໑໒. ໂອຕຣຓຫາຣສມ຺ປາຕວິຠາວນາ

໗໔. ເຍນ ເຍນ ປຎ຺ຎຕ຺ຕິຫາຣສມ຺ປາເຕນ ປຎ຺ຎຕ຺ຕິປ຺ປເຠທາ ນິທ຺ຘາຣິຕາ, ໂສ ປຎ຺ຎຕ຺ຕິຫາຣສມ຺ປາໂຕ ປຣິປຸຓ຺ໂຓ, ‘‘ກຕໂມ ໂອຕຣໂຓ ຫາຣສມ຺ປາໂຕ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕໂມ ໂອຕຣໂຓ ຫາຣສມ຺ປາໂຕ’’ຕິອາທິມາຫ.

‘‘ຕຕ຺ຖ ຕິສ຺ສໍ ຄາຖາຍໍ ກຕມານິ ອິນ຺ທ຺ຣິຍານິ ນິທ຺ຘາເຣຕ຺ວາ ກຕເມຫິ ນິທ຺ຘາຣິເຕຫິ ຘມ຺ເມຫິ ໂອຕຣຕີ’’ຕິ ປຸຈ຺ຉິຕພ຺ພຕ຺ຕາ ‘‘ຕສ຺ມາ’’ຕິອາທິ ວຸຕ຺ຕໍ. ຍາ ‘‘ຕສ຺ມາ ຣກ຺ຂິຕຈິຕ຺ຕສ຺ສາ’’ຕິອາທິຄາຖາ ວຸຕ຺ຕາ, ຕິສ຺ສໍ ຄາຖາຍໍ ‘‘ຕສ຺ມາ…ເປ… ປຸເຣກ຺ຂາໂຣ’’ຕິ ສຸຕ຺ຕປ຺ປເທເສນ ສມ຺ມາທິຏ຺ຐິ ຄຫິຕາ, ສມ຺ມາທິຏ຺ຐິຍາ ຄຫິຕາຍ ປຎ຺ຈິນ຺ທ຺ຣິຍານິ ສທ຺ຘາທິປຎ຺ຈິນ຺ທ຺ຣິຍານິ ຄຫິຕານິ ຠວນ຺ຕິ.

ຕານິເຍວ ສທ຺ຘາທິປຎ຺ຈິນ຺ທ຺ຣິຍານິ ວິຊ຺ຊາຍ ອຸປກາຣຕ຺ຕາ ວາ ປທຏ຺ຐານຕ຺ຕາ ວາ ວິຊ຺ຊາ ຠວນ຺ຕິ, ວິຊ຺ຊຸປ຺ປາທາ ຕາທິສາຍ ວິຊ຺ຊາຍ ອຸປ຺ປາທາ ອຸປ຺ປາທເຫຕຸໂຕ ອວິຊ຺ຊານິໂຣໂຘ ສມ຺ຠວຕິ, ອວິຊ຺ຊານິໂຣຘາ ສງ຺ຂາຣນິໂຣໂຘ ສມ຺ຠວຕິ…ເປ… ຊາຕິນິໂຣຘາ ຊຣາມຣຓນິໂຣໂຘ ສມ຺ຠວຕີຕິ. ອຍໍ ໂອຕຣຓາ ປຏິຈ຺ຈສມຸປ຺ປາເທນ ປຎ຺ຈິນ຺ທ຺ຣິຍານໍ ໂອຕຣຓາ ນາມ.

ຕານິເຍວ ປຎ຺ຈິນ຺ທ຺ຣິຍານິ ສີລກ຺ຂນ຺ເຘນ ສມາຘິກ຺ຂນ຺ເຘນ ປຎ຺ຎາກ຺ຂນ຺ເຘນ ຕີຫິ ຂນ຺ເຘຫິ ສງ຺ຄຫິຕານິ ຠວນ຺ຕິ ສທ຺ຘາວີຣິເຍຫິ ສີລສມ຺ຠວໂຕ, ສຕິຍາ ຈ ປຎ຺ຎານຸວຕ຺ຕກຕ຺ຕາ. ອຍໍ ໂອຕຣຓາ ຂນ຺ເຘຫິ ປຎ຺ຈິນ຺ທ຺ຣິຍານໍ ໂອຕຣຓາ ນາມ.

ຕານິເຍວ ປຎ຺ຈິນ຺ທ຺ຣິຍານິ ສງ຺ຂາຣປຣິຍາປນ຺ນານິ ຠວນ຺ຕິ. ເຍ ສງ຺ຂາຣາ ອນາສວາ ຠວນ຺ຕິ, ຠວງ຺ຄາ ຠວເຫຕູ ໂນ ຠວນ຺ຕິ, ເຕ ອນາສວາ ສງ຺ຂາຣາ ຘມ຺ມຘາຕຸສງ຺ຄຫິຕາ ຠວນ຺ຕິ ຘມ຺ມຘາຕຸຍາ ອນ຺ໂຕຄຘຕ຺ຕາ. ອຍໍ ໂອຕຣຓາ ຘາຕູຫິ ປຎ຺ຈິນ຺ທ຺ຣິຍານໍ ໂອຕຣຓາ ນາມ.

ສາ ອນາສວາ ຘມ຺ມຘາຕຸ ຘມ຺ມາຍຕນປຣິຍາປນ຺ນາ ຠວຕິ, ຍໍ ອາຍຕນໍ ອນາສວໍ ຠວຕິ, ຠວງ຺ຄໍ ຠວເຫຕຸ ໂນ ຠວຕິ. ອຍໍ ໂອຕຣຓາ ອາຍຕເນຫິ ຘມ຺ມຘາຕຸຍາ ໂອຕຣຓາ ນາມ.

‘‘ເອຕ຺ຕໂກວ ໂອຕຣໂຓ ຫາຣສມ຺ປາໂຕ ປຣິປຸຓ຺ໂຓ’’ຕິ ວຕ຺ຕພ຺ພຕ຺ຕາ ‘‘ນິຍຸຕ຺ໂຕ ໂອຕຣໂຓ ຫາຣສມ຺ປາໂຕ’’ຕິ ວຸຕ຺ຕໍ. ເຍນ ເຍນ ສໍວຓ຺ຓນາວິເສສຠູເຕນ ໂອຕຣຓຫາຣສມ຺ປາເຕນ ສຸຕ຺ຕປ຺ປເທສຕ຺ຖາ ໂອຕຣິຕພ຺ພາ, ໂສ ໂສ ສໍວຓ຺ຓນາວິເສສຠູໂຕ ໂອຕຣໂຓ ຫາຣສມ຺ປາໂຕ ນິຍຸຕ຺ໂຕ ຍຖາຣຫໍ ນິທ຺ຘາເຣຕ຺ວາ ຍຸຊ຺ຊິຕພ຺ໂພຕິ ອຕ຺ໂຖ ຄເຫຕພ຺ໂພຕິ.

ອິຕິ ໂອຕຣຓຫາຣສມ຺ປາເຕ ສຕ຺ຕິພລານຸຣູປາ ຣຈິຕາ

ວິຠາວນາ ນິຏ຺ຐິຕາ.

ປຓ຺ຑິເຕຫິ ປນ…ເປ… ຄເຫຕພ຺ໂພຕິ.

ອິໂຕ ປຏ຺ຐາຍ ‘‘ຕຕ຺ຖ ກຕໂມ’’ຕິອາທິອນຸສນ຺ຘ຺ຍຕ຺ໂຖ ຈ ປຣິໂຍສາເນ ‘‘ນິຍຸຕ຺ໂຕ’’ຕິອາທິອນຸສນ຺ຘ຺ຍຕ຺ໂຖ ຈ ວຸຕ຺ຕນຍານຸສາເຣເນວ ວິຎ຺ຎາຕພ຺ໂພ. ກຕ຺ຖຈິ ກຕ຺ຖຈິ ປາເຐ ອປາກຏໍເຍວ ຍຖາພລໍ ກຖຍິສ຺ສາມ.