ຍຸຕ຺ຕິຫາຣສໍວຓ຺ຓນາ

ມມນ຺ຕິ ສາມິນິທ຺ເທໂສ ຍຸຊ຺ຊຕິ ສຠາວນິຣຸຕ຺ຕິຍາ ຕຖາປໂຍຄທິສ຺ສນໂຕ, ອວຓ຺ຓສ຺ສ ຈ ຕທເປກ຺ຂຕ຺ຕາ. ວາຕິ ວິກປ຺ປນຕ຺ຖນິທ຺ເທໂສ ຍຸຊ຺ຊຕິ ເນປາຕິການມເນກຕ຺ຖຕ຺ຕາ, ເອຕ຺ຖ ຈ ນິຍມາຠາວໂຕ. ຠິກ຺ຂເວຕິ ອາມນ຺ຕນນິທ຺ເທໂສ ຍຸຊ຺ຊຕິ ຕທຕ຺ເຖເຍວ ເອຕສ຺ສ ປໂຍຄສ຺ສ ທິສ຺ສນໂຕ, ເທສກສ຺ສ ຈ ປຏິຄ຺ຄາຫກາເປກ຺ຂໂຕຕິ ເອວມາທິນາ ພ຺ຍຎ຺ຊນໂຕ ຈ –

ສພ຺ເພນ ສພ຺ພໍ ອາຆາຕາທີນມກຣຓໍ ຕາທິຠາວາຍ ສໍວຕ຺ຕຕີຕິ ຍຸຊ຺ຊຕິ ອິຏ຺ຐານິຏ຺ເຐສຸ ສມປ຺ປວຕ຺ຕິສພ຺ຠາວໂຕ. ຍສ຺ມິໍ ສນ຺ຕາເນ ອາຆາຕາທໂຍ ອຸປ຺ປນ຺ນາ, ຕນ຺ນິມິຕ຺ຕກາ ອນ຺ຕຣາຍາ ຕສ຺ເສວ ສມ຺ປຕ຺ຕິວິພນ຺ຘາຍ ສໍວຕ຺ຕນ຺ຕີຕິ ຍຸຊ຺ຊຕິ ກມ຺ມານໍ ສນ຺ຕານນ຺ຕເຣສຸ ອສງ຺ກມນໂຕ. ຈິຕ຺ຕມຠິຠວິຕ຺ວາ ອຸປ຺ປນ຺ນາ ອາຆາຕາທໂຍ ສຸຠາສິຕທຸພ຺ຠາສິຕສລ຺ລກ຺ຂເຓປິ ອສມຕ຺ຖຕາຍ ສໍວຕ຺ຕນ຺ຕີຕິ ຍຸຊ຺ຊຕິ ໂກຘໂລຠານໍ ອນ຺ຘຕມສຠາວໂຕ. ປາຓາຕິປາຕາທິທຸສ຺ສີລ຺ຍໂຕ ເວຣມຓີ ສພ຺ພສຕ຺ຕານໍ ປາໂມຊ຺ຊປາສໍສາຍ ສໍວຕ຺ຕຕີຕິ ຍຸຊ຺ຊຕິ ສີລສມ຺ປຕ຺ຕິຍາ ມຫໂຕ ກິຕ຺ຕິສທ຺ທສ຺ສ ອພ຺ຠຸຄ຺ຄຕຕ຺ຕາ. ຄມ຺ຠີຣຕາທິວິເສສຍຸຕ຺ເຕນ ຄຸເຓນ ຕຖາຄຕສ຺ສ ວຓ຺ຓນາ ເອກເທສຠູຕາປິ ສກລສພ຺ພຎ຺ຎຸຄຸຓຄ຺ຄຫຓາຍ ສໍວຕ຺ຕຕີຕິ ຍຸຊ຺ຊຕິ ອນຎ຺ຎສາຘາຣຓຕ຺ຕາ. ຕຊ຺ຊາອໂຍນິໂສມນສິກາຣປຣິກ຺ຂຕານິ ອຘິຄມຕກ຺ກນານິ ສສ຺ສຕວາທາທິອຠິນິເວສາຍ ສໍວຕ຺ຕນ຺ຕີຕິ ຍຸຊ຺ຊຕິ ກປ຺ປນຊາລສ຺ສ ອສມຸຄ຺ຆາຏິຕຕ຺ຕາ. ເວທນາທີນໍ ອນວໂພເຘນ ເວທນາປຈ຺ຈຍາ ຕຓ຺ຫາ ວຑ຺ຒຕີຕິ ຍຸຊ຺ຊຕິ ອສ຺ສາທານຸປສ຺ສນາສພ຺ຠາວໂຕ, ສຕິ ຈ ເວທຍິຕຠາເວ (ເວທຍິຕຣາເຄ (ທີ. ນິ. ຏີ. ໑.໑໔໙) ຕຕ຺ຖ ອຕ຺ຕຕ຺ຕນິຍຄາໂຫ, ສສ຺ສຕາທິຄາໂຫ ຈ ວິປຣິປ຺ຜນ຺ທຕີຕິ ຍຸຊ຺ຊຕິ ກາຣຓສ຺ສ ສນ຺ນິຫິຕຕ຺ຕາ. ຕຓ຺ຫາປຈ຺ຈຍາ ຫິ ອຸປາທານໍ ສມ຺ຠວຕິ. ສສ຺ສຕາທິວາເທ ປຎ຺ຎເປນ຺ຕານໍ, ຕທນຸຈ຺ຉວິກຎ຺ຈ ເວທນໍ ເວທຍນ຺ຕານໍ ຜສ຺ໂສ ເຫຕູຕິ ຍຸຊ຺ຊຕິ ວິສຍິນ຺ທ຺ຣິຍວິຎ຺ຎາຓສງ຺ຄຕິຍາ ວິນາ ຕທຠາວໂຕ. ຉຜສ຺ສາຍຕນນິມິຕ຺ຕໍ ວຏ຺ຏສ຺ສ ອນຸປຈ຺ເຉໂທຕິ ຍຸຊ຺ຊຕິ ຕຕ຺ຖ ອວິຊ຺ຊາຕຓ຺ຫານໍ ອປ຺ປຫີນຕ຺ຕາ. ຉນ຺ນໍ ຜສ຺ສາຍຕນານໍ ສມຸທຍຕ຺ຖງ຺ຄມາທິປຊານນາ ສພ຺ພທິຏ຺ຐິຄຕິກສຎ຺ຎໍ ອຕິຈ຺ຈ ຕິຏ຺ຐຕີຕິ ຍຸຊ຺ຊຕິ ຈຕຸສຈ຺ຈປຏິເວຘຠາວໂຕ. ອິມາຫິເຍວ ທ຺ວາສຏ຺ຐິຍາ ສພ຺ພທິຏ຺ຐິຄຕານໍ ອນ຺ໂຕຊາລີກຕຠາໂວຕິ ຍຸຊ຺ຊຕິ ອກິຣິຍວາທາທີນໍ, ອິສ຺ສຣວາທາທີນຎ຺ຈ ຕທນ຺ໂຕຄຘຕ຺ຕາ, ຕຖາ ເຈວ ເຫຏ຺ຐາ ສໍວຓ຺ຓິຕໍ. ອຸຈ຺ຉິນ຺ນຠວເນຕ຺ຕິໂກ ຕຖາຄຕສ຺ສ ກາໂຍຕິ ຍຸຊ຺ຊຕິ ຠຄວໂຕ ອຠິນີຫາຣສມ຺ປຕ຺ຕິຍາ ຈຕູສຸ ສຕິປຏ຺ຐາເນສຸ ຐຕ຺ວາ ສຕ຺ຕນ຺ນໍ ໂພຊ຺ຌງ຺ຄານໍ ຍຖາຠູຕໍ ຠາວິຕຕ຺ຕາ. ກາຍສ຺ສ ເຠທາ ປຣິນິພ຺ພຸຕໍ ນ ທກ຺ຂນ຺ຕີຕິ ຍຸຊ຺ຊຕິ ອນຸປາທິເສສນິພ຺ພານປ຺ປຕ຺ຕິຍໍ ຣູປາທີສຸ ກສ຺ສຈິປິ ອນວເສສໂຕຕິ ອິມິນາ ນເຍນ ອຕ຺ຖໂຕ ຈ ສຸຕ຺ເຕ ພ຺ຍຎ຺ຊນຕ຺ຖານໍ ຍຸຕ຺ຕິຕາວິຠາວນລກ຺ຂໂຓ ຍຸຕ຺ຕິຫາໂຣ ນາມ ຍຖາຫ ‘‘ສພ຺ເພສໍ ຫາຣານໍ, ຍາ ຠູມີ’’ຕິອາທິ (ເນຕ຺ຕິ. ໔.໓).