໑໔. ອຘິຏ຺ຐານຫາຣວິຠງ຺ຄວິຠາວນາ

໔໖. ເຍນ ເຍນ ສໍວຓ຺ຓນາວິເສສຠູເຕນ ວິຠງ຺ເຄນ ປຎ຺ຫາທໂຍ ໂສຘິຕາ, ໂສ ສໍວຓ຺ຓນາວິເສສຠູໂຕ ປຣິປຸຓ຺ໂຓ, ‘‘ກຕໂມ ອຘິຏ຺ຐານຫາຣວິຠງ຺ໂຄ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕໂມ ອຘິຏ຺ຐາໂນ ຫາໂຣ’’ຕິອາທິ ວຸຕ຺ຕໍ. ຕຕ຺ຖ ຕຕ຺ຖາຕິ ເຕສຸ ນິທ຺ທິຏ຺ເຐສຸ ໂສຬສສຸ ເທສນາຫາຣາທີສຸ ກຕໂມ ສໍວຓ຺ຓນາວິເສໂສ ປຏິນິທ຺ເທສໂຕ ອຘິຏ຺ຐາໂນ ຫາໂຣ ອຘິຏ຺ຐານຫາຣວິຠງ຺ໂຄ ນາມາຕິ ປຸຈ຺ຉຕິ. ‘‘ເອກຕ຺ຕຕາຍ ຘມ຺ມາ, ເຍປິ ຈ ເວມຕ຺ຕຕາຍ ນິທ຺ທິຏ຺ຐາ’’ຕິອາທິນິທ຺ເທສສ຺ສ ອິທານິ ມຍາ ວຸຈ຺ຈມາໂນ ‘‘ເຍ ຕຕ຺ຖ ນິທ຺ທິຏ຺ຐາ, ຕຖາ ເຕ ຘາຣຍິຕພ຺ພາ’’ຕິອາທິໂກ ວິຕ຺ຖາຣສໍວຓ຺ຓນາວິເສໂສ ອຘິຏ຺ຐານຫາຣວິຠງ຺ໂຄ ນາມາຕິ ຄເຫຕພ຺ໂພ.

‘‘ເຍ ຘມ຺ມາ ສຸຕ຺ເຕສຸ ເອກຕ຺ຕຕາຍ ຈ ເວມຕ຺ຕຕາຍ ຈ ນິທ຺ທິຏ຺ຐາ, ເຕ ຘມ຺ມາ ກິໍ ປນ ຕເຖວ ຘາຣຍິຕພ຺ພາ, ອຸທາຫຸ ອຎ຺ຎຖາປິ ວິກປ຺ປຍິຕພ຺ພາ’’ຕິ ປຸຈ຺ຉິຕພ຺ພຕ຺ຕາ ‘‘ເຍ ຕຕ຺ຖາ’’ຕິອາທິ ວຸຕ຺ຕໍ. ຕຕ຺ຖ ເຕສຸ ສຸຕ຺ຕນ຺ເຕສຸ ເຍ ທຸກ຺ຂສຈ຺ຈາທໂຍ ຘມ຺ມາ ເອກຕ຺ຕຕາຍ ຈ ເວມຕ຺ຕຕາຍ ຈ ນິທ຺ທິຏ຺ຐາ, ເຕ ທຸກ຺ຂສຈ຺ຈາທໂຍ ຘມ຺ມາ ຕຖາ ເອກຕ຺ຕຕາຍ ຈ ເວມຕ຺ຕຕາຍ ຈ ຘາຣຍິຕພ຺ພາ ອຸປລກ຺ຂິຕພ຺ພາ, ນ ອຎ຺ຎຖາ ວິກປ຺ປຍິຕພ຺ພາ.

‘‘ສາມຎ຺ຎກປ຺ປນາຍ ໂວຫາຣຠາເວນ ອນວຏ຺ຐານໂຕ ກຕມາ ເອກຕ຺ຕຕາ, ກຕມາ ເວມຕ຺ຕຕາ’’ຕິ ປຸຈ຺ຉິຕພ຺ພຕ຺ຕາ ‘‘ທຸກ຺ຂນ຺ຕິ ເອກຕ຺ຕຕາ’’ຕິອາທິ ວຸຕ຺ຕໍ. ທຸກ຺ຂນ຺ຕິ ຊາຕິອາທິວິເສສມນເປກ຺ຂິຕ຺ວາ ຍາ ທຸກ຺ຂສາມຎ຺ຎຕາ ວຸຕ຺ຕາ, ສາ ອຍໍ ທຸກ຺ຂສາມຎ຺ຎຕາ ທຸກ຺ຂສ຺ສ ເອກຕ຺ຕຕາ ນາມ. ‘‘ຕຕ຺ຖ ກຕມໍ ທຸກ຺ຂ’’ນ຺ຕິ ປຸຈ຺ຉິຕາ ‘‘ຊາຕິ ທຸກ຺ຂາ, ຊຣາ ທຸກ຺ຂາ…ເປ... ວິຎ຺ຎາຓໍ ທຸກ຺ຂ’’ນ຺ຕິ ຊາຕິອາທິວິເສສມເປກ຺ຂິຕ຺ວາ ຍາ ທຸກ຺ຂວິເສສຕາ ວຸຕ຺ຕາ, ສາ ອຍໍ ທຸກ຺ຂວິເສສຕາ ທຸກ຺ຂສ຺ສ ເວມຕ຺ຕຕາ ນາມ. ຕຕ຺ຖາຕິ ເຍ ທຸກ຺ຂາທໂຍ ຘມ຺ມາ ສຸຕ຺ເຕ ວຸຕ຺ຕາ, ຕຕ຺ຖ ເຕສຸ ທຸກ຺ຂາທີສຸ ອຕ຺ເຖສຸ.

ທຸກ຺ຂສມຸທໂຍຕິ ‘‘ຕຓ຺ຫາ ໂປໂນຠວິກາ’’ຕິ ວິເສສມນເປກ຺ຂິຕ຺ວາ ຍາ ສມຸທຍສາມຎ຺ຎຕາ ວຸຕ຺ຕາ, ສາ ອຍໍ ສມຸທຍສາມຎ຺ຎຕາ ສມຸທຍສ຺ສ ເອກຕ຺ຕຕາ ນາມ. ‘‘ຕຕ຺ຖ ກຕໂມ ສມຸທໂຍ’’ຕິ ປຸຈ຺ຉິຕ຺ວາ ‘‘ຍາຍໍ ຕຓ຺ຫາ…ເປ… ວິຠວຕຓ຺ຫາ’’ຕິ ວິເສສໍ ອເປກ຺ຂິຕ຺ວາ ຍາ ສມຸທຍວິເສສຕາ ວຸຕ຺ຕາ, ສາ ອຍໍ ສມຸທຍວິເສສຕາ ສມຸທຍສ຺ສ ເວມຕ຺ຕຕາ ນາມ.

ທຸກ຺ຂນິໂຣໂຘຕິ ‘‘ຕສ຺ສາເຍວ ຕຓ຺ຫາຍ ອເສສວິຣາຄນິໂຣໂຘ’’ຕິ ວິເສສມນເປກ຺ຂິຕ຺ວາ ຍາ ນິໂຣຘສາມຎ຺ຎຕາ ວຸຕ຺ຕາ, ສາ ອຍໍ ນິໂຣຘສາມຎ຺ຎຕາ ນິໂຣຘສ຺ສ ເອກຕ຺ຕຕາ ນາມ. ‘‘ຕຕ຺ຖ ກຕໂມ ທຸກ຺ຂນິໂຣໂຘ’’ຕິ ປຸຈ຺ຉິຕ຺ວາ ‘‘ໂຍ ຕສ຺ສາເຍວ ຕຓ຺ຫາຍ ອເສສວິຣາຄນິໂຣໂຘ ຈາໂຄ ປຏິນິສ຺ສຄ຺ໂຄ ມຸຕ຺ຕິ ອນາລໂຍ’’ຕິ ວິເສສມເປກ຺ຂິຕ຺ວາ ຍາ ນິໂຣຘວິເສສຕາ ວຸຕ຺ຕາ, ສາ ອຍໍ ນິໂຣຘວິເສສຕາ ນິໂຣຘສ຺ສ ເວມຕ຺ຕຕາ ນາມ.

ທຸກ຺ຂນິໂຣຘຄາມິນີ ປຏິປທາຕິ? ປຏິປທາຕິ ສມ຺ມາທິຏ຺ຐິອາທິວິເສສມນເປກ຺ຂິຕ຺ວາ ຍາ ນິໂຣຘຄາມິນິປຏິປທາສາມຎ຺ຎຕາ ວຸຕ຺ຕາ, ສາ ອຍໍ ນິໂຣຘຄາມິນິປຏິປທາສາມຎ຺ຎຕາ ມຄ຺ຄສ຺ສ ເອກຕ຺ຕຕາ ນາມ. ‘‘ຕຕ຺ຖ ກຕມາ ທຸກ຺ຂນິໂຣຘຄາມິນີ ປຏິປທາ’’ຕິ ປຸຈ຺ຉິຕ຺ວາ ‘‘ອຍເມວ ອຣິໂຍ…ເປ… ສມ຺ມາສມາຘີ’’ຕິ ສມ຺ມາທິຏ຺ຐິອາທິວິເສສມເປກ຺ຂິຕ຺ວາ ຍາ ວິເສສທຸກ຺ຂນິໂຣຘຄາມິນິປຏິປທຕາ ວຸຕ຺ຕາ, ສາ ອຍໍ ວິເສສທຸກ຺ຂນິໂຣຘຄາມິນິປຏິປທຕາ ມຄ຺ຄສ຺ສ ເວມຕ຺ຕຕາ ນາມ.

ມຄ຺ໂຄຕິ ນິຣຍຄາມິມຄ຺ຄາທິວິເສສມນເປກ຺ຂິຕ຺ວາ ຍາ ສາມຎ຺ຎມຄ຺ຄຕາ ວຸຕ຺ຕາ, ສາ ອຍໍ ສາມຎ຺ຎມຄ຺ຄຕາ ມຄ຺ຄສ຺ສ ເອກຕ຺ຕຕາ ນາມ. ‘‘ຕຕ຺ຖ ກຕໂມ ມຄ຺ໂຄ’’ຕິ ປຸຈ຺ຉິຕ຺ວາ ‘‘ນິຣຍຄາມີ ມຄ຺ໂຄ…ເປ… ນິພ຺ພານຄາມີ ມຄ຺ໂຄ’’ຕິ ນິຣຍຄາມິມຄ຺ຄາທິວິເສສໍ ອເປກ຺ຂິຕ຺ວາ ຍາ ວິເສສມຄ຺ຄຕາ ວຸຕ຺ຕາ, ສາ ອຍໍ ວິເສສມຄ຺ຄຕາ ມຄ຺ຄສ຺ສ ເວມຕ຺ຕຕາ ນາມ.

ນິໂຣໂຘຕິ ປຏິສງ຺ຂານິໂຣຘາທິວິເສສໍ ອນເປກ຺ຂິຕ຺ວາ ຍາ ສາມຎ຺ຎນິໂຣຘຕາ ວຸຕ຺ຕາ, ສາ ອຍໍ ສາມຎ຺ຎນິໂຣຘຕາ ນິໂຣຘສ຺ສ ເອກຕ຺ຕຕາ ນາມ. ‘‘ຕຕ຺ຖ ກຕໂມ ນິໂຣໂຘ’’ຕິ ປຸຈ຺ຉິຕ຺ວາ ‘‘ປຏິສງ຺ຂານິໂຣໂຘ…ເປ… ສພ຺ພກິເລສນິໂຣໂຘ’’ຕິ ປຏິສງ຺ຂານິໂຣຘາທິວິເສສໍ ອເປກ຺ຂິຕ຺ວາ ຍາ ວິເສສນິໂຣຘຕາ ວຸຕ຺ຕາ, ສາ ອຍໍ ວິເສສນິໂຣຘຕາ ນິໂຣຘສ຺ສ ເວມຕ຺ຕຕາ ນາມ.

ຣູປນ຺ຕິ ຈາຕຸມຫາຠູຕິກາທິວິເສສມນເປກ຺ຂິຕ຺ວາ ຍາ ສາມຎ຺ຎຣູປຕາ ວຸຕ຺ຕາ, ສາ ອຍໍ ສາມຎ຺ຎຣູປຕາ ຣູປສ຺ສ ເອກຕ຺ຕຕາ ນາມ. ‘‘ຕຕ຺ຖ ກຕມໍ ຣູປ’’ນ຺ຕິ ປຸຈ຺ຉິຕ຺ວາ ‘‘ຈາຕຸມຫາຠູຕິກໍ…ເປ… ວາໂຍຘາຕຸຍາ ຈິຕ຺ຕໍ ວິຣາເຊຕີ’’ຕິ ຈາຕຸມຫາຠູຕິກາທິວິເສສມເປກ຺ຂິຕ຺ວາ ຍາ ວິເສສຣູປຕາ ວຸຕ຺ຕາ, ສາ ອຍໍ ວິເສສຣູປຕາ ຣູປສ຺ສ ເວມຕ຺ຕຕາ ນາມ.

໔໘. ອວິຊ຺ຊາຕິ ທຸກ຺ເຂອຎ຺ຎາຓາທິວິເສສມນເປກ຺ຂິຕ຺ວາ ຍາ ອວິຊ຺ຊາສາມຎ຺ຎຕາ ວຸຕ຺ຕາ, ສາ ອຍໍ ອວິຊ຺ຊາສາມຎ຺ຎຕາ ອວິຊ຺ຊາຍ ເອກຕ຺ຕຕາ ນາມ. ‘‘ຕຕ຺ຖ ກຕມາ ອວິຊ຺ຊາ’’ຕິ ປຸຈ຺ຉິຕ຺ວາ ‘‘ທຸກ຺ເຂ ອຎ຺ຎາຓໍ, ທຸກ຺ຂສມຸທເຍ ອຎ຺ຎາຓໍ…ເປ… ອວິຊ຺ຊາລງ຺ຆີ ໂມໂຫ ອກຸສລມູລ’’ນ຺ຕິ ທຸກ຺ເຂອຎ຺ຎາຓາທິວິເສສມເປກ຺ຂິຕ຺ວາ ຍາ ອວິຊ຺ຊາວິເສສຕາ ວຸຕ຺ຕາ, ສາ ອຍໍ ອວິຊ຺ຊາວິເສສຕາ ອວິຊ຺ຊາຍ ເວມຕ຺ຕຕາ ນາມ.

ວິຊ຺ຊາຕິ ທຸກ຺ເຂຎາຓາທິວິເສສມນເປກ຺ຂິຕ຺ວາ ຍາ ວິຊ຺ຊາສາມຎ຺ຎຕາ ວຸຕ຺ຕາ, ສາ ອຍໍ ວິຊ຺ຊາສາມຎ຺ຎຕາ ວິຊ຺ຊາຍ ເອກຕ຺ຕຕາ ນາມ. ‘‘ຕຕ຺ຖ ກຕມາ ວິຊ຺ຊາ’’ຕິ ປຸຈ຺ຉິຕ຺ວາ ‘‘ທຸກ຺ເຂ ຎາຓໍ, ທຸກ຺ຂສມຸທເຍ ຎາຓໍ…ເປ… ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນ’’ນ຺ຕິ ທຸກ຺ເຂຎາຓາທິວິເສສມເປກ຺ຂິຕ຺ວາ ຍາ ວິຊ຺ຊາວິເສສຕາ ວຸຕ຺ຕາ, ສາ ອຍໍ ວິຊ຺ຊາວິເສສຕາ ວິຊ຺ຊາຍ ເວມຕ຺ຕຕາ ນາມ.

ສມາປຕ຺ຕີຕິ ສຎ຺ຎາສມາປຕ຺ຍາທິວິເສສໍ ອນເປກ຺ຂິຕ຺ວາ ຍາ ສາມຎ຺ຎສມາປຕ຺ຕິຕາ ວຸຕ຺ຕາ, ສາ ສາມຎ຺ຎສມາປຕ຺ຕິຕາ ສມາປຕ຺ຕິຍາ ເອກຕ຺ຕຕາ ນາມ. ‘‘ຕຕ຺ຖ ກຕມາ ສມາປຕ຺ຕີ’’ຕິ ປຸຈ຺ຉິຕ຺ວາ ‘‘ສຎ຺ຎາສມາປຕ຺ຕິ ອສຎ຺ຎາສມາປຕ຺ຕິ…ເປ… ນິໂຣຘສມາປຕ຺ຕີ’’ຕິ ສຎ຺ຎາສມາປຕ຺ຍາທິວິເສສໍ ອເປກ຺ຂິຕ຺ວາ ຍາ ວິເສສສມາປຕ຺ຕິຕາ ວຸຕ຺ຕາ, ສາ ອຍໍ ວິເສສສມາປຕ຺ຕິຕາ ສມາປຕ຺ຕິຍາ ເວມຕ຺ຕຕາ ນາມ.

ຌາຍີຕິ ເສກ຺ຂຌາຍີອາທິວິເສສໍ ອນເປກ຺ຂິຕ຺ວາ ຍາ ຌາຍີສາມຎ຺ຎຕາ ວຸຕ຺ຕາ, ສາ ຌາຍີສາມຎ຺ຎຕາ ຌາຍິໂນ ເອກຕ຺ຕຕາ ນາມ. ‘‘ຕຕ຺ຖ ກຕໂມ ຌາຍີ’’ຕິ ປຸຈ຺ຉິຕ຺ວາ ‘‘ອຕ຺ຖິ ເສກ຺ໂຂ ຌາຍີ, ອຕ຺ຖິ ອເສກ຺ໂຂ ຌາຍີ…ເປ… ປຎ຺ຎຸຕ຺ຕໂຣ ຌາຍີ’’ຕິ ເສກ຺ຂຌາຍີອເສກ຺ຂຌາຍີອາທິວິເສສມເປກ຺ຂິຕ຺ວາ ຍາ ຌາຍີວິເສສຕາ ວຸຕ຺ຕາ, ສາ ອຍໍ ຌາຍີວິເສສຕາ ຌາຍິໂນ ເວມຕ຺ຕຕາ ນາມ.

ສມາຘີຕິ ສຣຓສມາຘ຺ຍາທິວິເສສມນເປກ຺ຂິຕ຺ວາ ຍາ ສມາຘິສາມຎ຺ຎຕາ ວຸຕ຺ຕາ, ສາ ອຍໍ ສມາຘິສາມຎ຺ຎຕາ ສມາຘິໂນ ເອກຕ຺ຕຕາ ນາມ. ‘‘ຕຕ຺ຖ ກຕໂມ ສມາຘີ’’ຕິ ປຸຈ຺ຉິຕ຺ວາ ‘‘ສຣໂຓ ສມາຘິ, ອຣໂຓ ສມາຘິ…ເປ… ມິຈ຺ຉາສມາຘິ, ສມ຺ມາສມາຘີ’’ຕິ ສຣຓສມາຘ຺ຍາທິວິເສສມເປກ຺ຂິຕ຺ວາ ຍາ ສມາຘິວິເສສຕາ ວຸຕ຺ຕາ, ສາ ອຍໍ ສມາຘິວິເສສຕາ ສມາຘິໂນ ເວມຕ຺ຕຕາ ນາມ.

ປຏິປທາຕິ ອາຄາຬ຺ຫປຏິປທາທິວິເສສມນເປກ຺ຂິຕ຺ວາ ຍາ ປຏິປທາສາມຎ຺ຎຕາ ວຸຕ຺ຕາ, ອຍໍ ປຏິປທາສາມຎ຺ຎຕາ ປຏິປທາຍ ເອກຕ຺ຕຕາ ນາມ. ‘‘ຕຕ຺ຖ ກຕມາ ປຏິປທາ’’ຕິ ປຸຈ຺ຉິຕ຺ວາ ‘‘ອາຄາຬ຺ຫປຏິປທາ, ນິຊ຺ຌາມປຏິປທາ…ເປ… ສຸຂາ ປຏິປທາ ຂິປ຺ປາຠິຎ຺ຎາ’’ຕິ ອາຄາຬ຺ຫປຏິປທາທິວິເສສມເປກ຺ຂິຕ຺ວາ ຍາ ປຏິປທາວິເສສຕາ ວຸຕ຺ຕາ, ສາ ອຍໍ ປຏິປທາວິເສສຕາ ປຏິປທາຍ ເວມຕ຺ຕຕາ ນາມ.

ກາໂຍຕິ ນາມກາຍາທິວິເສສມນເປກ຺ຂິຕ຺ວາ ຍາ ກາຍສາມຎ຺ຎຕາ ວຸຕ຺ຕາ, ສາ ອຍໍ ກາຍສາມຎ຺ຎຕາ ກາຍສ຺ສ ເອກຕ຺ຕຕາ ນາມ. ‘‘ຕຕ຺ຖ ກຕໂມ ກາໂຍ’’ຕິ ປຸຈ຺ຉິຕ຺ວາ ‘‘ນາມກາໂຍ ຣູປກາໂຍ…ເປ… ອຍໍ ນາມກາໂຍ’’ຕິ ນາມກາຍາທິວິເສສມເປກ຺ຂິຕ຺ວາ ຍາ ກາຍວິເສສຕາ ວຸຕ຺ຕາ, ສາ ອຍໍ ກາຍວິເສສຕາ ກາຍສ຺ສ ເວມຕ຺ຕຕາ ນາມາຕິ ໂຍຊນາ ກາຕພ຺ພາ. ປທຕ຺ຖາທິໂກ ວິເສໂສ ອຏ຺ຐກຖາຍໍ (ເນຕ຺ຕິ. ອຏ຺ຐ. ໔໗) ວິຕ຺ຖາຣໂຕ ວຸຕ຺ໂຕ.

ວຸຕ຺ຕປ຺ປກາຣສ຺ສ ທຸກ຺ຂສມຸທຍາທິກສ຺ສ ຘມ຺ມສ຺ສ ເອກຕ຺ຕຕາທິລກ຺ຂຓໍ ນິຄມນວເສນ ທສ຺ເສຕຸໍ ‘‘ເອວໍ ໂຍ ຘມ຺ໂມ’’ຕິອາທິ ວຸຕ຺ຕໍ. ຕຕ຺ຖ ເອວນ຺ຕິ ອິມິນາ ມຍາ ວຸຕ຺ເຕນ ‘‘ທຸກ຺ຂນ຺ຕິ ເອກຕ຺ຕຕາ. ຕຕ຺ຖ ກຕມໍ ທຸກ຺ຂໍ? ຊາຕິ ທຸກ຺ຂາ, ຊຣາ ທຸກ຺ຂາ’’ຕິອາທິວຈເນນ. ໂຍ ຘມ຺ໂມຕິ ໂຍ ໂກຈິ ຊາຕິຊຣາພ຺ຍາຘ຺ຍາທິວິເສສຘມ຺ໂມ. ຍສ຺ສ ຘມ຺ມສ຺ສາຕິ ຕໂຕ ຊາຕິອາທິວິເສສຘມ຺ມໂຕ ອຎ຺ຎສ຺ສ ຊຣາທິວິເສສຘມ຺ມສ຺ສ. ສມານຠາໂວຕິ ຊາຕິອາທິວິເສສຘມ຺ເມນ ຊຣາທິວິເສສຘມ຺ມສ຺ສ ທຸກ຺ຂຠາເວນ ສມານຠາໂວ. ຕສ຺ສ ຘມ຺ມສ຺ສາຕິ ຊຣາທິວິເສສຘມ຺ມສ຺ສ. ເອກຕ຺ຕຕາຍາຕິ ທຸກ຺ຂສມຸທຍຕາທິສມານຕາຍ ທຸກ຺ຂສມຸທຍາທິຠາວານໍ ເອກີຠາເວນ. ເອກີຠວຕີຕິ ຊາຕິອາທິວິເສສເຠເທນ ອເນໂກປິ ‘‘ທຸກ຺ຂສມຸທໂຍ’’ຕິອາທິນາ ເອກສທ຺ທາຠິເຘຍ຺ຍຕາຍ ເອກີຠວຕິ. ເຍນ ເຍນ ວາ ປນ ວິລກ຺ຂໂຓ, ເຕນ ເຕນ ເວມຕ຺ຕໍ ຄຈ຺ຉຕິ. ຍສ຺ສ ຊາຕິອາທິຘມ຺ມສ຺ສ ເຍນ ເຍນ ອຠິນິພ຺ພຕ຺ຕນປຣິປາຈນາທິສຠາເວນ ໂຍ ຊາຕິອາທິຘມ຺ໂມ ຊຣາທິຘມ຺ເມນ ວິລກ຺ຂໂຓ ວິສທິໂສ ໂຫຕິ, ຕສ຺ສ ຊາຕິອາທິຘມ຺ມສ຺ສ ເຕນ ເຕນ ອຠິນິພ຺ພຕ຺ຕນປຣິປາຈນາທິສຠາເວນ ໂສ ຊາຕິອາທິຘມ຺ໂມ ຊຣາທິຘມ຺ເມນ ເວມຕ຺ຕຕໍ ວິສທິສຕ຺ຕໍ ຄຈ຺ຉຕິ, ທຸກ຺ຂສມຸທຍາທິຠາເວນ ສມາໂນປິ ຊາຕິອາທິຘມ຺ໂມ ຊຣາທິຘມ຺ມສ຺ສ ວິສິຏ຺ຐຕໍ ຄຈ຺ຉຕີຕິ ອຕ຺ໂຖ ທຏ຺ຐພ຺ໂພ.

ທຸກ຺ຂສມຸທຍາທິຘມ຺ມສ຺ສ ເອກຕ຺ຕເວມຕ຺ຕຕາ ອາຈຣິເຍນ ວິຠຕ຺ຕາ, ອມ຺ເຫຫິ ຈ ຎາຕາ, ‘‘ຕາຍ ເອກຕ຺ຕເວມຕ຺ຕຕາຍ ກຕ຺ຖ ປຸຈ຺ຉິເຕ ສຕິ ອຘິຏ຺ຐານໍ ວີມໍສິຕພ຺ພ’’ນ຺ຕິ ປຸຈ຺ຉິຕພ຺ພຕ຺ຕາ ສຸຕ຺ຕາທິເກ ປຸຈ຺ຉິເຕ ສຕິ ວີມໍສິຕພ຺ພນ຺ຕິ ທສ຺ເສຕຸໍ ‘‘ເອວໍ ສຸຕ຺ເຕ ວາ’’ຕິອາທິ ວຸຕ຺ຕໍ. ຕຕ຺ຖ ເອວໍ ອິມິນາ ວຸຕ຺ຕປ຺ປກາເຣນ ສຸຕ຺ເຕ ວາ ປຸຈ຺ຉິເຕ, ເວຍ຺ຍາກຣເຓ ວາ ປຸຈ຺ຉິເຕ, ຄາຖາຍໍ ວາ ປຸຈ຺ຉິຕາຍໍ ສຕິ ອຘິຏ຺ຐານໍ ວີມໍສິຕພ຺ພໍ. ‘‘ກິໍ ວີມໍສິຕພ຺ພ’’ນ຺ຕິ ປຸຈ຺ເຉຍ຺ຍ ‘‘ເອກຕ຺ຕຕາຍ ປຸຈ຺ຉຕິ ກິໍ, ອຸທາຫຸ ເວມຕ຺ຕຕາຍ ປຸຈ຺ຉຕິ ກິ’’ນ຺ຕິ ວີມໍສິຕພ຺ພນ຺ຕິ ໂຍຊນາ. ອຏ຺ຐກຖາຍໍ ປນ – ‘‘ອິທານິ ຕາວ ເອກຕ຺ຕເວມຕ຺ຕຕາວິສເຍ ນິໂຍເຊຕ຺ວາ ທສ຺ເສຕຸໍ ‘ສຸຕ຺ເຕ ວາ ເວຍ຺ຍາກຣເຓ ວາ’ຕິອາທິ ວຸຕ຺ຕ’’ນ຺ຕິ (ເນຕ຺ຕິ. ອຏ຺ຐ. ໔໘) ວຸຕ຺ຕໍ. ‘‘ກຖໍ ປຸຈ຺ຉິຕໍ, ກຖໍ ວິສ຺ສຊ຺ຊິຕພ຺ພ’’ນ຺ຕິ ວຕ຺ຕພ຺ພຕ຺ຕາ ‘‘ຍທິ ເອກຕ຺ຕຕາຍາ’’ຕິອາທິ ວຸຕ຺ຕໍ. ‘‘ເຕນາຫາ’’ຕິອາທ຺ຍານຸສນ຺ຘ຺ຍາທິໂກ ຈ ‘‘ນິຍຸຕ຺ໂຕ ອຘິຏ຺ຐາໂນ ຫາໂຣ’’ຕິ ອິມສ຺ສ ອນຸສນ຺ຘ຺ຍາທິໂກ ຈ ວຸຕ຺ຕນຍານຸສາເຣນ ເວທິຕພ຺ໂພ.

ອິຕິ ອຘິຏ຺ຐານຫາຣວິຠງ຺ເຄ ສຕ຺ຕິພລານຸຣູປາ ຣຈິຕາ

ວິຠາວນາ ນິຏ຺ຐິຕາ.

ປຓ຺ຑິເຕຫິ ປນ ອຏ຺ຐກຖາຏີການຸສາເຣນ ຄມ຺ຠີຣຕ຺ໂຖ ວິຕ຺ຖາຣໂຕ ວິຠຊິຕ຺ວາ ຄເຫຕພ຺ໂພຕິ.