໑໖. ສມາໂຣປນຫາຣວິຠງ຺ຄວິຠາວນາ

໕໐. ເຍນ ເຍນ ສໍວຓ຺ຓນາວິເສສຠູເຕນ ປຣິກ຺ຂາຣຫາຣວິຠງ຺ເຄນ ສຸຕ຺ຕຕ຺ຖານໍ ເຫຕຸປຈ຺ຈໂຍ ວິຠຕ຺ໂຕ, ໂສ…ເປ… ວິຠງ຺ໂຄ ປຣິປຸຓ຺ໂຓ, ‘‘ກຕໂມ ສມາໂຣປນຫາຣວິຠງ຺ໂຄ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕໂມ ສມາໂຣປໂນ ຫາໂຣ’’ຕິອາທິ ວຸຕ຺ຕໍ. ຕຕ຺ຖ ເຕສຸ ນິທ຺ທິຏ຺ເຐສຸ ໂສຬສສຸ ເທສນາຫາຣາທີສຸ ກຕໂມ ສໍວຓ຺ຓນາວິເສໂສ ສມາໂຣປໂນ ຫາໂຣ ສມາໂຣປນຫາຣວິຠງ຺ໂຄ ນາມາຕິ ປຸຈ຺ຉຕິ. ‘‘ເຍ ຘມ຺ມາ ຍໍມູລາ’’ຕິອາທິນິທ຺ເທສສ຺ສ ອິທານິ ມຍາ ວຸຈ຺ຈມາໂນ ‘‘ເອກສ຺ມິໍ ປທຏ຺ຐາເນ ຍຕ຺ຕການິ ປທຏ຺ຐານານິ ໂອຕຣນ຺ຕີ’’ຕິອາທິໂກ ວິຕ຺ຖາຣສໍວຓ຺ຓນາວິເສໂສ ສມາໂຣປນຫາຣວິຠງ຺ໂຄ ນາມ.

‘‘ກິຕ຺ຕເກ ປທຏ຺ຐາເນ ສຸຕ຺ເຕ ວຸຕ຺ເຕ ກິຕ຺ຕການິ ປທຏ຺ຐານານິ ສມາໂຣປຍິຕພ຺ພານີ’’ຕິ ປຸຈ຺ຉິຕພ຺ພຕ຺ຕາ ‘‘ເອກສ຺ມິໍ ປທຏ຺ຐາເນ’’ຕິອາທິ ວຸຕ຺ຕໍ. ເອກສ຺ມິໍ ປທຏ຺ຐາເນ ສຸຕ຺ເຕ ວຸຕ຺ເຕ ສຕິ ອວຸຕ຺ຕານິ ຍຕ຺ຕການິ ປທຏ຺ຐານານິ ໂອຕຣນ຺ຕິ ສໂມສຣນ຺ຕິ, ສພ຺ພານິ ຕານິ ອວຸຕ຺ຕານິ ປທຏ຺ຐານານິ ສຸຕ຺ເຕ ວຸຕ຺ຕານິ ວິຍ ນິທ຺ຘາຣຓວເສນ ອາເນຕ຺ວາ ເທສນາຍ ອາໂຣປຍິຕພ຺ພານິ. ‘‘ການິ ວິຍ ສມາໂຣປຍິຕພ຺ພານີ’’ຕິ ວຕ຺ຕພ຺ພຕ຺ຕາ ‘‘ຍຖາ ອາວຏ຺ເຏ’’ຕິອາທິ ວຸຕ຺ຕໍ. ອາວຏ຺ເຏ ຫາເຣ ເອກສ຺ມິໍ ປທຏ຺ຐາເນ ສຸຕ຺ເຕ ວຸຕ຺ເຕ ສຕິ ສຸຕ຺ເຕ ອວຸຕ຺ຕານິ ພຫຸການິ ປທຏ຺ຐານານິ ໂອຕຣນ຺ຕິ, ຕານິ ພຫຸການິ ປທຏ຺ຐານານິ ປຣິເຍສິຕພ຺ພານິ ຍຖາ, ເອວໍ ສມາໂຣປເນ ຫາເຣປິ ພຫຸການິ ປທຏ຺ຐານານິ ເທສນາຍ ສມາໂຣປຍິຕພ຺ພານີຕິ ອຕ຺ໂຖ.

‘‘ເກວລໍ ປນ ປທຏ຺ຐານວເສເນວ ສມາໂຣປນາ ກາຕພ຺ພາ ກິໍ, ອຸທາຫຸ ອຎ຺ຎວເສນາປິ ສມາໂຣປນາ ກາຕພ຺ພາ ກິ’’ນ຺ຕິ ວຕ຺ຕພ຺ພຕ຺ຕາ ອຎ຺ຎວເສນາປິ ສມາໂຣປນາ ກາຕພ຺ພາ; ຕສ຺ມາ ສມາໂຣປນາ ຈຕຸພ຺ພິຘາ ກາຕພ຺ພາຕິ ທສ຺ເສນ຺ໂຕ ‘‘ຕຕ຺ຖ ສມາໂຣປນາ ຈຕຸພ຺ພິຘາ’’ຕິອາທິມາຫ. ຕຕ຺ຖ ຕຕ຺ຖາຕິ ຕາສຸ ສມາໂຣປຍິຕພ຺ພສມາໂຣປນາສຸ ປທຏ຺ຐານໍ ປທຏ຺ຐານສມາໂຣປນາ, ເວວຈນໍ ເວວຈນສມາໂຣປນາ, ຠາວນາ ຠາວນາສມາໂຣປນາ, ປຫານໍ ປຫານສມາໂຣປນາ, ອິຕິ ອິມິນາ ປເຠເທນ ສມາໂຣປນາ ຈຕຸພ຺ພິຘາ ກາຕພ຺ພາ.

‘‘ຕາສຸ ຈຕຸພ຺ພິຘາສຸ ສມາໂຣປນາສຸ ກຕມາ ປທຏ຺ຐານສມາໂຣປນາ’’ຕິ ປຸຈ຺ຉິຕພ຺ພຕ຺ຕາ ຕຖາ ປຸຈ຺ຉິຕ຺ວາ ປທຏ຺ຐານສມາໂຣປນໍ ທສ຺ເສຕຸໍ ‘‘ຕຕ຺ຖ ກຕມາ’’ຕິອາທິ ວຸຕ຺ຕໍ. ສຸຕ຺ເຕ ວຸຕ຺ເຕນ ປທຏ຺ຐາເນນ ສຸຕ຺ເຕ ອວຸຕ຺ຕານໍ ປທຏ຺ຐານານໍ ສມາໂຣປນາ ກຕມາຕິ ປຸຈ຺ຉຕິ.

ສພ຺ພປາປສ຺ສ ອກຸສລສ຺ສ ຍໍ ອກຣຓໍ ອກຣຓເຫຕຸ ສາສນໍ ອຕ຺ຖິ, ເອຕໍ ສາສນໍ ພຸທ຺ຘານໍ ສາສນໍ ໂອວາໂທ ໂຫຕິ, ອຖ ວາ ອກຣຓໍ ອກຣຓຕ຺ຖາຍ ຍໍ ສາສນໍ ອຕ຺ຖິ, ເອຕໍ ພຸທ຺ຘານໍ ສາສນໍ ໂອວາໂທ ໂຫຕິ, ນ ຍສ຺ສ ກສ຺ສຈິ ສາສນນ຺ຕິ ອຕ຺ໂຖ. ອກຣຓນ຺ຕິ ຫິ ສມ຺ປທານຕ຺ເຖ ປວຕ຺ຕໍ ປຈ຺ຈຕ຺ຕວຈນໍ ຍຖາ ‘‘ກິສ຺ສ ອຕ຺ຖາຍ ກິມຕ຺ຖ’’ນ຺ຕິ. ກຸສລສ຺ສ ສມ຺ປທາ ສມ຺ປທາຍ ຍໍ ສາສນໍ ອຕ຺ຖິ, ເອຕໍ ພຸທ຺ຘານໍ ສາສນໍ. ສຈິຕ຺ຕປຣິໂຍທາປນໍ ສຈິຕ຺ຕປຣິໂຍທາປນຕ຺ຖໍ ຍໍ ສາສນໍ ອຕ຺ຖິ, ເອຕໍ ພຸທ຺ຘານໍ ສາສນໍ ໂຫຕິ.

ອິຕິ ເອວໍປກາເຣນ ວຸຕ຺ຕສ຺ສ ຕສ຺ສ ສາສນສ຺ສ ກິໍ ປທຏ຺ຐານນ຺ຕິ ວິເສສສ຺ສ ວິເສສປທຏ຺ຐານໍ ປຸນ ປຸຈ຺ຉຕິ. ອິທໍ ສຸຈຣິຕຕ຺ຕຍໍ ສາສນສ຺ສ ໂອວາທສ຺ສ ປທຏ຺ຐານໍ ສຸຈຣິຕຕ຺ຕເຍນ ເຫຕຸນາ ສາສນຕ຺ຕາຕິ ທຏ຺ຐພ຺ພໍ ຍຖາ ‘‘ອນ຺ເນນ ວສຕີ’’ຕິອາທິ. ‘‘ສຸຈຣິຕຕ຺ຕເຍ ປທຏ຺ຐາເນ ວຸຕ຺ເຕ ກຕມໍ ປທຏ຺ຐານໍ ສມາໂຣປຍິຕພ຺ພ’’ນ຺ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ຍໍ ກາຍິກຎ຺ຈາ’’ຕິອາທິ ວຸຕ຺ຕໍ. ອິທໍ ຂນ຺ຘຕ຺ຕຍໍ ສາສນສ຺ສ ປທຏ຺ຐານໍ ສມາໂຣປຍິຕພ຺ພໍ, ‘‘ຂນ຺ຘຕ຺ຕເຍ ປທຏ຺ຐາເນ ສມາໂຣປຍິເຕ ກຕມໍ ສມາໂຣປຍິຕພ຺ພ’’ນ຺ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ສີລກ຺ຂນ຺ໂຘ ຈາ’’ຕິອາທິ ວຸຕ຺ຕໍ. ອິທໍ ສມຖວິປສ຺ສນາທ຺ວຍໍ ສາສນສ຺ສ ປທຏ຺ຐານໍ ສມາໂຣປຍິຕພ຺ພໍ. ‘‘ສມຖວິປສ຺ສນາທ຺ວເຍ ປທຏ຺ຐາເນ ສມາໂຣປຍິເຕ ກຕມໍ ປທຏ຺ຐານໍ ສມາໂຣປຍິຕພ຺ພ’’ນ຺ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ສມຖສ຺ສ ຜລ’’ນ຺ຕິອາທິ ວຸຕ຺ຕໍ. ອິທໍ ຜລທ຺ວຍໍ ສາສນສ຺ສ ປທຏ຺ຐານໍ ສມາໂຣປຍິຕພ຺ພໍ.

ສາສນສ຺ສ ປທຏ຺ຐານານິ ສມາໂຣປຍິຕພ຺ພານີຕິ ອາຈຣິເຍນ ນິທ຺ຘາເຣຕ຺ວາ ວິຠຕ຺ຕານິ, ອມ຺ເຫຫິ ຈ ຎາຕານິ, ‘‘ອິທານິ ກຕມສ຺ສ ກຕມໍ ປທຏ຺ຐານໍ ສມາໂຣປຍິຕພ຺ພ’’ນ຺ຕິ ປຸຈ຺ຉິຕພ຺ພຕ຺ຕາ ‘‘ວນໍ ວນຖສ຺ສາ’’ຕິອາທິ ວຸຕ຺ຕໍ. ອິທໍ ກາມຄຸຓປຎ຺ຈກໍ ວນໍ ຕຓ຺ຫາຠູຕສ຺ສ ວນຖສ຺ສ ປທຏ຺ຐານໍ ຕຓ຺ຫາວຕ຺ຖຸຠາວໂຕ, ‘‘ອິຕ຺ຖີ’’ຕິ ວາ ‘‘ປຸຣິໂສ’’ຕິ ວາ ນິມິຕ຺ຕຄ຺ຄາຫສງ຺ຂາຕໍ ອິທໍ ວນໍ ‘‘ອໂຫ ຈກ຺ຂຸ, ອໂຫ ໂສຕໍ, ອໂຫ ຆານໍ, ອໂຫ ຊິວ຺ຫາ, ອໂຫ ກາໂຍ’’ຕິ ເຕສໍ ເຕສໍ ອງ຺ຄປຈ຺ຈງ຺ຄານໍ ອນຸພ຺ຍຎ຺ຊນຄ຺ຄາຫສງ຺ຂາຕສ຺ສ ວນຖສ຺ສ ປທຏ຺ຐານໍ ສມາໂຣປຍິຕພ຺ພໍ. ອປຣິຎ຺ຎາຕໍ ທ຺ວາທສາຍຕນສງ຺ຂາຕໍ ອິທໍ ວນໍ ສໍໂຍຊນສງ຺ຂາຕສ຺ສ ວນຖສ຺ສ ປທຏ຺ຐານໍ ສມາໂຣປຍິຕພ຺ພໍ, ອາຍຕນໍ ປຏິຈ຺ຈ ສໍໂຍຊນຸປ຺ປຊ຺ຊນໂຕ ອນຸສຍສງ຺ຂາຕໍ ອິທໍ ວນໍ ປຣິຍຸຏ຺ຐານສງ຺ຂາຕສ຺ສ ວນຖສ຺ສ ປທຏ຺ຐານໍ ສມາໂຣປຍິຕພ຺ພໍ. ‘‘ປຎ຺ຈກາມຄຸຓາທີນໍ ວນຠາໂວ ຈ ຕຓ຺ຫາທີນໍ ວນຖຠາໂວ ຈ ເກນ ອມ຺ເຫຫິ ສທ຺ທຫິຕພ຺ໂພ’’ຕິ ວຕ຺ຕພ຺ພຕ຺ຕາ ‘‘ເຕນາຫ ຠຄວາ’’ຕິອາທິ ວຸຕ຺ຕໍ. ເຕນ ປຎ຺ຈກາມຄຸຓາທີນໍ ວນຠາເວນ ຈ ຕຓ຺ຫາທີນໍ ວນຖຠາເວນ ຈ ຠຄວາ ‘‘ເຉຕ຺ວາ ວນຎ຺ຈ ວນຖຎ຺ຈາ’’ຕິ ຍໍ ວຈນໍ ອາຫ, ເຕນ ຠຄວໂຕ ວຈເນນ ວຈນານຸສາເຣນ ສທ຺ທຫິຕພ຺ໂພຕິ. ອຍນ຺ຕິ ອຍໍ ‘‘ເອກສ຺ມິໍ ປທຏ຺ຐາເນ’’ຕິອາທິສໍວຓ຺ຓນາ. ປທຏ຺ຐາເນນາຕິ ເອເກເກນ ປທຏ຺ຐາເນນ. ສມາໂຣປນາຕິ ຕທຎ຺ຎປທຏ຺ຐານານໍ ສມາໂຣປນາ. ສມາໂຣເປນ຺ຕິ ສມາໂຣປຍິຕພ຺ພານິ ເອຕາຍ ສໍວຓ຺ຓນາຍາຕິ ສມາໂຣປນາຕິ ວິຄ຺ຄໂຫຕິ. (໑)

໕໑. ປທຏ຺ຐາເນນ ສມາໂຣປນາ ອາຈຣິເຍນ ນິທ຺ທິຏ຺ຐາ, ອມ຺ເຫຫິ ຈ ຎາຕາ, ‘‘ກຕມາ ເວວຈເນນ ສມາໂຣປນາ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕມາ ເວວຈເນນາ’’ຕິອາທິ ວຸຕ຺ຕໍ. ຕຕ຺ຖາຕິ ຕາສຸ ຈຕູສຸ ປທຏ຺ຐານສມາໂຣປນາທີສຸ ສມາໂຣປນາສຸ ເວວຈເນນ ເອເກເກນ ໂຣຕທຎ຺ຎເວວຈນານໍ ສມາໂຣປນາ ກຕມາຕິ ປຸຈ຺ຉຕິ. ‘‘ຣາຄວິຣາຄາ’’ຕິ ຈ ‘‘ເຈໂຕວິມຸຕ຺ຕີ’’ຕິ ຈ ‘‘ເສກ຺ຂຜລ’’ນ຺ຕິ ຈ ອິທໍ ວຈນຕ຺ຕຍໍ ອນາຄາມິຜລຕ຺ຖຕ຺ຕາ ອນາຄາມິຜລສ຺ສ ເວວຈນໍ. ‘‘ອວິຊ຺ຊາວິຣາຄາ’’ຕິ ຈ ‘‘ປຎ຺ຎາວິມຸຕ຺ຕີ’’ຕິ ຈ ‘‘ອເສກ຺ຂຜລ’’ນ຺ຕິ ຈ ອິທໍ ວຈນຕ຺ຕຍໍ ອຣຫຕ຺ຕຜລຕ຺ຖຕ຺ຕາ ອຣຫຕ຺ຕຜລສ຺ສ ເວວຈນໍ. ອິມິນາ ນເຍນ ເສເສສຸ ໂຍຊນາ ກາຕພ຺ພາ. (໒)

ເວວຈເນນ ສມາໂຣປນາ ອາຈຣິເຍນ ນິທ຺ທິຏ຺ຐາ, ອມ຺ເຫຫິ ຈ ຎາຕາ, ‘‘ກຕມາ ຠາວນາຍ ສມາໂຣປນາ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕມາ ຠາວນາຍາ’’ຕິອາທິ ວຸຕ຺ຕໍ. ຕຕ຺ຖາຕິ ຕາສຸ ຈຕູສຸ ປທຏ຺ຐານສມາໂຣປນາທີສຸ ກຕມາຍ ເທສິຕາຍ ຠາວນາຍ ກຕເມສານໍ ອເທສິຕານໍ ຠາວນາໂຣປນາ ກຕມາຕິ ປຸຈ຺ຉຕິ. ຍຖາ ເຍນ ປກາເຣນ ຍໍ ຠາວນໍ ຠຄວາ ‘‘ຕສ຺ມາຕິຫ, ຕ຺ວໍ ຠິກ຺ຂຸ, ກາເຍ ກາຍານຸປສ຺ສີ ວິຫຣຕິ, ອາຕາປີ ສມ຺ປຊາໂນ ສຕິມາ ວິເນຍ຺ຍ ໂລເກ ອຠິຊ຺ຌາໂທມນສ຺ສ’’ນ຺ຕິ (ສໍ. ນິ. ໕.໓໖໙, ໓໗໑, ໓໙໕, ໔໑໕) ອາຫ, ຕຖາ ເຕນ ປກາເຣນ ຕາຍ ຠາວນາຍ ຕທຎ຺ຎຠາວນາປິ ສມາໂຣປຍິຕພ຺ພາຕິ ອຕ຺ໂຖ.

‘‘ຕສ຺ມາຕິຫາ’’ຕິອາທິປາເຐ ‘‘ກິໍ ຠາວນໍ ຠຄວາ ອາຫາ’’ຕິ ປຸຈ຺ຉິຕພ຺ພຕ຺ຕາ ‘‘ອາຕາປີ’’ຕິອາທິ ວຸຕ຺ຕໍ. ‘‘ອາຕາປີ’’ຕິ ວຈເນນ ວີຣິຍິນ຺ທ຺ຣິຍໍ ຠຄວາ ອາຫ. ‘‘ສມ຺ປຊາໂນ’’ຕິ ວຈເນນ ປຎ຺ຎິນ຺ທ຺ຣິຍໍ ຠຄວາ ອາຫ. ‘‘ສຕິມາ’’ຕິ ວຈເນນ ສຕິນ຺ທ຺ຣິຍໍ ອາຫ. ‘‘ວິເນຍ຺ຍ ໂລເກ ອຠິຊ຺ຌາໂທມນສ຺ສ’’ນ຺ຕິ ວຈເນນ ສມາຘິນ຺ທ຺ຣິຍໍ ອາຫ. ‘‘ເອວໍ ວຸຕ຺ເຕ ກຕມາ ຠາວນາ ສມາໂຣປຍິຕພ຺ພາ’’ຕິ ປຸຈ຺ຉິຕພ຺ພຕ຺ຕາ ‘‘ເອວໍ ກາເຍ ກາຍານຸປສ຺ສິໂນ ວິຫຣໂຕ ຈຕ຺ຕາໂຣ ສຕິປຏ຺ຐານາ ຠາວນາປາຣິປູຣິໍ ຄຈ຺ຉນ຺ຕີ’’ຕິ ວຸຕ຺ຕໍ. ເອວໍ ວຸຕ຺ຕາຍ ວີຣິຍິນ຺ທ຺ຣິຍາທິຠາວນາຍ ຈຕ຺ຕາໂຣ ສຕິປຏ຺ຐານາ ສມາໂຣປຍິຕພ຺ພາຕິ ອຕ຺ໂຖ. ເກນ ກາຣເຓນ ຠາວນາປາຣິປູຣິໍ ຄຈ຺ຉນ຺ຕີຕິ ປຸຈ຺ຉຕິ. ຈຕຸນ຺ນໍ ອິນ຺ທ຺ຣິຍານໍ ອິນ຺ທ຺ຣິຍຠາເວນ, ຠາເວຕພ຺ພຠາເວນ ວາ ເອກລກ຺ຂຓຕ຺ຕາ ຠາວນາປາຣິປູຣິໍ ຄຈ຺ຉນ຺ຕີຕິ ວິສ຺ສຊ຺ເຊຕິ. ‘‘ເຕສຸ ສມາໂຣປິເຕສຸ ກຕເມ ສມາໂຣປຍິຕພ຺ພາ’’ຕິ ປຸຈ຺ຉິຕພ຺ພຕ຺ຕາ ‘‘ຈຕູສູ’’ຕິອາທິ ວຸຕ຺ຕໍ. ຈຕູສຸ ສຕິປຏ຺ຐາເນສຸ ຠາວິຍມາເນສຸ ສມາໂຣປຍິຕພ຺ເພສຸ ຈຕ຺ຕາໂຣ ສມ຺ມປ຺ປຘານາ ຠາວນາປາຣິປູຣິໍ ຄຈ຺ຉນ຺ຕີຕິ ສມາໂຣປຍິຕພ຺ພາຕິ ອຕ຺ໂຖ. ເສເສສຸປິ ເອວເມວ ສມາໂຣປຍິຕພ຺ພາ.

ຠາວນາຍ ສມາໂຣປນາ ອາຈຣິເຍນ ວິຠຕ຺ຕາ, ອມ຺ເຫຫິ ຈ ຎາຕາ, ‘‘ກຕມາ ປຫາເນນ ສມາໂຣປນາ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕມາ’’ຕິອາທິ ວຸຕ຺ຕໍ. ຕຕ຺ຖາຕິ ຕາສຸ ຈຕູສຸ ປທຏ຺ຐານສມາໂຣປນາທີສຸ ກຕເມນ ເທສິເຕນ ປຫາເນນ ກຕເມສໍ ອເທສິຕານໍ ປຫານານໍ ກຕມາ ສມາໂຣປນາຕິ ປຸຈ຺ຉຕິ. ‘‘ກາເຍ ກາຍານຸປສ຺ສີ ວິຫຣນ຺ໂຕ ອສຸເຠ ‘ສຸຠ’ນ຺ຕິ ວິປລ຺ລາສໍ ປຊຫຕີ’’ຕິ ເທສິເຕນ ‘‘ສຸຠ’’ນ຺ຕິ ວິປລ຺ລາສປ຺ປຫາເນນ ກພຬີກາຣາຫາຣປຣິຎ຺ຎາຍ ປຣິພນ຺ຘກິເລສກາມຸປາທານປ຺ປຫານາທໂຍປິ ສມາໂຣປຍິຕພ຺ພາ.

‘‘ເວທນາສຸ ເວທນານຸປສ຺ສີ ວິຫຣນ຺ໂຕ ທຸກ຺ເຂ ‘ສຸຂ’ນ຺ຕິ ວິປລ຺ລາສໍ ປຊຫຕີ’’ຕິ ເທສິເຕນ ‘‘ສຸຂ’’ນ຺ຕິ ວິປລ຺ລາສປ຺ປຫາເນນ ຜສ຺ສາຫາຣປຣິຎ຺ຎາຍ ປຣິພນ຺ຘກິເລສຠວຸປາທານປ຺ປຫານາທໂຍປິ ສມາໂຣປຍິຕພ຺ພາ.

‘‘ຈິຕ຺ເຕ ຈິຕ຺ຕານຸປສ຺ສີ ວິຫຣນ຺ໂຕ ອນິຈ຺ເຈ ‘ນິຈ຺ຈ’ນ຺ຕິ ວິປລ຺ລາສໍ ປຊຫຕີ’’ຕິ ເທສິເຕນ ‘‘ນິຈ຺ຈ’’ນ຺ຕິ ວິປລ຺ລາສປ຺ປຫາເນນ ວິຎ຺ຎາຓາຫາຣປຣິຎ຺ຎາຍ ປຣິພນ຺ຘກິເລສທິຏ຺ຐຸປາທານປ຺ປຫານາທໂຍປິ ສມາໂຣປຍິຕພ຺ພາ.

‘‘ຘມ຺ເມສຸ ຘມ຺ມານຸປສ຺ສີ ວິຫຣນ຺ໂຕ ອນຕ຺ຕນິ ‘ອຕ຺ຕາ’ຕິ ວິປລ຺ລາສໍ ປຊຫຕີ’’ຕິ ເທສິເຕນ ‘‘ອຕ຺ຕາ’’ຕິ ວິປລ຺ລາສປ຺ປຫາເນນ ມໂນສຎ຺ເຈຕນາຫາຣປຣິຎ຺ຎາຍ? ມໂນສຎ຺ເຈຕນາຫາຣປຣິຎ຺ຎາຍ ປຣິພນ຺ຘກິເລສອຕ຺ຕວາທຸປາທານປ຺ປຫານາທໂຍປິ ສມາໂຣປຍິຕພ຺ພາຕິ ອຘິປ຺ປາໂຍ. (໔)

ປຫານຫາໂຣ ປນ ລກ຺ຂຓຫາຣວິຠງ຺ຄວຓ຺ຓນາຍໍ ວຸຕ຺ໂຕເຍວາຕິ ອິຘ ນ ວທາມ.

‘‘ສຸຕ຺ເຕ ເທສິເຕນ ເອເກເກນ ປທຏ຺ຐານາທິເກນ ອເທສິຕານໍ ປທຏ຺ຐານາທີນໍ ສມາໂຣປນຠາໂວ ເກນ ອມ຺ເຫຫິ ວິຊານິຕພ຺ໂພ ສທ຺ທຫິຕພ຺ໂພ’’ຕິ ວຕ຺ຕພ຺ພຕ຺ຕາ ‘‘ເຕນາຫ ອາຍສ຺ມາ’’ຕິອາທິມາຫ. ເຕນ ຕຖາ ສມາໂຣປນຠາເວນ ອາຍສ຺ມາ ມຫາກຈ຺ຈາໂນ –

‘‘ເຍ ຘມ຺ມາ ຍໍມູລາ, ເຍ ເຈກຕ຺ຖາ ປກາສິຕາ ມຸນິນາ;

ເຕ ສມາໂຣປຍິຕພ຺ພາ, ເອສ ສມາໂຣປໂນ ຫາໂຣ’’ຕິ –

ຍໍ ວຈນໍ ອາຫ, ເຕນ ວຈເນນ ວຈນານຸສາເຣນ ຕຖາ ສມາໂຣປນຠາໂວ ຕຸມ຺ເຫຫິ ວິຊານິຕພ຺ໂພ ສທ຺ທຫິຕພ຺ໂພຕິ ວຸຕ຺ຕໍ ໂຫຕິ.

‘‘ກິໍ ປນ ເອຕ຺ຕາວຕາ ສມາໂຣປໂນ ຫາໂຣ ປຣິປຸຓ຺ໂຓ, ອຎ຺ໂຎ ນິຍຸຕ຺ໂຕ ນຕ຺ຖີ’’ຕິ ວຕ຺ຕພ຺ພຕ຺ຕາ ‘‘ນິຍຸຕ຺ໂຕ ສມາໂຣປໂນ ຫາໂຣ’’ຕິ ວຸຕ຺ຕໍ. ສຸຕ຺ເຕ ເທສິເຕນ ນເຍນ ປທຏ຺ຐານາທິເກນ ອເທສິຕານິ ປທຏ຺ຐານານິ ສມາໂຣປຍິຕພ຺ພານິ ຠວນ຺ຕິ, ເຕນ ເຕນ ປທຏ຺ຐານາທິເກນ ອເທສິຕານໍ ປທຏ຺ຐານາທີນໍ ສມາໂຣປໂນ ຫາໂຣ ນິຍຸຕ຺ໂຕ ນິທ຺ຘາເຣຕ຺ວາ ຍຸຎ຺ຊິຕພ຺ໂພຕິ ອຕ຺ໂຖ ທຏ຺ຐພ຺ໂພ.

ອິຕິ ສມາໂຣປນຫາຣວິຠງ຺ເຄ ສຕ຺ຕິພລານຸຣູປາ ຣຈິຕາ

ວິຠາວນາ ນິຏ຺ຐິຕາ.

ປຓ຺ຑິເຕຫິ ປນ ອຏ຺ຐກຖາຏີການຸສາເຣນ ຄມ຺ຠີຣຕ຺ໂຖ ວິຕ຺ຖາຣໂຕ ວິຠຊິຕ຺ວາ ຄເຫຕພ຺ໂພ.

ອິເມ ຍຖາວຸຕ຺ຕາ ໂສຬສ ສໍວຓ຺ຓນາວິເສສາ ສໍວຓ຺ເຓຕພ຺ພຕ຺ເຖສຸ ອຎ຺ຎາຓສໍສຍານໍ ຫຣຓໂຕ ອປນຍນໂຕ ຫາຣາ ນາມາຕິ.

ນິຏ຺ຐິຕາ ຫາຣວິຠງ຺ຄວາຣວິຠາວນາ.