໑໓. ໂສຘນຫາຣວິຠງ຺ຄວິຠາວນາ

໔໕. ເຍນ ເຍນ ສໍວຓ຺ຓນາວິເສສຠູເຕນ ໂອຕຣຓຫາຣວິຠງ຺ເຄນ ໂອຕເຣຕພ຺ພາ ສຸຕ຺ຕຕ຺ຖາ ວິຠຕ຺ຕາ, ໂສ ສໍວຓ຺ຓນາວິເສສຠູໂຕ ວິຠງ຺ໂຄ ປຣິປຸຓ຺ໂຓ, ‘‘ກຕໂມ ໂສຘນຫາຣວິຠງ຺ໂຄ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕໂມ ໂສຘໂນ ຫາໂຣ’’ຕິອາທິ ວຸຕ຺ຕໍ. ຕຕ຺ຖ ຕຕ຺ຖາຕິ ເຕສຸ ນິທ຺ທິຏ຺ເຐສຸ ໂສຬສສຸ ເທສນາຫາຣາທີສຸ ກຕໂມ ສໍວຓ຺ຓນາວິເສໂສ ໂສຘໂນ ຫາໂຣ ໂສຘນຫາຣວິຠງ຺ໂຄ ນາມາຕິ ປຸຈ຺ຉຕິ. ‘‘ວິສ຺ສຊ຺ຊິຕມ຺ຫິ ປຎ຺ເຫ’’ຕິອາທິນິທ຺ເທສສ຺ສ ອິທານິ ມຍາ ວຸຈ຺ຈມາໂນ ‘‘ຍຖາ ອາຍສ຺ມາ ອຊິໂຕ’’ຕິອາທິໂກ ວິຕ຺ຖາຣສໍວຓ຺ຓນາວິເສໂສ ໂສຘນຫາຣວິຠງ຺ໂຄ ນາມາຕິ ຄເຫຕພ຺ໂພ. ‘‘ກຖໍ ຕຕ຺ຖ ປຎ຺ເຫ ໂສຘໂນ ຫາໂຣ ວິຎ຺ຎາຕພ຺ໂພ’’ຕິ ວຕ຺ຕພ຺ພຕ຺ຕາ ‘‘ຍຖາ ອາຍສ຺ມາ’’ຕິອາທິ ວຸຕ຺ຕໍ. ຍຖາ ເຍນ ປກາເຣນ ອາຍສ຺ມາ ອຊິໂຕ ປາຣາຍເນ ຠຄວນ຺ຕໍ ປຎ຺ຫໍ ປຸຈ຺ຉຕິ, ຕຖາ ເຕນ ປກາເຣນ ວິສ຺ສຊ຺ຊິຕມ຺ຫິ ປຎ຺ເຫ ອຍໍ ໂສຘໂນ ຫາໂຣ ວິຎ຺ຎາຕພ຺ໂພຕິ. ‘‘ນິຍເມຕ຺ວາ ວິຠເຊຫີ’’ຕິ ວຕ຺ຕພ຺ພຕ຺ຕາ ນິຍເມຕ຺ວາ ວິຠຊິຕຸໍ ‘‘ເກນສ຺ສູ’’ຕິອາທິ ວຸຕ຺ຕໍ. ຄາຖາຕ຺ໂຖ ວຸຕ຺ໂຕວ.

‘‘ເກນສ຺ສຸ ນິວຸໂຕ ໂລໂກ, ເກນສ຺ສຸ ນປ຺ປກາສຕິ;

ກິສ຺ສາຠິເລປນໍ ພ຺ຣູສິ, ກິໍສຸ ຕສ຺ສ ມຫພ຺ຠຍ’’ນ຺ຕິ. –

ປຸຈ຺ຉາວເສນ ປວຕ຺ຕຄາຖາຍຎ຺ຈ –

‘‘ອວິຊ຺ຊາຍ ນິວຸໂຕ ໂລໂກ, (ອຊິຕາຕິ ຠຄວາ,)

ວິວິຈ຺ຉາ ປມາທາ ນປ຺ປກາສຕິ;

ຊປ຺ປາຠິເລປນໍ ພ຺ຣູມິ, ທຸກ຺ຂມສ຺ສ ມຫພ຺ຠຍ’’ນ຺ຕິ. –

ວິສ຺ສຊ຺ຊນວເສນ ປວຕ຺ຕຄາຖາຍຎ຺ຈາຕິ ອິມາສຸ ທ຺ວີສຸ ຄາຖາສຸ ‘‘ເກນສ຺ສຸ ນິວຸໂຕ ໂລໂກ’’ຕິ ອິມິນາ ປເທນ ປຎ຺ເຫ ປຸຈ຺ຉິເຕ ‘‘ອວິຊ຺ຊາຍ ນິວຸໂຕ ໂລໂກ’’ຕິ ອິມິນາ ປເທນ ຠຄວາ ‘‘ເກນສ຺ສຸ ນິວຸໂຕ ໂລໂກ’’ຕິ ປທໍ ຕທຕ຺ເຖ ອຎ຺ຎາຓສໍສຍາທິມລານໍ ອປນຍເນນ ໂສເຘຕິ. ຕທຕ຺ເຖ ຫິ ວິສ຺ສຊ຺ຊິເຕ ອຎ຺ຎາຓສໍສຍາທີນໍ ອຠາວໂຕ ອຕ຺ໂຖ ໂສຘິໂຕ ນາມ, ອຕ຺ເຖ ຈ ໂສຘິເຕ ປທມ຺ປິ ໂສຘິຕໍເຍວ. ເຕນາຫ ອຏ຺ຐກຖາຍໍ – ‘‘ຕທຕ຺ຖສ຺ສ ວິສ຺ສຊ຺ຊນໂຕ’’ຕິ (ເນຕ຺ຕິ. ອຏ຺ຐ. ໔໕), ຏີກາຍຎ຺ຈ ‘‘ຕພ຺ພິສຍອຎ຺ຎາຓສໍສຍາທິມລາປນຍເນນ ໂສເຘຕີ’’ຕິ ວຸຕ຺ຕໍ. ໂນ ຈ ອາຣມ຺ຠນ຺ຕິ ປຸຈ຺ຉິຕຸໍ ອາຣຠິຕພ຺ພໍ ສພ຺ພຄາຖາປທໍ, ຄາຖາຕ຺ຖໍ ວາ, ຎາຕຸໍ ອິຈ຺ຉິຕສ຺ສ ສພ຺ພສ຺ສ ອຕ຺ຖສ຺ສ ວິສ຺ສຊ຺ຊນວເສນ ອປຣິໂຍສິຕຕ຺ຕາ ຠຄວາ ‘‘ອວິຊ຺ຊາຍ ນິວຸໂຕ ໂລໂກ’’ຕິ ເອຕ຺ຕເກເນວ ປເທນ ໂສເຘຕິ. ເສເສສຸປິ ເອສ ນໂຍ.

‘‘ກິໍສຸ ຕສ຺ສ ມຫພ຺ຠຍ’’ນ຺ຕິ ອິມິນາ ປເທນ ປຎ຺ເຫ ປຸຈ຺ຉິເຕ ‘‘ທຸກ຺ຂມສ຺ສ ມຫພ຺ຠຍ’’ນ຺ຕິ ປເທນ ຠຄວຕາ ອາຣມ຺ໂຠ ຎາຕຸໍ ອິຈ຺ຉິໂຕ ອຕ຺ໂຖ ສຸທ຺ໂຘ ໂສຘິໂຕ ໂຫຕິ. ເສສຄາຖາສຸປິ ເອເສວ ນໂຍ.

ຍຕ຺ຖ ປຎ຺ເຫ ເອວໍ ນິຣວເສສວິສ຺ສຊ຺ຊນວເສນ ອາຣມ຺ໂຠ ສຸທ຺ໂຘ ໂສຘິໂຕ ຠວຕິ, ໂສ ປຎ຺ໂຫ ວິສ຺ສຊ຺ຊິໂຕ ໂສຘິໂຕ ຠວຕິ. ຍຕ຺ຖ ປຎ຺ເຫ ເອວໍ ນິຣວເສສວິສ຺ສຊ຺ຊນວເສນ ອາຣມ຺ໂຠ ຍາວ ອສຸທ຺ໂຘ ອໂສຘິໂຕ ຠວຕິ, ຕາວ ໂສ ປຎ຺ໂຫ ວິສ຺ສຊ຺ຊິໂຕ ໂສຘິໂຕ ນ ຠວຕີຕິ ໂຍຊນາ. ‘‘ເຕນາຫາ’’ຕິອາທ຺ຍານຸສນ຺ຘ຺ຍາທ຺ຍຕ຺ໂຖ ເຈວ ‘‘ນິຍຸຕ຺ໂຕ ໂສຘໂນ ຫາໂຣ’’ຕິ ອນຸສນ຺ຘ຺ຍາທ຺ຍຕ຺ໂຖ ຈ ວຸຕ຺ຕນຍານຸສາເຣນ ເວທິຕພ຺ໂພ.

ອິຕິ ໂສຘນຫາຣວິຠງ຺ເຄ ສຕ຺ຕິພລານຸຣູປາ ຣຈິຕາ

ວິຠາວນາ ນິຏ຺ຐິຕາ.

ປຓ຺ຑິເຕຫິ ປນ ອຏ຺ຐກຖາຏີການຸສາເຣນ ຄມ຺ຠີຣຕ຺ໂຖ ວິຕ຺ຖາຣໂຕ ວິຠຊິຕ຺ວາ ຄເຫຕພ຺ໂພຕິ.