໓. ຍຸຕ຺ຕິຫາຣສມ຺ປາຕວິຠາວນາ

໖໕. ເຍນ ເຍນ ວິຈຍຫາຣສມ຺ປາເຕນ ສຸຕ຺ຕປ຺ປເທສຕ຺ຖາ ອາຈຣິເຍນ ວິຈຍິຕພ຺ພາ, ອມ຺ເຫຫິ ຈ ຎາຕາ, ໂສ ວິຈຍຫາຣສມ຺ປາໂຕ ປຣິປຸຓ຺ໂຓ, ‘‘ກຕໂມ ຍຸຕ຺ຕິຫາຣສມ຺ປາໂຕ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕໂມ ຍຸຕ຺ຕິຫາຣສມ຺ປາໂຕ’’ຕິອາທິ ວຸຕ຺ຕໍ. ອຏ຺ຐກຖາຍໍ ປນ – ‘‘ເອວໍ ນານານເຍຫິ ວິຈຍຫາຣສມ຺ປາຕໍ ວິຕ຺ຖາເຣຕ຺ວາ ອິທານິ ຍຸຕ຺ຕິຫາຣສມ຺ປາຕາທີນິ ທສ຺ເສຕຸໍ ‘ຕຕ຺ຖ ກຕໂມ ຍຸຕ຺ຕິຫາຣສມ຺ປາໂຕ’ຕິອາທິ ອາຣທ຺ຘ’’ນ຺ຕິ (ເນຕ຺ຕິ. ອຏ຺ຐ. ໖໕) ວຸຕ຺ຕໍ. ຕຕ຺ຖາຕິ ເຕສຸ ເທສນາຫາຣສມ຺ປາຕາທີສຸ ໂສຬສສຸ ຫາຣສມ຺ປາເຕສຸ ກຕໂມ ສໍວຓ຺ຓນາວິເສໂສ ຍຸຕ຺ຕິຫາຣສມ຺ປາໂຕ ນາມາຕິ ປຸຈ຺ຉຕິ, ປຸຈ຺ຉິຕ຺ວາ ຍສ຺ມິໍ ສຸຕ຺ຕປ຺ປເທເສ ວຸຕ຺ຕານໍ ອຕ຺ຖານໍ ຍຸຕ຺ຕິຠາໂວ ວິຈາເຣຕພ຺ໂພ, ຕໍ ສຸຕ຺ຕປ຺ປເທສໍ ນີຫຣິຕຸໍ –

‘‘ຕສ຺ມາ ຣກ຺ຂິຕຈິຕ຺ຕສ຺ສ, ສມ຺ມາສງ຺ກປ຺ປໂຄຈໂຣ;

ສມ຺ມາທິຏ຺ຐິປຸເຣກ຺ຂາໂຣ, ຎຕ຺ວານ ອຸທຍພ຺ພຍໍ;

ຖິນມິທ຺ຘາຠິຠູ ຠິກ຺ຂຸ, ສພ຺ພາ ທຸຄ຺ຄຕິໂຍ ຊເຫ’’ຕິ. (ອຸທາ. ໓໒; ເນຕ຺ຕິ. ໓໑, ໗໘) –

ວຸຕ຺ຕໍ. ຕສ຺ສໍ ຄາຖາຍໍ ຕສ຺ມາ ອຣກ຺ຂິຕຈິຕ຺ຕສ຺ສ ມາຣວສານຸຄຕຕ຺ຕາ ສຕິສໍວຣອິນ຺ທ຺ຣິຍສໍວຣາທິວເສນ ຠິກ຺ຂຸ ຣກ຺ຂິຕຈິຕ຺ໂຕ ອສ຺ສ ຠເວຍ຺ຍ, ຕສ຺ມາ ກາມວິຕກ຺ກາທິມິຈ຺ຉາສງ຺ກປ຺ປໂຄຈຣສ຺ສ ມາຣວສານຸຄຕຕ຺ຕາ ເນກ຺ຂມ຺ມສງ຺ກປ຺ປາທິວເສນ ຠິກ຺ຂຸ ສມ຺ມາສງ຺ກປ຺ປໂຄຈໂຣ ອສ຺ສ ຠເວຍ຺ຍ, ຕສ຺ມາ ມິຈ຺ຉາທິຏ຺ຐິຫຕຈິຕ຺ຕສ຺ສ ມາຣວສານຸຄຕຕ຺ຕາ ໂຍນິໂສມນສິກາເຣນ ຠິກ຺ຂຸ ອຸທຍພ຺ພຍໍ ຎຕ຺ວານ ສມ຺ມາທິຏ຺ຐິປຸເຣກ຺ຂາໂຣ ອສ຺ສ ຠເວຍ຺ຍ, ຕສ຺ມາ ຖິນມິທ຺ເຘນ ຫຕຈິຕ຺ຕສ຺ສ ມາຣວສານຸຄຕຕ຺ຕາ ວີຣິຍວເສນ ຠິກ຺ຂຸ ຖິນມິທ຺ຘາຠິຠູ ອສ຺ສ ຠເວຍ຺ຍ, ຕາທິໂສ ຠິກ຺ຂຸ ສພ຺ພາ ທຸຄ຺ຄຕິໂຍ ຊເຫ ຊຫິສ຺ສຕີຕິ ອຕ຺ໂຖ ເວທິຕພ຺ໂພ.

‘‘ຕສ຺ສໍ ຄາຖາຍໍ ກຖໍ ຍຸຕ຺ຕິຠາໂວ ວິຈາເຣຕພ຺ໂພ’’ຕິ ວຕ຺ຕພ຺ພຕ຺ຕາ ‘‘ຕສ຺ມາ ຣກ຺ຂິຕຈິຕ຺ຕສ຺ສາ’’ຕິອາທິ ວຸຕ຺ຕໍ. ຣກ຺ຂິຕຈິຕ຺ຕສ຺ສ ສມ຺ມາສງ຺ກປ຺ປໂຄຈໂຣ ຠວິສ຺ສຕີຕິ ອຕ຺ໂຖ ຍຸຊ຺ຊຕິ ເອວ, ໂນ ນ ຍຸຊ຺ຊຕິ. ມິຈ຺ຉາສງ຺ກປ຺ປານມ຺ປິ ຊຫິຕຕ຺ຕາ ສມ຺ມາທິຏ຺ຐິປຸເຣກ຺ຂາໂຣ ຫຸຕ຺ວາ ວິຫຣນ຺ໂຕ ອຸທຍພ຺ພຍໍ ປຏິວິຊ຺ຌິສ຺ສຕີຕິ ອຕ຺ໂຖ ຍຸຊ຺ຊຕິ ສມ຺ມາທິຏ຺ຐິປຸເຣກ຺ຂາຣສ຺ສ ອຸທຍພ຺ພຍານຸປສ຺ສນາສມ຺ຠວໂຕ. ອຸທຍພ຺ພຍໍ ປຏິວິຊ຺ຌນ຺ໂຕ ສພ຺ພາ ທຸຄ຺ຄຕິໂຍ ຊຫິສ຺ສຕີຕິ ອຕ຺ໂຖ ຍຸຊ຺ຊຕິ ອຸທຍພ຺ພຍານຸປສ຺ສນານຸກ຺ກເມນ ອຣິຍມຄ຺ຄສມ຺ຠວໂຕ. ສພ຺ພາ ທຸຄ຺ຄຕິໂຍ ຊຫນ຺ໂຕ ສພ຺ພານິ ທຸຄ຺ຄຕິວິນິປາຕຠຍານິ ສມຕິກ຺ກມິສ຺ສຕີຕິ ອຕ຺ໂຖ ຍຸຊ຺ຊຕິ ສພ຺ເພສໍ ທຸຄ຺ຄຕິວິນິປາຕຠຍານໍ ອນຸປ຺ປຊ຺ຊນໂຕ.

‘‘ເອຕ຺ຕໂກວ ຍຸຕ຺ຕິຫາຣສມ຺ປາໂຕ ປຣິປຸຓ຺ໂຓ’’ຕິ ວຕ຺ຕພ຺ພຕ຺ຕາ ‘‘ນິຍຸຕ຺ໂຕ ຍຸຕ຺ຕິຫາຣສມ຺ປາໂຕ’’ຕິ ວຸຕ຺ຕໍ. ເຍນ ເຍນ ສໍວຓ຺ຓນາວິເສສຠູເຕນ ຍຸຕ຺ຕິຫາຣສມ຺ປາເຕນ ສຸຕ຺ຕປ຺ປເທສຕ຺ຖານໍ ຍຸຕ຺ຕິຠາໂວ ວິຈາເຣຕພ຺ໂພ, ໂສ ໂສ ສໍວຓ຺ຓນາວິເສສຠູໂຕ ຍຸຕ຺ຕິຫາຣສມ຺ປາໂຕ ນິຍຸຕ຺ໂຕ ຍຖາຣຫໍ ນິທ຺ຘາເຣຕ຺ວາ ຍຸຊ຺ຊິຕພ຺ໂພຕິ ອຕ຺ໂຖ ຄເຫຕພ຺ໂພຕິ.

ອິຕິ ຍຸຕ຺ຕິຫາຣສມ຺ປາເຕ ສຕ຺ຕິພລານຸຣູປາ ຣຈິຕາ

ວິຠາວນາ ນິຏ຺ຐິຕາ.

ປຓ຺ຑິເຕຫິ ປນ…ເປ… ຄເຫຕພ຺ໂພຕິ.