກສ຺ສ ວິວາທມູລສ຺ສ ອາຍຕິໍ ອນວສ຺ສໂວ ໂຫຕິ. ອິມານິ ຉ ວິວາທມູລານິ ວິວາທາຘິກຣຓສ຺ສ ມູລໍ.

‘‘ກຕມານິ ຕີຓິ ອກຸສລມູລານິ ວິວາທາຘິກຣຓສ຺ສ ມູລໍ? ອິຘ ປນ, ຠິກ຺ຂເວ, ຠິກ຺ຂູ ລຸທ຺ຘຈິຕ຺ຕາ ວິວທນ຺ຕິ, ທຸຏ຺ຐຈິຕ຺ຕາ ວິວທນ຺ຕິ, ມູຬ຺ຫຈິຕ຺ຕາ ວິວທນ຺ຕິ – ຘມ຺ໂມຕິ ວາ ອຘມ຺ໂມຕິ ວາ, ວິນໂຍຕິ ວາ ອວິນໂຍຕິ ວາ, ຠາສິຕໍ ລປິຕໍ ຕຖາຄເຕນາຕິ ວາ ອຠາສິຕໍ ອລປິຕໍ ຕຖາຄເຕນາຕິ ວາ, ອາຈິຓ຺ຓໍ ຕຖາຄເຕນາຕິ ວາ ອນາຈິຓ຺ຓໍ ຕຖາຄເຕນາຕິ ວາ, ປຎ຺ຎຕ຺ຕໍ ຕຖາຄເຕນາຕິ ວາ ອປ຺ປຎ຺ຎຕ຺ຕໍ ຕຖາຄເຕນາຕິ ວາ, ອາປຕ຺ຕີຕິ ວາ ອນາປຕ຺ຕີຕິ ວາ, ລຫຸກາ ອາປຕ຺ຕີຕິ ວາ ຄຣຸກາ ອາປຕ຺ຕີຕິ ວາ, ສາວເສສາ ອາປຕ຺ຕີຕິ ວາ ອນວເສສາ ອາປຕ຺ຕີຕິ ວາ, ທຸຏ຺ຐຸລ຺ລາ ອາປຕ຺ຕີຕິ ວາ ອທຸຏ຺ຐຸລ຺ລາ ອາປຕ຺ຕີຕິ ວາ. ອິມານິ ຕີຓິ ອກຸສລມູລານິ ວິວາທາຘິກຣຓສ຺ສ ມູລໍ.

‘‘ກຕມານິ ຕີຓິ ກຸສລມູລານິ ວິວາທາຘິກຣຓສ຺ສ ມູລໍ? ອິຘ ປນ, ຠິກ຺ຂເວ, ຠິກ຺ຂູ ອລຸທ຺ຘຈິຕ຺ຕາ ວິວທນ຺ຕິ, ອທຸຏ຺ຐຈິຕ຺ຕາ ວິວທນ຺ຕິ, ອມູຬ຺ຫຈິຕ຺ຕາ ວິວທນ຺ຕິ – ຘມ຺ໂມຕິ ວາ ອຘມ຺ໂມຕິ ວາ…ເປ… ທຸຏ຺ຐຸລ຺ລາ ອາປຕ຺ຕີຕິ ວາ ອທຸຏ຺ຐຸລ຺ລາ ອາປຕ຺ຕີຕິ ວາ. ອິມານິ ຕີຓິ ກຸສລມູລານິ ວິວາທາຘິກຣຓສ຺ສ ມູລໍ.

໒໑໗. [ປຣິ. ໒໗໒] ‘‘ອນຸວາທາຘິກຣຓສ຺ສ ກິໍ ມູລໍ? ຉ ອນຸວາທມູລານິ ອນຸວາທາຘິກຣຓສ຺ສ ມູລໍ. ຕີຓິປິ ອກຸສລມູລານິ ອນຸວາທາຘິກຣຓສ຺ສ ມູລໍ, ຕີຓິປິ ກຸສລມູລານິ ອນຸວາທາຘິກຣຓສ຺ສ ມູລໍ, ກາໂຍປິ ອນຸວາທາຘິກຣຓສ຺ສ ມູລໍ, ວາຈາປິ ອນຸວາທາຘິກຣຓສ຺ສ ມູລໍ. ‘‘ກຕມານິ ຉ ອນຸວາທມູລານິ ອນຸວາທາຘິກຣຓສ຺ສ ມູລໍ? ອິຘ ປນ, ຠິກ຺ຂເວ, ຠິກ຺ຂຸ ໂກຘໂນ ໂຫຕິ ອຸປນາຫີ. ໂຍ ໂສ, ຠິກ຺ຂເວ, ຠິກ຺ຂຸ ໂກຘໂນ ໂຫຕິ ອຸປນາຫີ, ໂສ ສຕ຺ຖຣິປິ ອຄາຣໂວ ວິຫຣຕິ ອປ຺ປຕິສ຺ໂສ, ຘມ຺ເມປິ ອຄາຣໂວ ວິຫຣຕິ ອປ຺ປຕິສ຺ໂສ, ສງ຺ເຆປິ ອຄາຣໂວ ວິຫຣຕິ ອປ຺ປຕິສ຺ໂສ, ສິກ຺ຂາຍປິ ນ ປຣິປູຣກາຣີ ໂຫຕິ. ໂຍ ໂສ, ຠິກ຺ຂເວ, ຠິກ຺ຂຸ ສຕ຺ຖຣິປິ ອຄາຣໂວ ວິຫຣຕິ ອປ຺ປຕິສ຺ໂສ, ຘມ຺ເມປິ…ເປ… ສງ຺ເຆປິ…ເປ… ສິກ຺ຂາຍປິ ນ ປຣິປູຣກາຣີ, ໂສ ສງ຺ເຆ ອນຸວາທໍ ຊເນຕິ. ໂຍ ໂຫຕິ ອນຸວາໂທ ພຫຸຊນາຫິຕາຍ ພຫຸຊນາສຸຂາຍ ພຫຸໂນ ຊນສ຺ສ ອນຕ຺ຖາຍ ອຫິຕາຍ ທຸກ຺ຂາຍ ເທວມນຸສ຺ສານໍ. ເອວຣູປຎ຺ເຈ ຕຸມ຺ເຫ, ຠິກ຺ຂເວ, ອນຸວາທມູລໍ ອຊ຺ຌຕ຺ຕໍ ວາ ພຫິທ຺ຘາ ວາ ສມນຸປສ຺ເສຍ຺ຍາຖ, ຕຕ຺ຣ ຕຸມ຺ເຫ, ຠິກ຺ຂເວ, ຕສ຺ເສວ ປາປກສ຺ສ ອນຸວາທມູລສ຺ສ ປຫານາຍ ວາຍເມຍ຺ຍາຖ. ເອວຣູປຎ຺ເຈ ຕຸມ຺ເຫ, ຠິກ຺ຂເວ, ອນຸວາທມູລໍ ອຊ຺ຌຕ຺ຕໍ ວາ ພຫິທ຺ຘາ ວາ ນ ສມນຸປສ຺ເສຍ຺ຍາຖ, ຕຕ຺ຣ ຕຸມ຺ເຫ, ຠິກ຺ຂເວ, ຕສ຺ເສວ ປາປກສ຺ສ ອນຸວາທມູລສ຺ສ ອາຍຕິໍ ອນວສ຺ສວາຍ ປຏິປຊ຺ເຊຍ຺ຍາຖ. ເອວເມຕສ຺ສ ປາປກສ຺ສ ອນຸວາທມູລສ຺ສ ປຫານໍ ໂຫຕິ. ເອວເມຕສ຺ສ ປາປກສ຺ສ ອນຸວາທມູລສ຺ສ ອາຍຕິໍ ອນວສ຺ສໂວ ໂຫຕິ.

‘‘ປຸນ ຈປຣໍ, ຠິກ຺ຂເວ, ຠິກ຺ຂຸ ມກ຺ຂີ ໂຫຕິ ປຬາສີ…ເປ… ອິສ຺ສຸກີ ໂຫຕິ ມຈ຺ຉຣີ, ສໂຐ ໂຫຕິ ມາຍາວີ, ປາປິຈ຺ໂຉ ໂຫຕິ ມິຈ຺ຉາທິຏ຺ຐີ, ສນ຺ທິຏ຺ຐິປຣາມາສີ ໂຫຕິ ອາຘານຄ຺ຄາຫີ ທຸປ຺ປຏິນິສ຺ສຄ຺ຄີ. ໂຍ ໂສ, ຠິກ຺ຂເວ, ຠິກ຺ຂຸ ສນ຺ທິຏ຺ຐິປຣາມາສີ ໂຫຕິ ອາຘານຄ຺ຄາຫີ ທຸປ຺ປຏິນິສ຺ສຄ຺ຄີ, ໂສ ສຕ຺ຖຣິປິ ອຄາຣໂວ ວິຫຣຕິ ອປ຺ປຕິສ຺ໂສ, ຘມ຺ເມປິ ອຄາຣໂວ ວິຫຣຕິ ອປ຺ປຕິສ຺ໂສ, ສງ຺ເຆປິ ອຄາຣໂວ ວິຫຣຕິ ອປ຺ປຕິສ຺ໂສ, ສິກ຺ຂາຍປິ ນ ປຣິປູຣກາຣີ ໂຫຕິ. ໂຍ ໂສ, ຠິກ຺ຂເວ, ຠິກ຺ຂຸ ສຕ຺ຖຣິປິ ອຄາຣໂວ ວິຫຣຕິ ອປ຺ປຕິສ຺ໂສ, ຘມ຺ເມປິ…ເປ… ສງ຺ເຆປິ…ເປ… ສິກ຺ຂາຍປິ ນ ປຣິປູຣກາຣີ, ໂສ ສງ຺ເຆ ອນຸວາທໍ ຊເນຕິ. ໂຍ ໂຫຕິ ອນຸວາໂທ ພຫຸຊນາຫິຕາຍ ພຫຸຊນາສຸຂາຍ ພຫຸໂນ ຊນສ຺ສ ອນຕ຺ຖາຍ ອຫິຕາຍ ທຸກ຺ຂາຍ ເທວມນຸສ຺ສານໍ. ເອວຣູປຎ຺ເຈ ຕຸມ຺ເຫ, ຠິກ຺ຂເວ, ອນຸວາທມູລໍ ອຊ຺ຌຕ຺ຕໍ ວາ ພຫິທ຺ຘາ ວາ ສມນຸປສ຺ເສຍ຺ຍາຖ, ຕຕ຺ຣ ຕຸມ຺ເຫ, ຠິກ຺ຂເວ, ຕສ຺ເສວ ປາປກສ຺ສ ອນຸວາທມູລສ຺ສ ປຫານາຍ ວາຍເມຍ຺ຍາຖ. ເອວຣູປຎ຺ເຈ ຕຸມ຺ເຫ, ຠິກ຺ຂເວ, ອນຸວາທມູລໍ ອຊ຺ຌຕ຺ຕໍ ວາ ພຫິທ຺ຘາ ວາ ນ ສມນຸປສ຺ເສຍ຺ຍາຖ, ຕຕ຺ຣ ຕຸມ຺ເຫ, ຠິກ຺ຂເວ, ຕສ຺ເສວ ປາປກສ຺ສ ອນຸວາທມູລສ຺ສ ອາຍຕ຺ຕິໍ ອນວສ຺ສວາຍ ປຏິປຊ຺ເຊຍ຺ຍາຖ. ເອວເມຕສ຺ສ ປາປກສ຺ສ ອນຸວາທມູລສ຺ສ ປຫານໍ ໂຫຕິ. ເອວເມຕສ຺ສ ປາປກສ຺ສ ອນຸວາທມູລສ຺ສ ອາຍຕິໍ ອນວສ຺ສໂວ ໂຫຕິ. ອິມານິ ຉ ອນຸວາທມູລານິ ອນຸວາທາຘິກຣຓສ຺ສ ມູລໍ.

‘‘ກຕມານິ ຕີຓິ ອກຸສລມູລານິ ອນຸວາທາຘິກຣຓສ຺ສ ມູລໍ? ອິຘ ປນ, ຠິກ຺ຂເວ, ຠິກ຺ຂູ ຠິກ຺ຂຸໍ ລຸທ຺ຘຈິຕ຺ຕາ ອນຸວທນ຺ຕິ, ທຸຏ຺ຐຈິຕ຺ຕາ ອນຸວທນ຺ຕິ, ມູຬ຺ຫຈິຕ຺ຕາ ອນຸວທນ຺ຕິ – ສີລວິປຕ຺ຕິຍາ ວາ, ອາຈາຣວິປຕ຺ຕິຍາ ວາ, ທິຏ຺ຐິວິປຕ຺ຕິຍາ ວາ, ອາຊີວວິປຕ຺ຕິຍາ ວາ. ອິມານິ ຕີຓິ ອກຸສລມູລານິ ອນຸວາທາຘິກຣຓສ຺ສ ມູລໍ.

‘‘ກຕມານິ ຕີຓິ ກຸສລມູລານິ ອນຸວາທາຘິກຣຓສ຺ສ ມູລໍ? ອິຘ ປນ, ຠິກ຺ຂເວ, ຠິກ຺ຂູ ຠິກ຺ຂຸໍ ອລຸທ຺ຘຈິຕ຺ຕາ ອນຸວທນ຺ຕິ, ອທຸຏ຺ຐຈິຕ຺ຕາ ອນຸວທນ຺ຕິ, ອມູຬ຺ຫຈິຕ຺ຕາ ອນຸວທນ຺ຕິ – ສີລວິປຕ຺ຕິຍາ ວາ, ອາຈຣວິປຕ຺ຕິຍາ ວາ, ທິຏ຺ຐິວິປຕ຺ຕິຍາ ວາ, ອາຊີວວິປຕ຺ຕິຍາ ວາ. ອິມານິ ຕີຓິ ກຸສລມູລານິ ອນຸວາທາຘິກຣຓສ຺ສ ມູລໍ.

‘‘ກຕໂມ ກາໂຍ [ກຕໂມ ຈ ກາໂຍ (ສ຺ຍາ. ກໍ.)] ອນຸວາທາຘິກຣຓສ຺ສ ມູລໍ? ອິເຘກຈ຺ໂຈ ທຸພ຺ພຓ຺ໂຓ ໂຫຕິ, ທຸທ຺ທສ຺ສິໂກ, ໂອໂກຏິມໂກ, ພຫ຺ວາພາໂຘ, ກາໂຓ ວາ, ກຸຓີ ວາ, ຂຎ຺ໂຊ ວາ, ປກ຺ຂຫໂຕ ວາ, ເຍນ ນໍ ອນຸວທນ຺ຕິ. ອຍໍ ກາໂຍ ອນຸວາທາຘິກຣຓສ຺ສ ມູລໍ.

‘‘ກຕມາ ວາຈາ ອນຸວາທາຘິກຣຓສ຺ສ ມູລໍ? ອິເຘກຈ຺ໂຈ ທຸພ຺ພໂຈ ໂຫຕິ, ມມ຺ມໂນ, ເອຬຄລວາໂຈ, ຍາຍ ນໍ ອນຸວທນ຺ຕິ. ອຍໍ ວາຈາ ອນຸວາທາຘິກຣຓສ຺ສ ມູລໍ.

໒໑໘. ‘‘ອາປຕ຺ຕາຘິກຣຓສ຺ສ ກິໍ ມູລໍ? ຉ ອາປຕ຺ຕິສມຸຏ຺ຐານາ ອາປຕ຺ຕາຘິກຣຓສ຺ສ ມູລໍ. ອຕ຺ຖາປຕ຺ຕິ ກາຍໂຕ ສມຸຏ຺ຐາຕິ, ນ ວາຈໂຕ, ນ ຈິຕ຺ຕໂຕ. ອຕ຺ຖາປຕ຺ຕິ ວາຈໂຕ ສມຸຏ຺ຐາຕິ, ນ ກາຍໂຕ, ນ ຈິຕ຺ຕໂຕ. ອຕ຺ຖາປຕ຺ຕິ ກາຍໂຕ ຈ ວາຈໂຕ ຈ ສມຸຏ຺ຐາຕິ, ນ ຈິຕ຺ຕໂຕ. ອຕ຺ຖາປຕ຺ຕິ ກາຍໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ວາຈໂຕ. ອຕ຺ຖາປຕ຺ຕິ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ, ນ ກາຍໂຕ. ອຕ຺ຖາປຕ຺ຕິ ກາຍໂຕ ຈ ວາຈໂຕ ຈ ຈິຕ຺ຕໂຕ ຈ ສມຸຏ຺ຐາຕິ. ອິເມ ຉ ອາປຕ຺ຕິສມຸຏ຺ຐານາ ອາປຕ຺ຕາຘິກຣຓສ຺ສ ມູລໍ.

໒໑໙. ‘‘ກິຈ຺ຈາຘິກຣຓສ຺ສ ກິໍ ມູລໍ? ກິຈ຺ຈາຘິກຣຓສ຺ສ ເອກໍ ມູລໍ – ສງ຺ໂຆ.

໒໒໐. ‘‘ວິວາທາຘິກຣຓໍ ກຸສລໍ, ອກຸສລໍ, ອພ຺ຍາກຕໍ. ວິວາທາຘິກຣຓໍ ສິຍາ ກຸສລໍ, ສິຍາ ອກຸສລໍ, ສິຍາ ອພ຺ຍາກຕໍ. ຕຕ຺ຖ ກຕມໍ ວິວາທາຘິກຣຓໍ ກຸສລໍ? ອິຘ ປນ, ຠິກ຺ຂເວ, ຠິກ຺ຂູ ກຸສລຈິຕ຺ຕາ ວິວທນ຺ຕິ – ຘມ຺ໂມຕິ ວາ ອຘມ຺ໂມຕິ ວາ…ເປ… ທຸຏ຺ຐຸລ຺ລາ ອາປຕ຺ຕີຕິ ວາ ອທຸຏ຺ຐຸລ຺ລາ ອາປຕ຺ຕີຕິ ວາ. ຍໍ ຕຕ຺ຖ ຠຓ຺ຑນໍ ກລໂຫ ວິຄ຺ຄໂຫ ວິວາໂທ ນານາວາໂທ ອຎ຺ຎຖາວາໂທ ວິປຈ຺ຈຕາຍ ໂວຫາໂຣ ເມຘຄໍ – ອິທໍ ວຸຈ຺ຈຕິ ວິວາທາຘິກຣຓໍ ກຸສລໍ.

‘‘ຕຕ຺ຖ ກຕມໍ ວິວາທາຘິກຣຓໍ ອກຸສລໍ? ອິຘ ປນ, ຠິກ຺ຂເວ, ຠິກ຺ຂູ ອກຸສລຈິຕ຺ຕາ ວິວທນ຺ຕິ – ຘມ຺ໂມຕິ ວາ ອຘມ຺ໂມຕິ ວາ…ເປ… ທຸຏ຺ຐຸລ຺ລາ ອາປຕ຺ຕີຕິ ວາ ອທຸຏ຺ຐຸລ຺ລາ ອາປຕ຺ຕີຕິ ວາ. ຍໍ ຕຕ຺ຖ ຠຓ຺ຑນໍ ກລໂຫ ວິຄ຺ຄໂຫ ວິວາໂທ ນານາວາໂທ ອຎ຺ຎຖາວາໂທ ວິປຈ຺ຈຕາຍ ໂວຫາໂຣ ເມຘຄໍ – ອິທໍ ວຸຈ຺ຈຕິ ວິວາທາຘິກຣຓໍ ອກຸສລໍ.

‘‘ຕຕ຺ຖ ກຕມໍ ວິວາທາຘິກຣຓໍ ອພ຺ຍາກຕໍ? ອິຘ ປນ, ຠິກ຺ຂເວ, ຠິກ຺ຂູ ອພ຺ຍາກຕຈິຕ຺ຕາ ວິວທນ຺ຕິ – ຘມ຺ໂມຕິ ວາ ອຘມ຺ໂມຕິ ວາ…ເປ… ທຸຏ຺ຐຸລ຺ລາ ອາປຕ຺ຕີຕິ ວາ ອທຸຏ຺ຐຸລ຺ລາ ອາປຕ຺ຕີຕິ ວາ. ຍໍ ຕຕ຺ຖ ຠຓ຺ຑນໍ ກລໂຫ ວິຄ຺ຄໂຫ ວິວາໂທ ນານາວາໂທ ອຎ຺ຎຖາວາໂທ ວິປຈ຺ຈຕາຍ ໂວຫາໂຣ ເມຘຄໍ – ອິທໍ ວຸຈ຺ຈຕິ ວິວາທາຘິກຣຓໍ ອພ຺ຍາກຕໍ.

໒໒໑. ‘‘ອນຸວາທາຘິກຣຓໍ ກຸສລໍ, ອກຸສລໍ, ອພ຺ຍາກຕໍ. ອນຸວາທາຘິກຣຓໍ ສິຍາ ກຸສລໍ, ສິຍາ ອກຸສລໍ, ສິຍາ ອພ຺ຍາກຕໍ. ຕຕ຺ຖ ກຕມໍ ອນຸວາທາຘິກຣຓໍ ກຸສລໍ? ອິຘ, ຠິກ຺ຂເວ, ຠິກ຺ຂູ ຠິກ຺ຂຸໍ ກຸສລຈິຕ຺ຕາ ອນຸວທນ຺ຕິ – ສີລວິປຕ຺ຕິຍາ ວາ, ອາຈາຣວິປຕ຺ຕິຍາ ວາ, ທິຏ຺ຐິວິປຕ຺ຕິຍາ ວາ, ອາຊີວວິປຕ຺ຕິຍາ ວາ. ໂຍ ຕຕ຺ຖ ອນຸວາໂທ ອນຸວທນາ ອນຸລ຺ລປນາ ອນຸຠຓນາ ອນຸສມ຺ປວງ຺ກຕາ ອພ຺ຠຸສ຺ສຫນຕາ ອນຸພລປ຺ປທານໍ – ອິທໍ ວຸຈ຺ຈຕິ ອນຸວາທາຘິກຣຓໍ ກຸສລໍ.

‘‘ຕຕ຺ຖ ກຕມໍ ອນຸວາທາຘິກຣຓໍ ອກຸສລໍ? ອິຘ ປນ, ຠິກ຺ຂເວ, ຠິກ຺ຂູ ຠິກ຺ຂຸໍ ອກຸສລຈິຕ຺ຕາ ອນຸວທນ຺ຕິ – ສີລວິປຕ຺ຕິຍາ ວາ, ອາຈາຣວິປຕ຺ຕິຍາ ວາ, ທິຏ຺ຐິວິປຕ຺ຕິຍາ ວາ, ອາຊີວວິປຕ຺ຕິຍາ ວາ. ໂຍ ຕຕ຺ຖ ອນຸວາໂທ ອນຸວທນາ ອນຸລ຺ລປນາ ອນຸຠຓນາ ອນຸສມ຺ປວງ຺ກຕາ ອພ຺ຠຸສ຺ສຫນຕາ ອນຸພລປ຺ປທານໍ – ອິທໍ ວຸຈ຺ຈຕິ ອນຸວາທາຘິກຣຓໍ ອກຸສລໍ.

‘‘ຕຕ຺ຖ ກຕມໍ ອນຸວາທາຘິກຣຓໍ ອພ຺ຍາກຕໍ? ອິຘ ປນ, ຠິກ຺ຂເວ, ຠິກ຺ຂູ ຠິກ຺ຂຸໍ ອພ຺ຍາກຕຈິຕ຺ຕາ ອນຸວທນ຺ຕິ – ສີລວິປຕ຺ຕິຍາ ວາ, ອາຈາຣວິປຕ຺ຕິຍາ ວາ, ທິຏ຺ຐິວິປຕ຺ຕິຍາ ວາ, ອາຊີວວິປຕ຺ຕິຍາ ວາ. ໂຍ ຕຕ຺ຖ ອນຸວາໂທ ອນຸວທນາ ອນຸລ຺ລປນາ ອນຸຠຓນາ ອນຸສມ຺ປວງ຺ກຕາ ອພ຺ຠຸສ຺ສຫນຕາ ອນຸພລປ຺ປທານໍ – ອິທໍ ວຸຈ຺ຈຕິ ອນຸວາທາຘິກຣຓໍ ອພ຺ຍາກຕໍ.

໒໒໒. ‘‘ອາປຕ຺ຕາຘິກຣຓໍ ກຸສລໍ [ອິທໍ ປທໍ ເກສຸຈິ ນຕ຺ຖິ], ອກຸສລໍ, ອພ຺ຍາກຕໍ? ອາປຕ຺ຕາຘິກຣຓໍ ສິຍາ ອກຸສລໍ, ສິຍາ ອພ຺ຍາກຕໍ; ນຕ຺ຖິ ອາປຕ຺ຕາຘິກຣຓໍ ກຸສລໍ. ຕຕ຺ຖ ກຕມໍ ອາປຕ຺ຕາຘິກຣຓໍ ອກຸສລໍ? ຍໍ ຊານນ຺ໂຕ ສຎ຺ຊານນ຺ໂຕ ເຈຈ຺ຈ ອຠິວິຕຣິຕ຺ວາ ວີຕິກ຺ກໂມ – ອິທໍ ວຸຈ຺ຈຕິ ອາປຕ຺ຕາຘິກຣຓໍ ອກຸສລໍ.

‘‘ຕຕ຺ຖ ກຕມໍ ອາປຕ຺ຕາຘິກຣຓໍ ອພ຺ຍາກຕໍ? ຍໍ ອຊານນ຺ໂຕ ອສຎ຺ຊານນ຺ໂຕ ອເຈຈ຺ຈ ອນຠິວິຕຣິຕ຺ວາ ວີຕິກ຺ກໂມ – ອິທໍ ວຸຈ຺ຈຕິ ອາປຕ຺ຕາຘິກຣຓໍ ອພ຺ຍາກຕໍ.

໒໒໓. ‘‘ກິຈ຺ຈາຘິກຣຓໍ ກຸສລໍ, ອກຸສລໍ, ອພ຺ຍາກຕໍ? ກິຈ຺ຈາຘິກຣຓໍ ສິຍາ ກຸສລໍ, ສິຍາ ອກຸສລໍ, ສິຍາ ອພ຺ຍາກຕໍ. ຕຕ຺ຖ ກຕມໍ ກິຈ຺ຈາຘິກຣຓໍ ກຸສລໍ? ຍໍ ສງ຺ໂຆ ກຸສລຈິຕ຺ໂຕ ກມ຺ມໍ ກໂຣຕິ – ອປໂລກນກມ຺ມໍ, ຎຕ຺ຕິກມ຺ມໍ, ຎຕ຺ຕິທຸຕິຍກມ຺ມໍ, ຎຕ຺ຕິຈຕຸຕ຺ຖກມ຺ມໍ – ອິທໍ ວຸຈ຺ຈຕິ ກິຈ຺ຈາຘິກຣຓໍ ກຸສລໍ.

‘‘ຕຕ຺ຖ ກຕມໍ ກິຈ຺ຈາຘິກຣຓໍ ອກຸສລໍ? ຍໍ ສງ຺ໂຆ ອກຸສລຈິຕ຺ໂຕ ກມ຺ມໍ ກໂຣຕິ – ອປໂລກນກມ຺ມໍ, ຎຕ຺ຕິກມ຺ມໍ, ຎຕ຺ຕິທຸຕິຍກມ຺ມໍ, ຎຕ຺ຕິຈຕຸຕ຺ຖກມ຺ມໍ – ອິທໍ ວຸຈ຺ຈຕິ ກິຈ຺ຈາຘິກຣຓໍ ອກຸສລໍ.

‘‘ຕຕ຺ຖ ກຕມໍ ກິຈ຺ຈາຘິກຣຓໍ ອພ຺ຍາກຕໍ? ຍໍ ສງ຺ໂຆ ອພ຺ຍາກຕຈິຕ຺ໂຕ ກມ຺ມໍ ກໂຣຕິ – ອປໂລກນກມ຺ມໍ, ຎຕ຺ຕິກມ຺ມໍ, ຎຕ຺ຕິທຸຕິຍກມ຺ມໍ, ຎຕ຺ຕິຈຕຸຕ຺ຖກມ຺ມໍ – ອິທໍ ວຸຈ຺ຈຕິ ກິຈ຺ຈາຘິກຣຓໍ ອພ຺ຍາກຕໍ.

໒໒໔. [ປຣິ. ໓໕໕] ‘‘ວິວາໂທ ວິວາທາຘິກຣຓໍ, ວິວາໂທ ໂນ ອຘິກຣຓໍ, ອຘິກຣຓໍ ໂນ ວິວາໂທ, ອຘິກຣຓຎ຺ເຈວ ວິວາໂທ ຈ. ສິຍາ ວິວາໂທ ວິວາທາຘິກຣຓໍ, ສິຍາ ວິວາໂທ ໂນ ອຘິກຣຓໍ, ສິຍາ ອຘິກຣຓໍ ໂນ ວິວາໂທ, ສິຍາ ອຘິກຣຓຎ຺ເຈວ ວິວາໂທ ຈ.

‘‘ຕຕ຺ຖ ກຕໂມ ວິວາໂທ ວິວາທາຘິກຣຓໍ? ອິຘ ປນ, ຠິກ຺ຂເວ, ຠິກ຺ຂູ ວິວທນ຺ຕິ – ຘມ຺ໂມຕິ ວາ ອຘມ຺ໂມຕິ ວາ…ເປ… ທຸຏ຺ຐຸລ຺ລາ ອາປຕ຺ຕີຕິ ວາ ອທຸຏ຺ຐຸລ຺ລາ ອາປຕ຺ຕີຕິ ວາ. ຍໍ ຕຕ຺ຖ ຠຓ຺ຑນໍ ກລໂຫ ວິຄ຺ຄໂຫ ວິວາໂທ ນານາວາໂທ ອຎ຺ຎຖາວາໂທ ວິປຈ຺ຈຕາຍ ໂວຫາໂຣ ເມຘຄໍ – ອຍໍ ວິວາໂທ ວິວາທາຘິກຣຓໍ.

‘‘ຕຕ຺ຖ ກຕໂມ ວິວາໂທ ໂນ ອຘິກຣຓໍ? ມາຕາປິ ປຸຕ຺ເຕນ ວິວທຕິ, ປຸຕ຺ໂຕປິ ມາຕຣາ ວິວທຕິ, ປິຕາປິ ປຸຕ຺ເຕນ ວິວທຕິ, ປຸຕ຺ໂຕປິ ປິຕຣາ ວິວທຕິ, ຠາຕາປິ ຠາຕຣາ ວິວທຕິ, ຠາຕາປິ ຠຄິນິຍາ ວິວທຕິ, ຠຄິນີປິ ຠາຕຣາ ວິວທຕິ, ສຫາໂຍປິ ສຫາເຍນ ວິວທຕິ – ອຍໍ ວິວາໂທ ໂນ ອຘິກຣຓໍ.

‘‘ຕຕ຺ຖ ກຕມໍ ອຘິກຣຓໍ ໂນ ວິວາໂທ? ອນຸວາທາຘິກຣຓໍ, ອາປຕ຺ຕາຘິກຣຓໍ, ກິຈ຺ຈາຘິກຣຓໍ – ອິທໍ ອຘິກຣຓໍ ໂນ ວິວາໂທ.

‘‘ຕຕ຺ຖ ກຕມໍ ອຘິກຣຓຎ຺ເຈວ ວິວາໂທ ຈ? ວິວາທາຘິກຣຓໍ ອຘິກຣຓຎ຺ເຈວ ວິວາໂທ ຈ.

໒໒໕. [ປຣິ. ໓໕໖] ‘‘ອນຸວາໂທ ອນຸວາທາຘິກຣຓໍ, ອນຸວາໂທ ໂນ ອຘິກຣຓໍ, ອຘິກຣຓໍ ໂນ ອນຸວາໂທ, ອຘິກຣຓຎ຺ເຈວ ອນຸວາໂທ ຈ. ສິຍາ ອນຸວາໂທ ອນຸວາທາຘິກຣຓໍ, ສິຍາ ອນຸວາໂທ ໂນ ອຘິກຣຓໍ, ສິຍາ ອຘິກຣຓໍ ໂນ ອນຸວາໂທ, ສິຍາ ອຘິກຣຓຎ຺ເຈວ ອນຸວາໂທ ຈ.

‘‘ຕຕ຺ຖ ກຕໂມ ອນຸວາໂທ ອນຸວາທາຘິກຣຓໍ? ອິຘ ປນ, ຠິກ຺ຂເວ, ຠິກ຺ຂູ ຠິກ຺ຂຸໍ ອນຸວທນ຺ຕິ – ສີລວິປຕ຺ຕິຍາ ວາ, ອາຈາຣວິປຕ຺ຕິຍາ ວາ, ທິຏ຺ຐິວິປຕ຺ຕິຍາ ວາ, ອາຊີວວິປຕ຺ຕິຍາ ວາ. ໂຍ ຕຕ຺ຖ ອນຸວາໂທ ອນຸວທນາ ອນຸລ຺ລປນາ ອນຸຠຓນາ ອນຸສມ຺ປວງ຺ກຕາ ອພ຺ຠຸສ຺ສຫນຕາ ອນຸພລປ຺ປທານໍ – ອຍໍ ອນຸວາໂທ ອນຸວາທາຘິກຣຓໍ.

‘‘ຕຕ຺ຖ ກຕໂມ ອນຸວາໂທ ໂນ ອຘິກຣຓໍ? ມາຕາປິ ປຸຕ຺ຕໍ ອນຸວທຕິ, ປຸຕ຺ໂຕປິ ມາຕຣໍ ອນຸວທຕິ, ປິຕາປິ ປຸຕ຺ຕໍ ອນຸວທຕິ, ປຸຕ຺ໂຕປິ ປິຕຣໍ ອນຸວທຕິ, ຠາຕາປິ ຠາຕຣໍ ອນຸວທຕິ, ຠາຕາປິ ຠຄິນິໍ ອນຸວທຕິ, ຠຄິນີປິ ຠາຕຣໍ ອນຸວທຕິ, ສຫາໂຍປິ ສຫາຍໍ ອນຸວທຕິ – ອຍໍ ອນຸວາໂທ ໂນ ອຘິກຣຓໍ.

‘‘ຕຕ຺ຖ ກຕມໍ ອຘິກຣຓໍ ໂນ ອນຸວາໂທ? ອາປຕ຺ຕາຘິກຣຓໍ, ກິຈ຺ຈາຘິກຣຓໍ, ວິວາທາຘິກຣຓໍ – ອິທໍ ອຘິກຣຓໍ ໂນ ອນຸວາໂທ.

‘‘ຕຕ຺ຖ ກຕມໍ ອຘິກຣຓຎ຺ເຈວ ອນຸວາໂທ ຈ? ອນຸວາທາຘິກຣຓໍ ອຘິກຣຓຎ຺ເຈວ ອນຸວາໂທ ຈ.

໒໒໖. [ປຣິ. ໓໕໗] ‘‘ອາປຕ຺ຕິ ອາປຕ຺ຕາຘິກຣຓໍ, ອາປຕ຺ຕິ ໂນ ອຘິກຣຓໍ, ອຘິກຣຓໍ ໂນ ອາປຕ຺ຕິ, ອຘິກຣຓຎ຺ເຈວ ອາປຕ຺ຕິ ຈ. ສິຍາ ອາປຕ຺ຕິ ອາປຕ຺ຕາຘິກຣຓໍ, ສິຍາ ອາປຕ຺ຕິ ໂນ ອຘິກຣຓໍ, ສິຍາ ອຘິກຣຓໍ ໂນ ອາປຕ຺ຕິ, ສິຍາ ອຘິກຣຓຎ຺ເຈວ ອາປຕ຺ຕິ ຈ. ‘‘ຕຕ຺ຖ ກຕມໍ ອາປຕ຺ຕິ ອາປຕ຺ຕາຘິກຣຓໍ? ປຎ຺ຈປິ ອາປຕ຺ຕິກ຺ຂນ຺ຘາ ອາປຕ຺ຕາຘິກຣຓໍ, ສຕ຺ຕປິ ອາປຕ຺ຕິກ຺ຂນ຺ຘາ ອາປຕ຺ຕາຘິກຣຓໍ – ອຍໍ ອາປຕ຺ຕິ ອາປຕ຺ຕາຘິກຣຓໍ.

‘‘ຕຕ຺ຖ ກຕມໍ ອາປຕ຺ຕິ ໂນ ອຘິກຣຓໍ? ໂສຕາປຕ຺ຕິ ສມາປຕ຺ຕິ – ອຍໍ ອາປຕ຺ຕິ ໂນ ອຘິກຣຓໍ.

‘‘ຕຕ຺ຖ ກຕມໍ ອຘິກຣຓໍ ໂນ ອາປຕ຺ຕິ? ກິຈ຺ຈາຘິກຣຓໍ, ວິວາທາຘິກຣຓໍ, ອນຸວາທາຘິກຣຓໍ – ອິທໍ ອຘິກຣຓໍ ໂນ ອາປຕ຺ຕິ.

‘‘ຕຕ຺ຖ ກຕມໍ ອຘິກຣຓຎ຺ເຈວ ອາປຕ຺ຕິ ຈ? ອາປຕ຺ຕາຘິກຣຓໍ ອຘິກຣຓຎ຺ເຈວ ອາປຕ຺ຕິ ຈ.

໒໒໗. [ປຣິ. ໓໕໘] ‘‘ກິຈ຺ຈໍ ກິຈ຺ຈາຘິກຣຓໍ, ກິຈ຺ຈໍ ໂນ ອຘິກຣຓໍ, ອຘິກຣຓໍ ໂນ ກິຈ຺ຈໍ, ອຘິກຣຓຎ຺ເຈວ ກິຈ຺ຈຎ຺ຈ. ສິຍາ ກິຈ຺ຈໍ ກິຈ຺ຈາຘິກຣຓໍ, ສິຍາ ກິຈ຺ຈໍ ໂນ ອຘິກຣຓໍ, ສິຍາ ອຘິກຣຓໍ ໂນ ກິຈ຺ຈໍ, ສິຍາ ອຘິກຣຓຎ຺ເຈວ ກິຈ຺ຈຎ຺ຈ.

‘‘ຕຕ຺ຖ ກຕມໍ ກິຈ຺ຈໍ ກິຈ຺ຈາຘິກຣຓໍ? ຍາ ສງ຺ຆສ຺ສ ກິຈ຺ຈຍຕາ, ກຣຓີຍຕາ, ອປໂລກນກມ຺ມໍ, ຎຕ຺ຕິກມ຺ມໍ, ຎຕ຺ຕິທຸຕິຍກມ຺ມໍ, ຎຕ຺ຕິຈຕຸຕ຺ຖກມ຺ມໍ – ອິທໍ ກິຈ຺ຈໍ ກິຈ຺ຈາຘິກຣຓໍ.

‘‘ຕຕ຺ຖ ກຕມໍ ກິຈ຺ຈໍ ໂນ ອຘິກຣຓໍ? ອາຈຣິຍກິຈ຺ຈໍ, ອຸປຊ຺ຌາຍກິຈ຺ຈໍ, ສມານຸປຊ຺ຌາຍກິຈ຺ຈໍ, ສມານາຈຣິຍກິຈ຺ຈໍ – ອິທໍ ກິຈ຺ຈໍ ໂນ ອຘິກຣຓໍ.

‘‘ຕຕ຺ຖ ກຕມໍ ອຘິກຣຓໍ ໂນ ກິຈ຺ຈໍ? ວິວາທາຘິກຣຓໍ, ອນຸວາທາຘິກຣຓໍ, ອາປຕ຺ຕາຘິກຣຓໍ – ອິທໍ ອຘິກຣຓໍ ໂນ ກິຈ຺ຈໍ.

‘‘ຕຕ຺ຖ ກຕມໍ ອຘິກຣຓຎ຺ເຈວ ກິຈ຺ຈຎ຺ຈ? ກິຈ຺ຈາຘິກຣຓໍ ອຘິກຣຓຎ຺ເຈວ ກິຈ຺ຈຎ຺ຈ.