ສີຫວິກ຺ກີຬິຕນຍວຓ຺ຓນາ

ອາຆາຕານນ຺ທາທີນມກຣຓ-ວຈເນນ ສຕິສິທ຺ຘິ. ມິຈ຺ຉາຊີວາປຏິວິຣຕິວຈເນນ ວີຣິຍສິທ຺ຘິ. ວີຣິເຍນ ຫິ ກາມພ຺ຍາປາທວິຫິໍສາວິຕກ຺ເກ ວິໂນເທຕິ, ວີຣິຍສາຘນຎ຺ຈ ອາຊີວປາຣິສຸທ຺ຘິສີລນ຺ຕິ. ປາຓາຕິປາຕາທີຫິ ປຏິວິຣຕິວຈເນນ ສຕິສິທ຺ຘິ. ສຕິຍາ ຫິ ສາວຊ຺ຊານວຊ຺ໂຊ ທິຏ຺ໂຐ ໂຫຕິ. ຕຕ຺ຖ ຈ ອາທີນວານິສໍເສ ສລ຺ລກ຺ເຂຕ຺ວາ ສາວຊ຺ຊໍ ປຫາຍ ອນວຊ຺ຊໍ ສມາທາຍ ວຕ຺ຕຕິ. ຕຖາ ຫິ ສາ ‘‘ນິຍ຺ຍາຕນປຈ຺ຈຸປຏ຺ຐານາ’’ຕິ ວຸຈ຺ຈຕິ. ‘‘ຕຍິທໍ ຠິກ຺ຂເວ, ຕຖາຄໂຕ ປຊານາຕີ’’ຕິອາທິນາ ສມາຘິປຎ຺ຎາສິທ຺ຘິ. ປຎ຺ຎວາ ຫິ ຍຖາຠູຕາວໂພໂຘ ສມາຫິໂຕ ຈ ຍຖາຠູຕໍ ປຊານາຕີຕິ.

ຕຖາ ‘‘ນິຈ຺ໂຈ ຘຸໂວ’’ຕິອາທິນາ ອນິຈ຺ເຈ ‘‘ນິຈ຺ຈ’’ນ຺ຕິ ວິປລ຺ລາໂສ, ‘‘ອໂຣໂຄ ປຣໍ ມຣຓາ, ເອກນ຺ຕສຸຂີ ອຕ຺ຕາ, ທິຏ຺ຐຘມ຺ມນິພ຺ພານປ຺ປຕ຺ໂຕ’’ຕິ ຈ ເອວມາທີຫິ ອສຸເຂ ‘‘ສຸຂ’’ນ຺ຕິ ວິປລ຺ລາໂສ. ‘‘ປຎ຺ຈຫິ ກາມຄຸເຓຫິ ສມປ຺ປິໂຕ’’ຕິອາທິນາ ອສຸເຠ ‘‘ສຸຠ’’ນ຺ຕິ ວິປລ຺ລາໂສ. ສພ຺ເພເຫວ ທິຏ຺ຐິປ຺ປກາສນປເທຫິ ອນຕ຺ຕນິ ‘‘ອຕ຺ຕາ’’ຕິ ວິປລ຺ລາໂສຕິ ເອວເມຕ຺ຖ ຈຕ຺ຕາໂຣ ວິປລ຺ລາສາ ສິທ຺ຘາ ໂຫນ຺ຕິ, ເຕສໍ ປຏິປກ຺ຂໂຕ ຈຕ຺ຕາຣິ ສຕິປຏ຺ຐານານິ ສິທ຺ຘາເນວ. ຕຕ຺ຖ ຈຕູຫິ ຍຖາວຸຕ຺ເຕຫິ ອິນ຺ທ຺ຣິເຍຫິ ຈຕ຺ຕາໂຣ ປຸຄ຺ຄລາ ນິທ຺ທິສິຕພ຺ພາ. ກຖໍ ທຸວິໂຘ ຫິ ຕຓ຺ຫາຈຣິໂຕ ມຸທິນ຺ທ຺ຣິໂຍ ຕິກ຺ຂິນ຺ທ຺ຣິໂຍຕິ, ຕຖາ ທິຏ຺ຐິຈຣິໂຕປິ. ເຕສຸ ປຐໂມ ອສຸເຠ ‘‘ສຸຠ’’ນ຺ຕິ ວິປລ຺ລຕ຺ຖທິຏ຺ຐິໂກ ສຕິພເລນ ຍຖາຠູຕໍ ກາຍສຠາວໍ ສລ຺ລກ຺ເຂຕ຺ວາ ສມ຺ມຕ຺ຕນິຍາມໍ ໂອກ຺ກມຕິ. ທຸຕິໂຍ ອສຸເຂ ‘‘ສຸຂ’’ນ຺ຕິ ວິປລ຺ລຕ຺ຖທິຏ຺ຐິໂກ ‘‘ອຸປ຺ປນ຺ນໍ ກາມວິຕກ຺ກໍ ນາຘິວາເສຕີ’’ຕິອາທິນາ (ມ. ນິ. ໑.໒໖; ອ. ນິ. ໔.໑໔; ໖.໕໘) ວຸຕ຺ເຕນ ວີຣິຍສໍວຣສງ຺ຂາເຕນ ວີຣິຍພເລນ ຕໍ ວິປລ຺ລາສໍ ວິຘມຕິ. ຕຕິໂຍ ອນິຈ຺ເຈ ‘‘ນິຈ຺ຈ’’ນ຺ຕິ ວິປລ຺ລຕ຺ຖທິຏ຺ຐິໂກ ສມາຘິພເລນ ສມາຫິຕຠາວໂຕ ສງ຺ຂາຣານໍ ຂຓິກຠາວໍ ຍຖາຠູຕໍ ປຏິວິຊ຺ຌຕິ. ຈຕຸຕ຺ໂຖ ສນ຺ຕຕິສມູຫກິຈ຺ຈາຣມ຺ມຓຆນວິຈິຕ຺ຕຕ຺ຕາ ຜສ຺ສາທິຘມ຺ມປຸຎ຺ຊມຕ຺ເຕ ອນຕ຺ຕນິ ‘‘ອຕ຺ຕາ’’ຕິ ວິປລ຺ລຕ຺ຖທິຏ຺ຐິໂກ ຈຕຸໂກຏິກສຸຎ຺ຎຕາມນສິກາເຣນ ຕໍ ມິຈ຺ຉາຠິນິເວສໍ ວິທ຺ຘໍເສຕິ. ຈຕູຫິ ເຈຕ຺ຖ ວິປລ຺ລາເສຫິ ຈຕຸຣາສໂວຆໂຍຄຄນ຺ຖອຄຕິຕຓ຺ຫຸປ຺ປາທຸປາທານສຕ຺ຕວິຎ຺ຎາຓຏ຺ຐິຕິອປຣິຎ຺ຎາທິວເສນ ສພ຺ໂພປິ ອກຸສລປກ຺ໂຂ ເນຕພ຺ໂພ. ຕຖາ ຈຕູຫິ ສຕິປຏ຺ຐາເນຫິ ຈຕຸພ຺ພິຘຌານວິຫາຣາຘິຏ຺ຐານສຸຂຠາຄິຍຘມ຺ມອປ຺ປມຎ຺ຎາສມ຺ມປ຺ປຘານອິທ຺ຘິປາທາທິວເສນ ສພ຺ໂພປິ ໂວທານປກ຺ໂຂ ເນຕພ຺ໂພ.

ເອຕ຺ຖ ຈາຍໍ ສຈ຺ຈໂຍຊນາ – ສຸຠສຎ຺ຎາສຸຂສຎ຺ຎາຫິ, ຈຕູຫິປິ ວາ ວິປລ຺ລາເສຫິ ສມຸທຍສຈ຺ຈໍ, ເຕສມຘິຏ຺ຐານາຣມ຺ມຓຠູຕາ ປຎ຺ຈຸປາທານກ຺ຂນ຺ຘາ ທຸກ຺ຂສຈ຺ຈໍ, ເຕສມປ຺ປວຕ຺ຕິ ນິໂຣຘສຈ຺ຈໍ, ນິໂຣຘປຊານນາ ສຕິປຏ຺ຐານາທິກາ ມຄ຺ຄສຈ຺ຈນ຺ຕິ. ອຍໍ ວິປລ຺ລາເສຫິ ສໍກິເລສປກ຺ຂໍ, ສທ຺ຘິນ຺ທ຺ຣິຍາທີຫິ ໂວທານປກ຺ຂໍ ຈຕຸສຈ຺ຈໂຍຊນມຸເຂນ ນຍນລກ຺ຂຓສ຺ສ ສີຫວິກ຺ກີຬິຕນຍສ຺ສ ຠູມິ, ຍຖາຫ ‘‘ໂຍ ເນຕິ ວິປລ຺ລາເສຫິ, ກິເລເສ ອິນ຺ທ຺ຣິເຍຫິ ສທ຺ຘມ຺ເມ’’ຕິອາທິ (ເນຕ຺ຕິ. ໔.໑໙).