ນນ຺ທິຍາວຏ຺ຏນຍວຓ຺ຓນາ

ອາຆາຕາທີນມກຣຓວຈເນນ ຕຓ຺ຫາວິຊ຺ຊາສງ຺ໂກໂຈ ທສ຺ສິໂຕ. ສຕິ ຫິ ອຕ຺ຕຕ຺ຕນິຍວຕ຺ຖູສຸ ສິເນເຫ, ສມ຺ໂມເຫ ຈ ‘‘ອນຕ຺ຖໍ ເມ ອຈຣີ’’ຕິອາທິນາ ອາຆາໂຕ ຊາຍຕິ, ນາສຕິ. ຕຖາ ‘‘ປາຓາຕິປາຕາ ປຏິວິຣໂຕ’’ຕິອາທິວຈເນຫິ ‘‘ປຈ຺ຈຕ຺ຕຎ຺ເຎວ ນິພ຺ພຸຕິ ວິທິຕາ, ອນຸປາທາວິມຸຕ຺ໂຕ, ຉນ຺ນໍ ຜສ຺ສາຍຕນານໍ…ເປ… ຍຖາຠູຕໍ ປຊານາຕີ’’ຕິອາທິວຈເນຫິ ຈ ຕຓ຺ຫາວິຊ຺ຊານໍ ອຈ຺ຈນ຺ຕປ຺ປຫານໍ ທສ຺ສິຕໍ ໂຫຕິ. ຕາສໍ ປນ ປຸພ຺ພນ຺ຕກປ຺ປິກາທິປເທຫິ, ‘‘ອຊານຕໍ ອປສ຺ສຕ’’ນ຺ຕິອາທິປເທຫິ ຈ ສຣູປໂຕປິ ທສ຺ສິຕານໍ ຕຓ຺ຫາວິຊ຺ຊານໍ ຣູປຘມ຺ມາ, ອຣູປຘມ຺ມາ ຈ ອຘິຏ຺ຐານໍ. ຍຖາກ຺ກມໍ ສມໂຖ ຈ ວິປສ຺ສນາ ຈ ປຏິປກ຺ໂຂ, ເຕສໍ ປນ ເຈໂຕວິມຸຕ຺ຕິ, ປຎ຺ຎາວິມຸຕ຺ຕິ ຈ ຜລໍ. ຕຕ຺ຖ ຕຓ຺ຫາ ສມຸທຍສຈ຺ຈໍ, ຕຓ຺ຫາວິຊ຺ຊາ ວາ, ຕທຘິຏ຺ຐານຠູຕາ ຣູປາຣູປຘມ຺ມາ ທຸກ຺ຂສຈ຺ຈໍ, ເຕສມປ຺ປວຕ຺ຕິ ນິໂຣຘສຈ຺ຈໍ, ນິໂຣຘປຊານນາ ສມຖວິປສ຺ສນາ ມຄ຺ຄສຈ຺ຈນ຺ຕິ ເອວໍ, ຈຕຸສຈ຺ຈໂຍຊນາ ເວທິຕພ຺ພາ.

ຕຓ຺ຫາຄ຺ຄຫເຓນ ເຈຕ຺ຖ ມາຍາສາເຐຍ຺ຍມານາຕິມານມທປມາທປາປິຈ຺ຉຕາປາປມິຕ຺ຕຕາອຫິຣິກາໂນຕ຺ຕປ຺ປາທິວເສນ ສພ຺ໂພປິ ອກຸສລປກ຺ໂຂ ເນຕພ຺ໂພ. ຕຖາ ອວິຊ຺ຊາຄ຺ຄຫເຓນປິ ວິປຣີຕມນສິກາຣໂກຘຸປນາຫມກ຺ຂປຬາສອິສ຺ສາມຈ຺ຉຣິຍສາຣມ຺ຠ ໂທວຈສ຺ສຕາ ຠວທິຏ຺ຐິວິຠວທິຏ຺ຐາທິວເສນ. ວຸຕ຺ຕວິປຣິຍາເຍນ ປນ ອມາຍາອສາເຐຍ຺ຍາທິວເສນ, ອວິປຣີຕມນສິກາຣາທິວເສນ ຈ ສພ຺ໂພປິ ກຸສລປກ຺ໂຂ ເນຕພ຺ໂພ. ຕຖາ ສມຖປກ຺ຂິຍານໍ ສທ຺ຘິນ຺ທ຺ຣິຍາທີນໍ, ວິປສ຺ສນາປກ຺ຂິຍານຎ຺ຈ ອນິຈ຺ຈສຎ຺ຎາທີນໍ ວເສນາຕິ ອຍໍ ຕຓ຺ຫາວິຊ຺ຊາຫິ ສໍກິເລສປກ຺ຂໍ ສຸຕ຺ຕຕ຺ຖໍ ສມຖວິປສ຺ສນາຫິ ຈ ໂວທານປກ຺ຂໍ ຈຕຸສຈ຺ຈໂຍຊນມຸເຂນ ນຍນລກ຺ຂຓສ຺ສ ນນ຺ທິຍາວຏ຺ຏນຍສ຺ສ ຠູມິ. ວຸຕ຺ຕຎ຺ຫິ ‘‘ຕຓ຺ຫຎ຺ຈ ອວິຊ຺ຊມ຺ປິ ຈ, ສມເຖນ ວິປສ຺ສນາຍ ໂຍ ເນຕີ’’ຕິອາທິ.