໑໒. ໂອຕຣຓຫາຣວິຠງ຺ຄວິຠາວນາ

໔໒. ເຍນ ເຍນ ສໍວຓ຺ຓນາວິເສສຠູເຕນ ປຎ຺ຎຕ຺ຕິຫາຣວິຠງ຺ເຄນ ປຎ຺ຎຕ຺ຕິໂຍ ວິຠຕ຺ຕາ, ໂສ ສໍວຓ຺ຓນາວິເສສຠູໂຕ ວິຠງ຺ໂຄ ປຣິປຸຓ຺ໂຓ, ‘‘ກຕໂມ ໂອຕຣໂຓ ຫາຣວິຠງ຺ໂຄ’’ຕິ ປຸຈ຺ຉິຕພ຺ພຕ຺ຕາ ‘‘ຕຕ຺ຖ ກຕໂມ ໂອຕຣໂຓ ຫາໂຣ’’ຕິອາທິ ວຸຕ຺ຕໍ. ຕຕ຺ຖ ຕຕ຺ຖາຕິ ເຕສຸ ນິທ຺ທິຏ຺ເຐສຸ ໂສຬສສຸ ເທສນາຫາຣາທີສຸ ກຕໂມ ສໍວຓ຺ຓນາວິເສໂສ ໂອຕຣໂຓ ຫາໂຣ ໂອຕຣຓຫາຣວິຠງ຺ໂຄ ນາມາຕິ ປຸຈ຺ຉຕິ. ‘‘ໂຍ ຈ ປຏິຈ຺ຈຸປ຺ປາໂທ’’ຕິອາທິນິທ຺ເທສສ຺ສ ອິທານິ ມຍາ ວຸຈ຺ຈມາໂນ ‘‘ອຸທ຺ຘໍ ອໂຘ ສພ຺ພຘິ ວິປ຺ປມຸຕ຺ໂຕ’’ຕິອາທິໂກ ວິຕ຺ຖາຣສໍວຓ຺ຓນາວິເສໂສ ໂອຕຣໂຓ ຫາໂຣ ໂອຕຣຓຫາຣວິຠງ຺ໂຄ ນາມາຕິ ຄເຫຕພ຺ໂພ.

ຕຕ຺ຖ ປາເຐ ‘‘ກຕເມ ປຏິຈ຺ຈສມຸປ຺ປາທາທໂຍ ນິທ຺ຘາເຣຕ຺ວາ ກຕເມຫິ ນິທ຺ຘາຣິເຕຫິ ຘມ຺ເມຫິ ໂອຕຣຕີ’’ຕິ ປຸຈ຺ຉິຕພ຺ພຕ຺ຕາ ອິມສ຺ມິໍ ປາເຐ ອິເມ ປຏິຈ຺ຈສມຸປ຺ປາທາທໂຍ ນິທ຺ຘາເຣຕ຺ວາ ອິເມຫິ ນິທ຺ຘາຣິເຕຫິ ຘມ຺ເມຫິ ໂອຕຣຕີຕິ ທສ຺ເສຕຸໍ ‘‘ອຸທ຺ຘໍ ອໂຘ ສພ຺ພຘິ ວິປ຺ປມຸຕ຺ໂຕ’’ຕິອາທິ ວຸຕ຺ຕໍ. ຕຕ຺ຖ ອຸທ຺ຘນ຺ຕິ ກາມຘາຕຸໂຕ ອຸທ຺ຘໍ ອຸປຣິຠາເຄ ປວຕ຺ຕາຍ ຣູປຘາຕຸອຣູປຘາຕຸຍາ. ອໂຘຕິ ຣູປຘາຕຸໂຕ ເຫຏ຺ຐາຠາເຄ ປວຕ຺ຕາຍ ກາມຘາຕຸຍາ. ສພ຺ພຘີຕິ ສພ຺ພສ຺ມິໍ ກາມຣູປອຣູປຘາຕຸມ຺ຫິ. ວິປ຺ປມຸຕ຺ໂຕຕິ ປຏິສນ຺ຘິວເສນ ອປ຺ປວຕ຺ຕນໂຕ ວິປ຺ປມຸຕ຺ໂຕ ອເສກ຺ໂຂ. ອຍໍ ເສກ຺ໂຂ ທສ຺ສນມຄ຺ເຄນ ສກ຺ກາຍທິຏ຺ຐິຍາ ສມຸຄ຺ຆາຕຕ຺ຕາ ‘‘ອຫໍ ອສ຺ມີ’’ຕິ ອນານຸປສ຺ສີ ວິຫຣຕິ. ເອວໍ ເສກ຺ຂາຍ ວິມຸຕ຺ຕິຍາ ເຈວ ອເສກ຺ຂາຍ ວິມຸຕ຺ຕິຍາ ຈ ເສກ຺ໂຂ ເຈວ ອເສກ຺ໂຂ ຈ ອຕິຓ຺ຓປຸພ຺ພໍ ໂອຆໍ ອປຸນພ຺ຠວາຍ ວິມຸຕ຺ໂຕ ອຸທຕາຣີຕິ ຄາຖາຕ຺ໂຖ ຄເຫຕພ຺ໂພ.

ຕສ຺ມິໍ ຄາຖາປາເຐ ‘‘ກຕເມ ນິທ຺ຘາເຣຕ຺ວາ ກຕເມຫິ ໂອຕຣຕີ’’ຕິ ປຸຈ຺ຉິຕພ຺ພຕ຺ຕາ ‘‘ອຸທ຺ຘນ຺ຕິ ຣູປຘາຕູ’’ຕິອາທິ ວຸຕ຺ຕໍ. ອຸທ຺ຘນ຺ຕິ ມນຸສ຺ສໂລກໂຕ ອຸທ຺ຘໍ ຈາຕຸມຫາຣາຊິກາທໂຍປິ ຄຫິຕາຕິ ອຕ຺ຖສມ຺ຠວໂຕ ຕໍ ນິວຕ຺ເຕຕຸໍ ‘‘ຣູປຘາຕຸ ອຣູປຘາຕູ’’ຕິ ວຸຕ຺ຕໍ. ອໂຘຕິ ມນຸສ຺ສຠວໂຕ ອໂຘ ຈຕ຺ຕາໂຣ ອປາຍຠູມິໂຍ ຈ ຄຫິຕາຕິ ອຕ຺ຖສມ຺ຠວໂຕ ຕໍ ນິວຕ຺ເຕຕຸໍ ‘‘ກາມຘາຕູ’’ຕິ ວຸຕ຺ຕໍ. ສພ຺ພຘີຕິ ຈຕຸຠູມິເກຕິ ອຕ຺ຖສມ຺ຠວໂຕ ‘‘ເຕຘາຕຸເກ’’ຕິ ວຸຕ຺ຕໍ. ອຍໍ ອເສກ຺ຂາ ວິມຸຕ຺ຕີຕິ ວິມຸຕ຺ຕສ຺ສ ອເສກ຺ຂສ຺ສ ຍາ ວິຣາຄຕາ ອຕ຺ຖິ, ອຍມ຺ປິ ວິຣາຄຕາ ອເສກ຺ຂຜລວິມຸຕ຺ຕິ. ‘‘ອຸທ຺ຘໍ ອໂຘ ສພ຺ພຘິ ວິປ຺ປມຸຕ຺ໂຕ’’ຕິ ປາເຐ ວຸຕ຺ຕປ຺ປກາຣາ ອຍໍ ອເສກ຺ຂາ ວິມຸຕ຺ຕິ ນິທ຺ຘາຣິຕາຕິ ອຕ຺ໂຖ. ນິທ຺ຘາຣິຕາຍ ອເສກ຺ຂາຍ ວິມຸຕ຺ຕິຍາ ຍານິ ສທ຺ຘາທິປຎ຺ຈິນ຺ທ຺ຣິຍານິ ນິທ຺ຘາຣິຕານິ, ຕານິເຍວ ອເສກ຺ຂານິ ປຎ຺ຈິນ຺ທ຺ຣິຍານິ ຠວນ຺ຕິ. ອຍໍ ວຸຕ຺ຕປ຺ປກາຣາ ໂອຕຣຓາ ອິນ຺ທ຺ຣິເຍຫິ ວິມຸຕ຺ຕິຍາ ໂອຕຣຓາ ນາມ ປເວສນາ ນາມ.

ຕານິເຍວ ອເສກ຺ຂານິ ປຎ຺ຈິນ຺ທ຺ຣິຍານິ ວິຊ຺ຊາຍ ອຸປກາຣກຕ຺ຕາ, ປຎ຺ຎາປທຏ຺ຐານຕ຺ຕາ ວາ ວິຊ຺ຊາ ຠວນ຺ຕິ. ວິຊ຺ຊຸປ຺ປາທາ ຕາທິສາຍ ວິຊ຺ຊາຍ ອຸປ຺ປາທາ ອຸປ຺ປາທເຫຕຸໂຕ ອວິຊ຺ຊານິໂຣໂຘ ອວິຊ຺ຊາຍ ນິໂຣໂຘ ໂຫຕິ…ເປ… ທຸກ຺ຂກ຺ຂນ຺ຘສ຺ສ ນິໂຣໂຘ ໂຫຕິ, ອຍໍ ວຸຕ຺ຕປ຺ປກາຣາ ໂອຕຣຓາ ປຏິຈ຺ຈສມຸປ຺ປາເທຫິ ໂອຕຣຓາ ນາມ.

ຕານິເຍວ ອເສກ຺ຂານິ ປຎ຺ຈິນ຺ທ຺ຣິຍານິ ຕີຫິ ຂນ຺ເຘຫິ ສງ຺ຄຫິຕານິ ສທ຺ຘາວີຣິເຍຫິ ສີລສມ຺ຠວໂຕ, ສຕິຍາ ຈ ປຎ຺ຎານຸວຕ຺ຕກຕ຺ຕາ. ເສສາ ວຸຕ຺ຕນຍານຸສາເຣນ ເວທິຕພ຺ພາ.

‘‘ອຸທ຺ຘໍ ອໂຘ ສພ຺ພຘິ ວິປ຺ປມຸຕ຺ໂຕ’’ຕິ ປາເຐ ນິທ຺ຘາເຣຕ຺ວາ ໂອຕຣຓາ ອາຈຣິເຍນ ວິຠຕ຺ຕາ, ອມ຺ເຫຫິ ຈ ຎາຕາ, ‘‘ອຍໍ ອຫສ຺ມີຕິ ອນານຸປສ຺ສີ’’ຕິ ປາເຐ ‘‘ກຕເມ ນິທ຺ຘາເຣຕ຺ວາ ກຕເມຫິ ໂອຕຣເຓຫິ ໂອຕຣຕີ’’ຕິ ວຕ຺ຕພ຺ພຕ຺ຕາ ‘‘ອຍໍ ອຫສ຺ມີຕິ ອນານຸປສ຺ສີຕິ ອຍໍ ສກ຺ກາຍທິຏ຺ຐິຍາ’’ຕິອາທິ ວຸຕ຺ຕໍ. ໂຍ ອຍໍ ເສກ຺ໂຂ ‘‘ອຫມສ຺ມີ’’ຕິ ນານຸປສ຺ສີ, ຕສ຺ສ ເສກ຺ຂສ຺ສ ສກ຺ກາຍທິຏ຺ຐິຍາ ໂຍ ສມຸຄ຺ຆາໂຕ ອຕ຺ຖິ, ຍາ ສມຸຄ຺ຆາຕສງ຺ຂາຕາ ສມຸຄ຺ຆາຕວິມຸຕ຺ຕິ ເສກ຺ຂາ ວິມຸຕ຺ຕິ ໂຫຕິ, ຕສ຺ສາ ເສກ຺ຂາຍ ວິມຸຕ຺ຕິຍາ ຍານິ ສທ຺ຘາທິປຎ຺ຈິນ຺ທ຺ຣິຍານິ ນິທ຺ຘາຣິຕານິ, ຕານິເຍວ ເສກ຺ຂານິ ປຎ຺ຈິນ຺ທ຺ຣິຍານິ ຠວນ຺ຕິ. ອຍໍ ວຸຕ຺ຕປ຺ປກາຣາ ໂອຕຣຓາ ອິນ຺ທ຺ຣິເຍຫິ ໂອຕຣຓາ ນາມ. ເສສາ ວຸຕ຺ຕນຍານຸສາເຣນ ເວທິຕພ຺ພາ.

໔໓. ‘‘ອຸທ຺ຘໍ ອໂຘ’’ຕິອາທິຄາຖາຍໍ ໂອຕຣຓາ ອາຈຣິເຍນ ວິຠຕ຺ຕາ, ອມ຺ເຫຫິ ຈ ຎາຕາ, ‘‘ນິສ຺ສິຕສ຺ສ ຈລິຕ’’ນ຺ຕິອາທິປາເຐ ‘‘ກຕເມ ນິທ຺ຘາເຣຕ຺ວາ ກຕເມຫິ ໂອຕຣຕີ’’ຕິ ປຸຈ຺ຉິຕພ຺ພຕ຺ຕາ ‘‘ນິສ຺ສິຕສ຺ສ ຈລິຕໍ, ອນິສ຺ສິຕສ຺ສ ຈລິຕໍ ນຕ຺ຖີ’’ຕິອາທິ ວຸຕ຺ຕໍ. ນິສ຺ສິຕສ຺ສ ປຸຄ຺ຄລສ຺ສ ຈລິຕໍ ຈລນໍ ອຕ຺ຖິ, ອນິສ຺ສິຕສ຺ສ ປຸຄ຺ຄລສ຺ສ ຈລິຕໍ ຈລນໍ ນຕ຺ຖິ. ຈລິເຕ ຈລເນ ອສຕິ ປສ຺ສທ຺ຘິ ຠວຕິ, ປສ຺ສທ຺ຘິຍາ ສຕິ ວິຊ຺ຊມານາຍ ນຕິ ນ ໂຫຕິ, ນຕິຍາ ອສຕິ ອວິຊ຺ຊມານາຍ ອາຄຕິຄຕິ ນ ໂຫຕິ, ອາຄຕິຄຕິຍາ ອສຕິ ອວິຊ຺ຊມານາຍ ຈຸຕູປປາໂຕ ນ ໂຫຕິ, ຈຸຕູປປາເຕ ອສຕິ ອວິຊ຺ຊມາເນ ອິຘ ຉສຸ ອຊ຺ຌຕ຺ຕິກາຍຕເນສຸ ອຕ຺ຕານໍ ເນວ ປສ຺ສຕິ, ຫຸຣໍ ວາ ຉສຸ ພາຫິຣາຍຕເນສຸ ອຕ຺ຕານໍ ນ ປສ຺ສຕິ, ອຸຠຍໍ ອນ຺ຕເຣນ ວຊ຺ເຊຕ຺ວາ ຜສ຺ສາທິສມຸທາເຍສຸ ຘມ຺ເມສຸ ອຕ຺ຕານໍ ນ ປສ຺ສຕິ, ເອໂສວ ປຏິຈ຺ຈສມຸປ຺ປາໂທ ‘‘ອວິຊ຺ຊານິໂຣຘາ’’ຕິອາທິໂກ ທຸກ຺ຂສ຺ສ ອນ຺ໂຕ ອວສານໍ ກໂຣຕີຕິ ອຕ຺ໂຖ.

ນິສ຺ສິຕສ຺ສ ຈລິຕນ຺ຕິ ເອຕ຺ຖ ‘‘ນິສ຺ສໂຍ ກຕິວິໂຘ’’ຕິ ປຸຈ຺ຉິຕພ຺ພຕ຺ຕາ ‘‘ນິສ຺ສິຕສ຺ສ ຈລິຕນ຺ຕິ ນິສ຺ສໂຍ ນາມາ’’ຕິອາທິ ວຸຕ຺ຕໍ. ຕຕ຺ຖາຕິ ເຕສຸ ທຸວິເຘສຸ ຕຓ຺ຫານິສ຺ສຍທິຏ຺ຐິນິສ຺ສເຍສຸ ຍາ ເຈຕນາ ຣຕ຺ຕສ຺ສ ປຸຄ຺ຄລສ຺ສ ນິທ຺ຘາຣິຕາ, ອຍໍ ເຈຕນາຘມ຺ໂມ ຕຓ຺ຫານິສ຺ສໂຍ ນາມ. ຍາ ເຈຕນາ ມູຬ຺ຫສ຺ສ ປຸຄ຺ຄລສ຺ສ ນິທ຺ຘາຣິຕາ. ອຍໍ ເຈຕນາຘມ຺ໂມ ທິຏ຺ຐິນິສ຺ສໂຍ ນາມ. ສາ ທຸວິຘາ ເຈຕນາ ປນ ສງ຺ຂາຣາ ນາມ. ສງ຺ຂາຣປຈ຺ຈຍາ ວິຎ຺ຎາຓໍ…ເປ… ສພ຺ໂພ ປຏິຈ຺ຈສມຸປ຺ປາໂທ ນິທ຺ຘາຣິໂຕ. ອຍໍ ວຸຕ຺ຕປ຺ປກາຣາ ໂອຕຣຓາ ປຏິຈ຺ຈສມຸປ຺ປາເທຫິ ໂອຕຣຓາ ນາມ.

ຕຕ຺ຖາຕິ ຕສ຺ມິໍ ຕຓ຺ຫານິສ຺ສຍທິຏ຺ຐິນິສ຺ສເຍ ຍາ ເວທນາ ຣຕ຺ຕສ຺ສ ປຸຄ຺ຄລສ຺ສ ນິທ຺ຘາຣິຕາ, ອຍໍ ສຸຂາ ເວທນາ. ຍາ ເຈຕນາ ສມ຺ມູຬ຺ຫສ຺ສ ປຸຄ຺ຄລສ຺ສ ນິທ຺ຘາຣິຕາ, ອຍໍ ອທຸກ຺ຂມສຸຂາ ເວທນາ. ເຍຠຸຍ຺ເຍນ ເສສາ ວຸຕ຺ຕນຍານຸສາເຣນ ເວທິຕພ຺ພາ.

໔໔. ‘‘ນິສ຺ສິຕສ຺ສ ຈລິຕ’’ນ຺ຕິອາທິປາເຐ ໂອຕຣຓາ ອາຈຣິເຍນ ວິຠຕ຺ຕາ, ອມ຺ເຫຫິ ຈ ຎາຕາ.

‘‘ເຍ ເກຈິ ໂສກາ ປຣິເທວິຕາ ວາ…ເປ…

ປິຍໍ ນ ກຍິຣາຖ ກຸຫິຎ຺ຈິ ໂລເກ’’ຕິ. –

ຄາຖາປາເຐ ‘‘ກຕເມ ນິທ຺ຘາເຣຕ຺ວາ ກຕເມຫິ ໂອຕຣຕີ’’ຕິ ປຸຈ຺ຉິຕພ຺ພຕ຺ຕາ ‘‘ເຍ ເກຈິ ໂສກາ’’ຕິອາທິ ວຸຕ຺ຕໍ. ເຍ ເກຈິ ໂສກາ ວາ ຍາ ກາຈິ ປຣິເທວິຕາ ວາ ອເນກຣູປາ ຍາ ກາຈິ ທຸກ຺ຂາ ວາ ໂລກສ຺ມິໍ ສມ຺ຠວນ຺ຕິ. ເອເຕ ໂສກາທໂຍ ປິຍໍ ປຏິຈ຺ຈ ປຠວນ຺ຕິ, ປິເຍ ອສນ຺ເຕ ເອເຕ ໂສກາທໂຍ ນ ຠວນ຺ຕິ. ຕສ຺ມາ ປິເຍ ອສນ຺ເຕ ໂສກາທີນໍ ອຠາວໂຕ ເຍສໍ ວີຕໂສການໍ ກຸຫິຎ຺ຈິ ໂລເກປິ ນຕ຺ຖິ, ເຕ ວີຕໂສກາ ສຸຂິໂນ ຠວນ຺ຕິ. ຕສ຺ມາ ວີຕໂສການໍ ສຸຂສມ຺ປນ຺ນຕ຺ຕາ ອໂສກໍ ວິຣຊໍ ປຕ຺ຖຍາໂນ ສປ຺ປຸຣິໂສ ກຸຫິຎ຺ຈິ ໂລເກ ປິຍໍ ນ ກຍິຣາຖາຕິ ຄາຖາຕ຺ໂຖ.

‘‘ເຍ ເກຈິ ໂສກາ ປຣິເທວິຕາ ວາ, ທຸກ຺ຂາ ຈ ໂລກສ຺ມິມເນກຣູປາ ປິຍໍ ປຏິຈ຺ຈ ປຠວນ຺ຕິ ເອເຕ’’ຕິ ເອຕ຺ຖ ປາເຐ ຍາ ເວທນາ ນິທ຺ຘາຣິຕາ, ອຍໍ ທຸກ຺ຂາ ເວທນາ. ເສສາ ວຸຕ຺ຕນຍານຸສາເຣນ ເວທິຕພ຺ພາ.

‘‘ເຍ ເກຈິ ໂສກາ’’ຕິອາທິຄາຖາປາເຐ ໂອຕຣຓາ ອາຈຣິເຍນ ວິຠຕ຺ຕາ, ອມ຺ເຫຫິ ຈ ຎາຕາ, ‘‘ກາມໍ ກາມຍມານສ຺ສາ’’ຕິອາທິຄາຖາປາເຐ ‘‘ກຕເມ ນິທ຺ຘາເຣຕ຺ວາ ກຕເມຫິ ໂອຕຣຕີ’’ຕິ ວຕ຺ຕພ຺ພຕ຺ຕາ ‘‘ກາມໍ ກາມຍມານສ຺ສາ’’ຕິອາທິ ວຸຕ຺ຕໍ. ຕສ຺ສໍ ຄາຖາຍໍ ອຕ຺ໂຖ ເຫຏ຺ຐາ ວຸຕ຺ໂຕວ.

ຕຕ຺ຖາຕິ ຕສ຺ມິໍ ‘‘ປີຕິມໂນ ໂຫຕີ’’ຕິ ປາເຐ ຍາ ປີຕິມນຕາ ວຸຕ຺ຕາ ນິທ຺ຘາຣິຕາ, ອຍໍ ປີຕິມນຕາ ອນຸນໂຍ ໂຫຕິ. ‘‘ສລ຺ລວິທ຺ໂຘວ ຣຸປ຺ປຕີ’’ຕິ ປາເຐ ຍໍ ຣຸປ຺ປນໍ ອາຫ, ອິທໍ ຣຸປ຺ປນໍ ປຏິຆໍ ໂຫຕິ, ອນຸນໂຍ ຈ ປຏິຆຎ຺ຈ ນິທ຺ຘາຣິຕາຕິ ອຕ຺ໂຖ.

‘‘ອນຸນເຍ ຈ ປຏິເຆ ຈ ນິທ຺ຘາຣິເຕ ກຕໂມ ຘມ຺ໂມ ນິທ຺ຘາຣິໂຕ’’ຕິ ວຕ຺ຕພ຺ພຕ຺ຕາ ‘‘ອນຸນໂຍ ປຏິຆຎ຺ຈ ປນ ຕຓ຺ຫາປກ຺ໂຂ’’ຕິ ວຸຕ຺ຕໍ. ຕຓ຺ຫາປກ຺ໂຂຕິ ຕຓ຺ຫາປກ຺ຂຕ຺ຕາ ຕຓ຺ຫາ ນິທ຺ຘາຣິຕາ. ‘‘ອນຸນໂຍ ຕຓ຺ຫາປກ຺ໂຂ ໂຫຕຸ, ປຏິຆໍ ປນ ຕຓ຺ຫາປກ຺ຂໍ ນ ສິຍາ’’ຕິ ເຈ ວເທຍ຺ຍ? ປຏິຆສ຺ສ ອຕ຺ຕສິເນຫວເສນ ປວຕ຺ຕນໂຕ ປຏິຆມ຺ປິ ຕຓ຺ຫາປກ຺ຂໍ ໂຫຕິ. ‘‘ຕຓ຺ຫາຍ ນິທ຺ຘາຣິຕາຍ ກຕໂມ ນິທ຺ຘາຣິໂຕ’’ຕິ ວຕ຺ຕພ຺ພຕ຺ຕາ ‘‘ຕຓ຺ຫາຍ ຈ ປນາ’’ຕິອາທິ ວຸຕ຺ຕໍ. ທສນ຺ນໍ ຣູປາຍຕນານໍ ຕຓ຺ຫາຍ ປທຏ຺ຐານຕ຺ຕາ ທສ ຣູປານິ ອາຍຕນານິ ນິທ຺ຘາຣິຕານິ. ອຍໍ ວຸຕ຺ຕປ຺ປກາຣາ ໂອຕຣຓາ ອາຍຕເນຫິ ໂອຕຣຓາ ນາມ. ສຸຕ຺ເຕ ອາຄຕາ ປຏິຈ຺ຈສມຸປ຺ປາທາທໂຍ ເຕນ ສໍວຓ຺ຓນາວິເສເສນ ນເຍນ ນິທ຺ຘາຣິຕາ, ສຸຕ຺ຕຕ຺ຖມຸເຂນ ວາ ນິທ຺ຘາຣິຕາ, ເຕນ…ເປ… ນເຍນ ນິທ຺ຘາຣິເຕສຸ ປຏິຈ຺ຈສມຸປ຺ປາທາທີສຸ ໂຍ ສໍວຓ຺ຓນານຍວິເສໂສ ຕທຕ຺ຖວາຈກວເສນ ວາ ຕທຕ຺ຖຎາປກວເສນ ວາ ໂອຕຣຕິ ປວິສຕິ ສໂມສຣຕິ, ໂສ ສໍວຓ຺ຓນານຍວິເສໂສ ໂອຕຣໂຓ ຫາໂຣ ນາມາຕິ ອຘິປ຺ປາໂຍ ທຏ຺ຐພ຺ໂພ. ເສເສສຸປິ ວຸຕ຺ຕນຍານຸສາເຣນ ໂອຕຣຓາ ຄເຫຕພ຺ພາ. ‘‘ເຕນາຫ ອາຍສ຺ມາ’’ຕິອາທ຺ຍານຸສນ຺ຘ຺ຍາທິອຕ຺ໂຖ ເຈວ ‘‘ນິຍຸຕ຺ໂຕ ໂອຕຣໂຓ ຫາໂຣ’’ຕິ ອນຸສນ຺ຘ຺ຍາທິອຕ຺ໂຖ ຈ ວຸຕ຺ຕນຍານຸສາເຣນ ເວທິຕພ຺ໂພ.

ອິຕິ ໂອຕຣຓຫາຣວິຠງ຺ເຄ ສຕ຺ຕິພລານຸຣູປາ ຣຈິຕາ

ວິຠາວນາ ນິຏ຺ຐິຕາ.

ປຓ຺ຑິເຕຫິ ປນ ອຏ຺ຐກຖາຏີການຸສາເຣນ ຄມ຺ຠີຣຕ຺ໂຖ ວິຕ຺ຖາຣໂຕ ວິຠຊິຕ຺ວາ ຄເຫຕພ຺ໂພຕິ.