ທຸຕິຍຊ຺ຌານກຖາວຓ຺ຓນາ

໒໒໙. ຕາຫິ ຕາຫິ ອຸທກສິຣາຫິ ອຸພ຺ຠິຊ຺ຊຕິ ອຸທ຺ຘໍ ນິກ຺ຂມຕີຕິ ອຸພ຺ຠິທໍ, ຕາທິສໍ ອຸທກໍ ຍສ຺ສາຕິ ອຸພ຺ຠິໂທທໂກ, ທ-ກາຣສ຺ສ ປນ ຕ-ກາເຣ ກເຕ ອຸພ຺ຠິໂຕທໂກ, ອິມມຕ຺ຖໍ ທສ຺ເສຕຸໍ ‘‘ອຸພ຺ຠິນ຺ນອຸທໂກ’’ຕິ ວຸຕ຺ຕໍ, ນທີຕີເຣ ຂຕກູປໂກ ວິຍ ອຸພ຺ຠິຊ຺ຊນກອຸທໂກຕິ ອຕ຺ໂຖ. ອຸພ຺ຠິຊ຺ຊນກມ຺ປິ ອຸທກໍ ກຕ຺ຖຈິ ເຫຏ຺ຐາ ອຸພ຺ຠິຊ຺ຊິຕ຺ວາ ຘາຣາວເສນ ອຸຏ຺ຐຫິຕ຺ວາ ພຫິ ຄຈ຺ຉຕິ, ນ ຕໍ ໂກຈິ ອນ຺ໂຕເຍວ ປຕິຏ຺ຐິຕໍ ກາຕຸໍ ສກ຺ໂກຕິ ຘາຣາວເສນ ອຸຏ຺ຐຫນໂຕ, ອິຘ ປນ ວາລິກາຕເຏ ວິຍ ອຸທກຣຫທສ຺ສ ອນ຺ໂຕເຍວ ອຸພ຺ຠິຊ຺ຊິຕ຺ວາ ຕຕ຺ເຖວ ຕິຏ຺ຐຕິ, ນ ຘາຣາວເສນ ອຸຏ຺ຐຫິຕ຺ວາ ພຫິ ຄຈ຺ຉຕີຕິ ວິຎ຺ຎາຍຕິ ອໂຂຠກສ຺ສ ສນ຺ນິສິນ຺ນສ຺ເສວ ອຸທກສ຺ສ ອຘິປ຺ເປຕຕ຺ຕາຕິ ອິມມຕ຺ຖໍ ສນ຺ຘາຍາຫ ‘‘ນ ເຫຏ຺ຐາ’’ຕິອາທິ. ເຫຏ຺ຐາຕິ ອຸທກຣຫທສ຺ສ ເຫຏ຺ຐາ ມຫາອຸທກສິຣາ, ໂລຫິຕານຸຄຕາ ໂລຫິຕສິຣາ ວິຍ ອຸທການຸຄໂຕ ປຖວິປເທໂສ ‘‘ອຸທກສິຣາ’’ຕິ ວຸຈ຺ຈຕິ. ອຸຄ຺ຄຈ຺ຉນກອຸທໂກຕິ ຘາຣາວເສນ ອຸຏ຺ຐຫນກອຸທໂກ. ອນ຺ໂຕເຍວາຕິ ອຸທກຣຫທສ຺ສ ອນ຺ໂຕ ສມຕລປເທເສ ເອວ. ອຸພ຺ຠິຊ຺ຊນກອຸທໂກຕິ ອຸພ຺ຠິຊ຺ຊິຕ຺ວາ ຕຕ຺ເຖວ ຕິຏ຺ຐນກອຸທໂກ. ອາຄມນມຄ຺ໂຄຕິ ພາຫິຣໂຕ ອຸທກຣຫທາຠິມຸຂໍ ອາຄມນມຄ຺ໂຄ. ກາເລນ ກາລນ຺ຕິ ຣຸຬ຺ຫີປທໍ ‘‘ເອໂກ ເອກາຍາ’’ຕິອາທິ (ປາຣາ. ໔໔໓, ໔໔໔, ໔໕໒) ວິຍາຕິ ວຸຕ຺ຕໍ ‘‘ກາເລ ກາເລ’’ຕິ. ອນ຺ວທ຺ຘມາສນ຺ຕິ ເອຕ຺ຖ ອນຸສທ຺ໂທ ພ຺ຍາປເນ. ວສ຺ສານສ຺ສ ອທ຺ຘມາສໍ ອທ຺ຘມາສນ຺ຕິ ອຕ຺ໂຖ. ເອວໍ ອນຸທສາຫນ຺ຕິ ເອຕ຺ຖາປິ. ວຸຏ຺ຐິນ຺ຕິ ວສ຺ສນໍ. ອນຸປ຺ປວຈ຺ເຉຍ຺ຍາຕິ ນ ອຸປວຈ຺ເຉຍ຺ຍ. ວສ຺ສສທ຺ທໂຕ ຈສ຺ສ ສິທ຺ຘີຕິ ທສ຺ເສຕິ ‘‘ນ ວສ຺ເສຍ຺ຍາ’’ຕິ ອິມິນາ.

‘‘ສີຕາ ວາຣິຘາຣາ’’ຕິ ອິຕ຺ຖິລິງ຺ຄປທສ຺ສ ‘‘ສີຕໍ ຘາຣ’’ນ຺ຕິ ນປຸໍສກລິງ຺ເຄນ ອຕ຺ຖວຈນໍ ຘາຣສທ຺ທສ຺ສ ທ຺ວິລິງ຺ຄິກຠາວວິຎ຺ຎາປນຕ຺ຖໍ. ສີຕນ຺ຕິ ໂຂຠນາຠາເວນ ສີຕລໍ, ປຸຣາຓປຓ຺ຓຕິຓກຏ຺ຐາທິສໍກິຓ຺ຓາຠາເວນ ວາ ເສຕໍ ປຣິສຸທ຺ຘໍ. ເສຕໍ ສີຕນ຺ຕິ ຫິ ປຣິຍາໂຍ. ກສ຺ມາ ປເນຕ຺ຖ ອຸພ຺ຠິໂທທໂກເຍວ ຣຫໂທ ຄຫິໂຕ, ນ ອິຕເຣຕິ ອນຸໂຍຄມປເນຕິ ‘‘ເຫຏ຺ຐາ ອຸຄ຺ຄຈ຺ຉນອຸທກຎ຺ຫີ’’ຕິອາທິນາ. ອຸຄ຺ຄນ຺ຕ຺ວາ ອຸຄ຺ຄນ຺ຕ຺ວາ ຠິຊ຺ຊນ຺ຕນ຺ຕິ ອຸຏ຺ຐຫິຕ຺ວາ ອຸຏ຺ຐຫິຕ຺ວາ ຘາຣາກິຣຓວເສນ ອຸພ຺ຠິຊ຺ຊນ຺ຕໍ, ວິນສ຺ສນ຺ຕໍ ວາ. ໂຂເຠຕີຕິ ອາໂລເຬຕິ. ວຸຏ຺ຐີຕິ ວສ຺ສນໍ. ຘາຣານິປາຕປຸພ຺ພຸຬເກຫີຕິ ອຸທກຘາຣານິປາເຕຫິ ຈ ຕໂຕເຍວ ອຸຏ຺ຐິຕອຸທກປຸພ຺ພຸຬກສງ຺ຂາເຕຫິ ເຜຓປຏເລຫິ ຈ. ເອວໍ ຍຖາກ຺ກມໍ ຕິຓ຺ຓມ຺ປິ ຣຫທານມຄເຫຕພ຺ພຕໍ ວຕ຺ວາ ອຸພ຺ຠິໂທທກສ຺ເສວ ຄເຫຕພ຺ພຕໍ ວທຕິ ‘‘ສນ຺ນິສິນ຺ນເມວາ’’ຕິອາທິນາ. ຕຕ຺ຖ ສນ຺ນິສິນ຺ນເມວາຕິ ສມ຺ມາ, ສມໍ ວາ ນິສິນ຺ນເມວ, ອປຣິກ຺ໂຂຠຕາຍ ນິຈ຺ຈລເມວ, ສຸປ຺ປສນ຺ນເມວາຕິ ອຘິປ຺ປາໂຍ. ອິທ຺ຘິນິມ຺ມິຕມິວາຕິ ອິທ຺ຘິມຕາ ອິທ຺ຘິຍາ ຕຖາ ນິມ຺ມິຕໍ ອິວ. ຕຕ຺ຖາຕິ ຕສ຺ມິໍ ອຸປໂມປເມຍ຺ຍວຈເນ. ເສສນ຺ຕິ ‘‘ອຠິສນ຺ເທຕີ’’ຕິອາທິກໍ.