໘. ວິຠຕ຺ຕິຫາຣສມ຺ປາຕວິຠາວນາ

໗໐. ເຍນ ເຍນ ອາວຏ຺ຏຫາຣສມ຺ປາເຕນ ສຸຕ຺ຕຕ຺ຖາ ອາວຏ຺ເຏຕພ຺ພາ, ໂສ ອາວຏ຺ຏຫາຣສມ຺ປາໂຕ ປຣິປຸຓ຺ໂຓ, ‘‘ກຕໂມ ວິຠຕ຺ຕິຫາຣສມ຺ປາໂຕ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕໂມ ວິຠຕ຺ຕິຫາຣສມ຺ປາໂຕ’’ຕິອາທິ ວຸຕ຺ຕໍ. ຕຕ຺ຖ ກຕໂມ ສໍວຓ຺ຓນາວິເສໂສ ວິຠຕ຺ຕິຫາຣສມ຺ປາໂຕ ນາມາຕິ ປຸຈ຺ຉຕິ.

‘‘ກຕເມ ສຸຕ຺ຕຕ຺ຖາ ກຕ຺ຖ ວິຠຕ຺ຕາ’’ຕິ ປຸຈ຺ຉິຕພ຺ພຕ຺ຕາ ‘‘ຕສ຺ມາ ຣກ຺ຂິຕຈິຕ຺ຕສ຺ສາ’’ຕິອາທິ ວຸຕ຺ຕໍ. ຍາ ‘‘ຕສ຺ມາ…ເປ… ໂຄຈໂຣ’’ຕິ ຄາຖາ ວຸຕ຺ຕາ, ຕິສ຺ສໍ ຄາຖາຍໍ ວຸຕ຺ໂຕ ກຸສລປກ຺ໂຂ ຘມ຺ໂມ ກຸສລປກ຺ເຂນ ຘມ຺ເມນ ສຕິສໍວໂຣ ຘມ຺ໂມ ນິທ຺ທິສິຕພ຺ໂພ ວິຠຊິຕພ຺ໂພ, ອກຸສລປກ຺ເຂນ ຘມ຺ເມນ ນິທ຺ທິສິຕພ຺ໂພ ວິຠຊິຕພ຺ໂພ.

ກຖໍ? ‘‘ຣກ຺ຂິຕຈິຕ຺ຕສ຺ສາ’’ຕິ ປເທນ ວຸຕ຺ໂຕ ກຸສລປກ຺ໂຂ ສຕິສໍວໂຣ ຘມ຺ໂມ ‘‘ຈກ຺ຂຸທ຺ວາຣສໍວໂຣ…ເປ… ມໂນທ຺ວາຣສໍວໂຣ’’ຕິ ຉພ຺ພິເຘນ ກຸສລປກ຺ເຂນ ຘມ຺ເມນ ນິທ຺ທິສິຕພ຺ໂພ ວິຠຊິຕພ຺ໂພ. ‘‘ສມ຺ມາສງ຺ກປ຺ໂປ’’ຕິ ປເທນ ວຸຕ຺ໂຕ ກຸສລປກ຺ໂຂ ສມ຺ມາສງ຺ກປ຺ໂປ ຘມ຺ໂມ ‘‘ເນກ຺ຂມ຺ມສງ຺ກປ຺ໂປ ອພ຺ຍາປາທ-ສງ຺ກປ຺ໂປ ອວິຫິໍສາສງ຺ກປ຺ໂປ’’ຕິ ຕິວິເຘນ ກຸສລປກ຺ເຂນ ຘມ຺ເມນ ວິຠຊິຕພ຺ໂພ. ‘‘ສມ຺ມາທິຏ຺ຐິປຸເຣກ຺ຂາໂຣ’’ຕິ ປເທນ ວຸຕ຺ຕາ ກຸສລປກ຺ຂາ ຘມ຺ມຊາຕິ ‘‘ທຸກ຺ເຂ ຎາຓໍ, ທຸກ຺ຂສມຸທເຍ ຎາຓໍ, ທຸກ຺ຂນິໂຣເຘ ຎາຓໍ, ທຸກ຺ຂນິໂຣຘຄາມິນິປຏິປທາຍ ຎາຓໍ, ປຸພ຺ພນ຺ເຕ ຎາຓໍ, ອປຣນ຺ເຕ ຎາຓໍ, ປຸພ຺ພນ຺ຕາປຣນ຺ເຕ ຎາຓໍ, ອິທປ຺ປຈ຺ຈຍຕາປຏິຈ຺ຈສມຸປ຺ປນ຺ເນສຸ ຘມ຺ເມສຸ ຎາຓ’’ນ຺ຕິ (ຘ. ສ. ໑໐໖໓) ອຏ຺ຐວິເຘນ ກຸສລປກ຺ເຂນ ຘມ຺ເມນ ວິຠຊິຕພ຺ພາ. ‘‘ຎຕ຺ວານ ອຸທຍພ຺ພຍ’’ນ຺ຕິ ປເທນ ວຸຕ຺ຕໍ ກຸສລປກ຺ຂອຸທຍພ຺ພຍຎາຓໍ ຘມ຺ມຊາຕໍ ປຎ຺ຎາສວິເຘນ ອຸທຍພ຺ພຍຎາເຓນ ກຸສລປກ຺ເຂນ ວິຠຊິຕພ຺ພໍ. ‘‘ຖິນມິທ຺ຘາຠິຠູ’’ຕິ ປເທນ ວຸຕ຺ຕໍ ຖິນມິທ຺ຘາຠິຠວນໍ ກຸສລປກ຺ຂໍ ຘມ຺ມຊາຕໍ ‘‘ໂສຕາປຕ຺ຕິມຄ຺ຄາຠິຠວນໍ ສກທາຄາມິມຄ຺ຄາຠິຠວນໍ ອນາຄາມິມຄ຺ຄາຠິຠວນໍ ອຣຫຕ຺ຕມຄ຺ຄາຠິຠວນ’’ນ຺ຕິ ຈຕຸພ຺ພິເຘນ ກຸສລປກ຺ເຂນ ວິຠຊິຕພ຺ພໍ.

ສຕິສໍວໂຣ ກຸສລປກ຺ໂຂ ‘‘ໂລກິໂຍ ສຕິສໍວໂຣ, ໂລກຸຕ຺ຕໂຣ ສຕິສໍວໂຣ’’ຕິ ທຸພ຺ພິເຘນ ວິຠຊິຕພ຺ໂພຕິ. ໂລກິໂຍ ສຕິສໍວໂຣ ກາມາວຈໂຣວາຕິ ເອກວິເຘນ ວິຠຊິຕພ຺ໂພ. ໂລກຸຕ຺ຕຣາ ສຕິສໍວໂຣ ‘‘ທສ຺ສນຠູມິ, ຠາວນາຠູມີ’’ຕິ ທຸພ຺ພິເຘນ ວິຠຊິຕພ຺ໂພ. ກາມາວຈໂຣ ສຕິສໍວໂຣ ‘‘ກາຍານຸປສ຺ສນາສຕິສໍວໂຣ ເວທນານຸປສ຺ສນາສຕິສໍວໂຣ ຈິຕ຺ຕານຸປສ຺ສນາສຕິສໍວໂຣ ຘມ຺ມານຸປສ຺ສນາສຕິສໍວໂຣ’’ຕິ ຈຕຸພ຺ພິເຘນ ວິຠຊິຕພ຺ໂພ. ໂລກຸຕ຺ຕໂຣ ສຕິສໍວໂຣປິ ຕຖາ ຈຕຸພ຺ພິເຘນ ວິຠຊິຕພ຺ໂພ. ສມ຺ມາສງ຺ກປ຺ປສມ຺ມາທິຏ຺ຐິໂຍປິ ໂລກິຍໂລກຸຕ຺ຕຣວເສນ ທຸພ຺ພິຘາທິເຠເທນ ວິຠຊິຕພ຺ພາ. ປທຏ຺ຐາເນນປິ ປທຏ຺ຐານຫາຣສມ຺ປາເຕ ວຸຕ຺ຕນເຍນ ວິຠຊິຕພ຺ພາ.

ອກຸສລປກ຺ເຂນ ‘‘ອຣກ຺ຂິເຕນ ຈິຕ຺ເຕນາ’’ຕິ ປເທນ ວຸຕ຺ໂຕ ອສໍວໂຣ ‘‘ຈກ຺ຂຸອສໍວໂຣ …ເປ… ກາຍອສໍວໂຣ, ໂຈປນກາຍອສໍວໂຣ, ວາຈາອສໍວໂຣ, ມໂນອສໍວໂຣ’’ຕິ ອຏ຺ຐວິເຘນ ວິຠຊິຕພ຺ໂພ. ‘‘ມິຈ຺ຉາທິຏ຺ຐິຫເຕນາ’’ຕິ ປເທນ ຄຫິໂຕ ມິຈ຺ຉາສງ຺ກປ຺ໂປ ‘‘ກາມວິຕກ຺ໂກ ພ຺ຍາປາທວິຕກ຺ໂກ ວິຫິໍສາວິຕກ຺ໂກ’’ຕິ ຕິວິເຘນ ວິຠຊິຕພ຺ໂພ. ‘‘ມິຈ຺ຉາທິຏ຺ຐີ’’ຕິ ປເທນ ວຸຕ຺ຕາ ມິຈ຺ຉາທິຏ຺ຐິ ‘‘ທຸກ຺ເຂ ອຎ຺ຎາຓໍ…ເປ…ອິທປ຺ປຈ຺ຈຍຕາປຏິຈ຺ຈສມຸປ຺ປນ຺ເນສຸ ຘມ຺ເມສຸ ອຎ຺ຎາຓ’’ນ຺ຕິ ອຏ຺ຐວິເຘນ ວິຠຊິຕພ຺ພາ, ທ຺ວາສຏ຺ຐິທິຏ຺ຐິວິເຘນປິ ວິຠຊິຕພ຺ພາ. ຖິນມິທ຺ຘໍ ປຎ຺ຈວິເຘນ ສສງ຺ຂາຣິກວິເຘນ ວິຠຊິຕພ຺ພໍ.

‘‘ເອຕ຺ຕໂກວ ວິຠຕ຺ຕິຫາຣສມ຺ປາໂຕ ປຣິປຸຓ຺ໂຓ’’ຕິ ວຕ຺ຕພ຺ພຕ຺ຕາ ‘‘ນິຍຸຕ຺ໂຕ ວິຠຕ຺ຕິຫາຣສມ຺ປາໂຕ’’ຕິ ວຸຕ຺ຕໍ. ເຍນ ເຍນ ສໍວຓ຺ຓນາວິເສສຠູເຕນ ວິຠຕ຺ຕິຫາຣສມ຺ປາເຕນ ສຸຕ຺ຕປ຺ປເທສຕ຺ຖາ ວິຠຕ຺ຕາ, ໂສ ໂສ ສໍວຓ຺ຓນາວິເສສຠູໂຕ ວິຠຕ຺ຕິຫາຣສມ຺ປາໂຕ ນິຍຸຕ຺ໂຕຕິ ຍຖາຣຫ ນິທ຺ຘາເຣຕ຺ວາ ຍຸຊ຺ຊິຕພ຺ໂພຕິ ອຕ຺ໂຖ ຄເຫຕພ຺ໂພຕິ.

ອິຕິ ວິຠຕ຺ຕິຫາຣສມ຺ປາເຕ ສຕ຺ຕິພລານຸຣູປາ ຣຈິຕາ

ວິຠາວນາ ນິຏ຺ຐິຕາ.

ປຓ຺ຑິເຕຫິ ປນ…ເປ… ຄເຫຕພ຺ໂພຕິ.