໑໖. ສມາໂຣປນຫາຣສມ຺ປາຕວິຠາວນາ

໗໘. ‘‘ຕສ຺ມາ ຣກ຺ຂິຕຈິຕ຺ຕສ຺ສາ’’ຕິ ປເທນ ຍໍ ຣກ຺ຂິຕຈິຕ຺ຕໍ ວຸຕ຺ຕໍ, ຕໍ ຣກ຺ຂິຕຈິຕ຺ຕໍ ຕິຓ຺ຓໍ ສຸຈຣິຕານໍ ກມ຺ມານໍ ປທຏ຺ຐານໍ. ສມ຺ມາທິຏ຺ຐິຍາ ຠາວິຕາຍ ອຣິໂຍ ອຏ຺ຐງ຺ຄິໂກ ມຄ຺ໂຄ ຠາວິໂຕ ຠວຕິ ເອກໂຕ ຠາວິຕພ຺ພຕ຺ຕາ, ປທຏ຺ຐານກາຣຓຕ຺ຕາ ຈ. ເຕນ ວຸຕ຺ຕໍ – ‘‘ສມ຺ມາທິຏ຺ຐິໂຕ ຫີ’’ຕິອາທິ. ຍສ຺ສ ອຣຫໂຕ ສມາຘິວິມຸຕ຺ຕິ ຠວຕິ, ອຍໍ ອຣຫາ ອນຸປາທິເສໂສ ປຸຄ຺ຄໂລ, ອຍໍ ສມາຘິວິມຸຕ຺ຕິ ອນຸປາທິເສສາ ນິພ຺ພານຘາຕຸ.

‘‘ເທສນາຫາຣສມ຺ປາຕາທິໂກ ຫາຣສມ຺ປາໂຕ ເຍນ ໂສຬສປ຺ປເຠທຠາເວນ ສຸຕ຺ຕປ຺ປເທສຕ຺ເຖ ນິທ຺ຘາເຣຕ຺ວາ ຍຸຊ຺ຊິໂຕ, ໂສຬສປ຺ປເຠທຠາໂວ ເກນ ອມ຺ເຫຫິ ສທ຺ທຫິຕພ຺ໂພ’’ຕິ ວຕ຺ຕພ຺ພຕ຺ຕາ ‘‘ເຕນາຫາ’’ຕິອາທິ ວຸຕ຺ຕໍ. ເຕນ ໂສຬສປ຺ປເຠທຠາເວນ ອາຍສ຺ມາ ມຫາກຈ຺ຈາໂນ ‘‘ໂສຬສ…ເປ… ສຸຕ຺ຕ’’ນ຺ຕິ ຍໍ ວຈນໍ ອາຫ, ເຕນ ວຈເນນ ໂສຬສປ຺ປເຠທຠາໂວ ຕຸມ຺ເຫຫິ ສທ຺ທຫິຕພ຺ໂພ.

‘‘ເອຕ຺ຕໂກວ ຫາຣສມ຺ປາໂຕ ປຣິປຸຓ຺ໂຓ’’ຕິ ວຕ຺ຕພ຺ພຕ຺ຕາ ‘‘ນິຍຸຕ຺ໂຕ ຫາຣສມ຺ປາໂຕ’’ຕິ ວຸຕ຺ຕໍ. ເຍນ ເຍນ ສໍວຓ຺ຓນາວິເສສຠູເຕນ ເທສນາຫາຣສມ຺ປາເຕນ ສຸຕ຺ຕປ຺ປເທສຕ຺ຖາ ນິທ຺ຘາຣິຕາ, ໂສ ໂສ ສໍວຓ຺ຓນາວິເສສຠູໂຕ ເທສນາຫາຣສມ຺ປາຕາທິຫາຣສມ຺ປາໂຕ ນິຍຸຕ຺ໂຕ ຍຖາຣຫໍ ນິທ຺ຘາເຣຕ຺ວາ ຍຸຊ຺ຊິຕພ຺ໂພຕິ ອຕ຺ໂຖ ຄເຫຕພ຺ໂພ, ອຏ຺ຐກຖາຍຎ຺ຈ (ເນຕ຺ຕິ. ອຏ຺ຐ. ໗໓, ໗໖) ຕຖາ ນິທ຺ຘາເຣຕ຺ວາ ຍຸຊ຺ຊິໂຕຕິ.

ອິຕິ ເທສນາຫາຣສມ຺ປາຕາທິຫາຣສມ຺ປາເຕ ສຕ຺ຕິພລານຸຣູປາ

ຣຈິຕາ ວິຠາວນາ ນິຏ຺ຐິຕາ.

ປຓ຺ຑິເຕຫິ ປນ ອຏ຺ຐກຖາຏີການຸສາເຣນ ຄມ຺ຠີຣຕ຺ໂຖ ວິຕ຺ຖາຣໂຕ ວິຠຊິຕ຺ວາ ຄເຫຕພ຺ໂພຕິ.