໑໑. ປຎ຺ຎຕ຺ຕິຫາຣສມ຺ປາຕວິຠາວນາ

໗໓. ເຍນ ເຍນ ເວວຈນຫາຣສມ຺ປາເຕນ ເວວຈນານິ ນິທ຺ຘາຣິຕານິ, ໂສ ເວວຈນຫາຣສມ຺ປາໂຕ ປຣິປຸຓ຺ໂຓ, ‘‘ກຕໂມ ປຎ຺ຎຕ຺ຕິຫາຣສມ຺ປາໂຕ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕໂມ ປຎ຺ຎຕ຺ຕິຫາຣສມ຺ປາໂຕ’’ຕິອາທິ ວຸຕ຺ຕໍ.

‘‘ກຕມາ ສຸຕ຺ຕປ຺ປເທສຠູຕາ ປຎ຺ຎຕ຺ຕິ ກຕເມສໍ ຘມ຺ມານໍ ປຎ຺ຎຕ຺ຕີ’’ຕິ ປຸຈ຺ຉິຕພ຺ພຕ຺ຕາ ‘‘ຕສ຺ມາ’’ຕິອາທິ ວຸຕ຺ຕໍ. ‘‘ຕສ຺ມາ ຣກ຺ຂິຕຈິຕ຺ຕສ຺ສາ’’ຕິ ປຎ຺ຎຕ຺ຕິ ສຕິຍາ ປທຏ຺ຐານສ຺ສ ຣກ຺ຂິຕພ຺ພສ຺ສ ຈິຕ຺ຕສ຺ສ ປຎ຺ຎາປນໂຕ ສຕິຍາ ປທຏ຺ຐານປຎ຺ຎຕ຺ຕິ ນາມ. ສຕິຍາ ຫິ ຣກ຺ຂິຕພ຺ພໍ ຈິຕ຺ຕໍ ສຕິຍາ ປທຏ຺ຐານໍ ອຘິຏ຺ຐານໍ ນາມ. ເຕນາຫ ອຏ຺ຐກຖາຍໍ – ‘‘ອຘິຏ຺ຐຫິຕ຺ວາ ຣກ຺ຂນ຺ຕິຍາ ສຕິຍາ ຣກ຺ຂິຍມານໍ ຈິຕ຺ຕໍ ຕສ຺ສາ ອຘິຏ຺ຐານໍ ວິຍ ໂຫຕີ’’ຕິ. ‘‘ສມ຺ມາສງ຺ກປ຺ປໂຄຈໂຣ’’ຕິ ປຎ຺ຎຕ຺ຕິ ສມຖສ຺ສ ຠາວນາຍ ປຎ຺ຎາປນໂຕ ສມຖສ຺ສ ຠາວນາປຎ຺ຎຕ຺ຕິ ນາມ. ‘‘ສມ຺ມາທິຏ຺ຐິປຸເຣກ຺ຂາໂຣ, ຎຕ຺ວານ ອຸທຍພ຺ພຍ’’ນ຺ຕິ ປຎ຺ຎຕ຺ຕິ ທສ຺ສນຠູມິຍາ ນິກ຺ເຂປສ຺ສ ປຎ຺ຎາປນໂຕ ນິກ຺ເຂປປຎ຺ຎຕ຺ຕິ ນາມ. ‘‘ຖິນມິທ຺ຘາຠິຠູ ຠິກ຺ຂູ’’ຕິ ສມຸທຍສ຺ສ ອນວເສສປ຺ປຫານສ຺ສ ປຎ຺ຎາປນໂຕ ອນວເສສປ຺ປຫານປຎ຺ຎຕ຺ຕິ ນາມ. ‘‘ສພ຺ພາ ທຸຄ຺ຄຕິໂຍ ຊເຫ’’ຕິ ປຎ຺ຎຕ຺ຕິ ມຄ຺ຄສ຺ສ ອຣິຍມຄ຺ຄສ຺ສ ຠາວນາຍ ປຎ຺ຎາປນໂຕ ຠາວນາປຎ຺ຎຕ຺ຕິ ນາມ.

‘‘ເອຕ຺ຕໂກວ ປຎ຺ຎຕ຺ຕິຫາຣສມ຺ປາໂຕ ປຣິປຸຓ຺ໂຓ’’ຕິ ວຕ຺ຕພ຺ພຕ຺ຕາ ‘‘ນິຍຸຕ຺ໂຕ ປຎ຺ຎຕ຺ຕິຫາຣສມ຺ປາໂຕ’’ຕິ ວຸຕ຺ຕໍ. ເຍນ ເຍນ ສໍວຓ຺ຓນາວິເສສຠູເຕນ ປຎ຺ຎຕ຺ຕິຫາຣສມ຺ປາເຕນ ປຎ຺ຎຕ຺ຕິປ຺ປເຠທາ ນິທ຺ຘາຣິຕາ, ໂສ ໂສ ສໍວຓ຺ຓນາວິເສສຠູໂຕ ປຎ຺ຎຕ຺ຕິຫາຣສມ຺ປາໂຕ ນິຍຸຕ຺ໂຕ ຍຖາຣຫໍ ນິທ຺ຘາເຣຕ຺ວາ ຍຸຊ຺ຊິຕພ຺ໂພຕິ ອຕ຺ໂຖ ຄເຫຕພ຺ໂພຕິ.

ອິຕິ ປຎ຺ຎຕ຺ຕິຫາຣສມ຺ປາເຕ ສຕ຺ຕິພລານຸຣູປາ ຣຈິຕາ

ວິຠາວນາ ນິຏ຺ຐິຕາ.

ປຓ຺ຑິເຕຫິ ປນ…ເປ… ຄເຫຕພ຺ໂພຕິ.