໙. ປຣິວຕ຺ຕນຫາຣສມ຺ປາຕວິຠາວນາ

໗໑. ເຍນ ເຍນ ວິຠຕ຺ຕິຫາຣສມ຺ປາເຕນ ສຸຕ຺ຕປ຺ປເທສຕ຺ຖາ ວິຠຕ຺ຕາ, ໂສ ວິຠຕ຺ຕິຫາຣສມ຺ປາໂຕ ປຣິປຸຓ຺ໂຓ, ‘‘ກຕໂມ ປຣິວຕ຺ຕນຫາຣສມ຺ປາໂຕ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕໂມ ປຣິວຕ຺ຕໂນ ຫາຣສມ຺ປາໂຕ’’ຕິອາທິ ວຸຕ຺ຕໍ.

‘‘ກຕເມ ສຸຕ຺ຕປ຺ປເທສຕ຺ຖາ ກຖໍ ປຣິວຕ຺ເຕຕພ຺ພາ’’ຕິ ປຸຈ຺ຉິຕພ຺ພຕ຺ຕາ ‘‘ຕສ຺ມາ’’ຕິອາທິ ວຸຕ຺ຕໍ. ຍາ ‘‘ຕສ຺ມາ…ເປ… ໂຄຈໂຣ’’ຕິ ຄາຖາ ວຸຕ຺ຕາ, ຕາຍ ຄາຖາຍ ຍາ ສມຖວິປສ຺ສນາ ນິທ຺ຘາຣິຕາ, ຕາຍ ສມຖວິປສ຺ສນາຍ ຠາວິຕາຍ ອກຸສລານໍ ນິໂຣໂຘ ຜລໍ ປໂຍຊນໍ ໂຫຕິ, ປຣິຎ຺ຎາຕໍ ທຸກ຺ຂໍ ໂຫຕິ, ສມຸທໂຍ ປຫີໂນ ໂຫຕິ, ມຄ຺ໂຄ ຠາວິໂຕ ໂຫຕີຕິ ປຣິວຕ຺ເຕຕພ຺ໂພ. ປຏິປກ຺ເຂນ ປນ ສມຖວິປສ຺ສນາຍ ອຠາວິຕາຍ ອກຸສລານໍ ອນິໂຣໂຘ, ອປຣິຎ຺ຎາຕໍ ທຸກ຺ຂໍ, ສມຸທໂຍ ອປ຺ປຫີໂນ, ມຄ຺ໂຄ ອຠາວິໂຕ ໂຫຕີຕິ ປຣິວຕ຺ເຕຕພ຺ໂພ.

‘‘ເອຕ຺ຕໂກວ ປຣິວຕ຺ຕນຫາຣສມ຺ປາໂຕ ປຣິປຸຓ຺ໂຓ’’ຕິ ວຕ຺ຕພ຺ພຕ຺ຕາ ‘‘ນິຍຸຕ຺ໂຕ ປຣິວຕ຺ຕໂນ ຫາຣສມ຺ປາໂຕ’’ຕິ ວຸຕ຺ຕໍ. ເຍນ ເຍນ ສໍວຓ຺ຓນາວິເສສຠູເຕນ ປຣິວຕ຺ຕນຫາຣສມ຺ປາເຕນ ສຸຕ຺ຕປ຺ປເທສຕ຺ຖາ ປຣິວຕ຺ເຕຕພ຺ພາ, ໂສ ໂສ ສໍວຓ຺ຓນາວິເສສຠູໂຕ ປຣິວຕ຺ຕນຫາຣສມ຺ປາໂຕ ນິຍຸຕ຺ໂຕ ຍຖາຣຫໍ ນີຫຣິຕ຺ວາ ຍຸຊ຺ຊິຕພ຺ໂພຕິ ອຕ຺ໂຖ ຄເຫຕພ຺ໂພຕິ.

ອິຕິ ປຣິວຕ຺ຕນຫາຣສມ຺ປາເຕ ສຕ຺ຕິພລານຸຣູປາ ຣຈິຕາ

ວິຠາວນາ ນິຏ຺ຐິຕາ.

ປຓ຺ຑິເຕຫິ ປນ…ເປ… ຄເຫຕພ຺ໂພຕິ.