໔. ປທຏ຺ຐານຫາຣສມ຺ປາຕວິຠາວນາ

໖໖. ເຍນ ເຍນ ຍຸຕ຺ຕິຫາຣສມ຺ປາເຕນ ສຸຕ຺ຕປ຺ປເທສຕ຺ຖານໍ ຍຸຕ຺ຕິຠາໂວ ອາຈຣິເຍນ ວິຠາວິໂຕ, ອມ຺ເຫຫິ ຈ ຎາໂຕ, ໂສ ຍຸຕ຺ຕິຫາຣສມ຺ປາໂຕ ປຣິປຸຓ຺ໂຓ, ‘‘ກຕໂມ ປທຏ຺ຐານຫາຣສມ຺ປາໂຕ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕໂມ ປທຏ຺ຐາໂນ ຫາຣສມ຺ປາໂຕ’’ຕິ ປຸຈ຺ຉຕິ.

ປຸຈ຺ຉິຕ຺ວາ ຍສ຺ມິໍ ສຸຕ຺ຕປ຺ປເທເສ ວຸຕ຺ຕານິ ປທຏ຺ຐານານິ ນີຫຣິຕານິ, ຕໍ ສຸຕ຺ຕປ຺ປເທສໍ ນີຫຣິຕຸໍ ‘‘ຕສ຺ມາ ຣກ຺ຂິຕຈິຕ຺ຕສ຺ສ, ສມ຺ມາສງ຺ກປ຺ປໂຄຈໂຣຕິ ຄາຖາ’’ຕິ ວຸຕ຺ຕາ. ຄາຖາຕ຺ໂຖ ວຸຕ຺ໂຕວ. ‘‘ກຕເມ ຄາຖາຕ຺ຖາ ກຕເມສໍ ຘມ຺ມານໍ ປທຏ຺ຐານານີ’’ຕິ ປຸຈ຺ຉິຕພ຺ພຕ຺ຕາ ‘‘ຕສ຺ມາ ຣກ຺ຂິຕຈິຕ຺ຕສ຺ສາ’’ຕິອາທິ ວຸຕ຺ຕໍ. ‘‘ຕສ຺ມາ ຣກ຺ຂິຕຈິຕ຺ຕສ຺ສາ’’ຕິ ສຸຕ຺ຕປ຺ປເທສສ຺ສ ອຕ຺ຖຠູຕາ ອິນ຺ທ຺ຣິເຍສຸ ຄຸຕ຺ຕທ຺ວາຣຕາ ຕິຓ຺ຓໍ ສຸຈຣິຕານໍ ປທຏ຺ຐານໍ ນາມ ສຸຈຣິຕປາຣິປູຣິຍາ ອາສນ຺ນກາຣຓຕ຺ຕາ. ‘‘ສມ຺ມາສງ຺ກປ຺ປໂຄຈໂຣ’’ຕິ ສຸຕ຺ຕປ຺ປເທສສ຺ສ ອຕ຺ຖຠູຕາ ເນກ຺ຂມ຺ມສງ຺ກປ຺ປາທໂຍ ສມ຺ມາສງ຺ກປ຺ປາ ສມຖສ຺ສ ປທຏ຺ຐານໍ ນາມ ກາມຈ຺ຉນ຺ທອາທິນີວຣຓວິກ຺ຂມ຺ຠນສ຺ສ ອາສນ຺ນກາຣຓຕ຺ຕາ. ‘‘ສມ຺ມາທິຏ຺ຐິປຸເຣກ຺ຂາໂຣ’’ຕິ ສຸຕ຺ຕປ຺ປເທສສ຺ສ ອຕ຺ຖຠູຕາ ກມ຺ມສ຺ສກຕາສມ຺ມາທິຏ຺ຐິ ຈ ສປ຺ປຈ຺ຈຍນາມຣູປທສ຺ສນສມ຺ມາທິຏ຺ຐິ ຈ ວິປສ຺ສນາຍ ປທຏ຺ຐານໍ ນາມ ອນິຈ຺ຈານຸປສ຺ສນາທີນໍ ວິເສສກາຣຓຕ຺ຕາ. ‘‘ຎຕ຺ວານ ອຸທຍພ຺ພຍ’’ນ຺ຕິ ສຸຕ຺ຕປ຺ປເທສສ຺ສ ອຕ຺ຖຠູຕາ ອຸທຍພ຺ພຍານຸປສ຺ສນາປຎ຺ຎາ ທສ຺ສນຠູມິຍາ ປທຏ຺ຐານໍ ນາມ ປຐມມຄ຺ຄາຘິຄມສ຺ສ ອາສນ຺ນກາຣຓຕ຺ຕາ. ‘‘ຖິນມິທ຺ຘາຠິຠູ ຠິກ຺ຂູ’’ຕິ ສຸຕ຺ຕປ຺ປເທສສ຺ສ ອຕ຺ຖຠູຕໍ ຖິນມິທ຺ຘາຠິຠວນໍ ວີຣິຍສ຺ສ ປທຏ຺ຐານໍ ນາມ ອາສນ຺ນກາຣຓຕ຺ຕາ. ‘‘ສພ຺ພາ ທຸຄ຺ຄຕິໂຍ ຊເຫ’’ຕິ ສຸຕ຺ຕປ຺ປເທສສ຺ສ ອຕ຺ຖຠູຕາ ປຫາຕພ຺ພຊຫນຠາວນາຍ ອຣິຍມຄ຺ຄຠາວນາຍ ປທຏ຺ຐານໍ ນາມ ປຫາຕພ຺ພປ຺ປຫາເນນ ອຣິຍມຄ຺ຄຠາວນາປາຣິປູຣິສມ຺ຠວໂຕ.

‘‘ເອຕ຺ຕໂກວ ປທຏ຺ຐານຫາຣສມ຺ປາໂຕ ປຣິປຸຓ຺ໂຓ’’ຕິ ວຕ຺ຕພ຺ພຕ຺ຕາ ‘‘ນິຍຸຕ຺ໂຕ ປທຏ຺ຐາໂນ ຫາຣສມ຺ປາໂຕ’’ຕິ ວຸຕ຺ຕໍ. ເຍນ ເຍນ ສໍວຓ຺ຓນາວິເສສຠູເຕນ ປທຏ຺ຐານຫາຣສມ຺ປາຕຠູເຕນ ສຸຕ຺ຕປ຺ປເທສຕ຺ຖານິ ປທຏ຺ຐານານິ ນີຫຣິຕານິ, ໂສ ໂສ ສໍວຓ຺ຓນາວິເສສຠູໂຕ ປທຏ຺ຐານຫາຣສມ຺ປາໂຕ ນິຍຸຕ຺ໂຕ ຍຖາຣຫໍ ນິທ຺ຘາເຣຕ຺ວາ ຍຸຊ຺ຊິຕພ຺ໂພຕິ ອຕ຺ໂຖ ຄເຫຕພ຺ໂພຕິ.

ອິຕິ ປທຏ຺ຐານຫາຣສມ຺ປາເຕ ສຕ຺ຕິພລານຸຣູປາ ຣຈິຕາ

ວິຠາວນາ ນິຏ຺ຐິຕາ.

ປຓ຺ຑິເຕຫິ ປນ…ເປ… ຄເຫຕພ຺ໂພຕິ.