ຕິປຸກ຺ຂລນຍວຓ຺ຓນາ

ອາຆາຕາທີນມກຣຓວຈເນນ ອໂທສສິທ຺ຘິ, ຕຖາ ປາຓາຕິປາຕຜຣຸສວາຈາຫິ ປຏິວິຣຕິວຈເນນາປິ. ອານນ຺ທາທີນມກຣຓວຈເນນ ປນ ອໂລຠສິທ຺ຘິ, ຕຖາ ອພ຺ຣຫ຺ມຈຣິຍໂຕ ປຏິວິຣຕິວຈເນນາປິ. ອທິນ຺ນາທານາທີຫິ ປນ ປຏິວິຣຕິວຈເນນ ຕທຸຠຍສິທ຺ຘິ. ‘‘ຕຍິທໍ ຠິກ຺ຂເວ, ຕຖາຄໂຕ ປຊານາຕີ’’ຕິອາທິນາ ອໂມຫສິທ຺ຘິ. ອິຕິ ຕີຫິ ອກຸສລມູເລຫິ ຄຫິເຕຫິ ຕປ຺ປຏິປກ຺ຂໂຕ ອາຆາຕາທີນມກຣຓວຈເນນ ຈ ຕີຓິ ກຸສລມູລານິ ສິທ຺ຘານິເຍວ ໂຫນ຺ຕິ. ຕຕ຺ຖ ຕີຫິ ອກຸສລມູເລຫິ ຕິວິຘທຸຈ຺ຈຣິຕສໍກິເລສມລວິສມາກຸສລສຎ຺ຎາວິຕກ຺ກປຎ຺ຈາທິວເສນ ສພ຺ໂພປິ ອກຸສລປກ຺ໂຂ ວິຕ຺ຖາເຣຕພ຺ໂພ. ຕຖາ ຕີຫິ ກຸສລມູເລຫິ ຕິວິຘສຸຈຣິຕໂວທານສມກຸສລສຎ຺ຎາວິຕກ຺ກປຎ຺ຎາສທ຺ຘມ຺ມສມາຘິ- ວິໂມກ຺ຂມຸຂວິໂມກ຺ຂາທິວເສນ ສພ຺ໂພປິ ກຸສລປກ຺ໂຂ ວິຠາເວຕພ຺ໂພ.

ເອຕ຺ຖ ຈາຍໍ ສຈ຺ຈໂຍຊນາ – ໂລໂຠ ສມຸທຍສຈ຺ຈໍ, ສພ຺ພານິ ວາ ກຸສລາກຸສລມູລານິ, ເຕຫິ ປນ ນິພ຺ພຕ຺ຕາ ເຕສມຘິຏ຺ຐານໂຄຈຣຠູຕາ ອຸປາທານກ຺ຂນ຺ຘາ ທຸກ຺ຂສຈ຺ຈໍ, ເຕສມປ຺ປວຕ຺ຕິ ນິໂຣຘສຈ຺ຈໍ, ນິໂຣຘປຊານນາ ວິໂມກ຺ຂາທິກາ ມຄ຺ຄສຈ຺ຈນ຺ຕິ. ອຍໍ ອກຸສລມູເລຫິ ສໍກິເລສປກ຺ຂໍ, ກຸສລມູເລຫິ ຈ ໂວທານປກ຺ຂໍ ຈຕຸສຈ຺ຈໂຍຊນມຸເຂນ ນຍນລກ຺ຂຓສ຺ສ ຕິປຸກ຺ຂລນຍສ຺ສ ຠູມິ. ຕຖາ ຫິ ວຸຕ຺ຕໍ –

‘‘ໂຍ ອກຸສເລ ສມູເລຫິ,

ເນຕິ ກຸສເລ ຈ ກຸສລມູເລຫີ’’ຕິອາທິ. (ເນຕ຺ຕິ. ໔.໑໘);