ປທຏ຺ຐານຫາຣວຓ຺ຓນາ

ວຓ຺ຓາຣຫາວຓ຺ຓທຸພ຺ພຓ຺ຓຕານາເທຍ຺ຍວຈນຕາທິ ວິປຕ຺ຕີນໍ ປທຏ຺ຐານໍ. ວຓ຺ຓາຣຫວຓ຺ຓສຸພ຺ພຓ຺ຓຕາສທ຺ເຘຍ຺ຍວຈນຕາທິ ສມ຺ປຕ຺ຕີນໍ ປທຏ຺ຐານໍ. ຕຖາ ອາຆາຕາທໂຍ ນິຣຍາທິທຸກ຺ຂສ຺ສ ປທຏ຺ຐານໍ. ອາຆາຕາທີນມກຣຓໍ ສຄ຺ຄສມ຺ປຕ຺ຕິຍາທິສພ຺ພສມ຺ປຕ຺ຕີນໍ ປທຏ຺ຐານໍ. ປາຓາຕິປາຕາທິປຏິວິຣຕິ ອຣິຍສ຺ສ ສີລກ຺ຂນ຺ຘສ຺ສ ປທຏ຺ຐານໍ, ອຣິໂຍ ສີລກ຺ຂນ຺ໂຘ ອຣິຍສ຺ສ ສມາຘິກ຺ຂນ຺ຘສ຺ສ ປທຏ຺ຐານໍ. ອຣິໂຍ ສມາຘິກ຺ຂນ຺ໂຘ ອຣິຍສ຺ສ ປຎ຺ຎາກ຺ຂນ຺ຘສ຺ສ ປທຏ຺ຐານໍ. ຄມ຺ຠີຣຕາທິວິເສສຍຸຕ຺ຕໍ ຠຄວໂຕ ປຏິເວຘປ຺ປກາຣຎາຓໍ ເທສນາຎາຓສ຺ສ ປທຏ຺ຐານໍ. ເທສນາຎາຓໍ ເວເນຍ຺ຍານໍ ສກລວຏ຺ຏທຸກ຺ຂນິສ຺ສຣຓສ຺ສ ປທຏ຺ຐານໍ. ສພ຺ພາຍປິ ທິຏ຺ຐິຍາ ທິຏ຺ຐຸປາທານຠາວໂຕ ສາ ຍຖາຣຫໍ ນວວິຘສ຺ສປິ ຠວສ຺ສ ປທຏ຺ຐານໍ. ຠໂວ ຊາຕິຍາ. ຊາຕິ ຊຣາມຣຓສ຺ສ, ໂສກາທີນຎ຺ຈ ປທຏ຺ຐານໍ. ເວທນານໍ ຍຖາຠູຕໍ ສມຸທຍຕ຺ຖງ຺ຄມາທິປຏິເວຘນາ ຈຕຸນ຺ນໍ ອຣິຍສຈ຺ຈານໍ ອນຸໂພຘປຏິເວໂຘ ໂຫຕິ. ຕຕ຺ຖ ອນຸໂພໂຘ ປຏິເວຘສ຺ສ ປທຏ຺ຐານໍ. ປຏິເວໂຘ ຈຕຸພ຺ພິຘສ຺ສ ສາມຎ຺ຎຜລສ຺ສ ປທຏ຺ຐານໍ. ‘‘ອຊານຕໍ ອປສ຺ສຕ’’ນ຺ຕິ ອວິຊ຺ຊາຄຫຓໍ. ຕຕ຺ຖ ອວິຊ຺ຊາ ສງ຺ຂາຣານໍ ປທຏ຺ຐານໍ, ສງ຺ຂາຣາ ວິຎ຺ຎາຓສ຺ສ. ຍາວ ເວທນາ ຕຓ຺ຫາຍ ປທຏ຺ຐານນ຺ຕິ ເນຕ຺ວາ ເຕສໍ ‘‘ເວທນາປຈ຺ຈຍາ ຕຓ຺ຫາ’’ຕິອາທິນາ ປາຬິຍມາຄຕນເຍນ ສມ຺ພຊ຺ຌິຕພ຺ພໍ. ‘‘ຕຓ຺ຫາຄຕານໍ ປຣິຕສ຺ສິຕວິປ຺ຜນ຺ທິຕ’’ນ຺ຕິ ເອຕ຺ຖ ຕຓ຺ຫາ ອຸປາທານສ຺ສ ປທຏ຺ຐານໍ. ‘‘ຕທປິ ຜສ຺ສປຈ຺ຈຍາ’’ຕິ ເອຕ຺ຖ ສສ຺ສຕາທິປຎ຺ຎາປນໍ ປເຣສໍ ມິຈ຺ຉາຠິນິເວສສ຺ສ ປທຏ຺ຐານໍ. ມິຈ຺ຉາຠິນິເວໂສ ສທ຺ຘມ຺ມສ຺ສວນສປ຺ປຸຣິສູປນິສ຺ສຍໂຍນິໂສມນສິກາຣຘມ຺ມານຸຘມ຺ມປຏິປຕ຺ຕີຫິ ວິມຸຂຕາຍ ອສທ຺ຘມ຺ມສ຺ສວນາທີນຎ຺ຈ ປທຏ຺ຐານໍ. ‘‘ອຎ຺ຎຕ຺ຣ ຜສ຺ສາ’’ຕິອາທີສຸ ຜສ຺ໂສ ເວທນາຍ ປທຏ຺ຐານໍ. ຉ ຜສ຺ສາຍຕນານິ ຜສ຺ສສ຺ສ, ສກລສ຺ສ ຈ ວຏ຺ຏທຸກ຺ຂສ຺ສ ປທຏ຺ຐານໍ. ຉນ຺ນໍ ຜສ຺ສາຍຕນານໍ ຍຖາຠູຕໍ ສມຸທຍາທິປຊານນໍ ນິພ຺ພິທາຍ ປທຏ຺ຐານໍ, ນິພ຺ພິທາ ວິຣາຄສ຺ສາຕິອາທິນາ ຍາວ ອນຸປາທາປຣິນິພ຺ພານໍ ເນຕພ຺ພໍ. ຠຄວໂຕ ຠວເນຕ຺ຕິສມຸຈ຺ເຉໂທ ສພ຺ພຎ຺ຎຸຕາຍ ປທຏ຺ຐານໍ, ຕຖາ ອນຸປາທາປຣິນິພ຺ພານສ຺ສ ຈາຕິ. ອຍໍ ສຸຕ຺ເຕ ອາຄຕຘມ຺ມານໍ ປທຏ຺ຐານຘມ຺ມາ, ເຕສຎ຺ຈ ປທຏ຺ຐານຘມ຺ມາຕິ ຍຖາສມ຺ຠວໍ ປທຏ຺ຐານຘມ຺ມນິທ຺ຘາຣຓລກ຺ຂໂຓ ປທຏ຺ຐານຫາໂຣ ນາມ. ວຸຕ຺ຕຎ຺ຫິ ‘‘ຘມ຺ມໍ ເທເສຕິ ຊິໂນ, ຕສ຺ສ ຈ ຘມ຺ມສ຺ສ ຍໍ ປທຏ຺ຐານ’’ນ຺ຕິອາທິ (ເນຕ຺ຕິ. ໔.໔).