໖. ຈຕຸພ຺ຍູຫຫາຣສມ຺ປາຕວິຠາວນາ

໖໘. ເຍນ ເຍນ ລກ຺ຂຓຫາຣສມ຺ປາເຕນ ສຸຕ຺ຕປ຺ປເທສຕ຺ຖາ ສມານລກ຺ຂເຓນ ຄຫິຕາ, ໂສ ລກ຺ຂຓຫາຣສມ຺ປາໂຕ ປຣິປຸຓ຺ໂຓ, ‘‘ກຕໂມ ຈຕຸພ຺ຍູຫຫາຣສມ຺ປາໂຕ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕໂມ ຈຕຸພ຺ຍູໂຫ ຫາຣສມ຺ປາໂຕ’’ຕິອາທິ ວຸຕ຺ຕໍ. ຕຕ຺ຖ ເຕສຸ ເທສນາຫາຣສມ຺ປາຕາທີສຸ ໂສຬສສຸ ຫາຣສມ຺ປາເຕສຸ ກຕໂມ ສໍວຓ຺ຓນາວິເສໂສ ຈຕຸພ຺ຍູຫຫາຣສມ຺ປາໂຕ ນາມາຕິ ປຸຈ຺ຉຕິ.

‘‘ກຕມສ຺ມິໍ ສຸຕ຺ເຕ ກຕເມ ນິຣຸຕ຺ຍາຘິປ຺ປາຍນິທານປຸພ຺ພາປຣານຸສນ຺ຘໂຍ ນິທ຺ຘາຣິຕາ’’ຕິ ປຸຈ຺ຉິຕພ຺ພຕ຺ຕາ ‘‘ຕສ຺ມາ’’ຕິອາທິ ວຸຕ຺ຕໍ. ‘‘ຕສ຺ມາ ຣກ຺ຂິຕຈິຕ຺ຕສ຺ສາ’’ຕິ ສຸຕ຺ຕປ຺ປເທເສ ‘‘ຣກ຺ຂີຍເຕ ຣກ຺ຂິຕ’’ນ຺ຕິ ນິຣຸຕ຺ຕິໍ ‘‘ປຣິປາລີຍຕີ’’ຕິ ອິມິນາ ປຣິຍາເຍນ ທສ຺ເສຕິ, ອິຕິສທ຺ທສ຺ສ ອາທ຺ຍຕ຺ຖຕ຺ຕາ ‘‘ຈິນ຺ເຕຕີຕິ ຈິຕ຺ຕໍ, ອຕ຺ຕໂນ ສນ຺ຕານໍ ຈິໂນຕີຕິ ຈິຕ຺ຕໍ, ປຈ຺ຈເຍຫິ ຈິຕນ຺ຕິ ຈິຕ຺ຕໍ, ຈິຕ຺ຕວິຈິຕ຺ຕຏ຺ເຐນ ຈິຕ຺ຕໍ, ຈິຕ຺ຕກຣຓຏ຺ເຐນ ຈິຕ຺ຕໍ, ຣກ຺ຂິຕໍ ຈິຕ຺ຕໍ ຍສ຺ສາຕິ ຣກ຺ຂິຕຈິຕ຺ໂຕ. ສມ຺ມາ ສງ຺ກປ຺ເປຕີຕິ ສມ຺ມາສງ຺ກປ຺ໂປ, ຄາໂວ ຈຣນ຺ຕິ ເອຕ຺ຖາຕິ ໂຄຈໂຣ, ໂຄຈໂຣ ວິຍາຕິ ໂຄຈໂຣ, ສມ຺ມາສງ຺ກປ຺ໂປ ໂຄຈໂຣ ອສ຺ສາຕິ ສມ຺ມາສງ຺ກປ຺ປໂຄຈໂຣ. ສມ຺ມາ ປສ຺ສຕີຕິ ສມ຺ມາທິຏ຺ຐິ, ສມ຺ມາທິຏ຺ຐິ ປຸເຣກ຺ຂາໂຣ ອສ຺ສາຕິ ສມ຺ມາທິຏ຺ຐິປຸເຣກ຺ຂາໂຣ. ຊານາຕີຕິ ຎຕ຺ວານ. ອຸທໂຍ ຈ ວໂຍ ຈ ອຸທຍພ຺ພຍໍ. ຖິນຎ຺ຈ ມິທ຺ຘຎ຺ຈ ຖິນມິທ຺ຘໍ, ອຠິຠວຕີຕິ ອຠິຠູ, ຖິນມິທ຺ຘໍ ອຠິຠູຕິ ຖິນມິທ຺ຘາຠິຠູ. ຠິກ຺ຂຕີຕິ ຠິກ຺ຂູ’’ຕິ ນິຣຸຕ຺ຕິປິ ນີຫຣິຕາ. ເຕນາຫ – ‘‘ອິຕິ-ສທ຺ໂທ ອາທ຺ຍຕ຺ໂຖ’’ຕິ (ເນຕ຺ຕິ. ອຏ຺ຐ. ໖໘). ເອສາ ວຸຕ຺ຕປ຺ປກາຣາ ປຎ຺ຎຕ຺ຕິ ນິຣຸຕ຺ຕິ ນາມາຕິ ນີຫຣິຕາ.

ອິຘ ສຸຕ຺ຕປ຺ປເທເສ ຠຄວໂຕ ໂກ ອຘິປ຺ປາໂຍຕິ ເຈ ປຸຈ຺ເຉຍ຺ຍ, ເຍ ສປ຺ປຸຣິສາ ສພ຺ພາຫິ ທຸຄ຺ຄຕີຫິ ປຣິມຸຈ຺ຈິຕຸກາມາ ຠວິສ຺ສນ຺ຕິ, ເຕ ສປ຺ປຸຣິສາ ຘມ຺ມຈາຣິໂນ ຣກ຺ຂິຕຈິຕ຺ຕາ ຠວິສ຺ສນ຺ຕີຕິ ອຍໍ ອຘິປ຺ປາໂຍ. ເອຕ຺ຖ ‘‘ຕສ຺ມາ ຣກ຺ຂິຕຈິຕ຺ຕສ຺ສາ’’ຕິອາທິສຸຕ຺ຕປ຺ປເທເສ ຠຄວໂຕ ອຘິປ຺ປາໂຍຕິ ນີຫຣິຕພ຺ໂພ.

‘‘ກຕມໍ ນິທານ’’ນ຺ຕິ ເຈ ປຸຈ຺ເຉຍ຺ຍ, ໂກກາລິໂກ ສາຣິປຸຕ຺ຕໂມຄ຺ຄລ຺ລາເນສຸ ເຖເຣສຸ ຈິຕ຺ຕໍ ອຣກ຺ຂິຕ຺ວາ ປໂທສຍິຕ຺ວາ ມຫາປທຸມນິຣເຍ ຍສ຺ມາ ອຸປປນ຺ໂນ, ຍສ຺ມາ ຠຄວາ ຈ ສຕິອາຣກ຺ເຂນ ສມນ຺ນາຄໂຕ ສພ຺ພາ ທຸຄ຺ຄຕິໂຍ ຊຫຕິ, ຕສ຺ມາ ຈ ສພ຺ພາ ທຸຄ຺ຄຕິໂຍ ຊຫິຕຸກາໂມ ຠິກ຺ຂຸ ສປ຺ປຸຣິໂສ ຣກ຺ຂິຕຈິຕ຺ໂຕ ອສ຺ສ ຠເວຍ຺ຍາຕິ ນິທານໍ ນີຫຣິຕພ຺ພໍ.

‘‘ກຕໂມ ປຸພ຺ພາປຣສນ຺ຘີ’’ຕິ ເຈ ປຸຈ຺ເຉຍ຺ຍ, ສຸຕ຺ຕມ຺ຫິ ‘‘ສຕິຍາ ຈິຕ຺ຕໍ ຣກ຺ຂິຕພ຺ພ’’ນ຺ຕິ ຍໍ ວຈນໍ ວຸຕ຺ຕໍ, ເຕນ ປຸພ຺ພວຈເນນ ອຍໍ ‘‘ຕສ຺ມາ ຣກ຺ຂິຕຈິຕ຺ຕສ຺ສ…ເປ… ສພ຺ພາ ທຸຄ຺ຄຕິໂຍ ຊເຫ’’ຕິ ສຸຕ຺ຕປ຺ປເທໂສ ອນຸສນ຺ຘິ ສໍສນ຺ທຕິ ສເມຕີຕິ ປຸພ຺ພປຣານຸສນ຺ຘິ ນິທ຺ຘາຣິຕພ຺ໂພຕິ.

‘‘ເອຕ຺ຕໂກວ ຈຕຸພ຺ຍູຫຫາຣສມ຺ປາໂຕ ປຣິປຸຓ຺ໂຓ’’ຕິ ວຕ຺ຕພ຺ພຕ຺ຕາ ‘‘ນິຍຸຕ຺ໂຕ ຈຕຸພ຺ຍູໂຫ ຫາຣສມ຺ປາໂຕ’’ຕິ ວຸຕ຺ຕໍ. ເຍນ ເຍນ ສໍວຓ຺ຓນາວິເສສຠູເຕນ ຈຕຸພ຺ຍູຫຫາຣສມ຺ປາເຕນ ນິຣຸຕ຺ຍາຘິປ຺ປາຍນິທານປຸພ຺ພາປຣານຸສນ຺ຘິ ນິທ຺ຘາຣິຕພ຺ໂພ, ໂສ ໂສ ສໍວຓ຺ຓນາວິເສສຠູໂຕ ຈຕຸພ຺ຍູຫຫາຣສມ຺ປາໂຕ ນິຍຸຕ຺ໂຕ ຍຖາຣຫໍ ນິທ຺ຘາເຣຕ຺ວາ ຍຸຊ຺ຊິຕພ຺ໂພຕິ ອຕ຺ໂຖ ຄເຫຕພ຺ໂພຕິ.

ອິຕິ ຈຕຸພ຺ຍູຫຫາຣສມ຺ປາເຕ ສຕ຺ຕິພລານຸຣູປາ ຣຈິຕາ

ວິຠາວນາ ນິຏ຺ຐິຕາ.

ປຓ຺ຑິເຕຫິ ປນ…ເປ… ຄເຫຕພ຺ໂພຕິ.