໑໐. ເວວຈນຫາຣສມ຺ປາຕວິຠາວນາ

໗໒. ເຍນ ເຍນ ປຣິວຕ຺ຕນຫາຣສມ຺ປາເຕນ ສຸຕ຺ຕປ຺ປເທສຕ຺ຖາ ປຣິວຕ຺ເຕຕພ຺ພາ, ໂສ ປຣິວຕ຺ຕໂນ ຫາຣສມ຺ປາໂຕຕິ ປຣິປຸຓ຺ໂຓ, ‘‘ກຕໂມ ເວວຈໂນ ຫາຣສມ຺ປາໂຕ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕໂມ ເວວຈໂນ ຫາຣສມ຺ປາໂຕ’’ຕິອາທິ ວຸຕ຺ຕໍ.

‘‘ກຕເມສໍ ສຸຕ຺ຕປ຺ປເທສຕ຺ຖານໍ, ສຸຕ຺ຕປທານໍ ວາ ກຕມານິ ເວວຈນານີ’’ຕິ ປຸຈ຺ຉິຕພ຺ພຕ຺ຕາ ‘‘ຕສ຺ມາ’’ຕິອາທິ ວຸຕ຺ຕໍ. ຍາ ‘‘ຕສ຺ມາ…ເປ… ໂຄຈໂຣ’’ຕິ ຄາຖາ ວຸຕ຺ຕາ, ຕາຍ ຄາຖາຍ ‘‘ຣກ຺ຂິຕຈິຕ຺ຕສ຺ສາ’’ຕິ ປເທນ ວຸຕ຺ຕສ຺ສ ຈິຕ຺ຕສ຺ສ, ‘‘ຣກ຺ຂິຕຈິຕ຺ຕສ຺ສາ’’ຕິ ເອຕ຺ຖ ຈິຕ຺ຕສ຺ສ ປທສ຺ສ ວາ ‘‘ຈິຕ຺ຕໍ…ເປ… ວິຊານິຕຕ຺ຕ’’ນ຺ຕິ ຍໍ ວຈນໍ ວຸຕ຺ຕໍ, ອິທໍ ວຈນໍ ເວວຈນໍ, ‘‘ມານສໍ ຫທຍ’’ນ຺ຕິອາທິວຈນມ຺ປິ (ຘ. ສ. ໑໗, ໖໓) ຈິຕ຺ຕສ຺ສ ເວວຈນໍ. ‘‘ສມ຺ມາສງ຺ກປ຺ປໂຄຈໂຣ’’ຕິ ເອຕ຺ຖ ສມ຺ມາສງ຺ກປ຺ປສ຺ສ ‘‘ເນກ຺ຂມ຺ມສງ຺ກປ຺ໂປ ອພ຺ຍາປາທສງ຺ກປ຺ໂປ ອວິຫິໍສາສງ຺ກປ຺ໂປ’’ຕິ ຍໍ ວຈນໍ ວຸຕ຺ຕໍ, ອິທໍ ວຈນໍ ເວວຈນໍ, ‘‘ຕກ຺ໂກ ວິຕກ຺ໂກ’’ຕິອາທິ (ຘ. ສ. ໗) ວຈນມ຺ປິ ສມ຺ມາສງ຺ກປ຺ປສ຺ສ ເວວຈນໍ. ‘‘ສມ຺ມາທິຏ຺ຐິປຸເຣກ຺ຂາໂຣ’’ຕິ ເອຕ຺ຖ ສມ຺ມາທິຏ຺ຐິປທສ຺ສ ‘‘ສມ຺ມາທິຏ຺ຐິ ນາມ ປຎ຺ຎາສຕ຺ຖໍ ປຎ຺ຎາຂຄ຺ໂຄ ປຎ຺ຎາຣຕນໍ ປຎ຺ຎາປໂຕໂທ ປຎ຺ຎາປາສາໂທ’’ຕິ ຍໍ ວຈນໍ ວຸຕ຺ຕໍ, ອິທໍ ວຈນໍ ເວວຈນໍ, ‘‘ປຎ຺ຎາ ປຊານນາ ວິຈໂຍ’’ຕິອາທິ (ຘ. ສ. ໑໖) ວຈນມ຺ປິ ສມ຺ມາທິຏ຺ຐິປທສ຺ສ ເວວຈນໍ. ‘‘ຖິນໍ ຖິຍນາ ຖິຍິຕຕ຺ຕໍ ຈິຕ຺ຕສ຺ສ, ຈິຕ຺ຕສ຺ສ ອກລ຺ລຕາ ອກມ຺ມຎ຺ຎຕາ ໂອນາໂຫ ປຣິໂຍນາໂຫ ອນ຺ໂຕສງ຺ໂກໂຈ’’ຕິ (ຘ. ສ. ໑໑໖໒-໑໑໖໓) ຍໍ ວຈນໍ ວຸຕ຺ຕໍ, ອິທໍ ວຈນໍ ຖິນສ຺ສ ເວວຈນໍ. ‘‘ກາຍສ຺ສ ອກລ຺ລຕາ ອກມ຺ມຎ຺ຎຕາ ກາຍາລສິຍໍ ໂສປ຺ປໍ ສຸປນາ ສຸປ຺ປິຕຕ຺ຕ’’ນ຺ຕິ (ຘ. ສ. ໑໑໖໓) ຍໍ ວຈນໍ ວຸຕ຺ຕໍ, ອິທໍ ວຈນໍ ມິທ຺ຘສ຺ສ ເວວຈນໍ. ‘‘ຠິກ຺ຂໂກ ຠິກ຺ຂູ’’ຕິອາທິກໍ (ປາຣາ. ໔໕; ວິຠ. ໕໑໐) ຍໍ ວຈນໍ ວຸຕ຺ຕໍ, ອິທໍ ວຈນໍ ຠິກ຺ຂຸປທສ຺ສ ເວວຈນໍ. ‘‘ທຸຄ຺ຄຕິ ອປາໂຍ ວິນິປາໂຕ ວຏ຺ຏທຸກ຺ຂໍ ສໍສາໂຣ’’ຕິອາທິກໍ ຍໍ ວຈນໍ ວຸຕ຺ຕໍ, ອິທໍ ວຈນໍ ທຸຄ຺ຄຕິປທສ຺ສ ເວວຈນໍ. ອິຕິ ເວວຈນານິ ນີຫຣິຕານິ.

‘‘ເອຕ຺ຕໂກວ ເວວຈນຫາຣສມ຺ປາໂຕ ປຣິປຸຓ຺ໂຓ’’ຕິ ວຕ຺ຕພ຺ພຕ຺ຕາ ‘‘ນິຍຸຕ຺ໂຕ ເວວຈໂນ ຫາຣສມ຺ປາໂຕ’’ຕິ ວຸຕ຺ຕໍ. ເຍນ ເຍນ ສໍວຓ຺ຓນາວິເສສຠູເຕນ ເວວຈນຫາຣສມ຺ປາເຕນ ເວວຈນານິ ນີຫຣິຕານິ, ໂສ ໂສ ສໍວຓ຺ຓນາວິເສສຠູໂຕ ເວວຈນຫາຣສມ຺ປາໂຕ ນິຍຸຕ຺ໂຕ ຍຖາສມ຺ຠວໍ ນີຫຣິຕ຺ວາ ຍຸຊ຺ຊິຕພ຺ໂພຕິ ອຕ຺ໂຖ ຄຫິໂຕຕິ.

ອິຕິ ເວວຈນຫາຣສມ຺ປາເຕ ສຕ຺ຕິພລານຸຣູປາ ຣຈິຕາ

ວິຠາວນາ ນິຏ຺ຐິຕາ.

ປຓ຺ຑິເຕຫິ ປນ…ເປ… ຄເຫຕພ຺ໂພຕິ.