໗. ອາວຏ຺ຏຫາຣສມ຺ປາຕວິຠາວນາ

໖໙. ເຍນ ເຍນ ຈຕຸພ຺ຍູຫຫາຣສມ຺ປາເຕນ ນິຣຸຕ຺ຍາຘິປ຺ປາຍນິທານປຸພ຺ພາປຣານຸສນ຺ຘໂຍ ວິຠຕ຺ຕາ, ໂສ ຈຕຸພ຺ຍູຫຫາຣສມ຺ປາໂຕ ປຣິປຸຓ຺ໂຓ, ‘‘ກຕໂມ ອາວຏ຺ຏຫາຣສມ຺ປາໂຕ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕໂມ ອາວຏ຺ໂຏ ຫາຣສມ຺ປາໂຕ’’ຕິອາທິ ວຸຕ຺ຕໍ. ຕຕ຺ຖ ກຕໂມ ສໍວຓ຺ຓນາວິເສໂສ ອາວຏ຺ຏຫາຣສມ຺ປາໂຕ ນາມາຕິ ປຸຈ຺ຉຕິ.

‘‘ກຕເມ ສຸຕ຺ຕຕ຺ຖາ ກຖໍ ອາວຏ຺ເຏຕພ຺ພາ’’ຕິ ປຸຈ຺ຉິຕພ຺ພຕ຺ຕາ ‘‘ຕສ຺ມາ’’ຕິອາທິ ວຸຕ຺ຕໍ. ເນກ຺ຂມ຺ມສງ຺ກປ຺ປສງ຺ຂາຕສມ຺ມາສງ຺ກປ຺ປພຫຸໂລ ກສິຓາທິວເສນ, ອວິຫິໍສາສງ຺ກປ຺ປສງ຺ຂາຕສມ຺ມາສງ຺ກປ຺ປພຫຸໂລ ເມຕ຺ຕາທິວເສນ ອຘິຄຕາຍ ຈິຕ຺ເຕກຄ຺ຄຕາຍ ຈິຕ຺ຕໍ ຐເປນ຺ໂຕ ສໍກິເລສໂຕ ຣກ຺ຂິຕຈິຕ຺ໂຕ ນາມ ໂຫຕິ, ‘‘ຕສ຺ມາ ຣກ຺ຂິຕຈິຕ຺ຕສ຺ສ, ສມ຺ມາສງ຺ກປ຺ປໂຄຈໂຣ’’ຕິ ອິມິນາ ຣກ຺ຂິຕຈິຕ຺ເຕ ວຸຕ຺ເຕ ສຕິ ຍາ ເອກຄ຺ຄຕາ ອາວຏ຺ເຏຕພ຺ພາ, ສາ ອຍໍ ເອກຄ຺ຄຕາ ສມໂຖ. ‘‘ສມ຺ມາທິຏ຺ຐິປຸເຣກ຺ຂາໂຣ’’ຕິ ອິມິນາ ສມ຺ມາທິຏ຺ຐິປຸເຣກ຺ຂາເຣ ວຸຕ຺ເຕ ສຕິ ຍາ ປຎ຺ຎາ ອາວຏ຺ເຏຕພ຺ພາ, ສາ ອຍໍ ປຎ຺ຎາ ວິປສ຺ສນາ. ‘‘ຎຕ຺ວານ ອຸທຍພ຺ພຍ’’ນ຺ຕິ ອິມິນາ ອຸທຍພ຺ພຍຎາຓສມນ຺ນາຄເຕ ວຸຕ຺ເຕ ສຕິ ຍາ ທຸກ຺ຂປຣິຊານນາ ອາວຏ຺ເຏຕພ຺ພາ, ສາ ອຍໍ ທຸກ຺ຂປຣິຊານນາ ທຸກ຺ຂປຣິຎ຺ຎາ. ‘‘ຖິນມິທ຺ຘາຠິຠູ ຠິກ຺ຂູ’’ຕິ ອິມິນາ ປຸຄ຺ຄລາຘິຏ຺ຐາເນນ ຍໍ ຖິນມິທ຺ຘາຠິຠວນໍ ວຸຕ຺ຕໍ, ອິທໍ ຖິນມິທ຺ຘາຠິຠວນໍ ສມຸທຍປ຺ປຫານໍ. ‘‘ສມ຺ມາ ທຸຄ຺ຄຕິໂຍ ຊເຫ’’ຕິ ອິມິນາ ໂຍ ສພ຺ພທຸຄ຺ຄຕິຊຫນສງ຺ຂາໂຕ ອນຸປ຺ປາໂທ ວຸຕ຺ໂຕ, ໂສ ອຍໍ ອນຸປ຺ປາໂທ ນິໂຣໂຘ. ອິຕິ ທຸກ຺ຂປຣິຎ຺ຎາຍ ປຣິຎ຺ເຎຕພ຺ພໍ ທຸກ຺ຂສຈ຺ຈໍ ອາວຏ຺ເຏຕພ຺ພໍ, ສມຸທຍປ຺ປຫາເນນ ປຫາຕພ຺ພໍ ສມຸທຍສຈ຺ຈໍ ອາວຏ຺ເຏຕພ຺ພໍ, ນິໂຣເຘນ ນິໂຣຘສຈ຺ຈໍ ອາວຏ຺ເຏຕພ຺ພໍ, ສມຖວິປສ຺ສນາຫິ ມຄ຺ຄສຈ຺ຈໍ ອາວຏ຺ເຏຕພ຺ພນ຺ຕິ ອິມານິ ຈຕ຺ຕາຣິ ສຈ຺ຈານິ ອາວຏ຺ເຏຕພ຺ພານີຕິ.

‘‘ເອຕ຺ຕໂກວ ອາວຏ຺ໂຏ ຫາຣສມ຺ປາໂຕ ປຣິປຸຓ຺ໂຓ’’ຕິ ວຕ຺ຕພ຺ພຕ຺ຕາ ‘‘ນິຍຸຕ຺ໂຕ ອາວຏ຺ໂຏ ຫາຣສມ຺ປາໂຕ’’ຕິ ວຸຕ຺ຕໍ. ເຍນ ເຍນ ສໍວຓ຺ຓນາວິເສສຠູເຕນ ອາວຏ຺ຏຫາຣສມ຺ປາເຕນ ສມຖາທໂຍ ອາວຏ຺ເຏຕພ຺ພາ, ໂສ ໂສ ສໍວຓ຺ຓນາວິເສສຠູໂຕ ອາວຏ຺ຏຫາຣສມ຺ປາໂຕ ນິຍຸຕ຺ໂຕ ຍຖາຣຫໍ ນິທ຺ຘາເຣຕ຺ວາ ຍຸຊ຺ຊິຕພ຺ໂພຕິ ອຕ຺ໂຖ ຄເຫຕພ຺ໂພຕິ.

ອິຕິ ອາວຏ຺ຏຫາຣສມ຺ປາເຕ ສຕ຺ຕິພລານຸຣູປາ ຣຈິຕາ

ວິຠາວນາ ນິຏ຺ຐິຕາ.

ປຓ຺ຑິເຕຫິ ປນ…ເປ… ຄເຫຕພ຺ໂພຕິ.